Bieknaa le Zo khuol natawh

By: ZOMang

August 02, 2007 - USA gampen leitung mizosie in alunglut nagam ahi-aa, tua ziekin USA gam itunnop uhpen kimawsah theiding hilohi ciin ahuom in gennuom masa ing.Ikimawsahlo ici na in hoisienghi, maansienghi ci naa hipai nai lohi.

Human Right akici mihing khatsim ii pienpi suotatnaa, ahisihleh Democracy akicici pen atamzaw nitumnaa lam gam (Western country) aa teng gam te kung pan hingkipan hi ciding hi.Ahoi tamama thu ahi-aa leitungbup in angazo nadingaa ahanciem thu khat hi. A hoithu icihangun imangngil loding uh thukhat ah thukhat popo ah lang2 neiden aa, alan2 hoi maw? alangkhatbeh hoi maw? ci aom den gige ahihi.

Tualeh tam Human Right ahisihleh Democracy khantonaa gam te sungah aminthang penpen ahi USA gamsungthu tawhkisai ngaisunsiem in tawm genvavui.

USA pan aa angpei Pasien nasem Rev. Smitt in Yangon Chanchaung Biekinn ah kapkawmin "USA gam aading thu einanget piekun" ci-in training nithum aman nii mangpha pai na thu ah agen kaza ngaihi. Hum in lamdang kasa mama hi. USA gam tamza aa Pasien in thupha pie aa bangthungetpiek ding kisamlai ahei cia kalungsan laitah in, " no eimu na-ah USA pen neisangmu mama khathei ding uhhi. Ahihang Christian nuntat le zie tawh ei et pieklo uhcinh neithunget piek ding uh bang ahei ci nathei ding uhhi" cihi. Bang ee leh? " Pasien in USA gam pen thupha eipie aa, tua thupha pen tuni-in USA aa om Christian te in leitung nopsah naa lambeh sui naa'n kinei ta hi.Nu le Pa ten tate hilthei, samthei, genthei nawnlo, ta ten zong Nu-Pa ci itnaa zong neithei talo, leitungnopsahnaa lam behah kipeisiengta, Biekinn ah mi kimu talo" ci-in agen kaza ngai hi. Humhun in ka tel sieng lohangin tun ahileh Rev. gen thu akicien in katheikia aa, USA pen Christian te lampiel nading, minam manthan nading, gam khat hi ci-in katelsiem kia phingphing hi.

Leitung mizosie in atunnopnaa USA gamah tu-in Zo tezong kitung simsim ta hi.I thei gige dingin USA gamaa teng mite cile nitumnaa gamlam aa teng tepen ngainaa kicien aneilo ngainaa neite uh ahihi.Tuaban-ah Human Right akici pen uongtamama ahiziekin, nngaihnaa kicien hoih anei tele, Christian thuzui-mi te aa dingin lampiel nading, manthai nading lampi hoi mama gamte uh ahi cipen kicien mama hi.Tamtawh kisai mangsansan ding kisam khollo hi.

I inn nei aa ikhawi ibawng, ilawi te behbeh zong kuingak ci-in akum tampenpen kiheinaa en in kihei diemdiem lai hi. Ci nop na-ah ataa zaw le angekzaw kikal ah kizatahnaa alangni in nei diemdiem lai uhhi.Ngaisun kia lacinh phawhlai ding hiteh. ikhawi bawng sung ah ata penpen te akuisung aa angtun ciengun angekzaw ten aleitawh liekliek lai uhhi. Zahtahnaa kipie nahi gige hi. Tu ni-in nitumnaa gam lam ah tubang khat le khat kizahtahnaa gen nawn sihvai-in tate nangawn kisam thei ta lohi. Tua in ilaisiengtho uhtawh kikumkal hlimhlim ta hi. Adang tampi zong om lai.......

Tua ahiziekin Christian thuzuinaa lam le minam ngainaa hoi te imanthansah nuom sih le, ahisihleh minammangthang, ngaina mansuo, Christian mansuo te isuolo nadingun, isuo nop sih uhleh tu aa i-op naa gam i-op sung in Pasien masuon in Pasien eipiek damnaa le hunhoi te zangsiemin sumkhol in ahuntunciengin igam ma-ah i Christian thuzui naa le iminam ngainaa hoite nei-in imnam pi tematawh omton aa, Pasien ibiek ton ding un ingaisut ding uh kisam dinghi.

Iminam le ingaihnaahoi namtui tele IBieknaa imansuo nuomsihuhleh ci-naa hieai........
Mailam ah aban zom kia vavui. Genkhiel teng ngaidam thumkawm in......


