ZOLENGTHE NEWS | 01.04.2017

*Financial Kumlui beite i nun nopna teng toh, nua chieng hing heikia lou ding!* 

*CCpur Dist Hospital 1 step ahead:* R. Sudhan IAS, DC/CCpur in tuni'n District Hospital, CCpur ah "Computerized OPD Ticketing System" honna neita.

*Road Accidents Inquire Ordered:* Manipur CM in tuni'n tulah teng a accident um zeng zungte a zieh suikhe dingin Chief Secretary thupia. Traffic sign tuomtuom hing kibawl ding, gas horn zah hing kikhawm didan ahi.

*State solkal order khau:* Manipur Principal Secretary (Planning) Shri Vineet Joshi tuni'n Additional Chief Secretaries, Principal Secretaries, Commissioners, Secretaries leh heads of Departments teng kungah order khat tah mei suokhia. Kum 2016-17 sunga Rs 50 lakh & above lutna development work teng progress report detail teng State Planning Department website a upload dinga thupia in um uh. Lim (photo) in a support sese ding chi hinalai. 

*Order khat dang khat:* Chief Secretary, O Nabakishore in order a suo khat - Govt officer/administrative secretaries kichi tapou in a table a ni 1 sanga tamzaw file pending a koi theilou ding. Dept chin a di'a biomatric attendance koi hiding, officer jousia puntual ding chi order suo khiet in ana um.

*CCTV installation scam inquiry:* Manipur solkal in Rs 8 cr val lut a kibawl CCTV installation scam enquiry bawl dingin order suo khia. Enquiry Committee Chairman in ADGP Promod Ashthana leh Sumant Singh Secretary (RD&PR) ban ah Clay Khongsei IGP te member a guon in um uh. Rs 80154775 bei a bawl CCTV Scam enquire report ni 15 sunga submit di hi chat meidan ahi.

*SBI new rules & regulations:* Ha 1 a thumvei tan deposit free, aban Rs 50 charge pieh ngai. Metro citiy a minimum balance Rs 5000, city/town ah Rs 3000, semi urban ah Rs 2000, village branch ah Rs 1000; Minimum balance maintain loute'n niteng a Rs 200 lieu hiding; SBI ATM ha khat a 5 vei free a zah thei, aban teng Rs 100 ki cut jel ding;   

*Myanmar thuthang tamlou:* Military Junta in kum 50 vai ahawm jou in Aung San Suu Kyi lamkaina National League for Democracy te'n solkal form ua, kum khat chingta. Khen khat in Junta toh ki chimat seng chipawl umta ahi man in, tuni'a Rangoon a 19 seats kitelna umpen in Suu Kyi vaihawm dan mipi a lungtun leh tunlou kilang sah dingin gingtat huai.

*KSO Gunpi Block thuphuon:*  Dec. 31, 2016 jan a Kangvai, CCpur a M Jamchinthang Zou leh Jangkholam Guite te KNLF/KNO te'n soisah leh thautoh ana kapliem natunga tutan State Govt. a ngaisah lou zieh in April 3 apat kiphinna pat hiding chi uh.

*ZYO Moreh Block in mawpai:* March 29 nia meltheilou te'n Pu Manglamthang inn a bomb a puoja sah utoh kisai Moreh block ZYO in mawpaina sangpen bawl uh. Govt in a kinlam a ngaiven dingin phutna bawl uh. 

*ZOLENGTHE*

*Connecting the Zo people*

ZOLENGTHE NEWS | 30.03.2017

Twelve Headman's of Tangkhul Community called on Hon'ble CM at CM office on .30.3.2017.

*Manipur ah Gari tuasia umzing:* Tuni'n Manipur ah gari accident mun thum ah um a, mi 3 in hinna taan, mi 6 huoise deu a liam. I lampite ulah a kuo keukou dim, a ki tousia dim, a neu a neu thei nalai, gari tawlte lah vivi vava chia tai ngen. Pilvang vai ei!

*KIM Vaipaw thate:* Kuki Inpi Manipur in tuni'n kitelna nei. President (Kumpi) - Pu Thangkhosei Haokip, Semang - Dr S. Chongloi, Pachong - Pu Khanlienkhup Lianzaw, Lhangsam - Pu L Asong, Thumop - Pu A. Lienthang.

