By Dr. Hau Za Cin [ Phuitong Lim ]
A kah toto America - 1:
Sia Job Thawngno in, "America pen a 'kah' lamsang ahih manin kiamsuk ngeiloin kah toto a, India pen a 'diah' lamsang ahih manin khangto ngeiloin kidiah tawntung hi. Kei pen India ah bangzah vei hiam ka zinto ngei a, ahi zongin 'gamdang pai' hong kici ngeilo hi. America zinte bek 'gamdang pai' kici se hi" ciin Lamka hong zinlai in gen hi. Hi kasa mahmah hi. Ahi zongin tua a gen khit ciang Siapa hun khat sung CP te lenna gam lam zin khin ahih manin tun bel a lawmte in zong 'gamdang pai hiteh' a cihta ding uh lamen ing (theisam keng). 'Inn ka len tiang sava ti veve tong' a cih uh leh bel Siapa gamdang pai kici nailo maithei hi.
Phamawh kei e 'gamdang pai' a kicih kei leh zong, gamdang pai hi veve ahih ciang. Zomi dan ci mai ni. Zomi te ngeina, Zomi te lungsim ci zaw ni. CP te lenna gam ah lawmte khat in a gen ka lungsim ah tham den hi. Naupang te kimawl ci, galkap kineih. Khat in, "Kei a bu" a cih leh a lawm dang khat in, "Kei a uk" ci" ci pah hih tuak hi. A khuak tai peuhmah kici zaw lai hih tuak! Tua pen Zomi te LUNGSIM LIMLANG hi leh kilawm kasa hi. Dik, maan, true... mahmah ahih manin.
Siapa kammal khat pan Zomi te LUNGSIM pawlkhat hong dawk va kiau ahih manin i kibawlphat ding, i ngaihsut phat ding pawlkhat om hi lo hiam ka ci hi.
Le, tua lam i gen nop masa hilo a, i maban zop sawm dih ni.
Khat veivei kei leltak khualzinna khawng bang thupi hiam, mi zong khualzin a kuamah in bangmah gelh lopi uh ciin ka kisuanglah pian zel a (Kawl lungsim tawh Zolai simte adingin ka aana pian zel a.... ciin na simsak un, he he..), ahi zongin kei pen lawm leh gual min nangawn sawtpi a ciamteh theilo, mun min leh khua min zong sawtpi a ciamteh theilo ka hih manin tu in lai tawh gelh kei leng maimang mai ding ahih manin cihtaak ta kei leh ka siambang in lai tawh kem ning ciin mit kham pipi in ka hanciam hi. Laigelhpa khat in, "Numeite in amau sanga a kithupi bawlzaw, a kikin bawlzaw na' khat peuhpeuh a hazat uh theihsiam huai a, a ngeina hi," ci a, hih lai ah numei a cih ciang a ngaihno, a zi a genna hih tuak hi. "Tua manin ka zi in phunlo paulo a ka laibu gelh hong zawhsak manin ka lungdam hi. Amah sang ka kinbawl zawk dai dide a a hazat siam manin ka pakta semsem hi," ci hi. Tua pa in kum 10 sungin laibu bu 10 val hawmkhia zo hi!
1. Why America? Bang hanga America thupi bawl tuam se. Bang hanga America minthang diak se hiam?: Bang hanga America thupi se hiam? Bang hanga Amerika kici lo a America kici hiam (ci leng bel Zolai gelh dan ding tuamtuam a ngaihsunte buai pah lian ding hi). Bang hang a 'kei ka hi' a kici khempeuh in America zuan se hiam? Bang hanga a nei leh a hau masa peuhmah in America lunggulh masa uh hiam? Bang hanga Zomi te America tung hiam? Bang hanga mikangte Zogam ah hong pem lo a, Zomi te bek hilo leitung minam khempeuh America ah pem nuam uh hiam? Bang hanga gamdang kumpi peuhmah in a tate sangkahna dinga America tel masa hiam?
Tu laitak India Prime Minister Manmohan Singh tanu te America ah om hi kici hi. Sangkah in nasem in tengsuak lel uh hi. Singapore a biakinn lian bel leh pawlpi mi tam nei bel City Harvest Church kici a, tua ah a pastor pa uh zong a zi leh tate US ah om sak in amah in CP te lenna gam ah pastor sem hi kici hi. Tua mah bangin Zomi lak ah zong a khuamu masa, a hau masa, a khuasuak masa te in leitung minam dangte mah bangin US mah tate khanna ding, tate sangkahna dingin hanciam uh hi. Tate itlo kuamah omlo hiven maw!
Tua zahta a thupi America hi. Thupi sa lo i om khak leh zong phamawh kei. Ahi zongin ka neu thumangmawh a la khat ka phawk om - "a omlai teng kuamah ngaih loh teng." Leitung mihau, mipil, misiam leh khua mu masa, mit keuh masate in thupi leh belhtak a sak uh gam nuam hi a, a na zuatna gam uh ahih manin ei ngaihsutna leh amau ngaihsutna a kibanglo, "sangkahna kibanglo ci mai ni." Kei zong ka muhna ciangciangah thupi kasak nai loh hang thupi asa te thupisakna a muhpih nailo hi kha ning ka ci hi. Zomi Nam Ni kikhopna ah nungak melhoih muh zial bang hilai a, Khuado Pawi ciang tonpih tutpih theihna dingin a lungsim tawngah kullut (bu bawl) kullai bang ka hi hi.
2. Vanleng tung pan America kimu: Cingno te lenna gam ka nusiat zawh uh nai 10 valta, tuipi leh meipi bekbek a kimuh zawh zong sawt zo, lamet loh in leilak hong kidawk a, mual leh guam ahi cih a kitel ciangin vanleng sunga vanleng lampi lahna Navigator ci uh hiam aw ka et leh Canada gam a kigalmuh na hi leltak hi. Canada pen ZONET pu Pa Gin Mang te tuallenna gam hi. Vancouver khuapi tungsan ding khawngah ka len laitak un, 'vuk kiatna leh huihvot nung hiauhiauna hi' ci a Taiwan omlai a Canadian lawmte hong gen gam himawk veh ka ci hi. Leitung bup map pan en leng Pu Zam King Mang te huansak tawh kibang ziau hi.
Canada hoih si e maw ciin ka tutna vanleng tohlet pan ka khuadak laitak in Navigator in Canada gamgi pel suk in USA gamsung kawkta a, a gam hoih dan kilamdang tuam tawh kibang liang hi. Zanglo lian pipi kiphah ziaizuai a, lamzik sau pipi kikhawh zeza hi. Minnesota, Chicago, Detroit, Washington DC, New York, etc cihte khawng hong kidawk a, mun tampi ah Bual tui kicing kimu thei a, America gam thupina neucik ki galmuh ta cihna hi. A mu kha peuhmah in encim lo, a tung kha peuhmah ciah kik hamsa sa, a tengsuak kha peuhmah zongsang akicih pen a lamdang hilo a, 'a mu nailo peuhmah in a muh nop ding gam thupi hi mawk mah veh e' ka lungsim in ka ci hi.
Minnesotta kipel suk, Wisconsin tung khawng a kitun ciangin mual leh tui kituahna 'Beach' a cih khawng uh kigalmuh in a hing dipdep leh a dum kiaikuai sing leh tui te etlawm pha diak a, Milwauke khengsuk vangvangin Detroit vanlengtual ah tu dingin ka kithawita uh hi. Meipi kai ahih manin Detroit khua sung kimuh theihna tamlo a, meipi lak ah vanleng niamsuk diaidiai in meipi a phul ciangin kisinggawp ahih manin ka pam a tu mikang nungak melhoih mahmah te (Zolia te zaha hoih bel hi kei uh) awng khia kha uh a, "awiiii........" mah ci vangvang sam uh hi (tua tak ciang mi tampi in amau lam en duamduam uh)! A lauh ot uh lamdang a sa hi diam, ahih kei leh Zopau a 'awiiiii...' a cih khiat vengvang uh lamdang a sa uh hizaw diam, thei khang.
Detroit khua pen tu nung deuh a Ph.D. (Political Science) ngah Lia Dimkhek omna khua hi. CP te lenna gam pan ka dinkhiat ding laitak in tua thu hong kithang ahih manin ka maingal tuam mahmah hi. Vanlengtual ah hong na dawn kha tam bang ka ci kha lianga, ka kideihpiak tazen hi, lawlawm song. Hong mawhsak kei un, 'kong na dawn ding uh hiam, i kimu thei diam?' a ci zong om kha mai thei ahi, no theilo, he he....
3. "Welcome to America": "Welcome to America, and we wanna show you the city" ci a thu pulakna ka zak khit uh ciang Detroit khuapi tungah vanleng tawmvei vial len kawikawi a, lampi siangtho tak, moto Bawng hon banga kizui ngetngat, inn tampi khuaibu banga kigual tiltel kimu thei hi. Vanleng tual mahmah kidawk nailo a, luipi tawh a kibang tui kicing deda kimu den hi. Khuapi tungah lengleng in a kiu khat ah khuapi beita cih ding ciangin vanleng pei in lei zutkha a, a kha kising in, a awm bing heethaat a, America leitang a kitung hi lel tak hi.
Cingno te lenna gam bangin vanleng na tam mahmah lo a, lamdang ka sa hi. America pen thupi lua mahmah ding, vanleng zong tam mahmah ding, a mun zong siangtho mahmah ding cih upna tawh tung ka hih manin ka upmawh bangin mu pah zuahzuah lo ka hih manin lamdang ka sa sim hi.
Ahih hang a pam lam ka tai phei uh leh ka vanleng uh a khawlma in Bawng hon khumkhop mahmah banga kigual vanleng ka mu phei phei uh a, wow... wow... ka cici mai ta hi. America te in leitang lian nei lel uh ahih manin vanleng tual khawng ciil bawl vetlo in lianpi zik deda uh a, a tukna, a lenkhiatna, a koihna cih bangin a tuamtek in mun gam lapipi ah a koih uh na hi zaw hi. Cingno te, CP te lenna gam te ah bel leitang deihzah a zat ding neilo uh ahih manin na khempeuh zek bawlzaw uh hi ding hi.
A kah toto America - 2:
Suahtak na ut hiam? Na dikna (rights) na gum nuam hiam?
4. The Land of the free, and the home of the brave: Leitunga ah a hau masa, a pil masa, a hithei masa peuhmah in tate sangkah dinga a sawlna gam uh America hi mawk hi. India gam ah Zomi tampi tenna North East India pan nu leh pa in amau hihtheih khomkhom in a tate uh Shillong, Delhi, Bangalore, Mumbai (Bombay), etc te ah sangkah dingin kuankhiasak uh hi. Nu leh pa hihtheihna tawh kituak in a gamla tungzo deuh om a, a gamla tungzo lo zong om veve hi. Tua banga kitaitehna leitung ah America a tawpna hi. Mite tun theih tawp hi.
Bang hang hi ding hiam i cih leh America pen mihingte suakta taka nuntak theihna gam, hangsan taka thudik thuman a kigupna gam, a hoih peuhmah a kithupi bawlna gam, 'the land of the free and the home of the brave' ahih man hi, kici hi. A tom in gen leng American Dream na delh theihna gam hi. Mihing khat in a nuntak sunga a hih ut penpen a hih theihna dinga suahtakna a neihna gam hi. Khut kihensak lo, kam kihumsak lo cihna hi.
5. Detroit ah nai nih sung: Vanlengtual ah mikang, mivom, misan, mieng, a tuamtuam kileh mai'mai'te lakah kei zong vandak kawm ka lu hen'toin ka pum ka tholh phei a, ka khe khaito in ka khut ka vik phei a, ka mailam saupi en in ka pute inntual tung bangin ka vandak pah gaga sam hi. A dung leh vangah nektheih namkim, muhtheih namkim, aw.... nuam tei ei..... Taklam hek leng vanleng bebek kigual demdam, veilam hek leng mikang nungakno Zolia te zaha hoih phialphial nui hiuhiau a tukhawmte..., a thau a gawng, a khang a moi.... vanlengtual zong lianzo sa lawmlawm ing. "Tunkim ni hiam?"*** kici phial takpi hi!!
[*** Nidangin sanggam .....te pawlkhat khua neu pan Phaipi (Imphal) ah zin uh ci, Phaipi khuasung a tun uh ciang mihing tam sa lua, amau khua lamah Kikhoppi khawng ciang bek a mipi tam ahih cianga "Tunkim ni hiam?" ci uh hi ci. A khiatna pen mi tam sa lua in Kikhoppi om a, Kikhoppi tunkim ni hiam cihna hi. Shillong omlai lawmte hong hilh hi.]
6. Detroit pan DC ah mithau mahmah khat tawh tukhawm: Shillong sangkai lai in mi thau piante (a diak in nungak) kimu leh 'a nu leh pa in vakzo ahih manin hampha uh hi' ciin lawmte tawh ka holim ngeingai zel uh hi. Tua pen ko Mizogam pan khangkhia te cimphawng hi a, a taktak zong hi tuanlo hi.
Detroit vanlengtual ah vanleng tuang dinga ka kigual dimdem uh leh ka nung pek vuah pasal thau pha mahmah khat zong hong kigual a ka pianzawh ka mi muh lak pan lian bel lai dingin ka um hi. Vanleng sung ka lut tak uh ciang ka tutna kiangah hong pai pheiphei a ka kiangah hong tu mawk hi. Kalai, kalai! Ei bel mikang gam kizin hi mawk ahih ciang mikang nungak a hoihsim hiu hiau khat khawng tawh tukhawm leng kidah hetlo ding kimlai.... huiha. Nai nih sung ka pianzawh mihing ka muh lakpan a lianbel tawh tukhawm in leitunga thunei penpen President Bush inn kiang ka tung sam hi. Tua pa liat dan pen pasal nih in kikawi zo lo maithei hi. "Muhnop" i cih pen mihing zong na hi veve mawk ei guai.
7. Pa Thawng leh Nu Kok in hong dawn: A kah toto America vanlengtual ah Free Phone service om ding ka sak pen na omlo a, omlo ahih manin phone card USD 10 tawh ka lei leh local call khatvei, international call khatvei ('hello darling....' kici man bek) bek mah kizangthei a, bei ziau hi. Vanlengtual pua lam ah USD 10 lei leng local calls 20 val, international call zong .... I miss you... cih khawng zong kigen man thamtham hih tuaks. Tua manin 'land of the free' ah a free tam mahmah khollo tawh kibang. Theitel sam keng, kan lai ni.
"Pa Thawng, cidam in Dulles Vanlengtual hong tung ing ei" ka cih leh Pa Thawng in, "tawmvei na ngak pak aw" hong ci a, khuaphelep sanga manlang zaw in hong tung in ka gei a nungakno thum amau dawn ding ngak-a tute nusia in vanlengtual pua lam ah ka kisawnkhia uh hi.
Lamdang kasak mahmah pawlkhat pen van sawnna ding leng (trolley) saap kul (hire, paid); police, customs checking omlo; hong dawn dingte ngak kawma tutna ding tutphah kikoih se lo; mikang gam zin ciin mivom vive kimu den! Vanlengtual a nasemte bang India mi hileh kilawm (vai mel) tam mahmah. Pasal papi khat a tha hoih mawhlo, a mel zong Asian, a ngo pian khat in hong enen hong enen a, hong ngai pian ahi tam maw ka ci hi. Tun ka nungngaihsut kik ciang Zomi te melhoih hong sa hilel lo diam ka ci mai ta hi.
8. A lungzuanhuai zan khuamial: Pa Thawng leh Nu Kok tawh vanlengtual pua lam, amau moto omna lam ka zuat uh ciang nitak khuazing ding kithawi ta a (America ah ni tum hak mahmah hi), airport transport car tung pan ka kum khiat uh ciang vanlentual mai ah moto a dim a kiphah zeizai ka mu a, tua lak ah Zomi te moto zong bangzah hiam na om mawk hi. Topa in Zomi te hong lamsang a, Amah eite tungah hoih hi ka ci nuam hi. Tua banga moto khawlna lam zuan a ka pai pai laitak un khua hong zing deuhdeuh a, vanleng tung pan Washington DC leh vanlengtual kim leh pam teng akimuh theih bangin khua kimu nawnlo hi. Lungzuanhuai a, lungleng huai hi.
Tua sanga lungzuanhuai zaw zan in hong ngak a, gen khiat ngam loh lungzuanna tawh ka kidim hi.
Pa Ngocinthawng pen Pu Vumson, Ph.D. nau hi. Pasian thupha sanga ka laisimna ka zawh ciang a' lungdamna leh hong pahtawina a 'ka behpa hi teh' hong cih kiau hanga kei naupangno lawpna leh lungdamna tawh kidim a ka omlaite ka phawk a, pupa theihloh vaigam IIT Kanpur ah lungzuang taka ka omlai a thanuamna leh lametna saupi hong piakte ka mangngilh kei hi. Ahi zongin maitang kituah a 'lungdam' cih kammal bek zong kiho thei nawnlo ding cih ka ngaihsut kholh ciang kua theihloh in inn tun ding ka kihta mahmah hi. Tua lungzuanna in vanlengtual leh inn kikal gamla sak sem a, hih lai ka gelh ding zong ni tampi in ziakai sak lailai hi. Inn ka tung takpi uh a, amah na omlo hi. A innlui Riverdale ah ka hawh a, amah a tak in muh ding omlo a, a maan (photograph) bek mah muh theih dingin kisuang a, ngaihsutna kicing neithei ciang adingin lunglenhuai khuangaih huai hi. A tupa Otilio mopawi New York khuagei New Jersey ah ka pai a, amah na om tuanlo hi. Hih bang hun thupi ah a pu in a tu uap nuam dinga, a tu in zong a pu phawk dingin ka ummawh hi. Ahi zongin Topa gelna kinial theilo cih i Lai Siangtho ah i mu hi.
