Saturday, March 11, 2017

11th Manipur Assembly Election 2017 Result: Hung Assembly!

Ko'n Manipur Solkal Siem Ding - BJP or Congress?

A 11veina Manipur Legislative Assembly kitelna vuikhu jen in i pal galkai ta ua, khen khat a dingin kipahna leh khen khat a dingin mittui-naptui luonna apieng, tam pen kitaiteetna sil pieng ngeimawng ahi chi'n koi dan khat in koi talei, kitelna result i et chiengin absolute majority mu jousang uml

Assembly khat in solkal siemkhiet theina dingin 100 ah seat 50 (simple majority) a mu ngai a, government dettah siemkhietna dingin (absolute majority) poimaw hi. Tutung election result ah Indian National Congress in 28, Bharatiya Janata Dal in 21, Naga People's Front in 4, National People's Party in 4 ma, Lok Janshakti Party 1, All India Trinamool Congress 1 leh Independent 1 ahiman in absolute majority mujou koima umlou a, INC leh BJP guoi huoisiem penpen in government hing form ding dinmun in um hi.

Congress leh BJP te solkal form ding hing kitu ding uh ahita man in, koi in koi panpi a, koite koi kunga beh ding chi etngai ta hi. National level a party kizopte enta lei, BJP lamkaina nuai ah National Democratic Alliance (NDA) kichi kum 1998 in ana kiphut hi. Tam NDA sungah BJP, NPF, NPP, LJP chite ana ki khaikhawm ua, India solkal ana form ban uah, Nagaland tanpha ah BJP leh NPF te'n Democratic Alliance of Nagaland chi'n ana pangkhawm uhi. Election hunlai in ahileh BJP in NPF toh government form khawmlou ding chi'n ana gen ma uleh tu'a a lou theilou dinmun a dingta uh ahiman in tam NDA a ana sepkhawmpi uh party teng toh Manipur government hing form sawm ding un gingtat huai hi. Tam teng hoita a'ng pankhawm thei ua ahileh seat 30 amau khut nuai ah hing um ding hi. BJP in AITC leh Independent tegel a jawlzaw uleh seat 32 nei jou chang chang lanai ding ua, hinanleh AITC in BJP a zop ding gingtat huai lou jel hi.

A'ng etnop mama ding khat ahileh, BJP in vote campaign nasatah a abawl lai in, Manipur phaijang mite thuzaw theina dingin Naga People's Front toh solkal form khawmlou ding chi'n kamteng ana suo zing uhi. Tu dinmun et in ahileh NPF tellou a solkal form joulou ding uh ahiman in bang policy toh mipi a'ng zawl lungdam ua, bang chi hing pankhawm ding uh adiai chipen bildaw huai mama khat ahi. 

A langkhat lam ah, Indian National Congress in Assembly seat tam mupen manan uleh ama'u tanga solkal dinjou lou ding ahiman un, NDA toh ana ki zomkha lou AITC leh Independent khat tuah umte amau halim nuai a hing kailut sawm dingun gingtat huai hi. Kailut tama nan uleh seat 30 higiep ding ahiban ah, government form jou tuonlou ding ahiman un opposition a tou ahing telzaw ding uzong lam-et huai la lou hi.

BJP leh Congress halim nuoi a seat kikim linlien a um ding ahiman in, Manipur solkal a dinkhiet kinephuai lou chilei kichi khiel lawm lawm dingin gingtat huailou hi.

BJP in Congress chilou party teng toh government form nanleh Congress sang a ahip a tamzaw tuanlou ahiman un solkal detdou um lawm lawm dingin gingtat huailou a, maban a aki palpua legislative assembly ahing hi ding gingtat huai.

~ Pupu Zou

*ZOLENGTHE NEWS | 11.03.2017*

*11th Manipur Legislative Assembly election 2017 Final results*

Manipur Assembly election result Assembly 60 a sim zaw sieng ahitoh kijui in, a law ching tengteng ikipahpi ua, a lawsam tengteng i puonatpi uhi. 