Source: ZoForum.Co.Nr

Akikhen theilo Gamthu (Polictics) le Bieknaa thu

By: ZoMang

August 02, 2007 - 1.Pasien in leitung le vantung le asungaa om nazosie asiemzo ciengin hicihkoih lo-in akemding acingding amatawh kisun mi bawl ngekngek hi. Tua in bang eimusah ei cileh leitung le vantung le asungaa om nazosie kepcingsiem dingin mihing in mawpuohnaa inei uhhi ci ei musah gige ahihi.

2. Leitung le vantung le asungaa om nazosie kepcingsiem nading tawh kidungzui-in akemding ahi asiemsa mihingte ii kalsuon gamtat zieding thukham Pasien in kicien tahin nakoi laihi.Tua athukham koipen hla lam beh aa ding anhiloin tahsa lam tawh kisai aa zahding zuiding in na koih hi.Tua thukham in kumpi gamkhat sungaa akikoih thukham te ma ana hihi. Tua thukham izui leh kumpi thumang isuo ma bangin tua thukham in mihing khat le khat kiskal thu zosie ah ahuoiton sa kisuoh pai hi.Gentenaa: Siempi laisiengtho agol 10 napanh agol 27 dong sim leih, mihingte khuosah dingdan lamtawh kisai sum le pai sui danding, zi le ta zon danding, khutkhiel na tungaa thukhen danding, biekpiek danding, mizawng migen theite kep, huoi zie danding, neh le dawn danding,inn sah inn hlang tawh kikal danding ci-in akicing tahin ahuolhuol in thukham anakoih nathu imu-uhhi. Tampen hlathu bek aading ahilodan le Pasien athei, abie mikhat in hlathu le tahsa thu ah alangni-in septonding mawpuonaa, thuguihlun inei uhhi ci eicien gen tamama hi.

3. Zeisu in Keta kumpipa sum Keta kumpipa napie un ci-in Mate. 22: 21 sungah imu-uhhi. I lunglut lonaa, thupi isah lo, kisam isahlo thute gen inzong inei sih uhhi.Zeisu in leitung sum le pai te gen in ananei cipen mihing te aa dingin kisam sa ahiziekin anagen in akisai naa munmun aa sepdingin analam hil ahinathu ei theisah hi. Kumpi te le gamsungaa ateng mihing te in zahding aa akisam thu le sum le paite ana thupi sah ahimanin analamlah siem na higigie zawhi. Tam thu in bang ei musah ahei cileh mihing te in leitung aa cilesa tawh ihin sungteng tahsa aa kisam nate amun aa zatsiem theiding eiphawh sahhi.

4. 1Sam. 13: 13,15, Danial. 4; 17 cite sim lei Kumpi Saul, David, Solomon cite aa patin Pasienin leitung kumpi asem dingin ateel ngieat nathu le hoilo asah cieng aa kumpi panh aa akhawlsah nathu te imuthei uhhi. Tamin bang ei hil ei cileh gamsung acidam nadingin Pasien atheimi in amakaih ding akisap thu ei musah hi.

