*Truck Accident:* Singngat a BJP Election office honna vaiguon uap dinga hing kuon Behiang langte vangsiet huai tah in a tuonna uh truck tuosia in hinna tan hial umsih nanleh mi 39 kisukha ua, tuate lah a mi 32 te District hospital puotung in um ua, mi 4 dressing zaw in discharge hita. Singngat MLA Pu Ginsuanhau in abial mi-le-sa tuosie tuote vehna va nei. Tuaban ah MLA Candidate Pu Chinlunthang in zong vena va nei a, Pu Owen Mang Munluo, Admin lamkai in Zolengthe tuonvaite'n ORS box khat leh hamuonna thu toh ZOLENGTHE min in vena va nei uh. ZYO in damdawi beiteng tua ding a, ne-le-ta giehna teng BJP candidate Pu Chinlunthang leh ZYO Kamdouveng kithuo in buoipi uh.
*Manipur Face Encounter:* July 23, 2009 ni'a Khwairambam keithel a senior te thupieh dungjui a mi kaplum kei kahi chia kiphuong khia Head constable Herojit CBI top officialte mai ah kilang. Thudih hing pawt khongkhong ding dan hita. Tuabang kal ah, CBI in November 1996 a Ghaziabad fake encounter a kihal sepai officer 4 tuni'n jail bang jutdin thutan khum.
*Rs 6 Lakh mankhia:* Tuni'n Election Surveillance Officials leh State Police te'n mi khat apat note thate ngen Rs 6 lakh mankhia ua, etkaina nna pei lel.
*Sangnaupangte kiphinna kausem:* Union Home Minister Rajnath in Indo-Naga Framework Agreement ah Manipur min kilaw khahna khat zong umlou chinanleh AMSU leh pawl tuomtuom te'n a detail hing luikhia in chi'n Raj Bhavan mai ah kiphinna khausem bawl uh.
*Sanginn kikhah:* Pawl tuomtuom apat Monetary demand umzieh in Sadar Hills Pvt. School Assn (SHIPS) te'n hunchiem umlou in Pvt. School tengteng kha uh.
*Rengkai ah buoina pieng dehtah:* NEIDP candidate Pu Paukhansuan Khuptong, MLA candidate from 58 Ccpur a/c in nasa tah in masawn a, zan nita in Rengkai muolhoi area, Mata Mualtam etc ah open campaign nei a mipi peikhawm tam thei mama. Tuni nita a Rengkai field a nasa sem a open campaign a bawl sawm leh hausapu leh VA te'n block uh. Buaina um dehtah.
==============================
60-Singngat Assembly Constituency a Bharatiya Janata Party (BJP) candidate Pu Chinlunthang Zou Election Office honna leh Public Campaign tuni, Feb 22, 2017 in Singngat Zokhopi ah nei in um.
Pu Chinlunthang thugen
Tam bang a hunhoi leh hun manpha hingpia, tuaban ah i gam a kihen lamdangna tundi'a mipi hijat joujai hing peikhawmte zieh in Pasian kungah amasa pen in lungdam thu itun ahi.
Introduction them noukhat kang bawl ding a, tuni'a kei maia dingpa ahileh a jatat huai Pu Ramesh ahia, ST Morchan kichi Schedule Tribe te India pumpi a amahi a lieng penpen ahi a, 3 bills a i buoilai un mite'n mun tuamtuam apat in ang gal ua, ama'n Delhi apat ang gal ving veng ahi chi i thei ding a, ama kungah zong lungdam thu i tun ahi. Tuni'n 3 Bills toh kisai in BJP in zong nasatah a pan hing na lapi ahi.
