MAUTAAM KIALPI–Suahtaakna Lampi

Vangsel Zogam itluatna jiak in…

Khatchin Langel, New Delhi

Kum 24 val Ministry of Defence a kasep nung in, August 1, 2007 apan in Ministry of Agriculture & Cooperation, Krishi Bhavan ah kana kisuan khia a, huai building mah a om Ministry of Consumer Affairs, Food & Civil Supplies te office apan in, Govt. of India in Village Grain Bank (VGB=Antang Kholkhawmna Inn) policy pai lel-lel dungjui a VGB 93 bawlkhiakna dinga Commissioner(FCS), Manipur Government Notification No.6/10/2002-FCS(II) dated 7.9.2007 leh Manipur Sectt. Order No.6/10/2002-FCS(II) dated 15.9.2007 kava mukhe zenzen hi.

Hiai order ah Manipur Hill District 5 te aom vek ua, Churachandpur Sub-Division tel khakei mah leh, Singngat, Thanlon, Tipaimukh leh Henglep Sub-Division te ah hiai anuaia bang in VGB 93 bawlkhiakna thupiak ana omta hi:-

CHURACHANDPUR DISTRICT

(1) Tipaimukh Sub-Division
Village Population
1 Parvachom 1378
2 Rovakot 984
3 Leisen 1423
4 Tinsuong 1873
5 H. Moulien 378
6 Tuolbung 1220
7 Patpuimun 772

TOTAL 8028

(2) Thanlon Sub-Division
8 Gamhui 675
9 Bungpilon 455
10 Songtal 1090
11 Singjawl 1285
12 Bukpi 1624
13 Leizangphai 1396
TOTAL 6525

(3) Singngat Sub-Division
14 Allusingtom 228
15 Hianglam(K) 408
16 Ngaljang 338
17 Tonglon 322
18 Tuikamualum 471
TOTAL 1764

(4) Henglep Sub-Division
19 Aina 328
20 Santing (l) 737
21 Teijang 404
22 Monghen 372
23 Phiran 252
24 Henglep 6421
25 Chingphei 207
TOTAL 8721
GRAND TOTAL 25,038

# Khomin leh population te sanction order a kigelhdan ahi.

$ Tipaimukh Sub-Division list ah Vangaitanga Zomite’ tenna khomin 1 leng atel kei a, unau Hmarte kia anduh hilou ahih man in, a khasiat huaisim mah mah hi.

* CCPur Sub-Division atel kha kei sese. Poimohlou ahi diam?

2. Hiai VBG 25 te’n atawmpen in Kha khat in antang qtl 5007.60 lak vel amu thei gige ding uhi (BPL Family 1 mi 5 jel hitaleh).

3. Village Grain Bank Policy thiltup tomkim, Ministry of Consumer Affairs, Food & Civil Supplies Order No.6-1/2005-BP-II dated 21.2.2006 dungjui in, hiai anuaia bang ahi:-

* BPL family 40 omna ah VGB khat omsak theih.
* BPL family khat mi 4/5 jela hisap ahi a, BPL family 1 in antang quintal 1 a muthei ding.
* Antang, neih hun-huna a ditkiik ding un, VBG saitu dia kisepte’n a leitawisak ding uh.
* Antang masapen (initial) Central Govt FCI tawn in athawn/grant in State Govt. a pe ding.
* State Govt. in ‘Certificate of actual off-take of food grain’ a piaklut bang in FCI a pezom jel ding.