INC 28, BJP 21, NPP 4, NPF 4, LJP 1, AITC 1 leh IND 1

Friday, March 10, 2017

ZOLENGTHE NEWS | 09.03.2017

*11th MLA Election Result:* March 4 & 8 ni'a mipi deitelna banga vote khietna result jing nikhuo hing valeh puonkhiet in hing um zangzang tading. District headquarter chin ah kisahkholna man siengta. Vote simna jinglam nai 8 in kipang ding. CCPur dist a vote simna DTCC leh IWMP Building ah um dinga, Hall No. 1 ah 55-Tipaimukh leh 56-Thanlon te sim hiding a, Hall No. 2 ah 57-Henglep leh 60-Singngat banah Hall No. 3 ah 58-CCpur leh 59-Saikot sim hiding. Peace Ground ah Public Announcement bawl hijel ding. Jing chiengin Uttar Pradesh, Uttarakhand, Pubjab leh Goa ah zong vote counting kipan ding. 

*Highest Voter turn-out:* CEO in a gendan in tutung election ah 86.61% vote khiet in um a, numei vote khia ahileh 88.51% tunga, pasal ahileh 84.62% tungpha. Voter turn out sangna pen ahileh Thoubal leh Kakching districts kigawm 91% tunga, aban ah Bishnupur (91.18%), Chandel & Tengnoupal kigawm (91.10%). Churachandpur leh Pherzawl kigawm (69.2%) ahileh a ngiem pen ahi. Ukhrul leh Kamjong district kigawm 78.48%. Imphal East 89.57%, Imphal West 89.38%, Jiribam 81%, Kangpokpi 85.8%, Senapati 88.91% leh Tamenglong leh Noney districts kigawm 80.68%. Tutung Manipur election a Rs 40 crore lam zahbei a um.

*Congress in Govt form ding:* Tuni'n Manipur CM Ibobi in tutung zong Congress in government form kia ding ahi, seat 40 leh 42 kikal Cong a ding ahi chi'n gen. Cong in 2012 in seat 60 apat 42 ah guolzawna na tang.

*BJP in Govt Form ding:* Congress in CVOTER exit poll pomlou in govt form ding chima uleh, BJP in zong single largest party hiding u ahichi'n gen uh. BJP Manipur general secretary and sitting MLA Th Bishorjit in 25-30 seat BJP a hiding chi.

*Pasianni'a Office Kaiding:* Pu Chungjalen Thangnei, Dy.Secy. GAD, Govt of Manipur in Governor thupia dungjui a order asuona ah Financial Year 2016-17 closing um ding ahiman in March 19, 26 leh 29 chienga Finance Dept, Treasurer/SubTreasury office te kaidi'n theisah. Tualeh GoM toh kizom Bank te zong March 29 chia office kaidin thupia.

*PTC Ghq in Ngetna bawl:* Paite Tribe Council, Ghq in election siengthou tah a zaw ahi nua a buoina bawlte'm tawpsan a, election husa beitoh mimal kithei siemlouna umte zong beisah dingin ngetna bawl uh.  

*Post Poll Violence Update:* Kanankhu khuo a um, BJP Chandel Mandal President BS Angam inn meltheilou te'n haltum sah. Angam in agendan in NSCN(IM) te ngohbawl.

*RIMS kikhah:* Regular Director appoint bawl ahilou zieh in tuni'n RIMS a sem doctor leh staff te'n kiphinna nei ua, RIMS kikha law vawt.

*Editorial...........*

*Lawchindan leh lawsapdan siem kiphamaw*


Jingkhuo hingvah dinga, sithu namjen leh minpha/minsie chinteng liengkou a baat leh a suh atung a i diengpi, mipi deitelna lamkai ding puonkhietna vaiguon hing umta ding hi. A mipi hi in a candidatete hitaleh mipi deisahna tang ding a kinem leh a ching ding a kinem ngen ihi ua, a kinem tengteng ching theilou ding leh mi khat mei telkhiet a hing um ding ahiman in telkhalou a umte hita in, telching a umte hitazong leh mipi deitelna pen i pomsiem chiet uh kipha maw mama ding hi.

CEO in a peaceful pen kum chia a gen thei leh candidate leh supporterte'n zong mipi thutanna pen a hi bangbang a pomsiem pen pichin kilatna leh lungpikuo kilahna hiding ahiman in result a hing pieng bang bang i pomsiem chiet uh deihuai hi.


