T. Thangminlien,
Moral & Relgn. Secy, ZSP Delhi .
Munirka dunga bawngtal khat leh Zogam a um Bawngtal khat koi ahatzaw diei? Tamlah a Bawngte pen ninkholna (Dustbin) leh roti pou a kivah, hampa leh nisa muzoulou ahizieh un aguh atang uh kipzoulou leh dingtang zoulou khop in ahawi len uhi. A eeh uh munteng ah athethang ua, lampi teng asunawhphah uhi. Tuachilou in, Zogam a bawngte pen apute’n zingmawng matah in ahakhie ua, hamdawng hampa hingte ahaina uh atha hatthei mama uhi. A neu zawh vang un tamlah a Bawngte tawh kisutuasah lei kawlphe bangmai ding uhi. Bawngte mabang in mihingte zong, tamna kol roti nete sang in thagum ineizaw uhi. Zou tangval khat galkap physical test dinga avapeina ah Manipur a kipan ahizieh in sappa’n amuong mama a hinanleh Delhi a na umna asawt tai? chi’n sepai sappa’n adong sese hi. Amapa umna asawtpawl ahita a, tuachi dungzui in, 1650 metres race ah ahing lawsam ta hi.
Delhi khopi a I hindan uh ka ngaituo chieng leh physical guoh hilou in huohchimna (mental) langa zong nuoikiehtheina mawng ahi, hagau lam genda photlei. Akineppi huoi ngen kisutuona Delhi apat sepna gieldoh I vang mama uhi. Bangchi ding? I khanmawbaw sudamthei ding ‘zathu’ (as in zatui, zahaa) nih tahlang vai.
1. Tung sunni vanlai geizouta
Zing ihmut dute’n nuom asathei ua, hilezong athoubai te’n thawbai nuom asa zaw uhi. Zingthoubaite alungsim uh achiim a, naa tampi a zouzaw uhi. Innsung hithei deu ichite zong Zingthoubaite ahi tangpi uhi. Tualemah in Zing thouhahte athanawi ua, mawpuohna a zoula ua, miphalana khat anei uhi. Baro, suun nai 1 -2 chivel a thaw ichin laisie, i luvum uah gentheina Buddha bang in atouzing ding hi. Bible in zong ihmut duute genthei ding dan agen hi(Prov. 20:13). Tung suunni vanlai geizouta, eipawl lah mangnop laitah, i roomte uh miel kiehkuoh nalai. Tuunnu Zolei naubang maimai hilou a piching kah a akah thei mawng hilou maw!
2. Sienthouna -
Sienthouna ichi chiengleh tahsa leh lungsim sienthouna ahi. sienthouna ngaisang minam, mite etton hitalei a ut huoi tazen hi. Sangnaupang te’n hinkhuo siengthoutah in mangthei lei i daupei ding hi. Dau/vangphatna kichi sildang hilou in Pasien guolzawlna ahi. Lei leh Van siempa guolzawlna itanthei nading in ama zatat zing kisam hi. ‘Sahkho dan a ki suhbuo’ ( Daniel 1) a utlou zieh un, Daniel leh a lawmte’n Pasian guolzawlna atang ua, agamsung ua pilpen leh panmun hoi neipente ahing hi uhi. Zoseph zong Pasian mai a khelna bawlngam loupa ahizieh in Egypt gam Prime Minister minthangtah hizou hi. I bieh Pasian pen, alungtuohpou lechin ahing guolzawl teitei ding hi. Delhi sangnaupangte zong Daniel leh Zosephte bangding in Pasien in hing guolzawl hen.
No comments:
Post a Comment