4. Senna lamah mimal leh Vaipawte’ tunggikna ding bangmah aom kha kei. Central leh State Government in apiak ding hiai anuai bang in ahi ding hi:-

a) Cost of food grains @ 1 quintal per family for average 40 families 40 qtls.@ Rs.11,500 per MT (based on present cost) =Rs.46,000
b) Transportation cost @ Rs.90/- per qtl. Rs.90 x 40 =Rs.3,600 (to be equally shared by Central & State Govts.)
c) Training expenses Rs.1400/- per bank
d) Storage/weights/scales etc. Rs.6000/- per bank
e) Monitoring & administrative expenses Rs.3000/- per bank
TOTAL Rs.60,000/- per bank

5. Ana om gige khinsa PDS antang hawmkhiakna Fair Price Shop - BPL/AAY/ABPL card neite’n a rate diktak a amuh ding zah uh leitheihna mun ahi. DC CCPur gendan local newspaper a kasim khak dan in ‘Polling Station omna khua tenga FPS koih ding’ chih ahi. Hiai hial jaw leng ahithei khol kei dinga, himahleh, insak-inkhang, meithai, tagah leh gentheite ihehpiha, ipanpih theihna ding ua sepkhiak ding a poimoh kasakte hiaite ahi uh: -

(i) FPS mun bangzah ah aom a, antang, chini leh K-Oil atung ding zah, ahun bangjel in a tung hia?
(ii) BPL/AAY/ABPL family ten antang/chini bangzah, bangzah rate in amu ua? Adik hia?
(iii) Mun bangzahte ah FPS koihbeh a kiphamoh a?
(iv) Anei zou lou leh tagah-gentheite tunga lungkhamna leh haksatna omsakte’ tung a FIR/Police report bawla, High Court leh Supreme Court a PIL file ding.

Hiaite isepkhiak ngam mateng bangmah apai dik kei ding chih amuh theih hi. But who will bell the cat? Are we ready for this mission?

6. CCPur leh Delhi ZEPADA hon omkhesaka, nasep hon pankhete pahtakhuai kasa petmah hi. Amaute’ pan lakna jiak in PDS antang leh chinite bangzah hiamte’n ichiam khata ua, a kipahhuai mah mah. Hilehleng, Zodawn singtang khomite’n amu kha nai kei uh. Huan, Mautaam.org hon bawl khetute zahna sangpen ka pia hi. Kuapeuh - sia-leh-pha nei peuhmahte - khe khata dinga, pankhawm isiam leh iloh ching ngei ding uhi.

7. Houlimnate ah VGB leh FPS thute gentheih dan-dan in ana gen khasek mah leng hon lunglutpih tak tak om ngellou kasa sim hi. A khente’n lah thil omdan diktak suikhia a, puangkhia a, Police Report, PIL file chihtan pha pantouh lam igen kha khol kei ua, ‘Manipur Solkal thumlim lou law tel, Minister/MLA te lah hichi mai mah, bangmah hoih ngei tuan lou ding, phatuam lou ding ahi’ chihte houlimna tawpna ahi sek hi. Lauhsim gige khat neia, thudik gen ngamlou ihi uhia? ka chi dek dek hi.

8. Huchi hinapi’n, VGB leh FPS te hoih kasakna te leh Mautaam Kialpi douna dinga galvan hoihpen leh phatuampen hi dinga ka gintak tinten na a lian deuh deuh hi. Thil omdan diktak va suikhe pawl om in, thudik ahi bang banga genkhia in, ivek un, kithutuak in, nna semkhawm lehang lawhchinna hon dal zou ding bangmah a om kei hangsan takin ka chi ngam hi, “Eite lama Pathian pang ahih nung, kua’n hon dou zou peuhmah dia?” chih gingtate ihih jiak un.

9. Kum Thak 2008 tawh kiton in, Mautaam Kialpi jiaka gilkial-dangtakna leh natna tuam tuamte’n hon bunuai petmah ding ahita. I Gam leh Nam, tagah leh gentheite Kumthak 2008 in bang piak isawm ua? Zogam itna jiak in, a omsate puah thaka, aom nailoute semkhe ding in ikiman uhia? Ken jaw suahtakna ding lampi dang ka ngaihtuah khe zo kei hi.