Anina ah jinlian a i nei uh, Pu Hrangchal Ramthansanga, ama hi Aizawl apat kipan a tunia i program a hing tel ahi. Aizawl toh Delhi kawmtua a BJP ding a nasem khat ahi. Ama hi Hindu hi laizang lou ahi, BJP ichi chieng un Hindu meimei ding isa kha jel ua, Mizoram Christian state apat BJP ding a kipekhia, BJP Mizoram Pradesh a State Secretary ahi. Aban ah unaupa Michael Dangmei hi Tamenglong Nungba lammi ahi a, Manipur pumpi a ST Morcha a President ahi. BJP te kithu mang dan leh ki it dan ama ngeingei in tuni'n ilah ah ang talang hi.
Pu K Vungzalian i theisa himananleh, ama hi Singngat a patau meikang umlai a ana del gei mi ahi. Ama zieh in CCPur ah BJP hing khanglian ahi.
Election ding tarik 4 chieng a vote khiet ding hita in, tua umteng BJP a dingin dingdet lei, i kai ding chi ka gingta mei hi.
Tuni'n I lungbuoina, gimna uh, I gam ah school te bawllou in a um, i lampite bawllou a um chi i theisa ahia. Hitama nanleh tuasang a poimaw zaw tuni'n i gam ah a umta ahi, tuate a umsate suhoi ding a i buoibuoi kal un hih i politics uhih sangtah ana tung a, ibatpha lou khel in ana tung a, mangbang tah in, lungkham tah in ang koita a, i gam lei tang, i singtanggam leitang, i pupa leitang hita in, Pasian in ihina ang piah, identity tanpha suhsiet thei ding, mansuo thei ding dinmun in i politics uh a um ta hi chi i thei ding un poimaw kasa hi. Nidang in koulawi atheizaw kichi pawl khat in a athei zaw deu chimei vai in MLR & LR Act kichi in hih singtanggam ding a hoilou ahi, singtangmite leh phaijang mite kikal a politics hing um ding hita a, politics hih tuabang a kivi hita in, huzieh in MLR & LR Act hi jauhuai ahi, lauhuai ahi, kichat um ahi, singtang gam a ding a hoilou ahi chi tangkou in kana pangpang ua, tua sang a hoilou zaw a double a trible in hih EMP bill toh kithuo in hih 2015 Aug 31 in nasatah in Manipur State Assembly in ang pass a, tuami Congress govt in minute 11 sung in ang pass mawh uhi. Himi bang zieh ahiei, hei a pat hing kipan ahiei chi i thei uh poimaw ta hi. Huzieh in tunin ikingai tua uh ngai ahita hi. Tuazieh in MLA kakai a ahileh Singngat constituency a bi inn tengteng langva ka khuh ding chi hun hinawnlou ahi, MLA ka kai a ahileh a inn suon in solar nini i tang ding uh chi hun hinawnlou ahi, culvert politics, langva politics ding hinawnlou, BADP, MADP toh buoi hun hinawnlou, hute buoi pipi ngai nawnlou, tuate a um sa ahi, tuate toh bang ding a buouibuoi na hi uai? Buoi sih un tuate toh, hinanleh i gam i hu ngai hita hi.
