By - Tungnung, Zamlunmang Zou
Mi dangte bangin private company a nnasepna sawt lawmlawm sih nanleh zilkhiet tamlou ka nei a, ahing semtou zeel di leh sepna hing sui zeel dite theidi’a poimaw kasha tamlou kalung a umte hing kuom nuom ing.
Apatna di’n private company ahilouleh adieh in call center a abul leh apoimaw mamakhat ‘Interview’ na toh kisai gen vai. Dohna masa pen pen ahileh –
01. Tell me something about yourself (Nangma hina tamlou hing gen in)
Tam dohna ahileh interview bawl tengin adoh masah pen leh interview atelte’n a lam et pen khat ahi. Bailam tah bang, hinanleh bailam lou pikhat ahi. Tam dohna dawnna ahileh lawchinna di’a apoimaw bulpi khat ahi. Tamna apoimaw khat a ka thei ahileh – I thanuomna, sil dangdang lam saangin i interviewna companyte nasep lam toh kisai a I bawl thei umte genlat leh I nasepna lui a I phattuom dan, pan I laahzieha I company in phattuomna leh lawchinna angadante gen hoizaw in ka thei hi.
A dohna siltup ahileh – Ki taidemna pan mi tampite lah a ahoipen tendoh leh atam thei tawp paidoh ahi. Ham-le-pau zahdan leh naaldan (fluency in English), na lungsim a kina zahdan (way of presentation) etna, na mihing hina (personality), na sitna-le-siemna (skill) leh na nasepna zildohte (experience)te theinuomna ahi pen hi.
Bang tawbang dawnna lamet ahia
Chiindi’a hoilou leh zah lou di pawl khat ahileh - kei kahi leh nasep pawntha (hard-worker), nambat lam toh kisai in ka gang (good with numbers), tam kazaw in tam lampi dang ah ka zil chileh adang dang a ki zawitawn loute genkhalou ahoi hi. Adang khat ah I innsung thu leh I sanggam neiza, I nu-le-ipa shita, sum poimaw oahilou leh ka naute ka etkol chite interview hing bawlte’n ngaipeilou uhi.
Chiindi’a kilawm pawl khat – Tam line a kum tuoza kanasepna ah tam bang theina leh chitna kana zil doh a, tuote tungtawn in ka kisaipite’n hamphat leh lawchinna tam bangin a nga uhi. Tam bang na hoi kasepna ziehin ka sepna lui ah tuobang pahtawina leh tawi saangna chi tuomtuom ka ngah hi. Ka nasepna a ka panlahna ziehin ka company uah tuobang in khanletna leh mite ngai thupina ka ngah uhi chite a lam-et uh ana hi dan ahi.
A taangpi a gen di’a kilawmte – Eima ki pulahna tomkim tuo zong I nnasep suina toh ki zawitawn deute. I nasepna leh laizilna toh kisai, tuo zong nasep isuina toh ki zawitawn sah teitei ngai nalai, kum 10 masang laiate gen khalou hoi in ka thei hi. I dawnna in I nasep suina a sep-le-bawl diing umte a ngiim gige diing, Na nasepna lui a toh tuo nasuitha nasepna ki bang sih nanleh azah theina um didan lampi na heituoh sawm tentun di, dohnuom na nei ei chie hun pia a na um leh – amin maimai a doh lou diing, I dohta lezong, I houlimna aban sontheina khop di khat doh ahoi hi.
Tam dohan/kipulahna ahileh interviewna amasa pen ahiban ah maban son theina leh tuona kiet theina ahiman in pil vang tah a bawl chiitchiet ahoi hi.
02. Tell me about your previous working experience/s (Na nnasepna tungtawn a na zildoh te hing gen in)
Tam dohna zong apeellou kidongte khat ahi. Tuo ahiman in interview I peima hoitah a I sepna lui a I bawl leh tuo interview ipeina diing toh ki zawitawn thei teitei di’a gen didan ki sahkhol masah teitei apoimaw hi. Call centre ahilou leh company dang dang in I chitna-le-siemna ban ah, team leader in I pang thei diei chitan pha a a’ng na et uh ahita hi. I sepna lui tungtawn in lamkai leh amaziehin lawchinna a um thei diei chi I sepna lui apat in a thei nuom dieh uhi. Ka sepna a ka boss pa nikhat kakihoupi na ah, bang di’a working experience interview chie doh a um kha teitei ahiei chia ka houlimpina ah, am’n tambang in hing dawng hi, ‘your previous experience may not be related with what you are going for today, but what is being looked into is wether you would be handle your going to be job or be able to work with your collegues” chi’n hing dawn hi.