I Gam leh Nam, mipite’ a dinga hiaite’ sanga thil poimoh jaw bang aom a? Sum-leh-pai, ineih dan-dan ua I pankhawmna tuh ihih ding mah ahi. Hiai bangtan ihih zou ding ua? Mautaam Kialpi in bangtan, kum bangzah adaih dia? Antang leitawina ding VGB leh FPS te tampi koihbeh sak theih lai ding eive, Gam leh Nam itna jiaka I pangkhawm diam diam peuh uleh, lawmte ….

I tu’n leh jua lungmawl in,
Pianna gam giabang juun din’
Seen vontawite hon ngak uh
Sin in, seem in, giabang juun.

Dial dial in, diam diam leng lawm (2)
Vualzawhna, I gamlei ding.

Tua bang dinga mimbang piang
Nam chih, mi zatam lai ah
Ki-itna leh kituahna
Khantawn in om gige hen.

“Ka ta deihtakte aw, a thu leltak, ahih kei leh, lei leltakin, ki-it kei ni. Nasep thilhih leh thutakin ki-it zaw ni.” Amen!


www.zogam.com

Ann Na Neta Hia Sanggam?

Ching Mangte

Nikhat ka lawmnu toh ka kimu ua, "Ann na neta hia?" chi’n ka dong hi. Aman leng kipaktak in, nekhinta ahih dan hon gen banah ka concern na thupitak ziaka kipak lua ahihdan nasatakin hongen mawk hi. Ka ngaihtuah na ah bang ziaka ka dotna “Ann na neta hia?” ka chih lel pen bang chidan a ngai a de aw? Diklou sim hiam a dongkha ka hi ding chihna nei in ka om a lem hetkei hi. Ka kihou zomzel ua, himahleh ka om a lem khin kei a aziak ka thei chian ut hi. Meh taangpi leh koimun a hong kipan ahia chihvel thu khotaang ka kihou ua, huchi kom in dena ka kihouna masa uh ahon dawn dan mak sasim ka hih dan ka gen khe khong hi.

A hon gen a, tuma kum 20 malam a amau gam leng ana haksa law mahmah uh ahihdan, nitenga ann nekding neizou gige te bang eng law mahmah sam a ana khosa ngei uh ahihdan hon gen hi. Huaiziaka ka kimuh phet ua ka dotna pen huai hunlai a amau a dia leng ana common mahmah ahihdan hon genin, akimuh phetphet chiang ua 'ann na neta hia?' chia kidong un, a nenailou te kia hilou, a nek ding neilou ana hih uleh anei zawdeuh ten ana hawm/kipia uh ana hisam uh ahihdan hon gen hi. Huaiziaka, hiaibang a kidong thei te bel hon ngaihsak lua leh nelou dawnlou a I om ding laua hon deihsak lawte ahi uh chia kipak lua uhi.

Tuhunin hausa lua in nekgaih zohlouh phialphial nei in khosa ta mahle uh, a hunpaisa ua a haksat lai nite uh a thei gige ua, anntang malkhat manphat dan thei biik uh abang ua, annek chiang bang in hawmthoh leh kipaktak in thelthang sak lou hial in nethei uhi.

Hiaibang tanchin ka zak chiang in thupi kasa a, i dinmun uh ka lungsim ah a hong lang hi. I gam khang khe zou nai hetlou in nektawm zong a kitou delh tam mahmah hilai mah lehang nasatak a kialpi’n hon phaman zel. Nidang a I ngaihtuah khak khollouh bang a, “Ann neta maw/Ann na neta uhia?” chih eilak mahmah ah leng nidang deuh khong a kidot masak a ineih sek uh ana hita mahleh, ngaihtuah luat a le neilou a kidong khawng ina hih ngei uh ka lamen a, himahleh tuhun in ngaihtuah thak leh dotna poimoh lua ahong hithak ding chih kagingta hi.