*ZOLENGTHE*
*Connecting the Zo people*

Thursday, March 09, 2017

ZOLENGTHE NEWS | 09.03.2017

11th Manipur Legislative Assembly election candidates except BJP from 56-Thanlon (ST) A/C registering their grievances to the District Election Officer/Deputy Commissioner of Churachandpur, Manipur 

*Election Exit Polls:* Khovel pumpi a research lam a branch nei CVOTER (Center For Voting Opinions and Trends in Election Research) kichite'n tutung India a Assembly election umna munte survey a bawl dan uh tam bang ahi.
  1. 1. Manipur a mi 1330 survey abawlna uapat ngaidan apie uh: BJP 25-31, INC 17-23. Region wise ah [BJP Inner Manipur 14, Outer 6, New Dist 8], [INC Inner 15, Outer 2, New Dist 3], [Others Inner 3, Outer 8, New Dist 1].
  2. 2. Utter Pradesh: BJP 190-210, SP 110-130, BSP 57-74, Others 8
  3. 3. Punjab ah: INC 41-49, SAD 5-13, AAP 59-67, Others 0-3
  4. 4. Goa ah: BJP 18, INC 15, AAP 1, Others 5

Agendan un tam atunga prediction toh a result +-3 khel a kikhe lou dingin gen uh.

*Pastor's Rally for Peace:* Churachandpur District Christian's Goodwill Council saina toh March 10, 2017 jinglam nai 10.30 chiengin Peace Ground ah kipan in Kangvai, Saikawt, Lamjang, Pearsonmun te tuonkha in Pastor's Rally for Peace & Harmony um ding. 

*Post Poll Violence Update:* Election zaw toh kijui in CCpur leh Thoubal districtte ah buoina pieng. Lamka a buoina toh kisai a akiphin mipi 27 sepaite'n amat Lockup tangte CJM in ni 15 sung Sajiwa jail a um di'n order sua. SP CCpur in a gendan in Lamjang a mi kidnap kiman 2te kipuon dungjui in  Chiengkonpang apat Ginzomsang mat in um a, mi dang thumte mat hinailou, amaute ahileh Doukhum - Elimveng, Thonglunthang - Simveng leh Haulianlal - Gangpimual te hi uhi. Amaute police khut a aki surrender lou uleh Manipur pumpi a adsconded case toh puon hiding chi'n gen.  SP in March 7 nita a hun beisa Teargas azah utoh kisai agenna ah, kin-le-buong a kisahkholna umlou a na sepna um ahiman a a date ki verify manlou, maban ah tuabang umnawnlou ding chi'n gen.

*Curfew Hakol in um:* March 7 apat Hebron Veng leh akimvel a 144 CrPC koi a umpen District Magistrate in 6am-11am leh 1pm-3.30pm sung hakol. Lanva Leibul apat Venus Hotel (Gouchinkhup) veng kikal ah 144CrPC Curfew puan a um in Police te’n lampi khahtan in gari leh mimal koima lutsah lou ua, dakkal 24 sung duty uh kichi. Curfew relax hun sunga school kaipan kia tadingin Ebenezer Academy Principal in theisahna bawl.

*Lamjang Hausapa Innka:* New Lamka, Hebron veng a um Pu Suankhogin Lamjang hausapa inn tunita nai 8 lah vel in mei in kangtum chithu kija. Inn 2 um a, building loupen kangtum man kichi. Mei kipatna thei chet hinailou.

*Thanlon A/C thutha:* 56-Thanlon (ST) A/C sunga vote khietdan toh kisai lungkim lou BJP chilou candidate dangteng in Polling 21 a repoll bawl dinga a ngetna lah ua 6 meimei a repoll umdia order a um lungkim lou in tunin Lamka khopi ah lamjuina nei uh. Amaute'n repoll boycott puongin agent koima sawllou dinguh ahidan puong uh.

*Aadhaar Card hing poimaw ding:* India solkal in a buoipi Digitization toh kisai michin in Aadhaar Card neichiet ding chitoh kisai Supreme Court in mun khen khat a zahlou ding chima nanleh mun tamzaw ah zah ngeita. Numei BPL list a um, Free LPG connection neina dingin zong aloutheilou hita ding. Central Govt scheme te zong Aadhaar umlou a mutheilou chivel hing hipai ding ahi.


*ZOLENGTHE*
*Connecting the Zo people*

Wednesday, March 08, 2017

ZOLENGTHE NEWS | 08.03.2017

Manipur CM Okrm Ibobi Singh casting his vote

*Manipur Election Phase-II Update:* >> Tuni'n 11th MLA election Phase-II polling station 1,151 ah Assembly Constituenies 22 adi'n vote khiet in um. Poll percentage 83 tungjou.

>> Phungyar ah NSCN(IM) te'n Congress worker mi 6 puimang uh, police te'n ahun tah a adel zieh un Karongthel,Tengnoupal District ah mi 5 hunkhe man uh. NSCN(IM) te thupiah ahileh NPF vote ding chi ahi. 