Zomi te'n amin i theih masak, i min ding leh i mailam ding ama hihtheih ciangciang ah a khual, a sem leh a hanciam hi a, maitang kimu a kam kumkhawm dingin ka lunggulh penpen na hi tawntung hi. Ahi zongin mihing gelna leh mihing bawlpa gelna kibang lo a, i nuntakna zong Ama khut sungah om ahih manin Ama hunzeekna kiheithei vetlo hi. Topa kiangah leitung gimna haksatna leh dahna kahna te phawk nawnlo in hong khawlsan a, khamuang takin a kha tawldam hen.
9. "Buhsih leh Sa" mah lim penpen: Zomi te in "Buhsih leh Sa" mah lim kisa penpen hi. May 20 ni Nikhat pumpi makhelh dinga ka leng vangvang zawh uh ciang kimakhelhzo takpi a, ahi zongin gilpi sungah antak tam nawnlo hi ding hi. Zomi te an mah kiduh pen hi. Tua nitak inn lum ah Buhsih leh Sa mukvun nel pian-a ka nekkhop taktak uh bel 'dam man om' a cihte uh hi a, ken bel 'America zinman om' ka ci hi. Zogam thak ah Buhsih leh Sa na omzaw thamtham a,
Vaimim ciim zong khamzo lo,
Gatam ciip bek mah petpet ing,
cih tawh kilehbulh lian hi.
A kah toto America - 3:
Na vengte it in. Nang na ki it bangin na vengte zong it in. Vengte tawh kido sangin khua sagih tawh kido ding tel-huaizaw......
10. Ka vengpa uh leitungah thunei pen hi: Leitung ah a kithupi sim mahmah khat pen ka vengpa uh hi. Ka vengpa uh hih ding mipil, misiam, mihau, khanglui pau a 'kei ka hi' a kicite kituhna thupi hi. Tu laitak a ka innvengpa uh President Bush pen tukum November kha ciang a thalaih ding kitel dinga, mai kum February 2009 ciangin a thak in hong laihta ding kici hi. Tua ka innvengpa thak ding uh kituh in America gam mi minthang mahmah thum (tu laitak) John McCain, Hilary Clinton leh Barack Obama te mipi mai ah kinial in, 'kei hoihzaw ing, kei siamzaw ing, kei semzo pen ning, ken no haksatna thei pen in, ken na haksatna uh hong huhzo pen ding hi ing.....' ciin kidem keei uh hi. Ko ka thupi hetloh uh hang ka invengpa ding uh kituh in mipil tampi a buai den hi keei sam ei. Zomi te'n - 'kei a bu', 'kei a uk' ci-a tungnun kituh sang thupi zaw in um veng aw!
John Mc Cain lah Vietnam gal kido lai, 1970's hun a galte in a mat, galte thonginn sungah a kum kum a khumcip uh hong suakta kik hi a, a vanleng a kapkhiatsak lai vua tuipi tungah puanpi (parachute) tawh a tuaksukna ah a nakguh leh a khut khe guh kitante hangin America te lungsim ah 'gam leh nam adinga thuakpa' cih khat nei uh a, it in zahtak uh a, thupi sim mahmah uh hi. Ahi zongin kum 71 a pha khin galkap lui khat pen a cidamna, a thahatna leh a lungsim a hiam lai taktak diam cih mipi lungsim ah tawikhai bangin ki penglip deudeu hih tuak.
Hillary Clinton leuleu lah a pasal hanga minthang bek hilo, amah mah zong Law a siam man bekbek a minthang leh mihau innkuan hi a, Politics pen a innkuan mehtui limpen uh hi. Zomi pawlkhat in kawl ngapik kihello a annkuang a lui nawnloh dan in Clinton te innkuan sungah Politics genlo in ann kham cih om ngeilo kici hi. Ahi zongin mipil leh khangto gam gamthupi ah numei lawmlawm ko innveng a hong koih ding uh kisuanglah (kawlgam suak Zomite in 'aana' na cihte uh) in tukum November ciang kihello dingin khentat ta uh hi leh kilawm. A numei lungsim a suah taktak leh kum 2012 ciang bel hong tho kik ngiainguai mai tam maw, 'numei gal zawh', 'numei gal lelh' cih khat om hilo hia?
Barack Obama leuleu bel a pa Kenya mi, a nu Hawaii mikang ahih na hang khawng leh a vomte a cih uh black decendent hi a, tua bek hilo in apa pen maituamte Muslim hi a, ama min laizang zong Hussein hi kici hi. Tu laitak thupiang tuamtuam leh 9/11 zawh diakdiak maituamte pen America te in a pahtaak mahmah loh laitak ahi tam maw. Ahi zongin amah pen thugen siam, mipi lungsim zo thei, Singapore lawmte khat cih dana a 'lawng sau' ahi tam maw.... kah toto mawk hi. "Democry i cih zong khatveivei a pil pen, a siam pen kiteel hi tuanlo a, a haiteng a tamzaw zong hi thei veve hi" kici hiven maw.
Ka innvengpa ding uh pen November kha ciang kitel pan ding hi, na mitsuan ciat leng hilo dia.
11. Memorial Day niin.... :
A kah toto America - 4 :
Zomi te in bang i ciamteh hiam? Bang hihte i thupi bawl hiam? Kuate i phawk hiam? Gam leh nam ading nasemte i pahtawi hiam?
11. Memorial Day niin...: America te in a galkap hangsan te uh, gam leh nam ading a nuntakna, hinna, a thahatna leh a melhoihna, a khangno hun khempeuh a piate zahtakna in a site phawkna, a dam lai, a semlaite thapiakna in Memorial Day kici na nei uh hi. Galkapte Phawkna Ni cihna tawh kibang hi.
Vietnam gamah communist kiukna a lut ding dalna dinga America in a galkap tampi sawla kidona 'Vietnam War' a kici in mipi lungsim lawng mahmah lai a, tuma kum sawm val lai pek pan US President kitelna ah zong Vietnam galkuante min hong kidawk den hi. Tunai a President Bush seppih Colin Powel zong Vietnam galkuan khat hi a, mipi in zahtak mahmah uh hi. Vietnam ah Democracy a om ding deih in a galkap tampi sawl mah leh, guallel in ciah kik uh a, ahi zongin Rambo film ah bel guallel lo uh hi.
Hih Memorial Day ni pen kumpi zum khempeuh kikhak a, mun tuamtuam panin galkap lui te in amau Bike nam tuamtuam - Harley Davidson, Enfield, etc te tawh hong pai in Washington DC ah lampi zuihna (bike rally) nei uh a, muhnop hi, muhnop himai. Kei bang Harley Davidson khawng a taka ka mit tawh ka khatvei muhna ahih manin muhnop kasa a, thupi kasa a, ngaihno te tawh kipuak hialhial na dingin ka iplah hi. Amau galkap luite bel a zi te uh tawh kipua pahpah in, US flag leh amau galkap kipawlna uniform silh in kizui ngetngat uh a, muhnop mahmah kasa hi. A lamdang mahmah khat pen gam itna, gam ading phawkna lianpi a kingaihsun hi mah leh mivom sang mikang kitam muh zaw thamtham a, mivom kimu mello mawk hi.
Tua Bike te tungah tuangin maan ka kizaih a nuam kasa mahmah sam hi (a parking mun ah), naupang kimawl bangin. Amau a bike neite bang maan kilakpih ding cih ciang lungdam siam mahmah uh a, a puan-ak tung vua "Freedom is not free", "Nam Knights", "Some Give All", "Rolling Thunder", etc cih khawng a kigelhte a dawkloh ding lau hileh kilawm liangin ki pose uh hi. Tua lai kigelhte dawksak nuam uh hi. US kumpi in zong zahtakna lianpi pia in amau adingin nakpi takin hun hoih bawlsak in thupi tak in galkapte - gam leh nam adinga tha leh ngal nuntakna piate pahtawi uh hi. Zomi te lungsim bang America ah zong na om thamtham hi.
12. John F. Kennedy hanmual ah ka hawh leh:
A kah toto America - 5: Kennedy Hanmual ah:
12. John F Kennedy hanmual ah ka hawh leh: A thugen minthang vangvang ka phawk hi. "Ka gam in bang hong pia ding ci masa loin ken ka gam ading bang pia masa ding cih kidong zaw in" cih a hanmual ah kigelh a, tua mun ah ka hawh kha hi. A mikang kam in -
"My fellow Americans: ask not what your country can do for you - ask what you can do for your country.
My fellow citizens of the world: ask not what America will do for you, but what together we can do for the freedom of man.
Whether you are citizens of America or citizens of the world, ask of us the same high standards of strength and sacrifice which we ask of you. With a good conscience our only sure reward, with history the final judge of our deeds, let us go forth to lead the land we love, asking His blessing and His help, but knowing that here on earth God's work must truly be our own."
US in President tampi a neih lak pan Lincoln leh Kennedy banga mipite thupi ngaihsut mahmah tuam na tam hetlo hi. Tua banga a thupi sim mahmah uh Kennedy pen galkap hanmual minthang Arlington National Cemetry, Washington DC ah om a, kumsim in Memorial Day ciangin mipi a tul a simin na veh in na en hamtang uh hi. Tua zaha minthang President pen kua tawh kibang ding hiam ciin ka American lawmpa ka dot leh, "Elvis Presley minthan zah mah in a minthang hi" hong ci hi. Kennedy pen President bek hilo in celebrities status a nei hi mawk hi. A birthday ni a Marilyn Monroe "Happy Birthday" sak thu zong a minthang himawk hiven.
A hanmun ah mei kihal in, meikuang leitung beidong a mit nawnlo dingin kikuangsak a, a khanglam ah ama thugen minthang pen (a tungah i gensa pen) suanglaipi tungah ki at hi. Kennedy galna hun a zangnuamte leh a meikuang gei ah a ding dingin mi kigual diudeu a, khat khit khat kipai deudeu hi. Keizong a gei ah ka kigual a, ka hun hong tun ding ngaklah in ka khuadakdak kha liang hi. A meikuang mun ka tun ciangin ka gallam pan Pa Thawng in maan hong zaih in, tua bek mah ka kep ding ka ciahpih theih hong suak hi.
13. Theihloh galkapte hanmun ("Tomb of the unknown soldier"): Kennedy te hanmun veilam ah pai phei in, lui i kan khit ciang a gal mual ah kahto leng a kithei khalo galkapte hanmun kici khat om a, tua mun pen America te in a thupi sim diakdiak khat uh hi. Gal sungah galkap a si, ahi zongin a luang a kimulo, a sihna mun a kitheilo, pawlkhat bang amau si maw hing maw cihzong akitheilo zah donga kimu kik nawnlo leh a thu akithei nawnlo hi a, tua mun ah bang lai kigelh hiam cih leh :
"Hih lai ah Pasian bek in a theih
America galkap
thupina khempeuh tawh kipahtawi in
kisial hi"
"HERE RESTS IN
HONORED GLORY
AN AMERICAN SOLDIER
KNOWN BUT TO GOD"
Hih a kitheinawnlo, a kimukiklo, a kiciamteh kha lo leh a tangthu uh a kithei zom vetlo galkap si te zahtakna minit 5 halta khawngin pia zom ziahziah uh a, i lungsim hong lawng mahmah hi. Tua zahtakna i piak laitak in i khut i awm ah koih ding, tangloin ding ding, kuamah a tu omtheilo ding, tua zahtakna piak a kipat khit nak leh a zoh mateng kuamah ciah khia theilo ding cih dan in zuihding ngeina khat nei uh hi. US gam hutna dinga a nuntakna uh a piak lam uh kithei, ahi zongin amah kua hi hiam cih a kitheilo khempeuh zahtakna a piak uh thupi kasa hi. Ka lungsim ah America galkap hi nuam sing maw ka ci phial ta hi!Tua zah in a i lungsim hong zo mawk hi.
A lamdang mahmah khat pen hih hih National Cemetry ah zahtakna a pia, i Zongeina in gen leng Dai Hawh khempeuh lakah mikangte (whites) tam bel a, mivomte (blacks) tawm mahmah in, a dangte pen khualzinte (tourists) hi deuh uh hi. Tua man in ka lungsim ah America a it taktak, a khual taktak, a zuun taktak nuam pen mikangte bek mah hi hiam, ahitam maw ka ci hi. Nuntakna pia ngam pen tam kha inteh, ahi zongin gam it taktak leh a zun nuam taktak pen a si ngam zah hi khollo ahi tam maw ka ci hi.
Zomi i it taktak leh i zun ding, i khoi ding mah hilo ding hiam cih hong phawksak mahmah hi. It ding, kem ding, khoi ding, zahtak ding....
14. A dang khempeuh ah zong pak khat leh America flag kikoih: Hanmual a dang khempeuh pen khuapi khat sung cia mahmah ding mualtam diadua khat sungah kipehmat phial in kiphut a, a gual tangsak in, a kigamlatna kikimsak dimdiam in, a kikim suangneu hiam, singlamteh hiam kiphut dimdiam hi. Tua hanmual suang khat ciat ah pakbawk khat leh US flag khat ciat kikoih a, thupi mahmah ka sa ziaizuai hi. Tua mun ah pak a kizang khempeuh moto puak za bangzah apha tam aw! US flag bawlna dingin puanthan meter tul bangzah a kikhui tam aw!! Zomi khempeuh puansilh silh khat ciat cingzo phial lo diam?
15. Numei galkapte phawkna: US numei galkapte zong na thuneu hetlo uh a, pasal zah ahi zo kei zongin nakpi takin galdona leh gamsung hutna ah na nasem uh hi. Tua banga a gamkuanna uh a tuamtuam - Vietnam, Korea, Afghanistan, US suahtakna ding kidona, etc ah a sepkhiatte uh pahtawina, phawkna leh zahtakna in Museum khat bawlsak uh a, thupi kasa mahmah hi. Galte mat a suakta kikte tangthu, galkap sungah a lawmte a khuaite tangthu, a gualzo te gualzawhna thu cih bangin a kigelh, a kigen, a maan tawh kilak cih bangin om zihziah a, NASIA LUA hi mai hi.
Zomi, US pai khempeuh in muh dingin hoih kasa hi. I gam leh lei hutna dingin pasal bek hilo, numei in zong semthei hi cih i muhciat theihna dingin.
16. Korean War Memorial, Vietnam War Memorial lam ah:
A kah toto America 6: Korea, Vietnam War Memorial lam ah
John F. Kennedy, US President a suahni in mipi maiah a thugen masak penpen, US in "pay any price, bear any burden, meet any hardship, support any friend, oppose any foe, in order to assure the survival and success of liberty," na ci giap hi. Tua in Vietnam kidona piangsak hi kici thei hi.
Ciamteh ding, phawk dingin a hoih mah hiam thei khang, kido thu, kisim thu pen mihing lungsim ah kiciamteh den hi mawk a, lungsim bek hilo, singkung suangtum nangawn phut in a maimang ding kiphallo hi zen hi. Lamdang cip.
16. Korea, Vietnam War Memorial lam ah: Leitung galpi khatna pek pan THU tawh akidodo khin leitung pen thauvui thautang tawh kipelh theilo a, kilemna, kihotheihna leh kithutuakna a om theihna dingin hinna tampi in sihna thuaklawh hi. Communism leh Democracy aki nawkna mun peuhmah ah a THU bek a kinawk hilo in a mi, a sa bek thamlo thauvui thautang leh gal leh sa kineihna tawh kinawk in, a zo a om mateng in beilo hi. 'Ki akgual khen' cih tamlo a, a lel zawzaw a kihingpiakna (surrender) leitung hi.
Tua banga US in Democracy tangko a, Russia in Communism a tangkona leitungah amau gel mah hong kimaingat in - luidung, mualdungah a kimuhna peuh vuah hong kipumbawh pahpah ta uh hi. Tua banga kibawhna gam nih - Korea leh Vietnam hi. Democracy hoihzaw, Communism hoihzaw a kicih tuah uh ciangin deihna kibanglo pen Zomi te mah bangin hong kilang neih pah gaga uh a, pawl kikhen in, khen tuam kisuah pahpah hi.
June 25, 1950 kum a South Korea ah kitelna om pen North Korea in thukimpih lo ahih manin kitelpha kik dingin ngen a, a ut loh ciangin N.Korea in S.Korea sim phei pah a, kidona piang hi. USA in S Korea singkhuah puak behlap in, Russia in N Korea singkhuah a puah behlap ciangin kidona mei hong am semsem a, July 27, 1953 ciang kilemna neih ding a thukim mateng uh kidona kisumit zolo hi.
Korean War Memorial munpi ah "Freedom is not free" cih suangpek lianpi tungah kigelh a, a gei ah Korea galkapte lim tua laigelhna lam zuana pai bangin bawl uh hi. A khiatna pen galkapte in "freedom" (suahtakna) lam zuan in pai uh a, pawlkhat lampi ah si in, pawlkhat a mun tung hi cihna hi kici hi. A mun ah et ding pawl hi, ahihna zah in gen siam lo ding ihih manin tua zah ci phot ni.
