Thutut kingahdan in ATSUM palaite toh Manipur sorkar in tuni sunnung dak 2 apan nitaklam dak 3 tan kihou ua, Chief Minister O. Ibobi Singh leng Delhi a khualzin himahleh telephone tungtawn in a Cabinet toh kithuzak in ATSUM toh kihouna nei hi. ATSUM toh kihouna ah Manipur Cabinet telkim ua, Contract Teacher-te sepna sorkar in a beisak toh kisai in kithukimna nei thei uhi. A kithukim dan dungzui un Contract Teacher-te sepna September 1, 2008 apat December 31, 2008 sung hing nawn ding a, hiai toh kisai a tuni mah a sorkar in order suah ngal hi'n leng thutut kingah hi.
Sorkar in school 171-te huhna piak a tawpsan toh kisai in ahihleh Manipur Educational Code, 1982 leh Grant-in-Aid Schools Rules, 1977 dungzui a hiai school 171-te'n apaisa kum 10 sung a a nasepdan uh sorkar in etthakna neih di'n ATSUM palaite leh Manipur sorkar kithukim uh hi'n thutut kingah hi. Himahleh, sorkar in hun bangtan sung a 'evaluation' bawl a zoh ding hiam chih bikhiah a omlouh ziak in ATSUM in leng kiphinna tuamtuam a neihte tawpsak tuanlou in August 15 tan a kiphinna a neih sawmte khawlsak phot (under suspension) hidan in thutut kingah hi.
Huai banah, Manipur University a tribal reservation toh kisai ahihleh, Manipur Cabinet meeting neih nawnna masapen a Manipur singtangmite'n MU a quota a poimoh dan uh Cabinet in a pom a (acknowledge), huai zoh chiang a August kha sung ngei a hiai thu India Prime Minister kiang a tut dia Chief Minister in ATSUM team a makaih ding in tuni'n ATSUM palaite'n sorkar kiang ah thusun bawl ua, sorkar in leng hiai tungtang a ATSUM thusun bangbang pompih hidan in thutut kingah hi.
The Lamka Post August 12, 2008
No comments:
Post a Comment