>> Sunlai 11AM vel in Chingai Police Station huomsung a polling number 45/76-Chingairoi Khullen ah numei honkhat in EVM susie uh. 

>> Ukhrul a kipat polling No. 45/30 Poiyi mun a EVM thah dia kuon sun nai 11 vel in tungpan. 

>> Chandel dist sunga 41/32 Komlathabi polling station ah EVM suhsiet in um, a tha toh vote khiet sunzom kia thei uh.

>> Thoubal and Kakching district sunga A/C 10 umte ah peaceful deu a vote khiet in um. Nanleh 34/12 polling station - Wangjing Tentha ah EVM suhsiet in um.

*KKL President vuoh in um:* Tuni'n helpawl hidi'a muonmaw tangval thum in Tuibuong bazaar, mipi mai ah Pu Kamthang Haokip, President KKL GHQ ana vua uh. Tam thu toh kisai KIC, KKL Ghq, KSO CCpur, TKSU Ghq, KWU, KWOHR leh Kuki Chief Association CCpur te'n nasa tah a demna thu puongin agang thei pen a KIC Court a kipelut dingin phut uh. Tami thu saifel ahi masang ccpur pumpi bandh um ding chi'n social media a thethang hinanleh thuchien thuchien kithei nailou chipawl um.

*Joint Silnet Rally Umding:* 56-Thanlon A/C sunga mipi deina suhbuoi leh poll rigging, voterte hinna tanpha a giihna, election code of conduct leh constitutional rights palsietna deilouna leh demna in LJP, NPP, INC leh IND Cadidate te'n jing March 9 11am-2pm sung Lamka public ground to Tipaimukh rd, IB rd, Tedim Rd leh Tuibuong tuon in Silent Rally nei ding ua, michin in kithupi chiet dingin chielna bawl uh. 

*Dist Administration phut in um:* Election polling zaw Lamjang a siltung leh Lamka sung buoina toh kisai YPA Ghq, BJP Candidate, PRI(A) Candidate, Ind Candidates, NEIDP Candidate, INC Candidate leh JAC-AATB (NPP Candidate tellou) te'n CCpur dist administration kungah naikal 12 sunga Lamjang a mi kidnap telkha teng mipi thei dia luikhe ding leh naikal 24 sunga mankhe dingin phutna nei ua, bang chidan a Lamjang a tuobang sil a tunnua azong security melmu a umlou a, Phungzathang Tonsing in a sentri koi a um ahiai chi hilchetna peding in ngetna bawl uh. Tuaban ah bang chidan a mipite control nadi'a expire teargas shells zah a um chi dohna bawl kawm in, gam sunga lemna leh muonna umna dia kithupina peding a masa zing ahidan uzong tahlang uh.

*Phungzathang in clarification bawl:* Pu Phungzathang NPP Candidate 58-CCpur A/C(ST) in press clarification abawlna ah local newspaper khen khat in ka inn kihal chia asuo uh kamu in lamdang kasa chi a, abduct a um mi 2 ka inn apat hutkhiet a um chia thu kisuo thujuau bulbal neilou ahi chin gen.  


*ZOLENGTHE*
*Connecting the Zo people*

Tuesday, March 07, 2017

ZOLENGTHE NEWS | 07.03.2017

*International Women's Day:* Lamjang ah numei tung, Lamka khopi sungah numei jatatna bei hiai hiai. Tuabang kawmkal ah khovel pumpi'n jing chiengin International Women's Day mun chinteng ah zang ding.

*Post Election Incident Report:* March 5 nita in Lamjang khomi Thangmuansang s/o Chingpam leh Thangsuanmung s/o Niangkhochiin te meltheite'n ana soisah ua, tuni'n Lamjang khomi ma Baby Vungbiaklun jingkal nai 8 vel a inmai a puonphou a a umlai in pasal mai kituom 3 in pummat in puikhia uh. Khotheilou a um Baby pen Ngoiphai  khomi loukuonte'n tuakha ua, tuachin YPA ambulance toh Lamka puotung in um. Baby Vungbiaklun ahileh janni masa nita a vuah a ana um Thangmuansang naupa Thangbiakmang ji ahi kichi. Tam toh kisai in Lamka khopi sungah I44 CrPC um nanleh mipi ki kaikhawm in NPP Candidate Pu Phungzathang Tonsing innmai ah kiphinna nasatah um a, security force in tear gas nasatah in mipi control. Policete'n teargas zah khenkhat April 2008 a expired hita ahidan mukhiet in um, mipite pilvang poimaw. Mipi thangpai te'n Phungzathang Tonsing gate suse man in a compound sung a gari umte hunkhop zong suhsiat in um. Hinanleh ahuntah a security personnel te a tungzieh in a inn pen bit man chi'n kigen hi. Election sienthou leh lawching a neithei chi'a ikipah lai ua tam bang sil hing tung pen dahuai mama. Thunei tute'n a kin lam a mi giloute amat khiet kin uh poimaw.