A minthang penpen leh tuhun khangthakte in i theih bat nai pen Vietnam war hi a, 1959 pan kipan 1975 a bei pan ahi hi. Rambo I, II, III te ah kilak a, ahi zongin a tak tawh kilehbulh linlian in (limciinna sungah bel) Rambo in zo den hi. A taktak in bel tuni tanin America te in na a sak mahmah uh Democracy deihte guallelhna kido ahih man hi. Korea banga gualzo pah ding kisa kimlai galkap 60,000 kiim a sih zawh ciangin zong zawh ding lamet omlo ahih manin minsia takin kipiakhia, kidawkkhia zaw uh hi (withdrew cih kammal zang uh, surrender cih kammal zang nuam kei uh).
Vietnam gam pen Leilu (north) leh Leitaw (south) lam gam ciin North Vietnam, South Vietnam kikhen hi. Leilu lam pen Communist gam hi a, leitaw lam pen Democracy gam hi. Leilu lam makai pen Ho Chi Minh hi a, Sen minam hi (Tu laitak Sen kumpi Hu Jintao tawh a innkuan min a kibang hi, Ho = Hu. A Senlai awsuah ah Haw ci-a ging lo in, Hu ci a ging ding hi). Russia gam tawsawn N. Vietnam in US tawsawn S.Vietnam gambup uk nuam ahih manin gal kido a, leitaw lamte in lel uh ahih manin ahuh dingin US galkapte hong pai hi.
US galkapte hong tun tak ciangin Ho Chi Minh in tuma kum 20 hunlai a France kumpi Vietnam gam nusia dinga a hawlkhiat lai vua a gensa mah US te kiangah genkik in, "US in kum sawmnih kido ding acih leh kum sawmnih kidopih ding, kilemna deih a kilem a ut uh leh tuni nitak lam nitum ma in niangtui dawnkhawm dingin niangtui sai ah ka zawn ding hi," ciin na genkhol hi. A gen bangin kum 25 sung khawng hong kido takpi uh hi. Kido khit cianga US kumpi ciamtehna ah 'a guallel mah hizaw mawk hang ei' cih hi mawk hi. A thu saupi omlai.... gen khin zo pak kei ni.
Hih kidona ah US in galkap tampi a khuaite "suahtakna dinga nuntakna piate" ciin VIETNAM WAR MEMORIAL mun ah suanglaidalpi ba'ng tungah a min uh gelh in gual diudeu uh hi.
Hih Korea leh Vietnam galkap phawkna mun pen "Memorial Day" neih sim a galkap tampi Dai Hawh na mun leh Jerusalem kulhpi geia Kahna Bang kici mun ah khitui luang ziahziah banga pasal takpi khitui a luan ziahziahna mun hi mawk hi.
9/11 zawh diakdiak US mipite in suahtakna 'freedom' a thupi dan, kilemna peace a thupi dan tel semsem uh a, tua manin galkap site zahtakna uh khang in, kido hanga kilemna om thu tangko saan uh hi.
But, lets remember this: "freedom is not free!"
A kah toto America 7: Lincoln Memorial, etc
17. Lincoln Memorial: US President 16na Abraham Lincoln phawk tawntungna dinga kilam innpi pen Lincoln Memorial kici hi. Washington DC khuapi sunga National Mall kici mun ah kilam hi. A geel Henry Bacon hi a, a lam a bawl Daniel Chester French hi in, a za nuh Jules Guerin hi.
Hih mun pen Martin Luther King, Jr., in August 28, 1963 kum a March On Washington for Jobs and Freedom hunlai a a thugen minthang, "I have a dream" ("Ka mangmat khin hi," ahih kei leh "Ka mangin mukhol ing," "Mangmat zo ing") cih thu a genna mun hi. Tua a mangmat khit thu pen mivomte in suahtakna ngah ding, mivom mikang kideidanna om nawnlo ding, ci leh nam a kideidanna bei ding, America ah minam khempeuh liangko kikim ta ding hi cih ahi hi.
Tua thugenna ah mihing tul zanih bang kikhawm a, a vom a kang kihel hi. Tua thugenna in President Kennedy lungtang lawng mahmah a, suahtak ding, liangko kikim ding a deih mihing tul za tampi US khua tuamtuam gam tuamtuam pan hong kihel kei leh makaipa a lungkiat ding lau uh hi ci phial hi. Tua thugen pen US khangthu ah thugen hoih penpen lak ah kiciamteh a (2002), a thugen lai a a dinna suangphah zong kum 2003 ciangin kiciamteh hi. Kum 2008 ciang in a khatveina dingin Barack Obama US President kitelna ah kihel thei dingin kilamto zo hi kici hi.
Tua zahta a mipi a hup thugenna mun pen Lincoln Memorial hi.
A omna: Korean War Veterans Memorial,Vietnam Veterans Memorial gei mualtungah kilam hi a, Greek hunlai a Doric temple kici te tawh kibanga kum 1914 a kilam hi. 2005 kum in mihing tulza 30 (3 millions) val in veh in, en uh hi. National Park Sevice te kepna nuai ah kum 1933 pan in omta hi.
A kigelh laimalte: A khuam 36 pha a, khuam khat tungah tua hun a US gam state 36 te min khat ciat tuang hi (tun bel US ah state 50 pha ta). A sungah Lincoln lim lianpi in tungman leh buan, bilat lei tawh kibawl a, tutphah tungah kitu sak in a khut taklam khuttum a, a veilam khahkol hi. A lu tung san ah hih bangin kigelh a:
IN THIS TEMPLE
AS IN THE HEARTS OF THE PEOPLE
FOR WHOM HE SAVED THE UNION
THE MEMORY OF ABRAHAM LINCOLN
IS ENSHRINED FOREVER
(Hih innpi sungah
A hotkhiatsa a gam leh
Mi khempeuh lungsim ah
Abraham Lincoln phawkna
Kiciamteh tawntung hi)
A innpi leitaw lam kiu ah (south end corner) Gettysburg address kici, Lincoln thugen minthang penpen, "government of the people by the people for the people shall not perish from the earth" cih pen kigelh hi (Mipi ading mipi kumpi mipi vaihawmna hih leitung pan bei ngeilo ding hi).
Milim tuamtuam - vantungmite (angels) limin thudik, thumaan, truth gualzo cih lahna; America leilu leh leitaw gam kido pan kilemkik hi cih lahna lim; leh silate suahtakna ngahta hi cih lahna limte zong ki at hi.
Alim omdan: Hih lim kibawltawm (sculpture) ah Lincoln pen Kumpi tokhom tungah kitusak a, a khe taklam madawksak zaw in, a khe veilam nunung zaw a, kalsuan khia ding bangin lak uh hi. Khawllo in paizel ding cih lam genna ahi tam maw.
A mit zeu in a maisuah vak lo a, gim leh tawl hi cih kidawk in, gambup kipawlna innpi Capitol lam en in khuadak sak uh hi. Kipawlkhawmna mun thupi Washington Monument galet in nei hi cih lahna hi. A khut sungah Rom kumpite thuneihna leh thudikna (power and jurisdiction) humcip sak uh a, a tutphah san ah mipite thuneihna lahna ki gelh hi.
Leilu lam ah Lincoln President asep ni a thugen masa penpen kigelh a, leitaw lamah i gensa..... mipi ading mipi kumpi leitung pan bei ngeilo ding.... cih pen kigelh hi.
A mi phawkna bek zong hizah a thupi ci leng a mi bangzahta in a thupi tam?
A kah toto America 8: The White House, etc
Leitungah mihing tenna inn minthang pen hih inn hi a, a kiangah pai a, a gal pan ka et niin ka lungsim ah a tangthu bang hi ding hiam ciin ka ngaihsun kik a, inn ka tun ciangin a tangthu muh theihna ding laibu ka zonga, ka muhna pawlkhat pan hih inn pen kum za nih vala upa ahih lam ka thei hi.
Kum zanih bang beisa a kilam hih White House pen US president inn hi a, a nasepna munpi hi in, a nuai ah a sem pawlkhat nasepna mun zong ahi hi. The White House pen ka omna uh pan minit 15 sung khawng bek in kitung ziau ahih manin ka innvengpa uh ka ci mai hi!
1792-1800 kikal a kilam hih US president inn pen 1814 kumin British tawh kido lai in kihal sak a, a kanglo khempeuh kipuahpha kik in, a za zong kinuh kaang kik a, white paint kizang, tua manin a min "The White House" cih kipia hi. Mei katna vom khempeuh kinuh kaang kik mana Inn Kang kici bek hi masa lo a, tua ma in zong a kaang sa hi mah leh aza a kinuh kik zawh ciang mei katsa hihna pan a kilamthak kikna zahtakna tawh Inn Kang kici hi, aci pawl om hi. A ciil pan White House a kicih masakna pen President masa penpen George Washington zi Martha Custis Washington te inn pen White House Plantation kici hi. President hong sep uh ciang a inn lut masakna pen uh amau tenna inn min mah pia suak uh hih tuak!
A kiang pan gal-et: Kum 2001, 9/11 zawh ciang US gam ah migilo te nasepna hangin suahtakna tampi kihencip a, nidanga White House sung et theih hunte in hong kheng in, a huan sungah kual vak ding zong kikham cip in a kiang pan ki gal-et thei bek hita mawk hi. Dah huai sa'ng. Tua manin kei hawh ni sunsun in zong a kiang nai ah kipai theilo a, a visiting room nangawn uh a pai masa te lut theih zelna hi mah leh kitungzo nawnlo hi. Kei ziakai man hilo a, migilo te nasepna hang hizaw hi, ka ci hi.
Memorial Day ni ma, May 21, 2008 ni in zong a ki et utna ciang ki en theilo hi mawk hi. Ken bel 'muhnop' a kici lak ah kihel ahih cianga, a kongkhak ciang bek lut nuam hilo in, a innsung zong kimu thei leh a ut hiveng. Ahi zongin President pa omna The Executive Residence zong kimulo. Oval Office omna The West Wing leh President pa zi office "Office of the First Lady" kici omna The East Wing zong kimu khalo cihna hi. Moses in Canan gam a galet bang bek hi mawk ei.
United States Capitol: America gambup vaihawm Congress te vaihawmna innpi hi a, Capitol Hill kici na mun, National Mall nisuahna lamah om hi. White House, Lincoln Memorial cihte tawh kigamla lo in om hi. Hih inpi sungah vaihawmna munpi nih North Wing kici leh South Wing kici om hi. NW pen Senate te vaihawmna hi a, SW pen House of Representatives te vaihawmna hi.
A kiangah kipai theilo ahih manin a mai lampan kigalet a, inn lianpi a paak biabua hi lel a, a tungkhum ah US puankhai 4 kikhai a, a khuam golpipi leh a inn vum kiciang viatvuat vukmual banga pak biabua bek kimu hi.
Ni khat ni ciang Zomi te zong hih innpite sungah vaihawmin a tut hun hong tung sam lo ding hiam (Zogam thak a tung Zomite).
A kah toto America 9: Zomi makaite
America ka tun ni pan kipan tuni dongin Zomi makaite thusiamna leh hong deihsakna uh thupi kasa a, kei leltak hong mipi bawl a mi ngeina banga hong hopih, tutpih, ankuang umpih, etc. uh ciangin ka lungdam a, mi banga kamsiam leh mi ading phatuam zong a sem zo lah hilo khat hong thupi bawl uh cih ka ngaihsut ciang 'hih pen Zomi ngeina a bei nailo, a bei ngeilo ding, a bei dinga zong ka phalloh (kei mimal taka ka it mahmah ngeina) ki itna, kikhualna, kideihsakna leh ki angvanna hi' cih ka phawk a; Kalvary pan hong luangkhia sisan hanga itna bucing hong kizomsuak zong hi dingin ka ummawh hi. Tua ahih manin ka angtang mahmah hi. Siam in siam kei taleng ka lungdamna genzawh pak ding ahilote genlo in ka om ding kilawm lo a, gensiam takeileng ka siam bang beek a ka pulak kilawm sa in gen kong sawm hi. Kong 'zawng sing mat' suk gawp leh zong hong theisiam dingin kong thum hi.
1. Tg. Dong Khan Khup, President, Zomi Innkuan Washington DC in hong hopih pah: Pu Vumson, Sia Do Kham leh midang pawlkhatte len masakna gam hi cih i theihsa hi. Tua gam minthang leh nuam, Zomi pawlkhat in pilna, theihna, siamna leh gamtat luhek dan thak a tawkna uh, a sinna uh leh a ciahpihna uh America ah nitak tun in Zomi Innkuan DC sumkem Pa Ngocinthawng inn ah tung ing cih a theih ciang Zomi Innkuan DC makaipipa Taang Dong Khan Khup in a phone mekin hong hopih pah a, lampi ah haksatna gimna ka thuak leh thuakloh thute hong dot zawh ciangin 'cidam in a zang dia dua America hong tung ing ei' ka ci a, 'Welcome to America. Zomi Innkuan DC taangin hong muak hi ing' hong ci a, hih gam ka tun mana a lungdamna thu pawlkhat hong gen khit ciangin kei zong hong hopih mana ka lungdamna ka genpah hi.
Tua bek tawh hunsak lo in 'bang ciangin hun awng na nei tam?' hong ci a, 'tu laitak bel hun awng ka neih laitak hi' ka cih leh 'zing nitak ciang DC downtown ah nitak anne khawm leng ciin hong sam nuam hi ing' hong ci a, ka bil a ka thuzak a takpi mah hiam, ka zakkhial hiam ciin khatvei ka dotkik leh zakhiallo ka hih lam hong gen a, ka lungdamna guntui bang luang hi. Ka lamet bat loh sapna kammal ka zak pen 'lamdang' kasa lianga 'Topa thupha hi' ka ci hi; khangluite in, 'Nung lam sabah' acihte taktak uh himwk ahih manin.
Tawm behlap pak leng. Amah i makaipa Tg. Dong Khup pen tangval lai hi a, a melhoih leh thacing, mikangpau a nungakte in 'fit' a cihte uh hi. Vacancy a om leh omloh pen nungakte in theizaw in um ing, kei hong hilh kei! Pilna lamah electrical engineer hi in, a sepna i theihsiam theih dingin gen sawm leng - Washington DC khuapi sungah meivak leh anhuanna gas khempeuh a hawmkhia, a zuak Pepco kici PHI hi. Amau, elelctric meivak hawmkhia in a mekna a tunglamah a khintoh (on) uh ciangin President Bush tanute in zong limlang maiah a melhoih uh enthei pan hi, kici hi. Meivak hawmkhia kei le uh US khuapi a nungak tampi in limlang maiah kizem theilo ding hih tuak hi!
Anne dinga hong sap nitak in Zomi Innkuan DC sumkem Pa Ngocinthawng leh Nu Cinghzahuai te tawh ama zum (office) ah ka pai uh a, a mun siangtho in inn sang pipi, inn lian pipi tampi om a, US ah internet service lianpi Verizon Wireless zumpi gei hi. A gei ah ka pai phei uh leh ann hong nekpihna ding Hotel lianpi om a, a zom lah FBI Headquaters na hi leuleu in, a pam ah Federal Hall National Memorial kici innpi om hi. Kumpi kikhop lianpipi hih inn ah kinei hi. Tunai diak in Hillary Clinton in US President nomination Barack Obama tungah a lelh niin a campaign officials te tawh kikhopna neiin mipi maiah thugen hi. Ann limtak ka nek khit uh ciangin inn kongkhak tan hong kha a, nipini cianga kimu kik dingin ka kikhen phot uh hi.
Ka nung zakkik ciangin Tg. Dong Khup pen amah leh amah a kiphattawm te pawl hilo a, a nu leh pa minphatna lukhu a khusak, nu leh pa a pahtawi gamtat hoih, laisiam, mipil; Shillong kammal kawm pak leng 'tangvalte etteh, nungakte etcik' a cihzah donga mi hampha hih tuak hi. Zomi makai hih bang i neih hampha hang.
2. Tg. Vung Lian Mang, Secretary, Zomi Innkuan USA in hong hopih: Zomi Innkuan USA makaipipa Dr. Do Kham Kawlgam huihpi nung vil dingin khualzin hi cih US ka tunma in ka thei khin a, ahi zongin amah nung thuap ding makai hoih nei ahih manin lungmuang takin zin hi dingin ka um hi.
Zogam thak USA ka zin thu kuamah zong ka zaksak hi hetlo napi Zomi Innkuan makaite tangzang kasa a, lamet ngam hetloh in Zomi Innkuan USA laiatpi Tg. Mangpi in Tulsa pek pan phone tawh hong hopih vangvang a, "Zomi Innkuan USA minin hong vaidawn ing," hong cih tanghial ciangin ka pute inntual tung mahmah bangin ka lungsim hong innteek pah hi. Makaipipa omlo ahih manin amah mah in hong hopih ahihna thu zong hong gen a, naseppih dinga ka deih pawl hiveh e (ka lungsimin) ka ci pah hi. Zomi te i kalsuanna ah hih bang kithuapna pen khamuanhuai hi ka ci ngam hi.
Tg. Mangpi pen ka muh ngei zong hilo, aman zong hong mu ngei zong hilo, ahih hang' apa sia Rev. Paul Thuam Thang hi cih hong gen ciangin Shillong ah Phuitong Magazine ka bawllai vua a pa teekteek in ama khutgelh linlian tawh Zogam Lapi cih magazine ah suahsak dinga hong khak laiip ka honlaitak khawng ka mitkha ah hong kilanga, ka angtang tuam pah hi.
3. Dr. Do Kham, President, Zomi Innkuan USA in hong hopih: Kawlgam zin hong tung cih ka zak ciang kei mahmah in phone tawh hopih masa ning ka cih laitak ama'n hong hopih masa zaw a, 'mipil leh miteite pen kihopih masa man ngeilo hi' cih khat a kigenzel pen ka phawk hi.