03. Why do you want to join this company/Call Centre (Bang di’a tam company/call center zopnuom na hia)?
Tam dohna zong apoimaw vawt khat ahikia hi. Interview pang di ihileh I peina diing company sep-le-bawl, maban hun a kinepna aneidan uleh, hun peisa a alawchinate uh thei masah ahoi hi. Tuo kasepna a interview a’ng bawllai un zong a’ng dongkha uhi. Kadawnna ah, “tam company ahileh khovel umlaisia a bei ngeilou di, kiemngeilou a khang semsem di ahiban ah ka computer knowledge toh kituoh ahizieh in future a kingah theina di’a kamu man in” kava chi pou pou hi. Ka boss pa tuobang pataatna azah leh nui dap sim sehsuh kamu hi.
04. What do you expect your starting salary to be (na kipatna law di’n bangza naki nem ei)?
A taangpi’n law ahileh genmasah lou a offering letter mukuon chie gen ahoi hi. Hinanleh doh a I umta leh I sepna luia I law toh tuo I sepna diinga bangbang na sem thei a bangtan a panla thei di I hiei chi tuot ditdet a akilawm huntawh khat gen ahoi hi. Hinanleh I chitna-le-siemna toh ki tuohlou va mawh genlou ahoi hi. Ka interview lai in doh in ka um ngei a, ‘bangma experience neilou kahi ziehin tuoza chet ka lamen kachi thei sih, company in salary & compensation rules & regulation nei di ahiman in tuo toh pei hoi kasa hi, hinanleh ka lam-etza gendi’a pahlna leh dohna nang bawl man in tuoza kikaal vel hileh ka lam en hi’ kachi zel hi. Tuo dungzui in ka chiza piehin ka um hi.
05. Where do you find yourself after 5 years, if we hire you (Tam nah sem talehchin kum 5 zaw chieh heimun a um in nakimu ei)?
Tam dohna ahileh akidong mun pawl khat mama ahi. Atup pipen a kathei ahileh, bang tupna leh panlaahsawm dan I nei ei chi thei nuomna hi in ka thei hi. Tam zong dohkha a um kahi man in kahing gen kia diing hi. Ka dawnna ah, “Kum 5 zaw chieh hei mun a ka um vang thei chieh sing, hinanleh ka deithusam in nangma touna mun a tou ka lam en hi, tuo ahilou leh tam company a keima ka um lou leh company chimaw phiel leh nikhat kakai lou leh zong ka poimaw dan ki thei phiel di’n ka ki mu hi” kava chisuh muolmuol hi. Boss pa lung asuh leh suh lou vang thei sing, hinanleh sepsah in ki um ta hi.
Dohna poimaw tampi theituoh umnalai hi. Hinanleh tuote gen kim di chilei sauseng di ahiman in, simtute’n eima kisui doh di’n nuosie kon tavai. Tu’n nasemta, company sunga anopna zong um, ahahsaatna zong um, ani mama a I tawpsan nuomni zong um, kum tawn a sep den nuomna lungsim zong um. Nop isah laisie I tha zong tawldam in I nasepna bang nuom kisa vanguut hi. HInanleh nasepna I tawpsan ni bang hing um thethu thei ahiman in, tuotoh kisai eima leh eima’n ki siemphat theina lampi umte tamlou gen kia vai.
01. Na buoina thupi pen bang ahiei, suidoh masa in?
Na nnasepna a na buoina leh a poikhoitu bang pentah ahiei? A hun sawt zieh maw? Boss giitlou/mi theisiem lou zieh? A halaw tawm zieh maw? Ahilou leh na nasep pen na thazawlou zieh maw? Na seppite toh naki tuoh lou zieh maw? A zieh tampi a um thei, khat mai zong ahi thei hi. Tuote abanban a gelkhiet thaw dit det a, bang pentah in na nnasepna thasietna hing guon ahiei chi suidoh ahoi hi. Etsahna di’n – kei zong kanasepna ah sawt nailou in ka office uh aning in ka mawh ning thaw hi. Bang zieh ade aw chie ka ngaisut sut leh – ni khat ka lung a hing kilang ahileh, ka seppite hamtam/houlim haat thei uh, chalak uh, tuoleh kol ham ngen a ham uh; tuote zieh hi in ka thei hi. Kei zong kipan in alah ua hamtam leh amau chalak bang a chalak kang pat leh tuni chiengin nop kasa ta hi. Chalak chipen I sepdi huntawh khat um in tuopen zaw teitei di. Keipen in zaw sieng vat a nita lang chie tawldam zaw di ichileh, adangte a zoula kipang un bawlpi ngai.. tuochu kei a mai bawl gige, kimawl kawm a bawl, lah zawthaw tah a zou veve. Nop lel.