*Ibobi v/s Sharmila:* Congress akichi leh Ibobi sil bawltheina zieh a kum 15 sunga vihawmna tu chie ki enbet toh AFSPA deilouna zieh a kum 16 ann ngawl jou, Iron Lady chi kiminvaw Irom Sharmila te maban ding jing chiah mipite'n thutanna vote khe ding uh. A lamdang khat, Ibobi in a ngamthaw zieh adiei mah, a kitetpi ding Sharmila a demlam ki ja kha lou kei!

*ARte'n KNA Cadre 4 man:* PIB Defence, Imphal thusuo in CCpur Sector Assam Rifles of Red Shield Division nuoi a Veng Battalion te'n March 3 ni'n Sangaikot area ah Kuki National Army cadres SS Maj Mangkhup Tungdim (PRO), Pvt Kamminthang Haokip, Sgt Lunkholen Haokip, leh Sgt Thangtinlal Khongsai te man uh chithu kija.

*Joint Appeal Bawl Uh:* 11th MLA Election post poll violence toh kisai NPP candidate, BJP Candidate, NEIDP Candidate, PRI(A) candidate, INC Candidate leh Ind, Candidate te Chief Agent te'n tuni'n koima'n buoina bawllou dingin ngetna nei uh. 

*KRA leh KNF kikap, Mi 1 Shi:* Zanita Kangpokpi Dist-a Khengjang leh Leikot kikal ak KNF/UPF lek KRA-U/KNO akikap tuana uah Kamminlun Hmar s/o Seiminthang Hmar of Khengjang kaplup in um kha. Ama hi KRA-U cadre a hidan in thutut kimu.

*Repoll Um Ding:* Phase 1 Repoll Polling Station 34 ah um ding

Lamka, March 7: Election Commission of India thupieh tuni'a kimu in a gendan in March 4, 2017 ni'a vote khietna polling station 34te a pom thei hilou chi'n puong a, tuamun tengah March 9, 2017 (Ningahni) chienga vote khiettha dingin puong hi. Tuani chiengin vote khietna jinglam nai 7 in kipan dinga nitahlang nai 3 tan in vote khiet thei ding in tahlang hi.

Repoll umna mun dingte ahileh: 

1. *7-Andro* ah mun 5 [7/17-Poiroukhongjil (A), 7/41-Moirangpurel (A), 7/42-Tumukhong, 7/43-Moirangpurel (B) leh 7/44-Itham] te ahi. 

2. *10-Uripok* ah mun 1[10/5-Iroisemba(B)] 

3. *46-Saikul* ah 12 [46/1-Saikho, 46/2-Khaochangbung, 46/3-Molkon(A), 46/5-Molkon(B), 46/16-Ekou Mulam, 46/18-Luwangsangol, 46/21-Khongnangpokpi, 46/24-Kamuching, 46/30-Khamenlok, 46/42-Kamuching, 46/43-Lairok Vaiphei leh 46/44-Maphou Kuki],

4. 51-Saitu ah 3 [51/2-Mayangkhang (A), 51/3-Mayangkhang (B) leh 51/12-L Simol] 

5. *56-Thanlon* ah 6 [56/2-Phaijang, 56/5-Dailon, 56/21-Thanlon (A), 56/26-Songtal, 56/27-Sumtuk leh 56/35-Khajang], 

6. *57-Henglep* ah 5 [57/13-Kolhen, 57/14-Moldak, 57/15-V.Munlai, 57/18-Songphu leh 57/55-Tuilaphai], 

7. *59-Saikot* ah 1 (59/64-Ngurte) leh 

8. *60-Singngat* ah 1 [60/4-Tonglon(T)].

Monday, March 06, 2017

ZOLENGTHE NEWS | 06.03.2017

LAMJANG KHUO A VUO LEH SAAT SIDUP A UM
*Lamka ah 144CrPC koi in um:* Jannita a Thangmuansang leh Thangsuanmung vuoh a aum utoh kisai Lamka khopi sung a bouruak sousang a mu ahiman in District Magistrate in tuni 4pm apat Lamka khopi sungah 144(2) CrPC koi.