Amah kawlgam zinna pan hong tung tuung hi a, a gim ding, a tawl ding theihsa hi. Ahi zongin makai ahihna zo takin amah tanghial kiniamkhiat in 'USA ah hong muak ung' cih gen dinga hong hopih masak tanghial ciang kisuanlah huai phial hi. Zogam thakah Zomi te polite dan leh thusiam dan, vaidawn siam dan leh deihsakna kicingte ka mit mahmahtawh mu, ka bil mah tawh ka zak ciang 'Zomi hih mahmah nuam lawmlawm e' ka ci hi.
Hong tung tuung ahih man leh a khualzinna gim ding ahih manin 'ki thuza kik ni' ciin mangpha ka kikhak uh hi.
4. Pa Thang Do Hang Hatzaw, President, Zomi Innkuan Florida in hong hopih: "Zomi World Cup USA" kici kumsima US buppi Zomi te kimawlna a zindo tawntung Florida Zomi Innkuante makaipipa Pa Hangpi in zong ka zin thu a zak ciangin a nasep khawl sungin hong hopih a, sau ka kiho man loh uh hangin a hun awng a neih pak sunga hong vaidawnna kammalte leh deihsakna thute in ka lungsim hong tawldam sak mahmah hi.
Hih thu ka gelh laitak in amau omna khua Florida ah ka om a, amau khua ah ka zinsuk nitak Zomi Christian Church (ZCC) ah ka thugen nitak in zong amau biakinn nusia liangin hong kikhawm vangvang a, Zomi Innkuan makaite hong deihsakna tuamtuamte hampha ka kisa hi. Florida ka zin ma in lasak siam ahih lam ka thei kei hi.
Makai tuamtuam, mimal leh pawl min a hong hopih, hong vaidawn tuamtuamte.....
A kah toto America 10: A kilehbulh America
Kilehbulh i cih hang amau ei kilehbulh hong ci zaw tam maw, hehe. Amau muhna ah, 'A kilehbulh Zogam' ihi zaw mai tam maw. Amau bel "American hi ing" ci ziau uh a, Zogam ah bel "Kei tua beh, tua tribe, Zomi hi ing" i kicih bialbual te khawng e, kilehbulh lua hilo ham? Luilam.
Amau 'hun' thupi sa uh a, Zogam ah 'lengla do'; 'zin do na siam un' cih pen thupi kisa hi. Leiba in moto, inn, vanzat tampipi kingah a, Zogam ah inn sak inn khang nangawn lei kibasak ngamlo hi; muh kik lamet om khollo ahi tam maw. Hih bel Zomite zia hi kei in Zomite Kawlte tawh i ten khop, sungh leh pu, mak leh mo khawnga i kilak zeel zuul cianga Zomite in i meltheih thak gamtat gina lo hi. A manlanga i nusiat dinga hoih gamtat zahpihhuai, zumhuai leh mi hong gimneihna ding omdan hoihlo ahi hi.
Amau kam tawh a gen uh thu khat peuhpeuh pen 'takpi maw' cih kik kulse loin a takpi mah uh hipah a, zuau kihello hi. Zuau gen cih khatvei hong theih nak uh leh mihing ngeina in hong sim nawnlo in hong hopih dan uh kilamdang lian a, lawmhoih suah ding bel Phulum aksi laksawm mah abang hipah hi. Tua manin mikanggam ah 'kamsiam' kitamzatlo a, 'thuman' kitamzat zaw hi.
Zomi a tam mahmahna India khuapi Delhi ah Bawng hon leh moto leh mihing in lampi kituh a, a pai masa ding, lam kaan masa ding kiphu nuaunuau uh hi. Zogam thak America ah bel Bawng hon cih thadah gan kimu lo, vok leh akte khuasung vak cih zong omlo, amau omna ding mun ciat ah om uh a, a tuam tek in inn kilamsak a, kikhum tuam hi. Tua manin khuasung pen mihing tenna hi a, gan vakzauna ding hilo hi. Gan ek leh zun tawh kinawngkaisak lo uh hi.
A nitna mun ah a nit hangin a siangthona ding munte siangtho a, 'mikanggamte siangtho uh' kici se hi. Gamdang zin peuhmah in tua mah gen thupi in nei den uh a, a taktak in bel a nitna mun ah niin mahmah veve ding uh hi. Amau tua niin te hong musak lo uh hiven. Kei adingin bang phatuam vanglak ---- kha guk sung ka khedap nin nailo, nawtsiang kul nailo tazen hi ei! Zogam hong paal ciang tua sang siangzaw dingin lamen ing.
America te hau mahmah uh hi, mikim in amau moto hawl ciat uh hi, inn khat ah moto 4 leh 5 khawng nei uh hi ci a i gengen pen amau a hauhman uh hikhin pah tuanlo a, a cihtakna hang uh ahi zaw tam ka cihsak hi. Hauhna i cih pen lasiam, kimawlsiam, laisiam, mipil i cih mah banga a tuam pian ngiat hi a, mikim neih hi tuanlo hih tuak hi. Moto tam nei khempeuh 'mihau' kici tuan pahlo a, moto neilo khempeuh 'mizawng' kici pah tuanlo hi. Ahi zongin tua bang a neih theihna uh pen a 'cihtak man uh' hi ka ci kiknuam hi. Kumpi sum tawh ei moto ding lei cih bang omsak lo uh ahi tam maw. India khawng ah officer neu pan kipan a lianpen donga a kigen kiukiu thei khat pen 'sum golhguk lakna' (corruption) hi. Officer tunglo te nangawn in tua 'gu' pen dawn kha uh ahi tam maw. Sum siangtho lo neihna, lakna, ngahna pen hih America gam ah kizalo ahi tam maw. A om zong LS in "Baal mai ah a kun ngeilo mi siangtho..." a cih banga mi siangtho tampite hangin agam sungah khantohna hoihtak in kalsuan a, mi kimin a sep thaman a diktak in ngah hi ding hi. Tua manin sum nekguk omlo in mite in moto 4, 5 khawng nei ziahziah lel uh hi. Thanuam taka nasep gah ne uh hi.
Fashion lamah, designer dresses a silh tam a, Zomite lak ah bel Lamka khawng pan a khuamu masa leh a neizaw deuh pawlkhat in designer dresses a silh uh leh cih loh a zang tam nai kei mawk leng kilawm. Christmas kuan cianga i nute, i nite, i sanggamte khawngin 'second hand' (thak) hong teelsak uh pen i puanthak neih sunsun khawng a hi kitam lai ahih manin 'designer dresses' zang tam nailo i hi tam maw ciing. Lawmte bel ei hong phawklo in a vakna ding, a kikhopna ding, a nasepna office ah silh ding, lawm leh gual kiangah hawh ciang silh ding cih bangin kizepna ding a deih bangbang in khuisak uh, design sak ziahziah uh himawk ei.
A annek uh lah protein tam, vitamins lah hoih, calorie lah a hoih bek... a lim lah lim lai...... hlip... hlip... hlip... Maiteh tui-awm 'limlang meh' sang bel gilvah baihzaw thamtham. Voksa, Bawngsa lak ah e'n lim i sak a thau tata amau nelo (ne ngamlo, a thau khak ding uh lau, thau leh natna ngah ding lau, natna ngah leh sawt a nuntak loh ding uh lau.... mikangte zong hangsan khin tuanlo zel uh hi ei...), ei lim sakloh, 'C = ci omlo, sa limlo' i cih bangin ne se uh hi. Damsawt i sawm dan a tuam ciat hi ei.
I kibatlohna tampi om. A kilehbulh tampi om. En kilehbulh i cihte amau hoih nasa uh, ei hoihsakte amau kilehbulh nasa mahmah thei inteh.
Amau suakta uh, ei bel koltang hang. Amau suakta tak in amau pau mikangpau, spanish pau (Spanish te pen Zogam thakah Zomite in min khat na neisak uh a 'Benete' kici hi, amau Be duhlua uh ahih man in, a an nek khempeuh vuah Be kihel a, Benete kici hi), etc suakta tak in zang ziahziah lel uh hi. Amau ngeina ciat mah thupi bawl in kem uh a, a khantoh zelna dingin zong hanciam uh hi. Zogam ah bel Zomi pawlkhat Kawl long ok, Kala long ok, etc cih bangin om a, Zopau a pau ding zahpih in Kawlpau, Kalapau (Vaipau), etc khawng pau duaiduai sese uh hi. Pau dang a sin zah uh Zopau kisin leh siam veve dingin up huai. Zomi a zumpih zah uh Zopau, Zolai a theihloh uh zumpih leh midangte in a neumuhna uh kiamtuam ding hiven, na ci hia? Guai, kua in Zomi te Kawl long ok suut sak ding? Kala long ok kua in suut sak ding? Zomi long a ok lote kua in Zomi long ok sak ding??? Inn gua hah masa ding maw gam gua hah masa ding?
Zogam thak i tun ziahziah pen i suahtakna ding maw, i manthanna ding? Zogam leh America a kilehbulh bangin i minam hihna zong i lehkhup khak ding dahhuai kha ding hi. I koltanna gam pan suakta khin a i suahtakna i zatsiam kei a, i koltanna long mah i oh oh lai leh bel i suahtak a meetna om tuan khollo ding hi.
Na suahtak leh suaktate bangin gamtang in,
Na suahtak kei leh suakta dingin hanciam lai in,
Zomi te kua mah nuai ah kuun ngeilo a,
Kuamah nuaiah ki-ap ngeilo hi,
A pumpi a suakta kei zong a lungsim suakta tawntung minam hi.
Tua pen Zogam leh Zogam thak leh Zogam thak hong pianglai ding a kilamdanna, a kilehbulhna hi.
A kah toto America 10: A kilehbulh America
Kilehbulh i cih hang amau ei kilehbulh hong ci zaw tam maw, hehe. Amau muhna ah, 'A kilehbulh Zogam' ihi zaw mai tam maw. Amau bel "American hi ing" ci ziau uh a, Zogam ah bel "Kei tua beh, tua tribe, Zomi hi ing" i kicih bialbual te khawng e, kilehbulh lua hilo ham? Luilam.
Amau 'hun' thupi sa uh a, Zogam ah 'lengla do'; 'zin do na siam un' cih pen thupi kisa hi. Leiba in moto, inn, vanzat tampipi kingah a, Zogam ah inn sak inn khang nangawn lei kibasak ngamlo hi; muh kik lamet om khollo ahi tam maw. Hih bel Zomite zia hi kei in Zomite Kawlte tawh i ten khop, sungh leh pu, mak leh mo khawnga i kilak zeel zuul cianga Zomite in i meltheih thak gamtat gina lo hi. A manlanga i nusiat dinga hoih gamtat zahpihhuai, zumhuai leh mi hong gimneihna ding omdan hoihlo ahi hi.
Amau kam tawh a gen uh thu khat peuhpeuh pen 'takpi maw' cih kik kulse loin a takpi mah uh hipah a, zuau kihello hi. Zuau gen cih khatvei hong theih nak uh leh mihing ngeina in hong sim nawnlo in hong hopih dan uh kilamdang lian a, lawmhoih suah ding bel Phulum aksi laksawm mah abang hipah hi. Tua manin mikanggam ah 'kamsiam' kitamzatlo a, 'thuman' kitamzat zaw hi.
Zomi a tam mahmahna India khuapi Delhi ah Bawng hon leh moto leh mihing in lampi kituh a, a pai masa ding, lam kaan masa ding kiphu nuaunuau uh hi. Zogam thak America ah bel Bawng hon cih thadah gan kimu lo, vok leh akte khuasung vak cih zong omlo, amau omna ding mun ciat ah om uh a, a tuam tek in inn kilamsak a, kikhum tuam hi. Tua manin khuasung pen mihing tenna hi a, gan vakzauna ding hilo hi. Gan ek leh zun tawh kinawngkaisak lo uh hi.
A nitna mun ah a nit hangin a siangthona ding munte siangtho a, 'mikanggamte siangtho uh' kici se hi. Gamdang zin peuhmah in tua mah gen thupi in nei den uh a, a taktak in bel a nitna mun ah niin mahmah veve ding uh hi. Amau tua niin te hong musak lo uh hiven. Kei adingin bang phatuam vanglak ---- kha guk sung ka khedap nin nailo, nawtsiang kul nailo tazen hi ei! Zogam hong paal ciang tua sang siangzaw dingin lamen ing.
America te hau mahmah uh hi, mikim in amau moto hawl ciat uh hi, inn khat ah moto 4 leh 5 khawng nei uh hi ci a i gengen pen amau a hauhman uh hikhin pah tuanlo a, a cihtakna hang uh ahi zaw tam ka cihsak hi. Hauhna i cih pen lasiam, kimawlsiam, laisiam, mipil i cih mah banga a tuam pian ngiat hi a, mikim neih hi tuanlo hih tuak hi. Moto tam nei khempeuh 'mihau' kici tuan pahlo a, moto neilo khempeuh 'mizawng' kici pah tuanlo hi. Ahi zongin tua bang a neih theihna uh pen a 'cihtak man uh' hi ka ci kiknuam hi. Kumpi sum tawh ei moto ding lei cih bang omsak lo uh ahi tam maw. India khawng ah officer neu pan kipan a lianpen donga a kigen kiukiu thei khat pen 'sum golhguk lakna' (corruption) hi. Officer tunglo te nangawn in tua 'gu' pen dawn kha uh ahi tam maw. Sum siangtho lo neihna, lakna, ngahna pen hih America gam ah kizalo ahi tam maw. A om zong LS in "Baal mai ah a kun ngeilo mi siangtho..." a cih banga mi siangtho tampite hangin agam sungah khantohna hoihtak in kalsuan a, mi kimin a sep thaman a diktak in ngah hi ding hi. Tua manin sum nekguk omlo in mite in moto 4, 5 khawng nei ziahziah lel uh hi. Thanuam taka nasep gah ne uh hi.
Fashion lamah, designer dresses a silh tam a, Zomite lak ah bel Lamka khawng pan a khuamu masa leh a neizaw deuh pawlkhat in designer dresses a silh uh leh cih loh a zang tam nai kei mawk leng kilawm. Christmas kuan cianga i nute, i nite, i sanggamte khawngin 'second hand' (thak) hong teelsak uh pen i puanthak neih sunsun khawng a hi kitam lai ahih manin 'designer dresses' zang tam nailo i hi tam maw ciing. Lawmte bel ei hong phawklo in a vakna ding, a kikhopna ding, a nasepna office ah silh ding, lawm leh gual kiangah hawh ciang silh ding cih bangin kizepna ding a deih bangbang in khuisak uh, design sak ziahziah uh himawk ei.
A annek uh lah protein tam, vitamins lah hoih, calorie lah a hoih bek... a lim lah lim lai...... hlip... hlip... hlip... Maiteh tui-awm 'limlang meh' sang bel gilvah baihzaw thamtham. Voksa, Bawngsa lak ah e'n lim i sak a thau tata amau nelo (ne ngamlo, a thau khak ding uh lau, thau leh natna ngah ding lau, natna ngah leh sawt a nuntak loh ding uh lau.... mikangte zong hangsan khin tuanlo zel uh hi ei...), ei lim sakloh, 'C = ci omlo, sa limlo' i cih bangin ne se uh hi. Damsawt i sawm dan a tuam ciat hi ei.
I kibatlohna tampi om. A kilehbulh tampi om. En kilehbulh i cihte amau hoih nasa uh, ei hoihsakte amau kilehbulh nasa mahmah thei inteh.
Amau suakta uh, ei bel koltang hang. Amau suakta tak in amau pau mikangpau, spanish pau (Spanish te pen Zogam thakah Zomite in min khat na neisak uh a 'Benete' kici hi, amau Be duhlua uh ahih man in, a an nek khempeuh vuah Be kihel a, Benete kici hi), etc suakta tak in zang ziahziah lel uh hi. Amau ngeina ciat mah thupi bawl in kem uh a, a khantoh zelna dingin zong hanciam uh hi. Zogam ah bel Zomi pawlkhat Kawl long ok, Kala long ok, etc cih bangin om a, Zopau a pau ding zahpih in Kawlpau, Kalapau (Vaipau), etc khawng pau duaiduai sese uh hi. Pau dang a sin zah uh Zopau kisin leh siam veve dingin up huai. Zomi a zumpih zah uh Zopau, Zolai a theihloh uh zumpih leh midangte in a neumuhna uh kiamtuam ding hiven, na ci hia? Guai, kua in Zomi te Kawl long ok suut sak ding? Kala long ok kua in suut sak ding? Zomi long a ok lote kua in Zomi long ok sak ding??? Inn gua hah masa ding maw gam gua hah masa ding?
Zogam thak i tun ziahziah pen i suahtakna ding maw, i manthanna ding? Zogam leh America a kilehbulh bangin i minam hihna zong i lehkhup khak ding dahhuai kha ding hi. I koltanna gam pan suakta khin a i suahtakna i zatsiam kei a, i koltanna long mah i oh oh lai leh bel i suahtak a meetna om tuan khollo ding hi.
Na suahtak leh suaktate bangin gamtang in,
Na suahtak kei leh suakta dingin hanciam lai in,
Zomi te kua mah nuai ah kuun ngeilo a,
Kuamah nuaiah ki-ap ngeilo hi,
A pumpi a suakta kei zong a lungsim suakta tawntung minam hi.
Tua pen Zogam leh Zogam thak leh Zogam thak hong pianglai ding a kilamdanna, a kilehbulhna hi.