5. Sawltah Paul in ei-uk kumpi te thu mandingin Rome . 13;1-7 le Tita. 3;1 ah nagen hi.Tamthu tawm igenzek dingun kalung gulhi. Kumpi te thu-uknaa namang un ciin nagen napi sawltah te mama in Rome kumpi te thuneinaa nalangpanh uhhi. Tam thu sungah kumpi te in Pasien deih na tawhkituoh aa gam amakai ding uh le tua makainaa gamsungaa teng mite in azui dinguh cithu ahi aa, Rome kumpi-in Pasien nasem te Christian te tu aa kawlgam galkap kumpi te mabangin simmaw, gawi, thuman tawh uk ahimanin sawltah te in anuntat na uh pie in analangpang, ananiel kingkeng uh na hihi. A hihang kawlgamsung aa Christian makai tepen tulien in sawltah te siangin lungduoizaw hi icidiei maw? ahi sih leh kumpi te thuman lo na ah kumpitawh kigulluh thei zaw hi ici ding vuoi? ahisih leh thu man thu tah hang in anuntat nauh sawltah te bangin piengam lo uh ici ding vuoi? ahisihleh, gilo kumpite thu mang uh ici zaw ding vuoi? ci gendingdan akicienin ka thei sihzawta hi. Paul in Rome 13; 1 nasungah anguk kumpite thu namangun na ci-in, ameng 4 nasung ah kumpite ahileh mipi te aa dingin Pasien sawltah ahihi. nacikia hi. Tam laisiengtho mun tegel pen ani-in kisim ton ngai phalo in kawlgamsung aa om Pasien nasem atamzaw icidiei mah te in ameng 1 na beh sim in nei-in mipi thuhil na in aneiden kaphawk kha gige hi. Tua thuhil na pen alangbai, amitlangkhat khuomulo thuhilnaa anhi gige hi. Kumpi asem te-in Pasien thei in Pasien deihdantawh kituohin makaih ding aa, tua makainaa pen gami te thuzui te in mang ding hi anaci ahihi. Pasien theilo le milim po sing le suong po abie kumpi sem aa, mipi agawigawi le Christian te abawlsiesie te uknaa namangun anaci hikhol lo zawhi. Sawltah te mama in tuadan kumpi te thuneinaa namang lobeh tham lo in, anuntat na uh pie in kumpi te gitlo naa na talangsah zaw lai uhhi. A hisih le Pasien nasem dihtah ahi na-uh thuman thutah tawh kumpi gilote mai ah anuntat na pie in nadingtang kingkeng uhhi. Khat lam pan in Polictics hoilo azang kumpi te in Polictics hoi azah kia nadinguh zong ana hihi. Na Polictics zahdan uh ci-in thuse lo in na om uh hileh, anuntat na uh piek nasawm khol lo ding uhhi. Thu man akilak nadingin thumanlo a om kul aa, thua thumanlo akilah nadingin thuman lahkhiet ngai hi. Sepkhiet tangtang ding kisam hi.

Khatvei bieknaa lamaa Pasien nasem kahi aci hlamangthang kicien khatzong amatlam agencien theilo, Pasien na kasepzaw kumsawm valtang aci, laisiengtho sangka B.D man zohitang akici Pasien nasem khatawh kaki mutuo aa, Pasien thuma kikum le laisiengtho thuma kikumkum in atawp nalam ah genbehtawh akicing ahilo Pasien thu ah sepnalamsang thu kikum toto in sepna ineithei nadingin sepnading akisam munte a opding le tuamun te aa isepding ci thule sepding akisam ahi kawlgam sungaa gammi te nuntat hamsatzie le tabang hamsatnaa angkipat naa kumpi te gitnatlo naa, a polictics zahdan uh ahoi lozie le tuate ziekaa gamsungaa hamsatnaa tung ahithu le tua te sepzie dingdan ci kikup tawpna lam ka tun uh ciengin " lawm keipen Pasien nasem ka hi-aa, tua polictics hoilo thu citele tuaziekaa hamsatnaa te tawh kisai kei nasep hisih, zong lunglut sing, kei hlamlam nasem hibong eici-in kakikup na-uh amongdong tunzolo in kadinkhawl vawt ta uhhi. Ka lungsimsungah ama kungaa kagenkhiet lo " aw......cinaa te keitawh kisaisih, cinaate kepding kei nasep hisih, cinaate akidah, adon sawmlo sievuon tawh kibang hicie izaw...... cikhat danaa tawh kigawm thukhat kalungsimah angsuoh vathi.

Thukhupnaa: Kawlgam bangaa Polictics kici gamsung ki uk naa- ahoi lociengin gamsung mite genthei mama-aa, tua migenthei te a enkol, akemding le akhoi dingin Christian akiciten mawpuohnaa nei aa, gamsung cidam nadingin athupipen tawtang ahi polictics ahoi nadingin zong Christian te ma in mawpuoh naa aneizaw ihi uhhi. Mihing te le tam leitung bit tah le hlamuong tah aa omkhawm liailiai na in vantung limla na hi-aa, nuntattawntungnaa ka nga dinghi, gupnaa kanga zohi akici thuzui mi te in vantungtawh kilawm nuntatnaa leitung aa inei ding uh akisap mabangin "notetung kilem naa om ta hen" "kilemnaa kangpie hi" " kilemnaa kang nuosie hi" aci Zeisu in vantung aa ding aa nagen hi lo in tamleitung aa om ding aa anagen ahimabangin tua kilemnaa cipen hlathu beh na hilo in mihing te kikal aa a omding deihnaa ahi aa, akilemlo, gamsung buoinaa te ah kilem naa a-op nadingin hingzing Pasien abie Christian te, adeuhdeuh in Pasien nasem akici te mawpuonaa anei ihi uhthu le Polictics le Bieknaa akituomkoi theilo ahithu iphawk dingun deihsah ahihi.

Itna sungah
ZoMang