Ministerial teamte April 2, 2008 in Imphal hongtung ding, Central team in Mautaam thu ah Mizoram CM mu uh
Aizawl, March 31: Mizoram state a kialpi a tunna munte enkhe dia Central apan kuan Inter Ministerial Central teamte leh tuni in Mizoram Chief Minister Zoramthanga kimu in, huai ah makai tamtak paikhawm uhi. Thusuak kingah dan in, tuni nitaklam dak 4:30 in Inter Ministerial Central Teamte Pankaj Kumar, Joint Secretary, Department of Agriculture & Co-operation, Govt. of India in makaih a, Chief Minister Zoramthanga in a official Bangalow-ah kimuhpih hi.
Pankaj Kumar in agendan in, March 20, 2008 in Central govt in huai teamte a dinkhiak ahihdan gen in, mautaam tawh kisai in pan naktak a laksawm uh ahihdan CM theisak hi. Chief Minister Zoramthanga in Centre palaite kiangah kum 2/3 paisa apan zusa leh ganhing tuamtuam in Mizoram state leitang sung a om buh le baal te tom siang keuhkeuh in mipi ann ngawlthei ding dinmun ah koih zou uh a, state Govt panlakna ziak in Food Corporation of India in antang bangzahhiam pe mahle uh huai in daih vual ding ahihlouh dan gen in, sum leh antang chihlouh a poimawh omlou ahihdan gen hi.
Zoramthanga in Centre palaite kiang a agenbehna ah kum 47 paisa in Mautaam ana tung ngei a, huai hunlai ana thuak kha mi tamtak Zoram ah damlai ahihdan gen in huai a haksatna atuah uh a mangngilh theihna ding un tutung in Mautaam omlam phawklou khop a State in antang kiningching koih ut ahihna ah, Centre palaite’n naktak in a kithuahpih uh poimawh ahihdan gen hi. Mizoram i chih India khua leh tui hihna nei ahihman in India mi le sa ka hi kichite’n Mizoram nelhsiah theih vual hilou ding chi’n leng Zoramthanga in gen hi.
Inter Ministerial Central Teamte ahihleh Pankaj Kumar ban ah Sarvan Kumar, Director, Planning Commission; Ms. Nalini Pathak, Asst. Director, Ministry of Finance; Sube Singh, Asst. Commissioner, RD Ministry; Dr. S.K.Biswas, Director, Department of Agriculture & Cooperation, Kolkata leh M.K.Gogoi, Gen. Manager (NE), FCI, Guwahati te hi uhi. Huai kihouna ah Mizoram Government sik le tang in, CM ban ah, Home Minister Tawnluia, K.Sangthuama, Minister of State for DM & R etc. leh K.Riachho, Secretary to Govt. of Mizoram, DM & R etc. te ban ah heutu tuamtuam tel uhi. Team leader Pankaj Kumar, IAS bel Nagaland cadre IAS officer ahih dung zui in NE te haksatna thei mahmah a, tutung a Mizoram Government in a kithuahpihna uah kipak mahmah ahihdan gen hi.
Centre teamte bel March 30 2008 in Delhi apan Aizawl tung uh a, April 2 2008 in Aizawl apan Imphal tungding ua, koi lailai mun pha ding uhiam chih theih hikei mah leh Lamka bel aphak uh gintak-huai a, April 5 2008 in Indigo flight in Imphal apan Delhi zuan in lengkhe ding uhi.
Med. Supdt in Press-te kimuhpih
Lamka, March-31: Dr Thang Khan Piang Hatzaw @ Dr T. Hatzaw, Medical Superintendent, District Hospotal/CCpur in tuni nitaklam in a office ah Press-te kimuhpih in Hospital leh vanzat tuamtuam tawh kisai genpih hi. Aman a genna ah News a kisuah phot mipi in thudik hi a pom uh ahihmanin Hospital tawh kisai a thusuah dingte adik leh diklouh amah contact a thuchian zong masa zel ding in ngen hi. Etsakna ding Hospital a oxygen omlouh hun ah Lamka kia hilou Imphal a JN hospital ah leng omlou sek ahihdan gen hi.