ZONET
A kah toto America - 1:
Sia Job Thawngno in, "America pen a 'kah' lamsang ahih manin kiamsuk ngeiloin kah toto a, India pen a 'diah' lamsang ahih manin khangto ngeiloin kidiah tawntung hi. Kei pen India ah bangzah vei hiam ka zinto ngei a, ahi zongin 'gamdang pai' hong kici ngeilo hi. America zinte bek 'gamdang pai' kici se hi" ciin Lamka hong zinlai in gen hi. Hi kasa mahmah hi. Ahi zongin tua a gen khit ciang Siapa hun khat sung CP te lenna gam lam zin khin ahih manin tun bel a lawmte in zong 'gamdang pai hiteh' a cihta ding uh lamen ing (theisam keng). 'Inn ka len tiang sava ti veve tong' a cih uh leh bel Siapa gamdang pai kici nailo maithei hi.
Phamawh kei e 'gamdang pai' a kicih kei leh zong, gamdang pai hi veve ahih ciang. Zomi dan ci mai ni. Zomi te ngeina, Zomi te lungsim ci zaw ni. CP te lenna gam ah lawmte khat in a gen ka lungsim ah tham den hi. Naupang te kimawl ci, galkap kineih. Khat in, "Kei a bu" a cih leh a lawm dang khat in, "Kei a uk" ci" ci pah hih tuak hi. A khuak tai peuhmah kici zaw lai hih tuak! Tua pen Zomi te LUNGSIM LIMLANG hi leh kilawm kasa hi. Dik, maan, true... mahmah ahih manin.
Siapa kammal khat pan Zomi te LUNGSIM pawlkhat hong dawk va kiau ahih manin i kibawlphat ding, i ngaihsut phat ding pawlkhat om hi lo hiam ka ci hi.
Le, tua lam i gen nop masa hilo a, i maban zop sawm dih ni.
Khat veivei kei leltak khualzinna khawng bang thupi hiam, mi zong khualzin a kuamah in bangmah gelh lopi uh ciin ka kisuanglah pian zel a (Kawl lungsim tawh Zolai simte adingin ka aana pian zel a.... ciin na simsak un, he he..), ahi zongin kei pen lawm leh gual min nangawn sawtpi a ciamteh theilo, mun min leh khua min zong sawtpi a ciamteh theilo ka hih manin tu in lai tawh gelh kei leng maimang mai ding ahih manin cihtaak ta kei leh ka siambang in lai tawh kem ning ciin mit kham pipi in ka hanciam hi. Laigelhpa khat in, "Numeite in amau sanga a kithupi bawlzaw, a kikin bawlzaw na' khat peuhpeuh a hazat uh theihsiam huai a, a ngeina hi," ci a, hih lai ah numei a cih ciang a ngaihno, a zi a genna hih tuak hi. "Tua manin ka zi in phunlo paulo a ka laibu gelh hong zawhsak manin ka lungdam hi. Amah sang ka kinbawl zawk dai dide a a hazat siam manin ka pakta semsem hi," ci hi. Tua pa in kum 10 sungin laibu bu 10 val hawmkhia zo hi!
1. Why America? Bang hanga America thupi bawl tuam se. Bang hanga America minthang diak se hiam?: Bang hanga America thupi se hiam? Bang hanga Amerika kici lo a America kici hiam (ci leng bel Zolai gelh dan ding tuamtuam a ngaihsunte buai pah lian ding hi). Bang hang a 'kei ka hi' a kici khempeuh in America zuan se hiam? Bang hanga a nei leh a hau masa peuhmah in America lunggulh masa uh hiam? Bang hanga Zomi te America tung hiam? Bang hanga mikangte Zogam ah hong pem lo a, Zomi te bek hilo leitung minam khempeuh America ah pem nuam uh hiam? Bang hanga gamdang kumpi peuhmah in a tate sangkahna dinga America tel masa hiam?
Tu laitak India Prime Minister Manmohan Singh tanu te America ah om hi kici hi. Sangkah in nasem in tengsuak lel uh hi. Singapore a biakinn lian bel leh pawlpi mi tam nei bel City Harvest Church kici a, tua ah a pastor pa uh zong a zi leh tate US ah om sak in amah in CP te lenna gam ah pastor sem hi kici hi. Tua mah bangin Zomi lak ah zong a khuamu masa, a hau masa, a khuasuak masa te in leitung minam dangte mah bangin US mah tate khanna ding, tate sangkahna dingin hanciam uh hi. Tate itlo kuamah omlo hiven maw!
Tua zahta a thupi America hi. Thupi sa lo i om khak leh zong phamawh kei. Ahi zongin ka neu thumangmawh a la khat ka phawk om - "a omlai teng kuamah ngaih loh teng." Leitung mihau, mipil, misiam leh khua mu masa, mit keuh masate in thupi leh belhtak a sak uh gam nuam hi a, a na zuatna gam uh ahih manin ei ngaihsutna leh amau ngaihsutna a kibanglo, "sangkahna kibanglo ci mai ni." Kei zong ka muhna ciangciangah thupi kasak nai loh hang thupi asa te thupisakna a muhpih nailo hi kha ning ka ci hi. Zomi Nam Ni kikhopna ah nungak melhoih muh zial bang hilai a, Khuado Pawi ciang tonpih tutpih theihna dingin a lungsim tawngah kullut (bu bawl) kullai bang ka hi hi.
2. Vanleng tung pan America kimu: Cingno te lenna gam ka nusiat zawh uh nai 10 valta, tuipi leh meipi bekbek a kimuh zawh zong sawt zo, lamet loh in leilak hong kidawk a, mual leh guam ahi cih a kitel ciangin vanleng sunga vanleng lampi lahna Navigator ci uh hiam aw ka et leh Canada gam a kigalmuh na hi leltak hi. Canada pen ZONET pu Pa Gin Mang te tuallenna gam hi. Vancouver khuapi tungsan ding khawngah ka len laitak un, 'vuk kiatna leh huihvot nung hiauhiauna hi' ci a Taiwan omlai a Canadian lawmte hong gen gam himawk veh ka ci hi. Leitung bup map pan en leng Pu Zam King Mang te huansak tawh kibang ziau hi.
Canada hoih si e maw ciin ka tutna vanleng tohlet pan ka khuadak laitak in Navigator in Canada gamgi pel suk in USA gamsung kawkta a, a gam hoih dan kilamdang tuam tawh kibang liang hi. Zanglo lian pipi kiphah ziaizuai a, lamzik sau pipi kikhawh zeza hi. Minnesota, Chicago, Detroit, Washington DC, New York, etc cihte khawng hong kidawk a, mun tampi ah Bual tui kicing kimu thei a, America gam thupina neucik ki galmuh ta cihna hi. A mu kha peuhmah in encim lo, a tung kha peuhmah ciah kik hamsa sa, a tengsuak kha peuhmah zongsang akicih pen a lamdang hilo a, 'a mu nailo peuhmah in a muh nop ding gam thupi hi mawk mah veh e' ka lungsim in ka ci hi.
Minnesotta kipel suk, Wisconsin tung khawng a kitun ciangin mual leh tui kituahna 'Beach' a cih khawng uh kigalmuh in a hing dipdep leh a dum kiaikuai sing leh tui te etlawm pha diak a, Milwauke khengsuk vangvangin Detroit vanlengtual ah tu dingin ka kithawita uh hi. Meipi kai ahih manin Detroit khua sung kimuh theihna tamlo a, meipi lak ah vanleng niamsuk diaidiai in meipi a phul ciangin kisinggawp ahih manin ka pam a tu mikang nungak melhoih mahmah te (Zolia te zaha hoih bel hi kei uh) awng khia kha uh a, "awiiii........" mah ci vangvang sam uh hi (tua tak ciang mi tampi in amau lam en duamduam uh)! A lauh ot uh lamdang a sa hi diam, ahih kei leh Zopau a 'awiiiii...' a cih khiat vengvang uh lamdang a sa uh hizaw diam, thei khang.
Detroit khua pen tu nung deuh a Ph.D. (Political Science) ngah Lia Dimkhek omna khua hi. CP te lenna gam pan ka dinkhiat ding laitak in tua thu hong kithang ahih manin ka maingal tuam mahmah hi. Vanlengtual ah hong na dawn kha tam bang ka ci kha lianga, ka kideihpiak tazen hi, lawlawm song. Hong mawhsak kei un, 'kong na dawn ding uh hiam, i kimu thei diam?' a ci zong om kha mai thei ahi, no theilo, he he....
3. "Welcome to America": "Welcome to America, and we wanna show you the city" ci a thu pulakna ka zak khit uh ciang Detroit khuapi tungah vanleng tawmvei vial len kawikawi a, lampi siangtho tak, moto Bawng hon banga kizui ngetngat, inn tampi khuaibu banga kigual tiltel kimu thei hi. Vanleng tual mahmah kidawk nailo a, luipi tawh a kibang tui kicing deda kimu den hi. Khuapi tungah lengleng in a kiu khat ah khuapi beita cih ding ciangin vanleng pei in lei zutkha a, a kha kising in, a awm bing heethaat a, America leitang a kitung hi lel tak hi.
Cingno te lenna gam bangin vanleng na tam mahmah lo a, lamdang ka sa hi. America pen thupi lua mahmah ding, vanleng zong tam mahmah ding, a mun zong siangtho mahmah ding cih upna tawh tung ka hih manin ka upmawh bangin mu pah zuahzuah lo ka hih manin lamdang ka sa sim hi.
Ahih hang a pam lam ka tai phei uh leh ka vanleng uh a khawlma in Bawng hon khumkhop mahmah banga kigual vanleng ka mu phei phei uh a, wow... wow... ka cici mai ta hi. America te in leitang lian nei lel uh ahih manin vanleng tual khawng ciil bawl vetlo in lianpi zik deda uh a, a tukna, a lenkhiatna, a koihna cih bangin a tuamtek in mun gam lapipi ah a koih uh na hi zaw hi. Cingno te, CP te lenna gam te ah bel leitang deihzah a zat ding neilo uh ahih manin na khempeuh zek bawlzaw uh hi ding hi.
A kah toto America - 2:
Suahtak na ut hiam? Na dikna (rights) na gum nuam hiam?
4. The Land of the free, and the home of the brave: Leitunga ah a hau masa, a pil masa, a hithei masa peuhmah in tate sangkah dinga a sawlna gam uh America hi mawk hi. India gam ah Zomi tampi tenna North East India pan nu leh pa in amau hihtheih khomkhom in a tate uh Shillong, Delhi, Bangalore, Mumbai (Bombay), etc te ah sangkah dingin kuankhiasak uh hi. Nu leh pa hihtheihna tawh kituak in a gamla tungzo deuh om a, a gamla tungzo lo zong om veve hi. Tua banga kitaitehna leitung ah America a tawpna hi. Mite tun theih tawp hi.
Bang hang hi ding hiam i cih leh America pen mihingte suakta taka nuntak theihna gam, hangsan taka thudik thuman a kigupna gam, a hoih peuhmah a kithupi bawlna gam, 'the land of the free and the home of the brave' ahih man hi, kici hi. A tom in gen leng American Dream na delh theihna gam hi. Mihing khat in a nuntak sunga a hih ut penpen a hih theihna dinga suahtakna a neihna gam hi. Khut kihensak lo, kam kihumsak lo cihna hi.
5. Detroit ah nai nih sung: Vanlengtual ah mikang, mivom, misan, mieng, a tuamtuam kileh mai'mai'te lakah kei zong vandak kawm ka lu hen'toin ka pum ka tholh phei a, ka khe khaito in ka khut ka vik phei a, ka mailam saupi en in ka pute inntual tung bangin ka vandak pah gaga sam hi. A dung leh vangah nektheih namkim, muhtheih namkim, aw.... nuam tei ei..... Taklam hek leng vanleng bebek kigual demdam, veilam hek leng mikang nungakno Zolia te zaha hoih phialphial nui hiuhiau a tukhawmte..., a thau a gawng, a khang a moi.... vanlengtual zong lianzo sa lawmlawm ing. "Tunkim ni hiam?"*** kici phial takpi hi!!
[*** Nidangin sanggam .....te pawlkhat khua neu pan Phaipi (Imphal) ah zin uh ci, Phaipi khuasung a tun uh ciang mihing tam sa lua, amau khua lamah Kikhoppi khawng ciang bek a mipi tam ahih cianga "Tunkim ni hiam?" ci uh hi ci. A khiatna pen mi tam sa lua in Kikhoppi om a, Kikhoppi tunkim ni hiam cihna hi. Shillong omlai lawmte hong hilh hi.]
6. Detroit pan DC ah mithau mahmah khat tawh tukhawm: Shillong sangkai lai in mi thau piante (a diak in nungak) kimu leh 'a nu leh pa in vakzo ahih manin hampha uh hi' ciin lawmte tawh ka holim ngeingai zel uh hi. Tua pen ko Mizogam pan khangkhia te cimphawng hi a, a taktak zong hi tuanlo hi.
Detroit vanlengtual ah vanleng tuang dinga ka kigual dimdem uh leh ka nung pek vuah pasal thau pha mahmah khat zong hong kigual a ka pianzawh ka mi muh lak pan lian bel lai dingin ka um hi. Vanleng sung ka lut tak uh ciang ka tutna kiangah hong pai pheiphei a ka kiangah hong tu mawk hi. Kalai, kalai! Ei bel mikang gam kizin hi mawk ahih ciang mikang nungak a hoihsim hiu hiau khat khawng tawh tukhawm leng kidah hetlo ding kimlai.... huiha. Nai nih sung ka pianzawh mihing ka muh lakpan a lianbel tawh tukhawm in leitunga thunei penpen President Bush inn kiang ka tung sam hi. Tua pa liat dan pen pasal nih in kikawi zo lo maithei hi. "Muhnop" i cih pen mihing zong na hi veve mawk ei guai.
7. Pa Thawng leh Nu Kok in hong dawn: A kah toto America vanlengtual ah Free Phone service om ding ka sak pen na omlo a, omlo ahih manin phone card USD 10 tawh ka lei leh local call khatvei, international call khatvei ('hello darling....' kici man bek) bek mah kizangthei a, bei ziau hi. Vanlengtual pua lam ah USD 10 lei leng local calls 20 val, international call zong .... I miss you... cih khawng zong kigen man thamtham hih tuaks. Tua manin 'land of the free' ah a free tam mahmah khollo tawh kibang. Theitel sam keng, kan lai ni.
"Pa Thawng, cidam in Dulles Vanlengtual hong tung ing ei" ka cih leh Pa Thawng in, "tawmvei na ngak pak aw" hong ci a, khuaphelep sanga manlang zaw in hong tung in ka gei a nungakno thum amau dawn ding ngak-a tute nusia in vanlengtual pua lam ah ka kisawnkhia uh hi.
Lamdang kasak mahmah pawlkhat pen van sawnna ding leng (trolley) saap kul (hire, paid); police, customs checking omlo; hong dawn dingte ngak kawma tutna ding tutphah kikoih se lo; mikang gam zin ciin mivom vive kimu den! Vanlengtual a nasemte bang India mi hileh kilawm (vai mel) tam mahmah. Pasal papi khat a tha hoih mawhlo, a mel zong Asian, a ngo pian khat in hong enen hong enen a, hong ngai pian ahi tam maw ka ci hi. Tun ka nungngaihsut kik ciang Zomi te melhoih hong sa hilel lo diam ka ci mai ta hi.
8. A lungzuanhuai zan khuamial: Pa Thawng leh Nu Kok tawh vanlengtual pua lam, amau moto omna lam ka zuat uh ciang nitak khuazing ding kithawi ta a (America ah ni tum hak mahmah hi), airport transport car tung pan ka kum khiat uh ciang vanlentual mai ah moto a dim a kiphah zeizai ka mu a, tua lak ah Zomi te moto zong bangzah hiam na om mawk hi. Topa in Zomi te hong lamsang a, Amah eite tungah hoih hi ka ci nuam hi. Tua banga moto khawlna lam zuan a ka pai pai laitak un khua hong zing deuhdeuh a, vanleng tung pan Washington DC leh vanlengtual kim leh pam teng akimuh theih bangin khua kimu nawnlo hi. Lungzuanhuai a, lungleng huai hi.
Tua sanga lungzuanhuai zaw zan in hong ngak a, gen khiat ngam loh lungzuanna tawh ka kidim hi.
Pa Ngocinthawng pen Pu Vumson, Ph.D. nau hi. Pasian thupha sanga ka laisimna ka zawh ciang a' lungdamna leh hong pahtawina a 'ka behpa hi teh' hong cih kiau hanga kei naupangno lawpna leh lungdamna tawh kidim a ka omlaite ka phawk a, pupa theihloh vaigam IIT Kanpur ah lungzuang taka ka omlai a thanuamna leh lametna saupi hong piakte ka mangngilh kei hi. Ahi zongin maitang kituah a 'lungdam' cih kammal bek zong kiho thei nawnlo ding cih ka ngaihsut kholh ciang kua theihloh in inn tun ding ka kihta mahmah hi. Tua lungzuanna in vanlengtual leh inn kikal gamla sak sem a, hih lai ka gelh ding zong ni tampi in ziakai sak lailai hi. Inn ka tung takpi uh a, amah na omlo hi. A innlui Riverdale ah ka hawh a, amah a tak in muh ding omlo a, a maan (photograph) bek mah muh theih dingin kisuang a, ngaihsutna kicing neithei ciang adingin lunglenhuai khuangaih huai hi. A tupa Otilio mopawi New York khuagei New Jersey ah ka pai a, amah na om tuanlo hi. Hih bang hun thupi ah a pu in a tu uap nuam dinga, a tu in zong a pu phawk dingin ka ummawh hi. Ahi zongin Topa gelna kinial theilo cih i Lai Siangtho ah i mu hi.