*Pu Demmang Mualliam:* Tujingkal matah in Pu Demmang Haokip, Chief of Demmang village, MDC Leimata ADCC in hing mualliam santa. Ama sunna in CCpur dist sunga achool teng leh ADCC Office jing chiah kikha ding.

*Ki vuate mat hita:* Jannita Lamjang khomi Thangmuansang (26vel) s/o Chingpam leh Thangsuanmung (16vel) s/o Niangkhochiin te a inn uapat puimang leh sidup jen a ana vua Thangsuanlal of Elim veng, New Lamka leh Thangkhanlun of Beulahlane, Central Lamka te tuni'n police khut ah umta. SSPP Ghq in Siamsinpawlpi General Headquarters a Executive Committee member a hina tawpsah uh. ZRO (Zomi Re-Unification Organization) in mawpai, hichibang a gamtangte ki en liam maimailou ding ahi chi'n gen. Tam siltung toh kisai National People's Party (NPP) in ki saikhahna neilou ahidan uh thupuon bawl.

*Economic Blockade illegal:* Manipur High Court in tuni'n Economic Blockade khu dankal (illegal) ahichi'n puong a, blockade supporterte tunga dan bang a nasem dingin security force lamte thupia. Court hatna banga va kilang lou UNC Office bearer 6te March 23 tan hunpieh in um uh. MHC in  Economic Blockade khu “violating the fundamental rights of the citizens” ahiban ah Supreme Court thupieh dungjui a illegal a puon a um ahidan gen.

*Helpawl Ni Kikaptua:* SoO nuoi a um KNO/KRA leh UPF/KNF hidinga ginmawte tuni 4pm lah vel in Kangpokpi dist, Gamnom Sapormeina police station bial sungah nasatah in kikap tua uh chi thutut kimu.

*Govt Form Ding Chitua uh:* Tuni'n  Assam Finance Minister, Hemanta Biswa
Sharma of Bhartiya Janata Party (BJP) in 11th MLA election ah BJP in absolute majority mu ding chin gen.

*Election Phase 2:* March 8 jinglam nai 7 apat nitahlang nai 3 tan Thoubal, Kakching, Jiribam, Tamenglong, Noney, Senapati, Ukhrul, Kamjong, Chandel leh Tengnoupal district ah vote khietna umkia ding. Assembly 22 adin mi 98 kitu din gua, mi 7,74,472 te'n vote khietna nei ding uh.

*SBI Thupuon:* State Bank of India in April 1 apat bank account maintain na di'a minimum balance Rs 1000 (Rural) leh Rs 5000 (Urban) tei a um gige ding, Rs 1000 nuoilamte fine um ta ding in gen. Ha khat a sum 3vei deposit bawl thei ding, 3vei ban ah service charge umta ding chi uh.

*Fake Account Kiman:* Cyber Crime Unit Imphal West in janni'n Facebook a Fake Account a kimawl Paokai Haokip (24)yrs s/o (L) Khaihao Haokip of N. Zalenphai Village Ccpur man uh.

*US a Ph.D. Zilding kuon:* Pastor Khup Do Khen, Director of Ministries, MELC in 8th March, 2017 chienga US a Ph.D. zil ding in kuan ding. ELWA HQ OB, MELC OB leh a seppi Office Staff te’n tuni'n Hahna vaiguon zahpi uh.

*Repoll Um ding:* KNT Daily News in agendan in Saikul A/C polling station muthum - H. Champhai, C. Molkon A & B leh Kamuching ah March 8 chiengin repoll um ding chi.

*59-Saikot Assessment:* 59-Saikot BJP election Office in Assessment abawl dan thei utte a di'n - LJP 6097, BJP 14025, INC 12571. Thu kija dan in LJP in 7000 vel mu dia ki gingta uh, LJP in vote a tam mulai sia, BJP adia chance hoi semsem chi'n gen uh.

*60-Singngat Assessment:* BJP te'n 7700 vel mudia ki ginta, INC leh NPP sang a tam zaw. INC te'n ahileh 9652 vel mudia ki gingta, BJP leh NPP sanga tam zaw hijel. NPP te ta leuleu inlah 5016 mudia ki gingta jel uh. Tulaitah a unpi ua guoljou.


*ZOLENGTHE*
*Connecting the Zo people*