Med. Supdt in a gendan in Hospital a zat dingin 144-KV Generator thak hongtung a, zat ahihchangin Hospital campus a meivak kiching pethei ding a,CT Scan machi8ne leng zat theih hidin gen hi.Huailouin Hospital a ding tuam himhim electric transformer khat hongtung pah din leng gen hi. Huailouin Hospital a thilnin leh paihdingte haltumna ding machine(Incinerator) leng Delhi apan hongtung a,huchibang vanzat J NHospital ah leng om nailou hi’n gen hi. Huaite banah Hospital a zat ding Washing machine 1, Operation Theatre table 2, boyl’s apparatus(naplup piakna table) leh tele-medicine leng hongtung a, huaite mipi adia hatuam taka zat ahih theihna ding in Press te’n leng kithuahpih ding in ngen hi. Dist Hospital ah OPD a damloy ki-ensak, Hospital a damlou om tampi a om bangin emergency thil a Gari poimawhna tam mahleh Hospital in zat ding gari tasam petmah hi’n leng gen hi.
Cycle leh Scooter kiphukha
Lamka, March-31: Kwakta kianga Ukha Gate ah March 30, 2008 nitaklam dak 3:30 vel in cycle atai Lunkhongam (20) s/o Mangboi of Gothol leh Scooter atai Hemlun (50) s/o Lamkhothang of Matiyang kiphu tuahkha uh a, anih tuak ua liam in District Hospital a etkol ahihnung un Hemlun pen a gim ziak in Doctor te’n RIMS a etkol ding in refer uh a, March 30 nitak mahin Imphal ah kipua hi.
Inter Ministerial Team te’n Tipaimukh pha ding
Lamka, March-31: CCpur District ah maupak ziaka Mautaam kialpi tung thu ah amun mahmah a thil omdan enkhe ding in Central apan Inter Ministerial Team te’n April 2 ,2008 in Tipaimukh khua pha ding uhi. Amau Silchar lam apan in Tipaimukh lut ding uh a, DC/CCpur & SP/CCpur in na kithuahpih ding uhi. Pankaj Kumar, Joint Secy. Department of Agriculture&Co-operation,Ministry of Agri.Government of India makaih in Sarvan Kumar,Director of Planning Commissioner; Jo Sharma,Asst.Director Ministry of Finance; Subhash Singh, Asst.Commissioner Ministry of Rural Development; Dr.S.R.Bishwas, Director Dept.of Agriculture&Co-operation; J.P.Pandey,Executive Director NEFCI ban ah Women &Child Development, Government of India apan Officer bangzah hiam in leng Mautaam in a hihsiatna munte enkhe ding in hongzin ding uhi. Amau khua bangzah phading uhiam chih bel theih hilou hi.
Silver Jubilee lopna leh biakinn honna
Lamka, March-31: Central Lamka EBC te’n a April 1, 2008 sun dak 12:30 in a biakinn uah Silver Jubilee lom ding uhi. Rev.L.Khamkholun, Gen.Secy/ EBC in Jubilee suangphuh hong in h Pathian kiang ah lan dinga, Pathian thutak genna leng nei ding hi. Huai ban ah April 6,2008 zinglam dak 10.30 in Central Lamka(South) Lailamveng a EBC biakinn thak hon hiding hi. Huai ah Rev.L.Khamkholun mah in biakinn hong in Pathian kiang ah lan ding a, Rev.Dr.B.Luaichinthang, Director of Ministries in Pathian thugen ding hi.
N.Mangi in Lamka hongpha
#N.Mangi Singh, MLA in tuni zinglam dak 11 in Lamka hongpha hi. Aman Meitei Society makaite kimuhpih huainung in mun tuamtuam aphakzawh in Imphal ah kiknawn hi.
Electric Dept te’n singphuk uh
#Khua khal a huihpi nun ding patauh ziak in tuni in Electricity Department /CCpur te’n Singngat line a Electric guipi in ahihkhak theih ding singkung omte phuk uh a, IB line lam ate leng phuk vek sawm uh hi’n kigen hi.
ZWC election neiding
#United Zou Organisation, Gen HQ a Executive te’n tuni zinglam Zogal hall, Zou Veng ah meeting uh a, April 25, 2008 in Daizang khua ah Zou Working Committee election 2008-2009 neih ding in thupuk uh chihthu kiza hi.
Electric voltage in zoulou sek
## District Hospital a zat ding a hongtung CT Scan machine zat theihna ding in electric power (tha) voltage 410- apan 420 tan poimawh gige himahleh voltage 320-330 kikal lel electric meivak tha a om ziakin tunitan in kizang theilou chihthu om hi.