Zomi te'n amin i theih masak, i min ding leh i mailam ding ama hihtheih ciangciang ah a khual, a sem leh a hanciam hi a, maitang kimu a kam kumkhawm dingin ka lunggulh penpen na hi tawntung hi. Ahi zongin mihing gelna leh mihing bawlpa gelna kibang lo a, i nuntakna zong Ama khut sungah om ahih manin Ama hunzeekna kiheithei vetlo hi. Topa kiangah leitung gimna haksatna leh dahna kahna te phawk nawnlo in hong khawlsan a, khamuang takin a kha tawldam hen.
9. "Buhsih leh Sa" mah lim penpen: Zomi te in "Buhsih leh Sa" mah lim kisa penpen hi. May 20 ni Nikhat pumpi makhelh dinga ka leng vangvang zawh uh ciang kimakhelhzo takpi a, ahi zongin gilpi sungah antak tam nawnlo hi ding hi. Zomi te an mah kiduh pen hi. Tua nitak inn lum ah Buhsih leh Sa mukvun nel pian-a ka nekkhop taktak uh bel 'dam man om' a cihte uh hi a, ken bel 'America zinman om' ka ci hi. Zogam thak ah Buhsih leh Sa na omzaw thamtham a,
Vaimim ciim zong khamzo lo,
Gatam ciip bek mah petpet ing,
cih tawh kilehbulh lian hi.
A kah toto America - 3:
Na vengte it in. Nang na ki it bangin na vengte zong it in. Vengte tawh kido sangin khua sagih tawh kido ding tel-huaizaw......
10. Ka vengpa uh leitungah thunei pen hi: Leitung ah a kithupi sim mahmah khat pen ka vengpa uh hi. Ka vengpa uh hih ding mipil, misiam, mihau, khanglui pau a 'kei ka hi' a kicite kituhna thupi hi. Tu laitak a ka innvengpa uh President Bush pen tukum November kha ciang a thalaih ding kitel dinga, mai kum February 2009 ciangin a thak in hong laihta ding kici hi. Tua ka innvengpa thak ding uh kituh in America gam mi minthang mahmah thum (tu laitak) John McCain, Hilary Clinton leh Barack Obama te mipi mai ah kinial in, 'kei hoihzaw ing, kei siamzaw ing, kei semzo pen ning, ken no haksatna thei pen in, ken na haksatna uh hong huhzo pen ding hi ing.....' ciin kidem keei uh hi. Ko ka thupi hetloh uh hang ka invengpa ding uh kituh in mipil tampi a buai den hi keei sam ei. Zomi te'n - 'kei a bu', 'kei a uk' ci-a tungnun kituh sang thupi zaw in um veng aw!
John Mc Cain lah Vietnam gal kido lai, 1970's hun a galte in a mat, galte thonginn sungah a kum kum a khumcip uh hong suakta kik hi a, a vanleng a kapkhiatsak lai vua tuipi tungah puanpi (parachute) tawh a tuaksukna ah a nakguh leh a khut khe guh kitante hangin America te lungsim ah 'gam leh nam adinga thuakpa' cih khat nei uh a, it in zahtak uh a, thupi sim mahmah uh hi. Ahi zongin kum 71 a pha khin galkap lui khat pen a cidamna, a thahatna leh a lungsim a hiam lai taktak diam cih mipi lungsim ah tawikhai bangin ki penglip deudeu hih tuak.
Hillary Clinton leuleu lah a pasal hanga minthang bek hilo, amah mah zong Law a siam man bekbek a minthang leh mihau innkuan hi a, Politics pen a innkuan mehtui limpen uh hi. Zomi pawlkhat in kawl ngapik kihello a annkuang a lui nawnloh dan in Clinton te innkuan sungah Politics genlo in ann kham cih om ngeilo kici hi. Ahi zongin mipil leh khangto gam gamthupi ah numei lawmlawm ko innveng a hong koih ding uh kisuanglah (kawlgam suak Zomite in 'aana' na cihte uh) in tukum November ciang kihello dingin khentat ta uh hi leh kilawm. A numei lungsim a suah taktak leh kum 2012 ciang bel hong tho kik ngiainguai mai tam maw, 'numei gal zawh', 'numei gal lelh' cih khat om hilo hia?
Barack Obama leuleu bel a pa Kenya mi, a nu Hawaii mikang ahih na hang khawng leh a vomte a cih uh black decendent hi a, tua bek hilo in apa pen maituamte Muslim hi a, ama min laizang zong Hussein hi kici hi. Tu laitak thupiang tuamtuam leh 9/11 zawh diakdiak maituamte pen America te in a pahtaak mahmah loh laitak ahi tam maw. Ahi zongin amah pen thugen siam, mipi lungsim zo thei, Singapore lawmte khat cih dana a 'lawng sau' ahi tam maw.... kah toto mawk hi. "Democry i cih zong khatveivei a pil pen, a siam pen kiteel hi tuanlo a, a haiteng a tamzaw zong hi thei veve hi" kici hiven maw.
Ka innvengpa ding uh pen November kha ciang kitel pan ding hi, na mitsuan ciat leng hilo dia.
11. Memorial Day niin.... :
A kah toto America - 4 :
Zomi te in bang i ciamteh hiam? Bang hihte i thupi bawl hiam? Kuate i phawk hiam? Gam leh nam ading nasemte i pahtawi hiam?
11. Memorial Day niin...: America te in a galkap hangsan te uh, gam leh nam ading a nuntakna, hinna, a thahatna leh a melhoihna, a khangno hun khempeuh a piate zahtakna in a site phawkna, a dam lai, a semlaite thapiakna in Memorial Day kici na nei uh hi. Galkapte Phawkna Ni cihna tawh kibang hi.
Vietnam gamah communist kiukna a lut ding dalna dinga America in a galkap tampi sawla kidona 'Vietnam War' a kici in mipi lungsim lawng mahmah lai a, tuma kum sawm val lai pek pan US President kitelna ah zong Vietnam galkuante min hong kidawk den hi. Tunai a President Bush seppih Colin Powel zong Vietnam galkuan khat hi a, mipi in zahtak mahmah uh hi. Vietnam ah Democracy a om ding deih in a galkap tampi sawl mah leh, guallel in ciah kik uh a, ahi zongin Rambo film ah bel guallel lo uh hi.
Hih Memorial Day ni pen kumpi zum khempeuh kikhak a, mun tuamtuam panin galkap lui te in amau Bike nam tuamtuam - Harley Davidson, Enfield, etc te tawh hong pai in Washington DC ah lampi zuihna (bike rally) nei uh a, muhnop hi, muhnop himai. Kei bang Harley Davidson khawng a taka ka mit tawh ka khatvei muhna ahih manin muhnop kasa a, thupi kasa a, ngaihno te tawh kipuak hialhial na dingin ka iplah hi. Amau galkap luite bel a zi te uh tawh kipua pahpah in, US flag leh amau galkap kipawlna uniform silh in kizui ngetngat uh a, muhnop mahmah kasa hi. A lamdang mahmah khat pen gam itna, gam ading phawkna lianpi a kingaihsun hi mah leh mivom sang mikang kitam muh zaw thamtham a, mivom kimu mello mawk hi.
Tua Bike te tungah tuangin maan ka kizaih a nuam kasa mahmah sam hi (a parking mun ah), naupang kimawl bangin. Amau a bike neite bang maan kilakpih ding cih ciang lungdam siam mahmah uh a, a puan-ak tung vua "Freedom is not free", "Nam Knights", "Some Give All", "Rolling Thunder", etc cih khawng a kigelhte a dawkloh ding lau hileh kilawm liangin ki pose uh hi. Tua lai kigelhte dawksak nuam uh hi. US kumpi in zong zahtakna lianpi pia in amau adingin nakpi takin hun hoih bawlsak in thupi tak in galkapte - gam leh nam adinga tha leh ngal nuntakna piate pahtawi uh hi. Zomi te lungsim bang America ah zong na om thamtham hi.
12. John F. Kennedy hanmual ah ka hawh leh:
A kah toto America - 5: Kennedy Hanmual ah:
12. John F Kennedy hanmual ah ka hawh leh: A thugen minthang vangvang ka phawk hi. "Ka gam in bang hong pia ding ci masa loin ken ka gam ading bang pia masa ding cih kidong zaw in" cih a hanmual ah kigelh a, tua mun ah ka hawh kha hi. A mikang kam in -
"My fellow Americans: ask not what your country can do for you - ask what you can do for your country.
My fellow citizens of the world: ask not what America will do for you, but what together we can do for the freedom of man.
Whether you are citizens of America or citizens of the world, ask of us the same high standards of strength and sacrifice which we ask of you. With a good conscience our only sure reward, with history the final judge of our deeds, let us go forth to lead the land we love, asking His blessing and His help, but knowing that here on earth God's work must truly be our own."
US in President tampi a neih lak pan Lincoln leh Kennedy banga mipite thupi ngaihsut mahmah tuam na tam hetlo hi. Tua banga a thupi sim mahmah uh Kennedy pen galkap hanmual minthang Arlington National Cemetry, Washington DC ah om a, kumsim in Memorial Day ciangin mipi a tul a simin na veh in na en hamtang uh hi. Tua zaha minthang President pen kua tawh kibang ding hiam ciin ka American lawmpa ka dot leh, "Elvis Presley minthan zah mah in a minthang hi" hong ci hi. Kennedy pen President bek hilo in celebrities status a nei hi mawk hi. A birthday ni a Marilyn Monroe "Happy Birthday" sak thu zong a minthang himawk hiven.
A hanmun ah mei kihal in, meikuang leitung beidong a mit nawnlo dingin kikuangsak a, a khanglam ah ama thugen minthang pen (a tungah i gensa pen) suanglaipi tungah ki at hi. Kennedy galna hun a zangnuamte leh a meikuang gei ah a ding dingin mi kigual diudeu a, khat khit khat kipai deudeu hi. Keizong a gei ah ka kigual a, ka hun hong tun ding ngaklah in ka khuadakdak kha liang hi. A meikuang mun ka tun ciangin ka gallam pan Pa Thawng in maan hong zaih in, tua bek mah ka kep ding ka ciahpih theih hong suak hi.
13. Theihloh galkapte hanmun ("Tomb of the unknown soldier"): Kennedy te hanmun veilam ah pai phei in, lui i kan khit ciang a gal mual ah kahto leng a kithei khalo galkapte hanmun kici khat om a, tua mun pen America te in a thupi sim diakdiak khat uh hi. Gal sungah galkap a si, ahi zongin a luang a kimulo, a sihna mun a kitheilo, pawlkhat bang amau si maw hing maw cihzong akitheilo zah donga kimu kik nawnlo leh a thu akithei nawnlo hi a, tua mun ah bang lai kigelh hiam cih leh :
"Hih lai ah Pasian bek in a theih
America galkap
thupina khempeuh tawh kipahtawi in
kisial hi"
"HERE RESTS IN
HONORED GLORY
AN AMERICAN SOLDIER
KNOWN BUT TO GOD"
Hih a kitheinawnlo, a kimukiklo, a kiciamteh kha lo leh a tangthu uh a kithei zom vetlo galkap si te zahtakna minit 5 halta khawngin pia zom ziahziah uh a, i lungsim hong lawng mahmah hi. Tua zahtakna i piak laitak in i khut i awm ah koih ding, tangloin ding ding, kuamah a tu omtheilo ding, tua zahtakna piak a kipat khit nak leh a zoh mateng kuamah ciah khia theilo ding cih dan in zuihding ngeina khat nei uh hi. US gam hutna dinga a nuntakna uh a piak lam uh kithei, ahi zongin amah kua hi hiam cih a kitheilo khempeuh zahtakna a piak uh thupi kasa hi. Ka lungsim ah America galkap hi nuam sing maw ka ci phial ta hi!Tua zah in a i lungsim hong zo mawk hi.
A lamdang mahmah khat pen hih hih National Cemetry ah zahtakna a pia, i Zongeina in gen leng Dai Hawh khempeuh lakah mikangte (whites) tam bel a, mivomte (blacks) tawm mahmah in, a dangte pen khualzinte (tourists) hi deuh uh hi. Tua man in ka lungsim ah America a it taktak, a khual taktak, a zuun taktak nuam pen mikangte bek mah hi hiam, ahitam maw ka ci hi. Nuntakna pia ngam pen tam kha inteh, ahi zongin gam it taktak leh a zun nuam taktak pen a si ngam zah hi khollo ahi tam maw ka ci hi.
Zomi i it taktak leh i zun ding, i khoi ding mah hilo ding hiam cih hong phawksak mahmah hi. It ding, kem ding, khoi ding, zahtak ding....
14. A dang khempeuh ah zong pak khat leh America flag kikoih: Hanmual a dang khempeuh pen khuapi khat sung cia mahmah ding mualtam diadua khat sungah kipehmat phial in kiphut a, a gual tangsak in, a kigamlatna kikimsak dimdiam in, a kikim suangneu hiam, singlamteh hiam kiphut dimdiam hi. Tua hanmual suang khat ciat ah pakbawk khat leh US flag khat ciat kikoih a, thupi mahmah ka sa ziaizuai hi. Tua mun ah pak a kizang khempeuh moto puak za bangzah apha tam aw! US flag bawlna dingin puanthan meter tul bangzah a kikhui tam aw!! Zomi khempeuh puansilh silh khat ciat cingzo phial lo diam?
15. Numei galkapte phawkna: US numei galkapte zong na thuneu hetlo uh a, pasal zah ahi zo kei zongin nakpi takin galdona leh gamsung hutna ah na nasem uh hi. Tua banga a gamkuanna uh a tuamtuam - Vietnam, Korea, Afghanistan, US suahtakna ding kidona, etc ah a sepkhiatte uh pahtawina, phawkna leh zahtakna in Museum khat bawlsak uh a, thupi kasa mahmah hi. Galte mat a suakta kikte tangthu, galkap sungah a lawmte a khuaite tangthu, a gualzo te gualzawhna thu cih bangin a kigelh, a kigen, a maan tawh kilak cih bangin om zihziah a, NASIA LUA hi mai hi.
Zomi, US pai khempeuh in muh dingin hoih kasa hi. I gam leh lei hutna dingin pasal bek hilo, numei in zong semthei hi cih i muhciat theihna dingin.
16. Korean War Memorial, Vietnam War Memorial lam ah:
A kah toto America 6: Korea, Vietnam War Memorial lam ah
John F. Kennedy, US President a suahni in mipi maiah a thugen masak penpen, US in "pay any price, bear any burden, meet any hardship, support any friend, oppose any foe, in order to assure the survival and success of liberty," na ci giap hi. Tua in Vietnam kidona piangsak hi kici thei hi.
Ciamteh ding, phawk dingin a hoih mah hiam thei khang, kido thu, kisim thu pen mihing lungsim ah kiciamteh den hi mawk a, lungsim bek hilo, singkung suangtum nangawn phut in a maimang ding kiphallo hi zen hi. Lamdang cip.
16. Korea, Vietnam War Memorial lam ah: Leitung galpi khatna pek pan THU tawh akidodo khin leitung pen thauvui thautang tawh kipelh theilo a, kilemna, kihotheihna leh kithutuakna a om theihna dingin hinna tampi in sihna thuaklawh hi. Communism leh Democracy aki nawkna mun peuhmah ah a THU bek a kinawk hilo in a mi, a sa bek thamlo thauvui thautang leh gal leh sa kineihna tawh kinawk in, a zo a om mateng in beilo hi. 'Ki akgual khen' cih tamlo a, a lel zawzaw a kihingpiakna (surrender) leitung hi.
Tua banga US in Democracy tangko a, Russia in Communism a tangkona leitungah amau gel mah hong kimaingat in - luidung, mualdungah a kimuhna peuh vuah hong kipumbawh pahpah ta uh hi. Tua banga kibawhna gam nih - Korea leh Vietnam hi. Democracy hoihzaw, Communism hoihzaw a kicih tuah uh ciangin deihna kibanglo pen Zomi te mah bangin hong kilang neih pah gaga uh a, pawl kikhen in, khen tuam kisuah pahpah hi.
June 25, 1950 kum a South Korea ah kitelna om pen North Korea in thukimpih lo ahih manin kitelpha kik dingin ngen a, a ut loh ciangin N.Korea in S.Korea sim phei pah a, kidona piang hi. USA in S Korea singkhuah puak behlap in, Russia in N Korea singkhuah a puah behlap ciangin kidona mei hong am semsem a, July 27, 1953 ciang kilemna neih ding a thukim mateng uh kidona kisumit zolo hi.
Korean War Memorial munpi ah "Freedom is not free" cih suangpek lianpi tungah kigelh a, a gei ah Korea galkapte lim tua laigelhna lam zuana pai bangin bawl uh hi. A khiatna pen galkapte in "freedom" (suahtakna) lam zuan in pai uh a, pawlkhat lampi ah si in, pawlkhat a mun tung hi cihna hi kici hi. A mun ah et ding pawl hi, ahihna zah in gen siam lo ding ihih manin tua zah ci phot ni.