*Tangkhul Naga Wungnao Long:* Ukhrul district sung a Tangkhul khuo Headman (vaihawm) 12 "Tangkhul Naga Wungnao Long, Ukhrul" min in tuni'n CM Biren kipapina vaiguon a zumpi ah va nai uh. CM pu'n singtang gam puophatna ding a Ministers, secretaries, directors leh engineer te a mun mama ua nasem dia sawl a um di ahidan ana gen.

*Kawlphe in mi khat that:* Tuni'n Manipur leh NE state teng ah guo nasatah in ju, Jiribam ah kawlphe in Nilakanta Das (45) hinna lasah. Tamenglong district sung NH-37 ah memchim in gari tailete buai. T Laijang leh K Sinam lampi menchim zieh in tan, Jiri-Imp lampi nemchim zieh in gari liente tailou. Imphal khopi sung Uripok, Singjamei, Keishamthong, Sagolband leh Lamphel lah lampite tui in tum.

*Zou Gospel Motion Album tha:* Ahing tung ding April 2 apat Roslyn Kimbuang Zou in abawl *MANGPA HOI HI - Vol 1* chi Gospel Motion Album Lamka khopi sung CD zuohna munte ah muthei hita ding.

*ZOLENGTHE*

*Connecting the Zo people*

ZOLENGTHE NEWS | 29.03.2017

The Healing Touch: Hon'ble CM Shri N. Biren Sing give a healing touch to the injured persons at RIMS, Sjija Hospital, Raj medicity & JNIMS on 29.3.2017.

A Kham Sempei Loute Kitawp Hen!: Singtang lam a govt sangsia, na sempeilou a mi guoisawnte toh kisai state solkal in thusuo bawl. Govt skul chin ah sangsiate lim, min, khuo, chitna flex a tadoh chiet dingin order suo. Tuachia sangnaupang te'n ka sangsia nu/pa ki mu ngeisih na e a'ng chini uh hing um ding dan ahi. _Student Orgns te'n tam bangte etkai in nei in, khau peipi sim mama lei hoi didan hia..._.

CM in Bus Accidentte ve: CM Biren in Delhi a'ng tun tun in Imp-Dimapur road a tuasie a liemte RIMS, SHIJA, Raj Medicity leh JNIMS ah vehna va nei a, Doctorte kawmu dungjui in a liem huoise deute Rs 50,000 leh a ha liam sengloute Rs 30,000 in sietvat. Shina tuate Rs 2lakh chiet toh sietvat ding.

*Moreh ah Temple attack in um:* Moreh a Shiva Temple ah bomb hattah puohza, koite khut nua ahi chi thei hinailou. I nua Pasianni'n zong Tamu ah Nepali temple khat ah bomb ana puahza.

*JACAATB in Solkal kihoupi ding:*  Joint Action Committee Against Anti Tribal Bill (JACAATB) in public consultation anei uh tungtawn in Manipur solkal toh kihouna nei dingin ki thukim ua, CCpur dist a 6th Scheduled koi di'a phut ding lemsa uh chi'n thutut kimu. 

*Manipur CM Interview na:* 

Q1: _Economic blockade ladoh toh kisai hamsa na sa vangut amah?_

CM: Mipite dei-le-ngai govt in a theipi a, i buoina iki ngaikhiet pi chia sil apieng maw umlou ahi. Govt luipen ah tuabang ana um lou, tuazieh a ka nuosie ahi.

Q2: _UNC in EB a koikia louna ding leh Meiteite lungkim sahna di'n bang plan na nei ei?_

CM: Valley leh hills mipite ki kal a awngvang lienpi um, tuami suh bing ahitheina dingin Hill dist teng leh valley district teng a khantou dan kibang a um ngai. Tuami na dinga pan nasa tah a la kahi.

Q3: _Centre apat bang support na ki nem ei?_

CM: State capital leh remotest area ki kawmna lampi bawlna ding leh damlouna toh kisai a zah le ding helicopter Ambulance 2 a masa pen in ka lam en.