Session kipat ding April 7 in kisuan
## Thawnsau Computech ah April-June,2008 sung training dingte April 1, 2008 a session kipan ding chih himahleh lemtan louhna khenkhat ziakin April 7,2008 in kipan ding a, seat awng tamlou om ziakin a lunglutte adin ngaihvan theih ding hi.
Training ading Compurter
# Rengkai Govt.H/School te’n NEC apan Computer 15 mu uh a, CCpur Govt.H/S in 5 mu uh a, Sagang School in 4 leh Gandhi Memo School in 5 mu uhi. School 4 a teacher-te training piakna ding in March 29 in ZEO/CCpur office ah Computer set 4, hongtung hi
SUUNNA
Mrs Chingkhoniang @ Chingbem(77) m/o V. Ginzanang of Zenhang Lamka sungna ziakin zan nitak dak 10.00 velin si a, tuni in Zenhang Lamka hanmual ah kivui hi.
Tongkhozam (80) s/o (late) Henneithang of Bijang tuni nitaklam dak 5:30 in sungna in si a, April 1,2008 in kivui ding hi.
IMPHAL NEWS:
ADC Bill thu ah ATSUM in thusuah bawl
Imphal, March 31: All Tribal Students Union Manipur(ATSUM) in Manipur Autonomous District Council Bill, 2008 ngai poimawh mahmah uh ahihdan puang uh a, tuni in ATSUM General Secretary in MLA leh mipite theih ding in thusuah bawl hi. Huai thusuak dan in, tuni in Imphal a Kuki inn ah Public Consultation Meeting om a, huai ah singtangmi pawl tuamtuam apan palai tamtak paikhawm in ngaihdan tuamtuam lakkhawm ahihdan taklang hi. ATSUM in huai hun ah thupukna khauhtak la a, Govt ah ngetna tawh thuahpah ahihdan puang kawm in, Manipur Govt in a limsak kei leh kiphinna in a zuih poimawh ding chi’n taklang uhi.
ATSUM in Manipur ADC Billl 2008 pomlou ahihdan puang uh a, Manipur Assembly in Select committee a apiakkhiak ua point kitunte leng pomlouh thu gen in select committee in draft a bawlthakte leng pom theilou ahihdan taklang uhi.
India Dan bupi nuai a singtangmite hamphatna ding tamtak kigelhte huai bill in nuai tomvek ahihdan taklang uh a, ST hihman lel a muh ding thil khenkhatte nasan muhsak sawmlouh hi a, state Government leh MLA te’n hiai hamphatnate amau sakhau ah kuahsawm a ngawh in huai thil singtangmite muhsitna ahi chi uhi.
Hiai tungtang April 3 2008 in Assembly ah puaklutnawn leh luikhiak hiding a, huai a thu kigente leh thil omdan ATSUM in enzui ding ahihdan taklang in singtangmite hamphatna om sunsunte koihdap a dikloutak bill namdet ahih veve leh ATSUM lungkim hetlou ding ahihdan taklang uhi.
PWD A/E 1 kaplup in om
Imphal, March 31: Tu nitak dak 7:30 vel ding in Public Works Department a Assistant Engineer sem K Nabachandra (49) s/o K Ibotombi of Utlou Kangjeibung Mamang Leikai kaplup in om hi. Thusuak in agendan in, a zi leh tate tawh bazaar a hawh a kiklam ua a gate bul uah Kangleipak Communist Party (City Meitei) pawl in akaplup uh hidan in kigen hi.
RIMS ah sit-in-protest nei
Imphal, March 31: Regional Institute of Medical campus ah tuni in KCP pawl in RIMS a semte vauna abawl ziak un, lungkimlou in RIMS a sem staff leh Doctor tengteng in sit-in-protest nei uhi. Amau zingchiang April 1 in sunzom nawn ding uhi.
MCS Officer 3 in IAS ngahthak uh
Imphal, March-31: Manipur govt nuai a senior MCS Officer 3 in IAS dinmun a kaisang ding in India govt in lemsakpih in IAS hihna conferred hi. MCS apan IAS ngahthak Officer-te leh tulela a dinmun let uh anuai bang hi.
1. H. Deleep Singh,MCS, Director(Institutional Finance) ex-officio Managing Director/MSCB and Director(Treasury & Accounts) & Additional Secretary(Finance).