A minthang penpen leh tuhun khangthakte in i theih bat nai pen Vietnam war hi a, 1959 pan kipan 1975 a bei pan ahi hi. Rambo I, II, III te ah kilak a, ahi zongin a tak tawh kilehbulh linlian in (limciinna sungah bel) Rambo in zo den hi. A taktak in bel tuni tanin America te in na a sak mahmah uh Democracy deihte guallelhna kido ahih man hi. Korea banga gualzo pah ding kisa kimlai galkap 60,000 kiim a sih zawh ciangin zong zawh ding lamet omlo ahih manin minsia takin kipiakhia, kidawkkhia zaw uh hi (withdrew cih kammal zang uh, surrender cih kammal zang nuam kei uh).
Vietnam gam pen Leilu (north) leh Leitaw (south) lam gam ciin North Vietnam, South Vietnam kikhen hi. Leilu lam pen Communist gam hi a, leitaw lam pen Democracy gam hi. Leilu lam makai pen Ho Chi Minh hi a, Sen minam hi (Tu laitak Sen kumpi Hu Jintao tawh a innkuan min a kibang hi, Ho = Hu. A Senlai awsuah ah Haw ci-a ging lo in, Hu ci a ging ding hi). Russia gam tawsawn N. Vietnam in US tawsawn S.Vietnam gambup uk nuam ahih manin gal kido a, leitaw lamte in lel uh ahih manin ahuh dingin US galkapte hong pai hi.
US galkapte hong tun tak ciangin Ho Chi Minh in tuma kum 20 hunlai a France kumpi Vietnam gam nusia dinga a hawlkhiat lai vua a gensa mah US te kiangah genkik in, "US in kum sawmnih kido ding acih leh kum sawmnih kidopih ding, kilemna deih a kilem a ut uh leh tuni nitak lam nitum ma in niangtui dawnkhawm dingin niangtui sai ah ka zawn ding hi," ciin na genkhol hi. A gen bangin kum 25 sung khawng hong kido takpi uh hi. Kido khit cianga US kumpi ciamtehna ah 'a guallel mah hizaw mawk hang ei' cih hi mawk hi. A thu saupi omlai.... gen khin zo pak kei ni.
Hih kidona ah US in galkap tampi a khuaite "suahtakna dinga nuntakna piate" ciin VIETNAM WAR MEMORIAL mun ah suanglaidalpi ba'ng tungah a min uh gelh in gual diudeu uh hi.
Hih Korea leh Vietnam galkap phawkna mun pen "Memorial Day" neih sim a galkap tampi Dai Hawh na mun leh Jerusalem kulhpi geia Kahna Bang kici mun ah khitui luang ziahziah banga pasal takpi khitui a luan ziahziahna mun hi mawk hi.
9/11 zawh diakdiak US mipite in suahtakna 'freedom' a thupi dan, kilemna peace a thupi dan tel semsem uh a, tua manin galkap site zahtakna uh khang in, kido hanga kilemna om thu tangko saan uh hi.
But, lets remember this: "freedom is not free!"
A kah toto America 7: Lincoln Memorial, etc
17. Lincoln Memorial: US President 16na Abraham Lincoln phawk tawntungna dinga kilam innpi pen Lincoln Memorial kici hi. Washington DC khuapi sunga National Mall kici mun ah kilam hi. A geel Henry Bacon hi a, a lam a bawl Daniel Chester French hi in, a za nuh Jules Guerin hi.
Hih mun pen Martin Luther King, Jr., in August 28, 1963 kum a March On Washington for Jobs and Freedom hunlai a a thugen minthang, "I have a dream" ("Ka mangmat khin hi," ahih kei leh "Ka mangin mukhol ing," "Mangmat zo ing") cih thu a genna mun hi. Tua a mangmat khit thu pen mivomte in suahtakna ngah ding, mivom mikang kideidanna om nawnlo ding, ci leh nam a kideidanna bei ding, America ah minam khempeuh liangko kikim ta ding hi cih ahi hi.
Tua thugenna ah mihing tul zanih bang kikhawm a, a vom a kang kihel hi. Tua thugenna in President Kennedy lungtang lawng mahmah a, suahtak ding, liangko kikim ding a deih mihing tul za tampi US khua tuamtuam gam tuamtuam pan hong kihel kei leh makaipa a lungkiat ding lau uh hi ci phial hi. Tua thugen pen US khangthu ah thugen hoih penpen lak ah kiciamteh a (2002), a thugen lai a a dinna suangphah zong kum 2003 ciangin kiciamteh hi. Kum 2008 ciang in a khatveina dingin Barack Obama US President kitelna ah kihel thei dingin kilamto zo hi kici hi.
Tua zahta a mipi a hup thugenna mun pen Lincoln Memorial hi.
A omna: Korean War Veterans Memorial,Vietnam Veterans Memorial gei mualtungah kilam hi a, Greek hunlai a Doric temple kici te tawh kibanga kum 1914 a kilam hi. 2005 kum in mihing tulza 30 (3 millions) val in veh in, en uh hi. National Park Sevice te kepna nuai ah kum 1933 pan in omta hi.
A kigelh laimalte: A khuam 36 pha a, khuam khat tungah tua hun a US gam state 36 te min khat ciat tuang hi (tun bel US ah state 50 pha ta). A sungah Lincoln lim lianpi in tungman leh buan, bilat lei tawh kibawl a, tutphah tungah kitu sak in a khut taklam khuttum a, a veilam khahkol hi. A lu tung san ah hih bangin kigelh a:
IN THIS TEMPLE
AS IN THE HEARTS OF THE PEOPLE
FOR WHOM HE SAVED THE UNION
THE MEMORY OF ABRAHAM LINCOLN
IS ENSHRINED FOREVER
(Hih innpi sungah
A hotkhiatsa a gam leh
Mi khempeuh lungsim ah
Abraham Lincoln phawkna
Kiciamteh tawntung hi)
A innpi leitaw lam kiu ah (south end corner) Gettysburg address kici, Lincoln thugen minthang penpen, "government of the people by the people for the people shall not perish from the earth" cih pen kigelh hi (Mipi ading mipi kumpi mipi vaihawmna hih leitung pan bei ngeilo ding hi).
Milim tuamtuam - vantungmite (angels) limin thudik, thumaan, truth gualzo cih lahna; America leilu leh leitaw gam kido pan kilemkik hi cih lahna lim; leh silate suahtakna ngahta hi cih lahna limte zong ki at hi.
Alim omdan: Hih lim kibawltawm (sculpture) ah Lincoln pen Kumpi tokhom tungah kitusak a, a khe taklam madawksak zaw in, a khe veilam nunung zaw a, kalsuan khia ding bangin lak uh hi. Khawllo in paizel ding cih lam genna ahi tam maw.
A mit zeu in a maisuah vak lo a, gim leh tawl hi cih kidawk in, gambup kipawlna innpi Capitol lam en in khuadak sak uh hi. Kipawlkhawmna mun thupi Washington Monument galet in nei hi cih lahna hi. A khut sungah Rom kumpite thuneihna leh thudikna (power and jurisdiction) humcip sak uh a, a tutphah san ah mipite thuneihna lahna ki gelh hi.
Leilu lam ah Lincoln President asep ni a thugen masa penpen kigelh a, leitaw lamah i gensa..... mipi ading mipi kumpi leitung pan bei ngeilo ding.... cih pen kigelh hi.
A mi phawkna bek zong hizah a thupi ci leng a mi bangzahta in a thupi tam?
A kah toto America 8: The White House, etc
Leitungah mihing tenna inn minthang pen hih inn hi a, a kiangah pai a, a gal pan ka et niin ka lungsim ah a tangthu bang hi ding hiam ciin ka ngaihsun kik a, inn ka tun ciangin a tangthu muh theihna ding laibu ka zonga, ka muhna pawlkhat pan hih inn pen kum za nih vala upa ahih lam ka thei hi.
Kum zanih bang beisa a kilam hih White House pen US president inn hi a, a nasepna munpi hi in, a nuai ah a sem pawlkhat nasepna mun zong ahi hi. The White House pen ka omna uh pan minit 15 sung khawng bek in kitung ziau ahih manin ka innvengpa uh ka ci mai hi!
1792-1800 kikal a kilam hih US president inn pen 1814 kumin British tawh kido lai in kihal sak a, a kanglo khempeuh kipuahpha kik in, a za zong kinuh kaang kik a, white paint kizang, tua manin a min "The White House" cih kipia hi. Mei katna vom khempeuh kinuh kaang kik mana Inn Kang kici bek hi masa lo a, tua ma in zong a kaang sa hi mah leh aza a kinuh kik zawh ciang mei katsa hihna pan a kilamthak kikna zahtakna tawh Inn Kang kici hi, aci pawl om hi. A ciil pan White House a kicih masakna pen President masa penpen George Washington zi Martha Custis Washington te inn pen White House Plantation kici hi. President hong sep uh ciang a inn lut masakna pen uh amau tenna inn min mah pia suak uh hih tuak!
A kiang pan gal-et: Kum 2001, 9/11 zawh ciang US gam ah migilo te nasepna hangin suahtakna tampi kihencip a, nidanga White House sung et theih hunte in hong kheng in, a huan sungah kual vak ding zong kikham cip in a kiang pan ki gal-et thei bek hita mawk hi. Dah huai sa'ng. Tua manin kei hawh ni sunsun in zong a kiang nai ah kipai theilo a, a visiting room nangawn uh a pai masa te lut theih zelna hi mah leh kitungzo nawnlo hi. Kei ziakai man hilo a, migilo te nasepna hang hizaw hi, ka ci hi.
Memorial Day ni ma, May 21, 2008 ni in zong a ki et utna ciang ki en theilo hi mawk hi. Ken bel 'muhnop' a kici lak ah kihel ahih cianga, a kongkhak ciang bek lut nuam hilo in, a innsung zong kimu thei leh a ut hiveng. Ahi zongin President pa omna The Executive Residence zong kimulo. Oval Office omna The West Wing leh President pa zi office "Office of the First Lady" kici omna The East Wing zong kimu khalo cihna hi. Moses in Canan gam a galet bang bek hi mawk ei.
United States Capitol: America gambup vaihawm Congress te vaihawmna innpi hi a, Capitol Hill kici na mun, National Mall nisuahna lamah om hi. White House, Lincoln Memorial cihte tawh kigamla lo in om hi. Hih inpi sungah vaihawmna munpi nih North Wing kici leh South Wing kici om hi. NW pen Senate te vaihawmna hi a, SW pen House of Representatives te vaihawmna hi.
A kiangah kipai theilo ahih manin a mai lampan kigalet a, inn lianpi a paak biabua hi lel a, a tungkhum ah US puankhai 4 kikhai a, a khuam golpipi leh a inn vum kiciang viatvuat vukmual banga pak biabua bek kimu hi.
Ni khat ni ciang Zomi te zong hih innpite sungah vaihawmin a tut hun hong tung sam lo ding hiam (Zogam thak a tung Zomite).
A kah toto America 9: Zomi makaite
America ka tun ni pan kipan tuni dongin Zomi makaite thusiamna leh hong deihsakna uh thupi kasa a, kei leltak hong mipi bawl a mi ngeina banga hong hopih, tutpih, ankuang umpih, etc. uh ciangin ka lungdam a, mi banga kamsiam leh mi ading phatuam zong a sem zo lah hilo khat hong thupi bawl uh cih ka ngaihsut ciang 'hih pen Zomi ngeina a bei nailo, a bei ngeilo ding, a bei dinga zong ka phalloh (kei mimal taka ka it mahmah ngeina) ki itna, kikhualna, kideihsakna leh ki angvanna hi' cih ka phawk a; Kalvary pan hong luangkhia sisan hanga itna bucing hong kizomsuak zong hi dingin ka ummawh hi. Tua ahih manin ka angtang mahmah hi. Siam in siam kei taleng ka lungdamna genzawh pak ding ahilote genlo in ka om ding kilawm lo a, gensiam takeileng ka siam bang beek a ka pulak kilawm sa in gen kong sawm hi. Kong 'zawng sing mat' suk gawp leh zong hong theisiam dingin kong thum hi.
1. Tg. Dong Khan Khup, President, Zomi Innkuan Washington DC in hong hopih pah: Pu Vumson, Sia Do Kham leh midang pawlkhatte len masakna gam hi cih i theihsa hi. Tua gam minthang leh nuam, Zomi pawlkhat in pilna, theihna, siamna leh gamtat luhek dan thak a tawkna uh, a sinna uh leh a ciahpihna uh America ah nitak tun in Zomi Innkuan DC sumkem Pa Ngocinthawng inn ah tung ing cih a theih ciang Zomi Innkuan DC makaipipa Taang Dong Khan Khup in a phone mekin hong hopih pah a, lampi ah haksatna gimna ka thuak leh thuakloh thute hong dot zawh ciangin 'cidam in a zang dia dua America hong tung ing ei' ka ci a, 'Welcome to America. Zomi Innkuan DC taangin hong muak hi ing' hong ci a, hih gam ka tun mana a lungdamna thu pawlkhat hong gen khit ciangin kei zong hong hopih mana ka lungdamna ka genpah hi.
Tua bek tawh hunsak lo in 'bang ciangin hun awng na nei tam?' hong ci a, 'tu laitak bel hun awng ka neih laitak hi' ka cih leh 'zing nitak ciang DC downtown ah nitak anne khawm leng ciin hong sam nuam hi ing' hong ci a, ka bil a ka thuzak a takpi mah hiam, ka zakkhial hiam ciin khatvei ka dotkik leh zakhiallo ka hih lam hong gen a, ka lungdamna guntui bang luang hi. Ka lamet bat loh sapna kammal ka zak pen 'lamdang' kasa lianga 'Topa thupha hi' ka ci hi; khangluite in, 'Nung lam sabah' acihte taktak uh himwk ahih manin.
Tawm behlap pak leng. Amah i makaipa Tg. Dong Khup pen tangval lai hi a, a melhoih leh thacing, mikangpau a nungakte in 'fit' a cihte uh hi. Vacancy a om leh omloh pen nungakte in theizaw in um ing, kei hong hilh kei! Pilna lamah electrical engineer hi in, a sepna i theihsiam theih dingin gen sawm leng - Washington DC khuapi sungah meivak leh anhuanna gas khempeuh a hawmkhia, a zuak Pepco kici PHI hi. Amau, elelctric meivak hawmkhia in a mekna a tunglamah a khintoh (on) uh ciangin President Bush tanute in zong limlang maiah a melhoih uh enthei pan hi, kici hi. Meivak hawmkhia kei le uh US khuapi a nungak tampi in limlang maiah kizem theilo ding hih tuak hi!
Anne dinga hong sap nitak in Zomi Innkuan DC sumkem Pa Ngocinthawng leh Nu Cinghzahuai te tawh ama zum (office) ah ka pai uh a, a mun siangtho in inn sang pipi, inn lian pipi tampi om a, US ah internet service lianpi Verizon Wireless zumpi gei hi. A gei ah ka pai phei uh leh ann hong nekpihna ding Hotel lianpi om a, a zom lah FBI Headquaters na hi leuleu in, a pam ah Federal Hall National Memorial kici innpi om hi. Kumpi kikhop lianpipi hih inn ah kinei hi. Tunai diak in Hillary Clinton in US President nomination Barack Obama tungah a lelh niin a campaign officials te tawh kikhopna neiin mipi maiah thugen hi. Ann limtak ka nek khit uh ciangin inn kongkhak tan hong kha a, nipini cianga kimu kik dingin ka kikhen phot uh hi.
Ka nung zakkik ciangin Tg. Dong Khup pen amah leh amah a kiphattawm te pawl hilo a, a nu leh pa minphatna lukhu a khusak, nu leh pa a pahtawi gamtat hoih, laisiam, mipil; Shillong kammal kawm pak leng 'tangvalte etteh, nungakte etcik' a cihzah donga mi hampha hih tuak hi. Zomi makai hih bang i neih hampha hang.
2. Tg. Vung Lian Mang, Secretary, Zomi Innkuan USA in hong hopih: Zomi Innkuan USA makaipipa Dr. Do Kham Kawlgam huihpi nung vil dingin khualzin hi cih US ka tunma in ka thei khin a, ahi zongin amah nung thuap ding makai hoih nei ahih manin lungmuang takin zin hi dingin ka um hi.
Zogam thak USA ka zin thu kuamah zong ka zaksak hi hetlo napi Zomi Innkuan makaite tangzang kasa a, lamet ngam hetloh in Zomi Innkuan USA laiatpi Tg. Mangpi in Tulsa pek pan phone tawh hong hopih vangvang a, "Zomi Innkuan USA minin hong vaidawn ing," hong cih tanghial ciangin ka pute inntual tung mahmah bangin ka lungsim hong innteek pah hi. Makaipipa omlo ahih manin amah mah in hong hopih ahihna thu zong hong gen a, naseppih dinga ka deih pawl hiveh e (ka lungsimin) ka ci pah hi. Zomi te i kalsuanna ah hih bang kithuapna pen khamuanhuai hi ka ci ngam hi.
Tg. Mangpi pen ka muh ngei zong hilo, aman zong hong mu ngei zong hilo, ahih hang' apa sia Rev. Paul Thuam Thang hi cih hong gen ciangin Shillong ah Phuitong Magazine ka bawllai vua a pa teekteek in ama khutgelh linlian tawh Zogam Lapi cih magazine ah suahsak dinga hong khak laiip ka honlaitak khawng ka mitkha ah hong kilanga, ka angtang tuam pah hi.
3. Dr. Do Kham, President, Zomi Innkuan USA in hong hopih: Kawlgam zin hong tung cih ka zak ciang kei mahmah in phone tawh hopih masa ning ka cih laitak ama'n hong hopih masa zaw a, 'mipil leh miteite pen kihopih masa man ngeilo hi' cih khat a kigenzel pen ka phawk hi.
