ZOLENGTHE NEWS | 23.02.2017

*RIMS a refer in um:* Janni'a Behiang lam a accidentte tuni'n RIMS ah mi 2 refer in um ua, Behiang PHC incharge Dr Steve Minlun leh ZYO Ghq te panlahna toh sil bangkim arrange zaw in umta a, tu'n ZYO Imphal te'n a poimawhna bang a panla di'n ki singsa uh. Lamka damdawi inn ah accident a ki sukhate va sietve mi pung deudeu.

*CCpur Cong Office hong:* 58-CCpur A/C a Congress candidate Pu Haukhanthang in tuni'n a tenna inn, Zogam Road, New Lamka ah Information Centre honna nei. Ama ahileh Khianglam hausate Pu M. Haumang naupa ahi. Candidate pun agenna ah, Pasian in mipi palai di'a hing sawl ahi chi a, mipi palai umte'n mipi aw ngaisah nuamlou in ahina uh kiletsahpi uh chi'n gen. Congress na muda uleh zong Haukhanthang beh hing hepi unlen na vote manpha uh hing pia un chi'n chielna bawl. 

*PM visit boycott:* Manipur phaijang helpawlte kikhawikhawmna CORCOM in Feb 25 (Kiginni) chia election campaign di'a India Prime Minister in Manipur a'ng pha ding toh kisai boycott leh total shutdown puong uh. Suty! Prime Minister in Feb 25 chiengin Langjing Achouba Ground ah public meeting uap ding. Tam toh kisai in Special Protection Group (SPG) hing tung.

*MLA in oeration in naunei sah:* Mizoram MLA Dr. K. Beichhua in a constituency veh a a umlai in Siaha Civil Hospital a numei naunei ding khat incharge doctor umlou zieh a buoi chi jakha in amun del pei a, ama'n operation bawl a, a nu leh a ta damtah in koi.

*Election Fever:* Tuni'n 11am vel in Wangjing Thentha A/C ah CPI candidate supporter te toh MLA Paonam Brojen INC supporter te kal ah suong a kisep tua in buoina pieng a, INC lamte 1 leh police te khat liam.

*PRJA in masawn jel:* Irom Chanu Sharmila new political party Peoples’ Resurgence and Justice Alliance (PRJA) te'n masawn jel. Supporter te apat donation tunitan in Rs 20 lakh valta. Delhi CM in Rs 50000 a panpi, Punjab AAP ten zong panpi. Manipur pulang apat panpina lut tam mama hidan in thusuo in gen.

*Kikap tuana um:* Tuni'n Khoupam tangvum ah NSCN-IM leh 5/2 Gorkha Regiment kal ah kikap tuona pieng a, 5/2 GR te khat amun ah shipei a, Rongmei numei kum 50 khat zong amun ah kaplup in um kha. NDNC-IM te'n a shiluong uh Tamenglong lam a apuo lai un Golpijang ah ZUF te'n ana lamtan ua kikap tuana pieng kia a, NSCN-IM te 2 in liamna tua chi thutut in gen.

*CT Lian Guite:* 58-CCpur A/C Independent candidate Pu CT Lian Guite in 'na'ng telching uleh gam kizua nawnlou ding' chi'n gen a, khentuom neilou a abial mipite a di'a dinggam ding ahidan puongkhia.

*NEIDP Candidate points: 58-CCpur a/c NEIDP candidate Pu Paukhansuan in atangkoupi diah ahileh thutahna (truth), dihtatna (righteousness), thudih a vaihawmna (justice), lemna (peace), siengthouna (holiness), gam leh nam khantouna chite ahi.

*SoO Camp etkaina:* Pu L. Kailun, State Police Nodal Officer, SAE-2017, Manipur in SSP, CCP/PHZL/KPI/TPL/CDL kungah a SoO Camp checking report submit dingin theisahna bawl. CCpur ah SoO Camp 5, Pherzawl ah 2, Kangpokpi ah 4, Tengnoupal ah 1 leh Chandel ah 1 um.

*ZOLENGTHE*

*Connecting the Zo people*

ZOLENGTHE NEWS | 22.02.2017

BJP Candidate Office Honna:* 60-Singngat Assembly Constituency a Bharatiya Janata Party (BJP) candidate Pu Chinlunthang Zou Election Office honna leh Public Campaign tuni, Feb 22, 2017 in Singngat Zokhopi ah nei in um. MLA candidate pu thugen a nuailam ah muthei ding...

*Truck Accident:* Singngat a BJP Election office honna vaiguon uap dinga hing kuon Behiang langte vangsiet huai tah in a tuonna uh truck tuosia in hinna tan hial umsih nanleh mi 39 kisukha ua, tuate lah a mi 32 te District hospital puotung in um ua, mi 4 dressing zaw in discharge hita. Singngat MLA Pu Ginsuanhau in abial mi-le-sa tuosie tuote vehna va nei. Tuaban ah MLA Candidate Pu Chinlunthang in zong vena va nei a, Pu Owen Mang Munluo, Admin lamkai in Zolengthe tuonvaite'n ORS box khat leh hamuonna thu toh ZOLENGTHE min in vena va nei uh. ZYO in damdawi beiteng tua ding a, ne-le-ta giehna teng BJP candidate Pu Chinlunthang leh ZYO Kamdouveng kithuo in buoipi uh.

*Manipur Face Encounter:* July 23, 2009 ni'a Khwairambam keithel a senior te thupieh dungjui a mi kaplum kei kahi chia kiphuong khia Head constable Herojit CBI top officialte mai ah kilang. Thudih hing pawt khongkhong ding dan hita. Tuabang kal ah, CBI in November 1996 a Ghaziabad fake encounter a kihal sepai officer 4 tuni'n jail bang jutdin thutan khum.

*Rs 6 Lakh mankhia:* Tuni'n Election Surveillance Officials leh State Police te'n mi khat apat note thate ngen Rs 6 lakh mankhia ua, etkaina nna pei lel. 

*Sangnaupangte kiphinna kausem:* Union Home Minister Rajnath in Indo-Naga Framework Agreement ah Manipur min kilaw khahna khat zong umlou chinanleh AMSU leh pawl tuomtuom te'n a detail hing luikhia in chi'n Raj Bhavan mai ah kiphinna khausem bawl uh.

*Sanginn kikhah:* Pawl tuomtuom apat Monetary demand umzieh in Sadar Hills Pvt. School Assn (SHIPS) te'n hunchiem umlou in Pvt. School tengteng kha uh.

*Rengkai ah buoina pieng dehtah:* NEIDP candidate Pu Paukhansuan Khuptong, MLA candidate from 58 Ccpur a/c in nasa tah in masawn a, zan nita in Rengkai muolhoi area, Mata Mualtam etc ah open campaign nei a mipi peikhawm tam thei mama. Tuni nita a Rengkai field a nasa sem a open campaign a bawl sawm leh hausapu leh VA te'n block uh. Buaina um dehtah.