Huchi hitaleh, a nei zodeuh ten a neilou zawte I ngaihtuah un I nekngaih mahmah uh kisam ding hi. I hinkhiak/khankhiak dek geigei chiang ua kiakniamna omzel ade aw chihna bang a om a, a kal a sa leh gal laka I buaina utoh, tua kialpi hong tung zel chih chu kingaihtuah, kinekngaih, ki-iit tuah leh ei-le-ei ki-thatthat leh poisak bei a khosak tawpsan in, kialpi ziaka I mi isate khat leh nih in hinna ana tankha ding uh chih lauh pen leh awlmoh pen in nei chiat thei le deih huai ka sa hi.

Hiaibang kalah, milian milal leh makai muanhuai lou tampi ilak ah om ihih manin mipi ten le hiaibang a migenthei tagah liangvai te tan theih ding hamphatnate na ngawn duhgoh tuntun a khosa mite naktak in dou in, hih chimit in ilak ah hiaibang zulhzauna leh thulim louhna te delh mang vek ding in pangkhom siam le ka chi mahmah hi. Huaiding in I chindan hoihlou apan in I dinmun leh chindan uh kikhek thei chial le ut huai hi.

Niteng a nekding nei a silh le ten teeng a khosak a nop leh manphat dan ngaihtuah thak ni. Ahi ding mah sa a, Pathian apat a bang tang ihia? Hiai tan a khosa thei a I ompen manpha lua ahihdan phawk in a hon petu tung ah kipak in diktatna mahmah I om na chiat uah hinpih in len tentan thei le bel a haksa leng dou khawm le nop ding hi.

A haksat hun leh nopsak hun om gige a, I haksat hun inleng Pathian kiang ah kik hun thei in nopsak hun inleng a hon pe pa phoklou zenin om keile Pathian in tua I dinmun apat hon dopsang ka lamen hi. Kialpi tung mah leh Pathian toh dou le ahaksa om lou ding hi. Amah phawk kei lebel neksenglouh louh nei lele ip tovang a koih bang lel ding a, zankhat inleng bei thei hi. Huaiziakin, I dinmun thei in kivelthak le ahun lai ahi dia, nekguk leh chet theih na tuamtuam ten sawt a daih louh dan thei in, I mi isate dinmun te theihpih in, i gam khantouh na din sem le I gam niam leh neuchik zaw hichin a om dildel nilouh kei ding hi. Migam changkang te leng haksatna pallou a om tuan kei uh chih thei in, tua I dinmun apat potkhiak sawm in panla chiat ni.

Hundang khat ah Saptuam saina in picnic in ka hoh uhi. Gamlak ahia, mual in a tuam mun niam chik ahi. Sing lian pipi a pou in a hing dipdip ua, a nawl ah inn/hall giahtheihna ding a bawl uh lianpi a om a, huai ah kipolh limna leh program tuamtuam ka nei uhi. Hun patma in ka vakvel ua, singteh keu tampi te lawmten a muh un, ka gam uh a haksat mahmah lai in singkhuah leng leizou lou in singteh tam pipi kaikhom in vaimim bul khong toh ann ka huan uh achi uhi. Huai hunlai in tu dinmun ding angaihtuah phak louh dan uleh na naktak a sep leh thumna tampi nei uh chihdan hon gen ua, ka lung a khoih mahmah. Tu in huai huntoh tehvual louh in Pathian in a domkang a, a an huandan uh, a khotang zalen dan uh, a khosak dan te khong uh ka muh chian ka eng thei mahmah a, ei gam leng a hong pallut hun ding ka ngaklah mahmah hi.

Hiai te tanchin tamlou I gen zual mah bang in, khovel a I damsung ni a tom dan thei in, nuam zawdeuh leh baih lam deuh in khosak sawm in, aniam deuhte iitna toh kidom kang siam in, i gam adia na hoih seem a makai te za thuap dan siam kizil in, tua idinmun uh huntawk lou ahihdan thei siam in tha-le-zung seng angaih huna leng seng peih hidin, anuam ahaksa ah Pathian sam ni. Midang te vualzwl a ompih gige Pa ei a din leng a nai in mansa gige ahi chih thei thak ni.


www.zogam.com