2017 - 2021 kikal kum 5 ahi a, Singngat ah MLA khat hing um ding a, Manipur ah 60 um ding a, singtangmi MLA 20 leh phaijang mi MLA 40 ahing um ding hi. Singtangmi leh Phaijang mite kikal politics ahita a, gam leh leitang leh identity kilasahna politics ahing hita a, ken hih MLA hina ah nopchiem lou ding ahi chi thei pumpum a a tetsawm kahi. Bang zieh, issue base politics hita, land base politics, identity kilasah sawmna politics hita. I unau phaijang mite nasatah a ahina uh rights uh concious hita. 1980 vel in hih phaijang mite, amaute i huotna hilaijang lou maw, a politiciante uh contractor ngen ahi ua, tuate MLA leh Minister in a telching ua, tuate'n contract leh business buoi in a hing buoi ua, Manipur hih keplou in ana um hi. Tuabang a aki ne tuatua kikal in Manipur hi mangthai ding a umta ahi chi ana mukhiet dan uhi ahi. Tua hunlai in Naga te'n Naga issue, Kuki issue, Zomi issue, Hmar issue, anam anam in issue kinei, Manipur pen kihawmja ding in ana umman ta a, tuachin hi i unau phaijang mite ang khanglou thah ua, ang ki siemthah ua, tunin ang kisiam tha tah un hi a MLA te uah ang pan uhi. Tuni a MLAte uh contractor tam nawnlou hi. Bang zieh, issue politics tahtah i bawllou ua ahileh tuni'n ei Manipur agam nei kichi hai a, gam neunou khat a teng hai a, gam alien zawsem i lahthei na ding i bawl uh ngai ahi. Tuni'n a MLAte uh en lei laisiem pipi, Oxford graduate, St Stephen college graduate, doctorate degree, ukil chitevel MLA ngen in ang nei ua, a fit mama ta ua, a refine mama ta a, amau zong hing kipan in Nagate dalna, singtangmite dalna in ang kipan a tuni'n 3 bills hing piengkhia ziang ahi chi hi i thei uh poimaw mama hi. Tuazieh in development politics pen a deilou ihi sia, ei singtangmite a ding in development politics sangin gam leitang hubitna, land base politics, identity politics chite i poimaw zaw tham uhi. Tunin Indian Constitution Article 371(c) ahi Hill Area te kivaihawmna ding provision ang pia a, tuani khu i humbit uh poimaw, a humbit thei ding mi i poimaw uhi.
Tuni'n thautawi ten koi a support diai, koi in sum a hau diai chite i lungsim ah a um, tuni'n tamte kitelna ding ah a factor ahita, tuabang te i ngaituatua kal in i gam hi amang thai ding ahita. Tubangte i teltel zieh ua hi tunin three bills zieh in i kap, i mau ua, i kapkap nailai uh hilou amah, i manghil ta umaw? Mawpuohna Indian constitution in MLAte apieh pen tuni'n a mawpuohna MLA ten a bawllou zieh ua tunitan a buoi nalai ihi uh chi thei thei lou ihi umaw? MLA te inn i hal ua, lampite i zui ua i keng khamnate uh a pha ta amah? Tam bangte i theichien ua, ikisiemtha lou uleh theijou nawnsing kei zong maw, Burma ka pem dawn (jokes), himi hita i politics pen. Unaute, ngaituana tahtah seng ta ui unaote.
Kei Suongdaw a um ka hi a, Kangkap a um ka hi a holhuut ka hi, Hiangtam ah, Behiang ah, Sangaikot ah kei singtangpa amawl a mawl kahin ken bang ma thei sing chi hun hinawnlou ahi. Na chi uleh taikhiel ding, tunin 3 bills in bang e atup, eiteng pi foreigner ihi na ding a tup abou vele. Foreigner nahi mawh a ahileh bank account na hong thei diai? NRGS na nei thei diai, na ki ngaitua ngei uai. Hih 3 bills idea hei a hing kipan ahiei chi i thei uai, Kawl gam a hing kipan ahi. Kawl kumpi in Rohinia Muslim te a gam uapat a delkhiet ut zieh ua abawl uh ahi, tuami khu i gam a hing kipuolut sawm abou vele, tuami bawl koi, Congress govt ahi. Na mangi=hil umaw, Congress govt ahi. Hi fight ding a BJP hing kipan ahi. Naupang pawl in bang achi fight mawh di la? Congress, C for Corruption ichi uh. Tuazieh in naupang pawlten zong BJP hing zomta un ka chi nuam ahi. Hichi bang i gam hita in, tuaziehin i ngaituana uh i hensawm uh ngaita hi. I ngaituana i hensawm lou ua ahileh a ngeingei a um ding ihi. Tuni'n i kipattha ngai uh ahi.
