A Pil leh Tei Minam (Intelligent Community)

David Vumlallian Zou
Queen’s University Belfast, UK

Introduction

I teenna Manipur pen “sana leitang” (land of jewels) na kichi hi. Hinanleh 1991 vel apat, i gam pen kitha-kimatna gaal phual i suahsah uhi. Tuaziah in siamsinna leh sumsinna lam ah nasatah in i tuantual law uhi. Ei India Mal-Suah lam ah, tunai in ‘state’ khen khat in changkan lam manaw uhi – eg. Sikkim leh Mizoram. Hinanleh gam leitang hausa zaw, Assam leh Manipur chite gari buannawi lah ah tang bang in, nua-le-ma sawn thei lou in um uhi. Kuki-Zomi tualgal (1997-98) zou in, Manipur Zodawn lam bang aniamkiah petma hi. Eite Lamka tual a thau toh i kidel sung un, India mundang ah IT revolution na tung hi. Eite Kumsang Lalgam leh “1997 Danger Point” toh i buai lai in, India a IIT engineer ten Y2K computer buaina suhveng dan (solution) na thei ua, USA leh Tumlam gamte ah sumsinna nasatah na nei uhi. Y2K computer buaina pen gamdang a engineer te’n zong suveng (solved) thei nanleh, India a engineer te’n man tawm (low cost) tah leh fel tah in bawl thei sese uhi. Khovel a Y2K buina pen India adia hamphatna (opportunity) kiselguh ahing suah ta hi. India a Economic Reform pen 1991 a na kipan hinanleh, kum 2000 pen India adia IT revolution kipat hun ahi. Tunia Lamka a mobile company Aircel leh Airtel kichite zong Economic Reform (1991) gasua ahi.

Leitang hausatna v/s Mihing siamna?

Tunai in, Prof. Atul Sarma in dotna poimaw tah a bawl a, “Bang dia India a state khenkhat gualtung tuang a, khangtou deu sese adiai?” Khantouna pen Pasian silsiam leitang hausatna (natural resources) toh kisai di’a ngaisun pawl um hi. Hinanleh tami ngaidan dih lou ahi, chi Prof. Sarma in agen hi. India a leitang hausa penpen Bihar, Orissa leh Assam chite ah zawnna huaise pen hi. Tualeh Africa gambung sung ah zong, thautui (oil), gold leh resources tuamtuam a leitang sausa pente (eg., Nigeria, Zaire, Sudan, etc.) bang ‘human development’ a tuantual pen in pang veve uhi. Tuaziah in, Manipur “sana leitang” tung ah teeng nanlei, khantou teitei ding chi “guarantee” um lou hi. Assam phaizang a thautui leh “tea garden” ten zong khantouna (human development) tun mel lou hi. Alelam ah, Aizawl kawlsia keen-tawng lah ah teeng nanlei, zawn teitei ding chi thu um lou hi. India a state changkang Kerala leh Gujarat ten zong leitang hausatna bangma nei tuan lou uhi. Tukhang ah, khantouna tahtah pen leitang hausatna sang in mihing siamna ah kinga zaw hi. Adiah in siamsinna leh sumsinna in khantouna tun hi.

Tulai sumsinna piching i bawl utleh, siamsinna leh “computer literacy” bang hing poimo ta hi. “Theina Khang” (Information Age) a Zou tate a pil-le-tei minam ahitheina dia poimo sil tampi um hi. Hinanleh a poimo tungtuang, sil thum ka tahlang ut hi. Tuate ahileh laitheina (mass literacy) leh library-cum-conference hall ahi uhi.

Lai simthei-gelhthei: Khantouna Zungpi

Mihing siamna tellou in leitang hausatna in minam tungding thei lou hi. Tualeh mihing siamna kalbi masa pen ahileh laitheina ahi. Mi kum 15 apat atung lam ten lai simthei-gelhthei ding china ahi. Mi zapi laitheina (mass literacy) um lou in, democracy pen politician-te kimawlna maimai asuah hi. Laithei lou ten newspaper zong sim thei lou hi. News simtu um louna leh thutha saite a hat louna mun ah, politician-te kinoptaal uhi. Tuaziah in, zapi laitheina um lou a solkar fel (good governance) nei ding kinepna um lou hi. Tualeh laithei lou mi mawl tamna mun ah, mi khat-le-ni pilna pen phatuam nanleh, athutawp ah koima’n zui thei tuan lou ding hi. Laitheina pen mimal khantouna mai hilou a, minam khantouna dia khutlai poimo pen ahi. Tuaziah in “BA, MA bang zat i nei ei?” chi pen poimo nanleh, “Zou sung a literacy rate bang zat ahiai?” chi khu dotna poimo zaw ahi.