2. M. Lakshmikumar Singh, MCS, Director(Settlement & Land Records) & ex-officio Additional Secretary(GAD/Sericulture).
3. K. Radhakumar Singh,MCS, Additional Secretary(Finance) & ex-officio Director(Small Savings) and Director(Local Fund & Audit).
Assembly ni 1 sung tu ding
Imphal, March 31: Manipur Autonomous District Council Bill 2008 tungtang ah Manipur Assembly special sitting 2vei om a, house in Select committee ah a piakkhiak ziak in Select committee in suggestion abawlte luikhiakna ding in April 3, 2008 in ni 1 sung Assembly special session om nawn ding hi. Hill Areas Committee makaihna in March 27,28 leh 31 in hiai bill tawh kisai in singtangmi MLA teng in meeting nei uhi.
Imphal Bazar area ah gari lut ding kham lai
Imphal, March 31: Transport Director in February 2 2008 a thusuah abawl dungzui in, Ima Market leh Khwai Bridge lak a gari lut ding a kham paizom zel in kha khat sung daihding chih himahleh, kha khat mah behlap lai uh ahihdan gen uhi. Transport Director thusuak in ataklat dan in Sewage project pailel zawh siang hinailou a, gari lut leh buaina lianpi tungding ahihman in Motor Vehicle Act 1988 Section 5/7 dungzui a a kham ahihdan taklang hi.
Assembly bomb thu ah mi 2 suspend hinawn
Imphal, March 31: Manipur Assembly complex sung ah March 8, 2008 a bomb paihlut tawh kisai in tuni in Imphal West SP L Kailun in Police constable 2 ahihna ua pan suspend nawn hi. Thusuak kingahdan in, Constable Sh Sunil Sharma of Imphal West Police Commando Unit leh Head Constable SH Khamba Singh of Imphal Police Station te huai thiltun ni in a duty na mun uah omlou uh ahihdan taklang kawm in suspend ahihthu puang hi. Amau suspend a a om sung uh Imphal Reserve line pawtsan theilou ding in leng gak hi.
Advisory member di’n mi 2 guangthak
Imphal, March 31: Manipur Govt in National Security Act(NSA) a Advisory Board member ding in tuni in mi 2 guangthak uhi. Thusuak dan in, Manipur Home Department in April 12 2002 in Chairman ding in retd Justice SP Rajkhowa sep a, tua ban ah member ding in L Shyamkishore Singh, Senior Advocate, Gauhati High Court leh Retd Director(Prosecution) M Nabakumar Singh guang uh a, himahleh helpawlte apan vauna a ngah munluat ziak un member 2 ahihna uapan kitawp uh hi’n thusuak in gen hi.
Hiai thu ah State Home Deptt in March 6 2008 in thusuah bawl nawn a, order omsa phiat in Dr Yamini Kanta Phukan, Senior Advocate/Gauhati High Court leh Joginder Singh, Sr Advocate/ Gauhati High Court te member ding in septhak ua, Chairman ahihleh, Rajkhowa mah in lenlai ding hi. Thusuak dingzui in member 3 te’n sitting a neih peuhmah chiang un ni khat in Rs 2500 mu ding uh a, tua ban ah Dearness allowance leng nikhat in Rs 350 hiding in kigen a, lenna pai man tengteng leng ahun leh amun zir in State Govt in sengding chihthu om hi.
BRTF truck 3 tuni in kihalsia
Imphal, March 31: Tuni nitaklam dak 3 vel ding in Lamlai a Baruni Chingkhong Kourinagar mun ah meltheihlouh pawlkhat in Border Road Task Force (BRTF) te gari zat truck 3 khamkhawl in halsiatsak vek uhi. Huai Truck 3 te’n cement pawchiat uh hi’n thusuak in gen hi.
AR post kap tu PLA hi’n kipuang
Imphal, March 31: Manipur-Myanmar gamgi jula Assam Rifles post om Ningani paisa a vakapte phaijang helpawl PLA hi’n kigen hi. Revolutionary People’s Front (RPF) thupuangtu in a taklat dan in RPF armed wing PLA cadre te gamtatna ahihdan gen in, a si leh liam tungtang bangmah taklang lou hi. Official thusuak in bel CCpur district sung a Behiang Border a 9th Assam Rifles post kaptu diktak theih hilou hidan in taklang a, huai kikaptuahna ah sepaih lam a si leh liam omlou ahihdan gen uhi.