02. Talk to the boss (Na boss pa houlimpi in)
Hehthaw (Complain) hilou in na boss pa kuungah na buoina leh na lungkimlouna geen in. Lamkai pichingte’n a nei ua nasemte lungsim thei nuom ua, lungdam tah a ana sep uh asep thei chiet uh dei gige ahiman un, anei ua nasemte apat feedback zong dei gige uhi. Na houlimpi chieng in tuochi, khachi atuo chilou leh hi theisihva chi thaw lou in, tuochi’n kibawl leh I company in phattuompi leh khantouna hi zawva chi sepsop lechin a lu uh su ngaungau ta ve un. Tuo bang a na bawl leh na boss in alungkimlouna um ahi chi thei tham diing ua, na sem hoi nahileh na tawpsan kha di bang zau diing uhi. Bang zieha zau di ula? Nang nahileh a company toh kisai bang kim theisa nahi man in, atha a mi dang vala a hing hiltha kia sangin nang lungkimlouna pen suh veng utzaw tham diing uhi.
03. Invest Your Time (Na hun petam in)
Private company I chi private (mimal) thuneina ahiman in chitahna leh guntuna tahtah toh khapet zeen a sep angai hi. Solkal a te apoimaw sih I china hituon lou in, koipou in I sep I bawlna chiet ah chitahna, guntuna leh dihtatna toh na sempou leh pataatna leh deisahna ki nga chiet hi. Adiehin private a semte adiing in apoimaw dieh in ka thei hi. Private a sem I hi leh hun pieh tam angai, company a diing in banb phatuom ka bawl thei ei, kei ziehin bang phattuomna leh ki khelna a um thei ei chite apoimaw mama hi.
Kiphatna hilou adang ten zong I bawl dia hoi kasah, ka nasepna ka silbawl ka boss pan a’ng pataat mama na khenkhat hing gen kia vang. Ka sepna ahileh tukum in kum 10 chinna ka lawm uhi. Tuo kum 10 peisa sunga ana bawl doh lou uh ka sep a pat in tampi ka bawl doh uh a um hi.
a). Product category kichi ka sepna ah 2000 val ka nei ua, hinanleh customerte sil dei teng kim lou pipi in misc chidan in kum 10 sung ana koi ngen ngong uhi. Ka sep apat in tuote chinglou ahi chi ka thei man in aguuh in a um lou a ka thei teng kana teidoh gige a, tukum bullam in ka boss pa kungah tam teng I bawllou leh customer tampilung kimlou a, portal dang a ki register di uh ahi chia kava gen kawi leh, hing ngaituo dedu in ‘Zou, you are absolutely right’ a’ng chidoh phut hi. Tuni chieng in category 3000 ching dehtah phiel kaneita ua, world a portal category nei tampen kahi ban uah, customer ten keyword asui teng uh akim phielta hi. Tam zieh in pataatna thupitah piehin ka um hi.
b). Ka sepna uah, na chi tuomtuom um a, hinanleh kei masang a sem te’n a thei khat uh thei tentun in na dang a thei sawm sih uhi. Hinanleh kasep apat in ka boss pa kungah I want to know all the jobs that we are doing in our company kachi dung jui in tuni chieng in ka nasep uh chi 20 vel um lah a chi 7 bang ka theita a, ka boss pa un a’ng pataat ban ah ka lawmte kuungah you guys have to learn a lesson from Zou achi hiel hi. Tam zieh ma in pataatna sangpen khuhsah kahi ban ah highest increment in salary piehin ka um kia hi. Tamte ziehin Pasian min kaphat ahi. Tu’n ahileh ka seppi te’n zong extra task chidan in azil sausau ta uhi.
c). Ka seppi te’n ana bawl ngamlou uleh bawl di ana zumpi uh, boss pa feedback nget ahi. Hinanleh ama un ana bawl uleh bawllou uh thei sese lou in nikhat ka boss pa uh kuungah Sir I need your feedback on my performance chia chiemnui sim a kava chi leh, akipa dan mawng mawng, ka gintaat khellam ahi lai zang hi. You are the first to sought my feed back ang chi ban ah feedback khop khop lou, company future plan chi in bang bang teng pi a’ng houlimpi hi. Boss te feedback nget zelzel did an ahi.
Ama leh ama kip hat hing kichi khava, tam tan ah ngah ta vai. Private nasepna semte’n thei tuoh tampi um a, na hing semtou zeel di ihiman in ki theisah diing leh I sepna apat zil di’a kilawm umte ki theisah tuo zeel lei chi deina toh tam article hig giel kahi bou hi. Ke’n ka theikimta, ka tuoh kimta, asiempen kahi, a chinpen kahi china hilou in, ka sil zilkhiette apat khat-le-ni in phattuomna ana ngah thei kha uleh chi kinepna toh tam ten gpi hing ki saat doh ahi. Mi dangte’n zong ka genkhalou, na bawl kha uh a um leh hing giel zeel leh uchin, ki thuhilna di’a poimaw mama in ka thei hi. Lungdam.