Khopi sung a teeng mi khen khat in, “Tulai koi lai thei lou um non sih va” chi’n ngaisun uhi.
2001 Census dung zui in, Churachandpur district a literacy rate 74% ahi. Total literacy neina ding gamla nalai hi. CC Pur district ah numei lai thei lou (illiterate) 35.6% um hi. I numei-te ⅓ sang a tam zaw lai thei lou ahi nalai uhi. Pasal laithei pen hunkhop pha hi[i]. Tuaziah in, Zou numei-te adia Literacy Mission siamkhiat ding poimo petma hi. Piching Sunde Skul bang ah kam-adawng (illiterate) pawl-te adia Literacy Class nei thei ahi. Sunde Skul pen kum simsial a Bible Study dan a peipei sang in, kum bang zat ama Literacy Class toh zoh khawm leh phattuampi zaw ding hi. Tami pen adiah in, numei laithei loute leh Zodawn lamte adin hoi hi.

China-te thupil khat in, “Nga matsa kihop tho sang in, ngat mat dan kihil ding thupi zaw hi” achi hi. Bible Study pen ngamat baisa kihop toh kibang ahia, mimal a Bible simtheina dia Literacy Class pen thupi zaw hi. Bible Study pen bawl ding ma ahi, hinanleh Literacy Class zong ngai dau thei hinon lou hi. Laithei ten Bible leh labu gen lou, Bible hilchetna bute zong mimal in a kisim thei mai ding uhi. Tualeh tulai laisim thei loute adin zalat theina dinmun tampi um hi. Niteng hinkhua a i maituah sil neu nounou – sign board, damdoi min, laithot, electric bill, ngainat chialna, election manifesto, advertisement, etc. – chite bang laithei loute adia batpha lou sil ahing suah hi. Tahsa dan in kinai nanleh, i Zou mipi laithei loute pen lungsim ah khual gam mi suah uhi. “Computer literacy” in tami laithei leh theilou khovel kigamlatna a keehlian zaw ma hi. I unau laithei loute khantouna khovel pulam khosa zing asuah uhi. Chitazet in, laithei lou pen mimal leh minam adia hamsiatna (curse) ahi. Ngaineep thei ahi non sih!

“Khotang Laboratory”: Conference Hall

A pil-le-tei minam hitheina din zapi laitheina ban ah, laibuli (library) leh conference hall kisam hi. Scientist ten laboratory tungtawn in sil suina thuh nei thei uhi. Tuama bang in conference hall pen a pil-le-tei minam siamkhiatna dia “khotang laboratory” poimo pen ahi. 1954 a JCA hun apat, Zou sung ah pulpit tungtawn in Zou tate Tapidaw i suahsah uhi. Tun kum 50 Tapidaw i hi nua un, thu-le-la a piching hun ahi ta hi. Pulpit dawn a mi khat aw-heu zen a kikoukou hun hinonlou hi. Conference hall sung a, ngaidan tampi leh theidan tampi sunkhawm a, kikup khawm hun ahi ta hi. Tualeh chi-le-nam a mi khen lou a, nam dang-te apat pilna leh siamna nei mite conference hall sung a chial lut a, tong kikuppi in, a theina te uh Zou minam dopsangna din zat sawm gige vai. Mi tuamtuam in a zilna utoh kituah in theina chi tuamtuam nei uhi. Tuaziah in lungsim kihong nei a, misiam tampi-te theina zat tuamtuam sunkhawm zing ding poimo ahi. Adiah in, i gam in siamsinna leh sumsinna lam theina-zau (secular) a tasam mama hi. Aziah pen, i gam gentheina leh gilkialna te i thuhsui leh, sakhona thu maimai toh suhveng thei zong hisam lou hi.

Tu dinmun ah, ZPCS Conference Hall chi lou seminar bawlna ding mun lemtang kinei zou nai lou hi. Hitheileh Conference Hall piching khat in sound system leh slides projector bang anei ding dan ahi. Tualeh seminar leh workshop bawlna din touna pen “round table” dan hileh a lemtanna tampi um hi. Tua ZPCS Conference Hall bang biahinn sung dan in touna a zawnzawn in kigual hi. Tami in “group interaction” bang tan ama dal pha hi. Maban ah huaplian zaw a zat thei din, Conference Hall changkhang khat Zou kampau te’n project nei thei lei lunggul huai hi. Zou lamkaite a pankhawm ua, a kihou thei uleh, ZYO complex ah Library-cum-Conference Hall lamna ding mun um tham ding hi. Tualeh JCA jubilee lopna bang atuam apai a bawl sang in, JCA conference hall adia project bang neithei hitalei Zou minam dopsangna suah ding hi. Khangsawn ten a zal zou pha ding uhi. Sum a lakh a lakh a kisenna in lukhawng (value for money) nei thei leh dei huai ta hi.