Congress ten kum 15 vai ahawmta ua, tuaun sung in i kim i pam bang achi ei, Congress MLA i neina ah i lawta uh 3 bills, bus bahara khan, adih ei? Huzieh in i mailam hun politics pen i unao phaijang mite i hua ichina ahikei, amaute toh ikikal ding ahita. Unau pawlpi lamkaite toh Congress cabinet tetoh 3 bills issue kana kihou ua, ka kihou chieng un a gen a, bang e a gen ichi leh hi hih singnuaimite bill ahi, kou a law ding dan ka thei sih uh, chi amei taveh, huchieng in ka kihou sau leh hih aman zong Manipur gam dinmunn hih huasat huai, buoihuai asa top ta a, tuazieh in hih mailam hun a MLA hi ding zong thanop huoi nawnlou ahi achi top mei ahi. Azieh chuh issue base politics ding pen ama zong contractor background ahi chieing in, aman zong thei vak khollou ahi.
Huzieh in 3 bills zieh in ikap imau ua, iki hal ua, innkuon shite zong ivuikim thei nai sia, i zatat i martyrte i vuithei nai sih, tuami jou in Manipur ah bang a um ei, Manipur University a ST reservation um pen zong i unao phaijang mite'n kisuongla loukei a hing tu ngam nalai uh a vele. Hujou in bang a umkia ei, Meitei tengteng ST ka hi ding uh chi politic ata mawh vele, amau ST ahing hi uleh eite bang hita ding lah? Mihing hina ah tanvou ikihawmte aki jatat nawnlou dan, a tam ten neh tam ding chi politics ahita hi.
Tam bang billte Manipur Assembly ah hing kipawlut kia ding ahi, ahing ki pualut kia chia Pa Thang in kai in achi zieh a i kai kit ding umoh? Contractor bills i zah a suoi i kai kia ding umoleh? Ki ngaitua hunta maw tuni'n, development pen dei hai, langva deihai, solar deihai, hinanleh hite sang a khawzaw tamta hi. Tunia boycott i bawlte, 3 bills a suoikaite jui nalailai hausate bang chuh ken vanggam a kaita uleh chi ngam ing e. Azieh bang? 3 Bills peisuo hileh achohkha ding koi, gam nei hausate avele, anina chohkha ding amaute ma hikia, amipite foreigner kichi ding in foreigner kahi sih uh hing va gensah in chia kisawl ding amaute hi kia, a thumna ah mipite ki hi pan ding. Tunia 3 Bills a suoikaite - hausa min a support puong kichite vang kahe tahih e. Hutobang supportte doudal ding a tunia ikipat ding uh ahi. I gam huhna ding, mimal mudana hilou. Hing kaikia ta uleh suoi kaisa hiven ahihi hita ven chi ta lou ding uh amah? Tuazieh in i lungsim ngaituana chimtah in zang ta vai.
Singngat constituency in MDC 4 inei a, hi teng li toh i MLA pa lah kithuo thei lou, ui-le-kel bang chi lei lah a val deu diai mah, a val deu diai mah, ahileh leh nu-le-pa chimei vai, nu-le-pa akituo lou leh ei atate bang chi ding lah? Tuazieh in tam MDC melhoi 4 teng toh kei hing kithuo sah un chinuom kahi. Melhoi 4te toh ka kithuo theina ding uh kum 5 chance hing pe leh uchin nasa tah a na hing sem ding kahi uh.
Singngat bus jukham pum in ihe a, Aug 31, 2015 in Zezaw ken tou ah a accident a, ashite ki vui nailou, huzieh in Singngat Bus hing hesah un chinuom kata khuh, bahara zong kala sih ding, Singngat bus ka he ding a, a sung ah i tuong ding uh.
BJP Zindabad, Prime Minister Narendra Modiji, Zindabad.
Transcripted from Audio by Admin Zolengthe, ZOLENGTHE
*ZOLENGTHE*
*Connecting the Zo people*
No comments:
Post a Comment