Q4: _Emotional Integration poimaw na chi kha a, na kitua lou utoh bang na chi gasuo sawm ei?_

CM: Valley mite ahileh Hindu kana hi ua, reservation ka nei uh. Naga leh Kuki te ahileh Christian ana hi ua, free society ahi uh. Majority community hina dawl a kipia doh masah ngai, cabinet meeting zong hills a tam tah nei hiding, ka thupi ahileh Hill Dists masuon jel in chi ahi. Mipite dei-le-ngai kikuppi dingin field work ha bawl ding chi'n ka minister te zong ha hiljouta. (_ET_)

*ZOLENGTHE*

*Connecting the Zo people*

ZOLENGTHE NEWS | 28.03.2017

Manipur Chief Minister N. Biren Singh meets Union Minister of State (Independent Charge) for Development of North Eastern Region (DoNER) Dr Jitendra Singh on March 28, 2017

*ZYO GHQ in Chielna Bawl:* Nu Niangkhanching, kum 60 vel, New Lamka College huong a teng, lungsim veng chiah lou, March 27, 2017 jinglam nai 8 vel a pawt, inn tung kia nonlou in um. Janni leh tuni'n ZYO GHQ leh YPA Elim Veng Unit pangkhawm in suina nei ua, mujou lou uhi. Jingchieng in asuina sutzop hikia ding ahiziehin ZYOte a tam thei bang kuon chiet ding in Info & Publicity, ZYO GHQ in theisahna bawl. *Ki ngakhawmna mun ding - Zogal Hall leh Nu Niangkhanching te Inn, New Lamka College huong; Ahun - 09.00AM.*

*Zou Gaal Kum 100 Chingta:* Suongkhai-thaang, Savum Pumlawng, Awgawchieng, teipi chite vel toh Pu Goulun, Pu Langzagin, Pu Lagou, Pu Tonghau, Pu Henkham, Pu Vungdam, Pu Suohgou, Pu Helthang, Pu Lampum, Pu Suohkham, Pu Salet leh adang dangte'n British te hangsan tah a ana douna uh (1917-1919) tukum in kum 100 chingta.

*Manipur Leengpa Security Guard Pieh:* Manipur solkal koima dang in ana bawl ngei vate lou, BJP Solkal in Manipur Leengpa khanggui kepbitna dingin tuni'n titular king Leishemba Sanajaoba security guard pie uh.

*Meitei Kum Tha:* Meiteite kum tha "Sajibu Nongma Panba Cheiraoba" (Lunar New Year) jing chieng hita. State Holiday ahi.

*Old Age Pension:* March 30 apat April 12 sung in District Social Welfare Office, CCpur, Chiengkawnpang ah Old Age Pension - Red & Blue Card neite kungah April - Aug 2015 (ha 5) ading hawm hiding. _Tehsete sum commission lah lou ding!_ 

*JACAATB Consultation Report:* JACAATB lamkaina in tuni'n Lamka ah Public Consultation um. Manipur Govt toh kihouna nei ding leh Charter of Demand submit ding ban ah, Pawl tuomtuom in JACAATB nungthuop zing ahidan uh talat in um.

*Manipur CM meets DoNER Minister:* CM N. Biren Singh in tuni'n Union Minister of State (Independent Charge) for Development of North Eastern Region (DoNER) Dr Jitendra Singh toh Sports University tungtang genkhawm uh. DoNER minister in Khuman Lamkap hokey stadium a flood lights bawlna di'n Rs.48 crore donate di'n chiem a, District chin a Women Market bawlna dinga zong kithupi ding ahidan gen. "Air-dispensary-cum-ambulance" helicopter service zong bawjui tou ding in chiem.

*MP teng kunga futbol pie hiding:* India in October chia FIFA U-17 Football World Cup a host ding toh kisai Football Culture promote na di'n jing chiah Union Sports Minister Shri Vijay vaiguonna toh Lok Sabha Speaker Smt. Sumitra Mahajan in MP teng kungah Football piehna nei ding chi hitazang ei!

*ZOLENGTHE*

*Connecting the Zo people*

ZOLENGTHE NEWS | 27.03.2017

Manipur Chief Minister N. Biren Singh calls on the Prime Minister Narendra Modi on March 27, 2017 (DIPR)

Biren leh Modi kimuna gasuo: Manipur CM N. Biren Singin in Delhi a um a boss pa Pu Modi va kimupi. CMpu'n Manipur a di'a development work poimaw tamtah PM kunga luikhia. Centre in Rs 140-150 crore grant di'n chiem. Manipur a Central Sponsored Scheme umte 90:10 pattern peipi di'n phasa ua,  National Highway 2 gel ah 4 Lane nasep pat hipei tading, April 1 apat NH-37 ah nasep pat hiding. Mini Secretariat bawlna ding zong DoNER tungtawn hiding a, District chin a  Women’s Market bawlna ding pen DoNER tungtawn a NLCPR funding bawl hiding. 60 bedded Mental hospital bawlna ding zong proposal thot hiding a, Flood lighting of Khuman Lampak Sports Complex pen Ministry of Sports leh Ministry of Power in enkai dinga, Smart City Project tung tawn a Flyover apoimaw na mun a bawl hiding.