Library (Laibuli) leh Theina Kepbitna (Documentation)

Tualeh conference hall leh library vakhu kop bang ahi uhi. Conference hall pen theina thezahna mun ahia, library pen theina kholkhawmna leh kepbitna mun ahi. Bible sung ah zong Thugenpa’n libuli (library) toh kisai hichi’n ana gen ngai hi, “Mipilte thugen belam chiangkhut bang ahia, a thugen uh kikaikhawm pen seh a kikhen zawtpi bang ahi” (Eccl. 12:11). I pi-le-pute’n nidang a i savun laibu ui in ahing nehtum sah dan tangthu ana nei uhi. A savun laibu uh sum tung a akoi ziah uh ahi. Tulai ham hileh, i pi-le-pute’n savun laibu nei nanleh uh a kepbit dan (documentation) thei lou uhi. Tutan a record dan in, Zou kam a laibu kisun masa pen “Pasian La” ahi. JCA ten 1954 kum a Sadar Bazar (Imphal) apat ana sut uh ahi. Tualeh Pu T.Gougin sut, “Shakespeare Tangthu” (1958) pen Zoukam a secular laibu i nei masat pen uh ahi. Tami MGM Press (Imphal) in a sut ahi. Ahileh tami Zou kam a laibu masa pente ui leh khaulaw (cockroach) ten anehtum louna din “documentation” i bawl tai? chi ngaisun tham ahi.

Mimal a laibu kepbitna “private collection” Zou sung ah um tham hi. Pu T.Gougin leh Pu Nehkhojang te’n bang “private collection” hunkhop nei uhi. Hinanleh hichibang mimal library-te pen dengdel petma uhi. Inn susiang numawl khat in zong “document” poimote paimang thei gige hi. Tuaziah in community library khat beh Zou kampauten a poimo uhi. Duthusam hileh, i history kepbitna kawm a, Zogal Memorial Library chi bang library project sawtpi a i na bawl ding dan ahi ta hi. ZLS ten tunai a Zoukam a laibu kisun teng copy 5 zel “deposit” dia a ngetna uh sil hoi ahi. Hun peisa ah, tami bang a ZLS deposit[ii] um lou a, Pu Tualpi tangthu (novel) gelh te bang khenkhat a copy kimu zou non lou hi. A author ten zong copy na kembit sam lou ua, documentation um lou pen a dahuai mama hi. Hun peisa a na kisun Zogam Thusuo, Tongsan, Zokuamthawn, ZSP Magazines, etc. chite bang a kikhel masang a laikhawm a, documentation bawl ding hun ta hi. Bang ma archives leh documentation um lou in, Zou tribe toh kisai i nua i ma kisuizui (research) thei lou ding hi. 1998 tan in Zou kam a laibu kisun 51 pha hi chi Upa Tunzagin in report abawl hi. Tualeh Dr. Lachinkhai in 2004 tan in Zou kam laibu title 300 pha din a hisap a, hinanleh laibu min 36 tan a tahlang thei giap hi. Tun tami laibu tengteng library (laibuli) khat a koikhawm a, “catalogue” hoitah siamkhiat hun ahi ta hi. Library pen documentation ban ah, Zodawn lamte phattuampi ding theina “Special Collection” nei thei lei dei huai sese hi. Adiah in damtheina (health care), neh-le-dawn (nutritional information), employment news, career guidance, haichi leh louhaw dan, environmental education, etc. toh kisai Chin-Kuki-Lushai ham a kigelh himhim kaihkhawm ngai ding hi. Tami theinate seminar leh worshop ban ah, hateng a kisun Zopatong leh hattuam tanchibute a thezah thei ahi.

Concluding Remarks

India a “father of library science”, Dr. Ranganathan pian ni (9 August) bang Library Day in nei thei lei, library lam navahna bangtan ama piangsah ding hi. Tam bang navahna (awareness) Zodawn gen lou, Lamka khosung mama ah zong kivaat nalai hi. Churachandpur district pumpi in zong mipi zat thei ding “public library” gina nei nai lou hi. Library kiningching siam masa lou a, a pil-le-tei minam (Intelligent Community) siamkhiat thei hilou hi. Tualeh “community library” in zong zapi laitheina (mass literacy) panpi in, tawsawn thei hi. “Information Society” neina din, BA, MA degree tampi nei huntawh lou hi. Degree sang a poimo zaw ahileh zapi laitheina (mass literacy), library kiningching leh theina thezahna ahi. Theina theizahna din pulpit maimai a kingah thei hi non lou hi. Tuaziah in, tanchinbute leh conference hall a tong kikupna poimo dan gensiam hamsa hi. Maban 21st century a i khosuah na ding leh a pil-le-tei minam siamna din mangmuna (vision) kichian kisam hi. Zou tuisiangte bang a i luankhawm ua, zapi panpina i mu leh, tui bang a chiim “vision” kichian sem, maban ah kisung khawm thei ding hi.

REFERENCES

Pillai, P. Gopinadhan (2002) Literacy and Social Transformation, Jaipur: Pointer; pp. 128.
Sarma, Atul (2002) “Why Assam continues to decelerate?”, Dialogue, 4(1): 103-123.

Notes
[i] CC Pur district a pasal literacy rate ahileh 84.98 ahi.
[ii] ZLS Deposit pen copy 5 zel dia lemguat ahi. See Resln. No. 6 of ZLS Executive Meeting 8 October 2005; circulated in Zopatong Vol.1, No.4, December 2005.