Amah kawlgam zinna pan hong tung tuung hi a, a gim ding, a tawl ding theihsa hi. Ahi zongin makai ahihna zo takin amah tanghial kiniamkhiat in 'USA ah hong muak ung' cih gen dinga hong hopih masak tanghial ciang kisuanlah huai phial hi. Zogam thakah Zomi te polite dan leh thusiam dan, vaidawn siam dan leh deihsakna kicingte ka mit mahmahtawh mu, ka bil mah tawh ka zak ciang 'Zomi hih mahmah nuam lawmlawm e' ka ci hi.
Hong tung tuung ahih man leh a khualzinna gim ding ahih manin 'ki thuza kik ni' ciin mangpha ka kikhak uh hi.
4. Pa Thang Do Hang Hatzaw, President, Zomi Innkuan Florida in hong hopih: "Zomi World Cup USA" kici kumsima US buppi Zomi te kimawlna a zindo tawntung Florida Zomi Innkuante makaipipa Pa Hangpi in zong ka zin thu a zak ciangin a nasep khawl sungin hong hopih a, sau ka kiho man loh uh hangin a hun awng a neih pak sunga hong vaidawnna kammalte leh deihsakna thute in ka lungsim hong tawldam sak mahmah hi.
Hih thu ka gelh laitak in amau omna khua Florida ah ka om a, amau khua ah ka zinsuk nitak Zomi Christian Church (ZCC) ah ka thugen nitak in zong amau biakinn nusia liangin hong kikhawm vangvang a, Zomi Innkuan makaite hong deihsakna tuamtuamte hampha ka kisa hi. Florida ka zin ma in lasak siam ahih lam ka thei kei hi.
Makai tuamtuam, mimal leh pawl min a hong hopih, hong vaidawn tuamtuamte.....
A kah toto America 10: A kilehbulh America
Kilehbulh i cih hang amau ei kilehbulh hong ci zaw tam maw, hehe. Amau muhna ah, 'A kilehbulh Zogam' ihi zaw mai tam maw. Amau bel "American hi ing" ci ziau uh a, Zogam ah bel "Kei tua beh, tua tribe, Zomi hi ing" i kicih bialbual te khawng e, kilehbulh lua hilo ham? Luilam.
Amau 'hun' thupi sa uh a, Zogam ah 'lengla do'; 'zin do na siam un' cih pen thupi kisa hi. Leiba in moto, inn, vanzat tampipi kingah a, Zogam ah inn sak inn khang nangawn lei kibasak ngamlo hi; muh kik lamet om khollo ahi tam maw. Hih bel Zomite zia hi kei in Zomite Kawlte tawh i ten khop, sungh leh pu, mak leh mo khawnga i kilak zeel zuul cianga Zomite in i meltheih thak gamtat gina lo hi. A manlanga i nusiat dinga hoih gamtat zahpihhuai, zumhuai leh mi hong gimneihna ding omdan hoihlo ahi hi.
Amau kam tawh a gen uh thu khat peuhpeuh pen 'takpi maw' cih kik kulse loin a takpi mah uh hipah a, zuau kihello hi. Zuau gen cih khatvei hong theih nak uh leh mihing ngeina in hong sim nawnlo in hong hopih dan uh kilamdang lian a, lawmhoih suah ding bel Phulum aksi laksawm mah abang hipah hi. Tua manin mikanggam ah 'kamsiam' kitamzatlo a, 'thuman' kitamzat zaw hi.
Zomi a tam mahmahna India khuapi Delhi ah Bawng hon leh moto leh mihing in lampi kituh a, a pai masa ding, lam kaan masa ding kiphu nuaunuau uh hi. Zogam thak America ah bel Bawng hon cih thadah gan kimu lo, vok leh akte khuasung vak cih zong omlo, amau omna ding mun ciat ah om uh a, a tuam tek in inn kilamsak a, kikhum tuam hi. Tua manin khuasung pen mihing tenna hi a, gan vakzauna ding hilo hi. Gan ek leh zun tawh kinawngkaisak lo uh hi.
A nitna mun ah a nit hangin a siangthona ding munte siangtho a, 'mikanggamte siangtho uh' kici se hi. Gamdang zin peuhmah in tua mah gen thupi in nei den uh a, a taktak in bel a nitna mun ah niin mahmah veve ding uh hi. Amau tua niin te hong musak lo uh hiven. Kei adingin bang phatuam vanglak ---- kha guk sung ka khedap nin nailo, nawtsiang kul nailo tazen hi ei! Zogam hong paal ciang tua sang siangzaw dingin lamen ing.
America te hau mahmah uh hi, mikim in amau moto hawl ciat uh hi, inn khat ah moto 4 leh 5 khawng nei uh hi ci a i gengen pen amau a hauhman uh hikhin pah tuanlo a, a cihtakna hang uh ahi zaw tam ka cihsak hi. Hauhna i cih pen lasiam, kimawlsiam, laisiam, mipil i cih mah banga a tuam pian ngiat hi a, mikim neih hi tuanlo hih tuak hi. Moto tam nei khempeuh 'mihau' kici tuan pahlo a, moto neilo khempeuh 'mizawng' kici pah tuanlo hi. Ahi zongin tua bang a neih theihna uh pen a 'cihtak man uh' hi ka ci kiknuam hi. Kumpi sum tawh ei moto ding lei cih bang omsak lo uh ahi tam maw. India khawng ah officer neu pan kipan a lianpen donga a kigen kiukiu thei khat pen 'sum golhguk lakna' (corruption) hi. Officer tunglo te nangawn in tua 'gu' pen dawn kha uh ahi tam maw. Sum siangtho lo neihna, lakna, ngahna pen hih America gam ah kizalo ahi tam maw. A om zong LS in "Baal mai ah a kun ngeilo mi siangtho..." a cih banga mi siangtho tampite hangin agam sungah khantohna hoihtak in kalsuan a, mi kimin a sep thaman a diktak in ngah hi ding hi. Tua manin sum nekguk omlo in mite in moto 4, 5 khawng nei ziahziah lel uh hi. Thanuam taka nasep gah ne uh hi.
Fashion lamah, designer dresses a silh tam a, Zomite lak ah bel Lamka khawng pan a khuamu masa leh a neizaw deuh pawlkhat in designer dresses a silh uh leh cih loh a zang tam nai kei mawk leng kilawm. Christmas kuan cianga i nute, i nite, i sanggamte khawngin 'second hand' (thak) hong teelsak uh pen i puanthak neih sunsun khawng a hi kitam lai ahih manin 'designer dresses' zang tam nailo i hi tam maw ciing. Lawmte bel ei hong phawklo in a vakna ding, a kikhopna ding, a nasepna office ah silh ding, lawm leh gual kiangah hawh ciang silh ding cih bangin kizepna ding a deih bangbang in khuisak uh, design sak ziahziah uh himawk ei.
A annek uh lah protein tam, vitamins lah hoih, calorie lah a hoih bek... a lim lah lim lai...... hlip... hlip... hlip... Maiteh tui-awm 'limlang meh' sang bel gilvah baihzaw thamtham. Voksa, Bawngsa lak ah e'n lim i sak a thau tata amau nelo (ne ngamlo, a thau khak ding uh lau, thau leh natna ngah ding lau, natna ngah leh sawt a nuntak loh ding uh lau.... mikangte zong hangsan khin tuanlo zel uh hi ei...), ei lim sakloh, 'C = ci omlo, sa limlo' i cih bangin ne se uh hi. Damsawt i sawm dan a tuam ciat hi ei.
I kibatlohna tampi om. A kilehbulh tampi om. En kilehbulh i cihte amau hoih nasa uh, ei hoihsakte amau kilehbulh nasa mahmah thei inteh.
Amau suakta uh, ei bel koltang hang. Amau suakta tak in amau pau mikangpau, spanish pau (Spanish te pen Zogam thakah Zomite in min khat na neisak uh a 'Benete' kici hi, amau Be duhlua uh ahih man in, a an nek khempeuh vuah Be kihel a, Benete kici hi), etc suakta tak in zang ziahziah lel uh hi. Amau ngeina ciat mah thupi bawl in kem uh a, a khantoh zelna dingin zong hanciam uh hi. Zogam ah bel Zomi pawlkhat Kawl long ok, Kala long ok, etc cih bangin om a, Zopau a pau ding zahpih in Kawlpau, Kalapau (Vaipau), etc khawng pau duaiduai sese uh hi. Pau dang a sin zah uh Zopau kisin leh siam veve dingin up huai. Zomi a zumpih zah uh Zopau, Zolai a theihloh uh zumpih leh midangte in a neumuhna uh kiamtuam ding hiven, na ci hia? Guai, kua in Zomi te Kawl long ok suut sak ding? Kala long ok kua in suut sak ding? Zomi long a ok lote kua in Zomi long ok sak ding??? Inn gua hah masa ding maw gam gua hah masa ding?
Zogam thak i tun ziahziah pen i suahtakna ding maw, i manthanna ding? Zogam leh America a kilehbulh bangin i minam hihna zong i lehkhup khak ding dahhuai kha ding hi. I koltanna gam pan suakta khin a i suahtakna i zatsiam kei a, i koltanna long mah i oh oh lai leh bel i suahtak a meetna om tuan khollo ding hi.
Na suahtak leh suaktate bangin gamtang in,
Na suahtak kei leh suakta dingin hanciam lai in,
Zomi te kua mah nuai ah kuun ngeilo a,
Kuamah nuaiah ki-ap ngeilo hi,
A pumpi a suakta kei zong a lungsim suakta tawntung minam hi.
Tua pen Zogam leh Zogam thak leh Zogam thak hong pianglai ding a kilamdanna, a kilehbulhna hi.
A kah toto America 10: A kilehbulh America
Kilehbulh i cih hang amau ei kilehbulh hong ci zaw tam maw, hehe. Amau muhna ah, 'A kilehbulh Zogam' ihi zaw mai tam maw. Amau bel "American hi ing" ci ziau uh a, Zogam ah bel "Kei tua beh, tua tribe, Zomi hi ing" i kicih bialbual te khawng e, kilehbulh lua hilo ham? Luilam.
Amau 'hun' thupi sa uh a, Zogam ah 'lengla do'; 'zin do na siam un' cih pen thupi kisa hi. Leiba in moto, inn, vanzat tampipi kingah a, Zogam ah inn sak inn khang nangawn lei kibasak ngamlo hi; muh kik lamet om khollo ahi tam maw. Hih bel Zomite zia hi kei in Zomite Kawlte tawh i ten khop, sungh leh pu, mak leh mo khawnga i kilak zeel zuul cianga Zomite in i meltheih thak gamtat gina lo hi. A manlanga i nusiat dinga hoih gamtat zahpihhuai, zumhuai leh mi hong gimneihna ding omdan hoihlo ahi hi.
Amau kam tawh a gen uh thu khat peuhpeuh pen 'takpi maw' cih kik kulse loin a takpi mah uh hipah a, zuau kihello hi. Zuau gen cih khatvei hong theih nak uh leh mihing ngeina in hong sim nawnlo in hong hopih dan uh kilamdang lian a, lawmhoih suah ding bel Phulum aksi laksawm mah abang hipah hi. Tua manin mikanggam ah 'kamsiam' kitamzatlo a, 'thuman' kitamzat zaw hi.
Zomi a tam mahmahna India khuapi Delhi ah Bawng hon leh moto leh mihing in lampi kituh a, a pai masa ding, lam kaan masa ding kiphu nuaunuau uh hi. Zogam thak America ah bel Bawng hon cih thadah gan kimu lo, vok leh akte khuasung vak cih zong omlo, amau omna ding mun ciat ah om uh a, a tuam tek in inn kilamsak a, kikhum tuam hi. Tua manin khuasung pen mihing tenna hi a, gan vakzauna ding hilo hi. Gan ek leh zun tawh kinawngkaisak lo uh hi.
A nitna mun ah a nit hangin a siangthona ding munte siangtho a, 'mikanggamte siangtho uh' kici se hi. Gamdang zin peuhmah in tua mah gen thupi in nei den uh a, a taktak in bel a nitna mun ah niin mahmah veve ding uh hi. Amau tua niin te hong musak lo uh hiven. Kei adingin bang phatuam vanglak ---- kha guk sung ka khedap nin nailo, nawtsiang kul nailo tazen hi ei! Zogam hong paal ciang tua sang siangzaw dingin lamen ing.
America te hau mahmah uh hi, mikim in amau moto hawl ciat uh hi, inn khat ah moto 4 leh 5 khawng nei uh hi ci a i gengen pen amau a hauhman uh hikhin pah tuanlo a, a cihtakna hang uh ahi zaw tam ka cihsak hi. Hauhna i cih pen lasiam, kimawlsiam, laisiam, mipil i cih mah banga a tuam pian ngiat hi a, mikim neih hi tuanlo hih tuak hi. Moto tam nei khempeuh 'mihau' kici tuan pahlo a, moto neilo khempeuh 'mizawng' kici pah tuanlo hi. Ahi zongin tua bang a neih theihna uh pen a 'cihtak man uh' hi ka ci kiknuam hi. Kumpi sum tawh ei moto ding lei cih bang omsak lo uh ahi tam maw. India khawng ah officer neu pan kipan a lianpen donga a kigen kiukiu thei khat pen 'sum golhguk lakna' (corruption) hi. Officer tunglo te nangawn in tua 'gu' pen dawn kha uh ahi tam maw. Sum siangtho lo neihna, lakna, ngahna pen hih America gam ah kizalo ahi tam maw. A om zong LS in "Baal mai ah a kun ngeilo mi siangtho..." a cih banga mi siangtho tampite hangin agam sungah khantohna hoihtak in kalsuan a, mi kimin a sep thaman a diktak in ngah hi ding hi. Tua manin sum nekguk omlo in mite in moto 4, 5 khawng nei ziahziah lel uh hi. Thanuam taka nasep gah ne uh hi.
Fashion lamah, designer dresses a silh tam a, Zomite lak ah bel Lamka khawng pan a khuamu masa leh a neizaw deuh pawlkhat in designer dresses a silh uh leh cih loh a zang tam nai kei mawk leng kilawm. Christmas kuan cianga i nute, i nite, i sanggamte khawngin 'second hand' (thak) hong teelsak uh pen i puanthak neih sunsun khawng a hi kitam lai ahih manin 'designer dresses' zang tam nailo i hi tam maw ciing. Lawmte bel ei hong phawklo in a vakna ding, a kikhopna ding, a nasepna office ah silh ding, lawm leh gual kiangah hawh ciang silh ding cih bangin kizepna ding a deih bangbang in khuisak uh, design sak ziahziah uh himawk ei.
A annek uh lah protein tam, vitamins lah hoih, calorie lah a hoih bek... a lim lah lim lai...... hlip... hlip... hlip... Maiteh tui-awm 'limlang meh' sang bel gilvah baihzaw thamtham. Voksa, Bawngsa lak ah e'n lim i sak a thau tata amau nelo (ne ngamlo, a thau khak ding uh lau, thau leh natna ngah ding lau, natna ngah leh sawt a nuntak loh ding uh lau.... mikangte zong hangsan khin tuanlo zel uh hi ei...), ei lim sakloh, 'C = ci omlo, sa limlo' i cih bangin ne se uh hi. Damsawt i sawm dan a tuam ciat hi ei.
I kibatlohna tampi om. A kilehbulh tampi om. En kilehbulh i cihte amau hoih nasa uh, ei hoihsakte amau kilehbulh nasa mahmah thei inteh.
Amau suakta uh, ei bel koltang hang. Amau suakta tak in amau pau mikangpau, spanish pau (Spanish te pen Zogam thakah Zomite in min khat na neisak uh a 'Benete' kici hi, amau Be duhlua uh ahih man in, a an nek khempeuh vuah Be kihel a, Benete kici hi), etc suakta tak in zang ziahziah lel uh hi. Amau ngeina ciat mah thupi bawl in kem uh a, a khantoh zelna dingin zong hanciam uh hi. Zogam ah bel Zomi pawlkhat Kawl long ok, Kala long ok, etc cih bangin om a, Zopau a pau ding zahpih in Kawlpau, Kalapau (Vaipau), etc khawng pau duaiduai sese uh hi. Pau dang a sin zah uh Zopau kisin leh siam veve dingin up huai. Zomi a zumpih zah uh Zopau, Zolai a theihloh uh zumpih leh midangte in a neumuhna uh kiamtuam ding hiven, na ci hia? Guai, kua in Zomi te Kawl long ok suut sak ding? Kala long ok kua in suut sak ding? Zomi long a ok lote kua in Zomi long ok sak ding??? Inn gua hah masa ding maw gam gua hah masa ding?
Zogam thak i tun ziahziah pen i suahtakna ding maw, i manthanna ding? Zogam leh America a kilehbulh bangin i minam hihna zong i lehkhup khak ding dahhuai kha ding hi. I koltanna gam pan suakta khin a i suahtakna i zatsiam kei a, i koltanna long mah i oh oh lai leh bel i suahtak a meetna om tuan khollo ding hi.
Na suahtak leh suaktate bangin gamtang in,
Na suahtak kei leh suakta dingin hanciam lai in,
Zomi te kua mah nuai ah kuun ngeilo a,
Kuamah nuaiah ki-ap ngeilo hi,
A pumpi a suakta kei zong a lungsim suakta tawntung minam hi.
Tua pen Zogam leh Zogam thak leh Zogam thak hong pianglai ding a kilamdanna, a kilehbulhna hi.
ZONET
To be continued.
No comments:
Post a Comment