Manipur Tragic Day bang top: Tuni Manipur mun tuomtuom mun 3 ah gari tuasia in mi 21 shi, 33 val in liamna tua. Accident masa Senapati dist sung, Imp-Dmp road, Makan leh Chakhumai kikal ah Bus khat tuasia in mi 12 shi a, mi 25 liam. A 2na - Imphal Jiribam road ah winger khat tuasia a mi 8 amun a shi kichi. A 3na -  Imphal Dimapur rd ma Lairou a truck in tuasia, a driver pa shi ngal.

Gari Tuosiete sietvena: Chief Minister in a shi innkuonte kungah ex-gratia of Rs.2.00 lakhs, a liem nasadeute kungah Rs.50,000/- leh a liem nasa deuloute kungah Rs.30,000 chiet sietvena bawl hiding chi'n gen.

Aadhaar Card: Supreme Court in govt welfare schemes muna dia Aadhaar Card pen mandatory hi theilou ding chi, ahivang in tulai scheme teng bang teng lah Aadhaar Card ngai teitei jel. A buai huai khat vang chu hi maw!

*Law Sanghun hitaleh kilawm:* Finance Department, Govt. of Manipur in Employment leh pensioners pay bill pass theina ding a Treasury Office, CCpur in "Green Signal" muta chi muonhuai tah apat thutut kimu.

*Electrict Fee Khang Ding:* Manipur State Power Distribution Company Limited (MSPDCL) thusuo in April 1 apat electrict fee neu khat khang ding chi uh. Prepaid meter daily rental charge pen khanglou in energy charge khang ding.

*ZOLENGTHE*

*Connecting the Zo people*

ZOLENGTHE NEWS | 26.03.2017

Manipur Chief Minister N. Biren Singh just before leaving for Delhi at Imphal Airport

*Phin hawm chia zong phallou:* Manipur CM N. Biren Singh in Indo-Naga Framework Agreement toh kisai tuni'n Manipur gamgi phin hawm chie suhkha di zong phal hilou ding chi'n gen. Tam Framework Agreement toh kisai Prime Minister in hilchetna abawl ban ah Union Home Minister in zong hilchetna bawlta ahiman in Manipur mipite buoilou dingin chielna bawl a, "_Manipur Territorial Integrity khu keima hinna sanga it huaizaw ahi_" chi talawm ei.

*Manipur CM Delhi zin:* CM Biren leh PWD minister Th Biswajit te'n tunita in Delhi juon ua, President, Prime Minister, Union home minister, National BJP President Amit Shah leh lamkai dangdang kimupi ding ua, March 28 a hing kile kia ding ua gingtat ahi.  

*MNRF in Th Muivah dem:* Manipur Naga Revolutionary Front (MNRF) in tuni'a thusuo abawlna uah Th Muivah in NE Nagate gawmkhawm ding hita ahipen juau pumlum leh Manipur Naga te lung-awpkai sahna ding meimei ahi chi'n gen uh. 

*Gujarat ah Hindu leh Muslim buai:* Prime Minister Modi hing kipatna state Gujarat, Patan dist sunga Vadavali khuo ah janita in Muslim leh Hindu school naupang ni kibuoi zieh in mipi tanpha buoina tunga, Hindu mi 5000 vel in Muslim te inn leh gari tampi haltum sah ua, Muslimte'n zong ana thuh uh. Sepaite' thahatna toh buoina suhveng a um ahidan K. K. Nirala, district top administrative official in gen.

*JACAATB Consultation Meeting:* Manipur Govt in chielna a pieh dungjui in JACAATB in March 28, 2017 - 11am chiengin YPA GHQ Hall, Hiangtam Lamka ah Public Consultation nei ding ua, JACAATB in michin chiel. A mun a teltheilou dingte'n March 27 tan a ngaidan jac.tribals@gmail.com a thot di'n chiel uh. 

*Samaritan Poimaw:* _Miss Andy Chiinngaihlian Simte d/o (L) H. Tunzamang of Dumsau Village, Delhi apat innlam zuon lai Dimapur ah damlou gimsia in,  Dimapur Civil Hospital Emergency Ward a um, va kan thei di eimi a um leh kidei kin. Nagaland police Lucy in ana pui dan ahi. Lucy No.07005201018.

*ZOLENGTHE*

*Connecting the Zo people*