SPORTS NEWS:
Sawmpau Memo. Football kidemna
Sahara leh Nghathal Youth Club pangkhawm a a organized ding uh “5th SAwmpau Mermnorial Football Tournament” April 1, 2008 sunnung dak 12.30 in Nghathal Playground ah kipan ding hi. Huai ah Chief Guest in Major R. Malik, 3-Assam Rifles pang ding a, Guest of Honour in Dr VC Pau, District AIDS Officer/CCpur pang ding hi. Huai Tournament kipatna ding in YPA HQ leh YMA HQ team kimawl masa ding uhi.
EDITORIAL:
Tuni Thupi:
“Pathian aw, ka naupan chik akipan nang non hilh a; tutan in na thil lamdang hihte ka theisak gige hi. ” Sam 71: 17
University thubuai in bangtan daihding?
India malsuah gamte i zawnkhal mahmah lai in Guwahati University nuai ah i ki binkhawm a, hun hongpai zel in, North Eastern Hills University(NEHU), Manipur University, Nagaland University leh adangdang hongpawt khia in, tuni chiang in state tamtak mahni khe in i dingthei uhi. Himahleh, sinna tuamtuam ah University facility om te’n a daihzawh louh ziak in Guwahati University i kop hun uh omlai hi. Etsakna ding in, Manipur in General Nursing Midwifery leh ANM study centre nei mahleh, Assam Board nuai ah tuni tan exam lai veve uh a, state in board/council tuam nei zou nailou hi.
Manipur a siamsinna inn sangpen bang a i koih Manipur University June 5 1980 in honkhiak ihi a, huai apan Manipur University hong khangtou hiaihiai in mahni kitoudelh bangtuk in hong om hi. Himahleh, Manipur in kong tuamtuam ah haksatna a phut dungzui in huai apan suahtak theihna ding ahih khak leh chikawm in October 13 2005 in Central Govt in neitu hihna leh thuneihna la nawn leuleu hi. Manipur University phiat hilou in aneitu (ownership) Central Govt a kikheng chihna hilel hi.
Manipur University Act 2005 enthak ding chilehang, ngaihdan tamtak a om ding hi. Manipur University Act, 2005 kichi bawl a hihlai in, Central University Act bang a pomtheih ahi kei a, a ziakbel Manipur ading liauliau ading a bawlkhiak ahi hi. MU in Centre University status a dopsangna ngah mahleh, a min Manipur University pe’n khek louh ding chihna ahi hi. A min kheklouh ahihhang in, Centre apan panpihna leh phungvuhna hong paite a buai ding chihna hituanlou hi. MU Act nuai a chiangtak a kigelh khat ahihleh, Rights & privileges chih hi a, section 4(d) nuai ah, MU a sem peuhmah in, pension, leave, gratuity, provident fund leh adangdang ngeina bang a a muhthou ding uh chih ahi. A Act pe’n thutuam hiphot ta leh, Manipur University nuai ah affiliated college 72 om a, Manipur Institute of Technology (MIT) leng pom hikhin hi. Centre khutsung ah Manipur University a lut hang in, Manipur State a dia kibawl liauliau mahbang in kilang hi.
Central Govt in Reservation tawh kisai in policy hoihtak a nei chih kuapeuh theihsa hi. Central Govt in sepna leh siamsinna ah reservation policy a neih dungzui in, All India level himhim a Competitions/employment leh further studies a ding in reservation percentage pen, All India population basis in Scheduled caste te ading in 15% koih a, Schedule Tribe te ading in 7.5% kikoih hi.
Tulel a Manipur state sung a government office omte a reservation percentage ding in SC 1%, ST 27% leh OBC 22% hi leuleu hi. Himahleh, hiaite a diktak a zuih ahihlouh ziak in All Tribal Students Union Manipur(ATSUM)_ leh Manipur University Tribal Students Union(MUTSU) makaih in University campus ah kiphinna om a, Chief Minister makaihna in ATSUM leh MUTSU team in Delhi a va phak nung uh hiai thawm dai vengveng hi’n kilang hi.
Manipur adin MU kichi siamsinna lama sangpen ahih ziak in laisiam leh mi upa thil ngaihtuah thei tamtakte ading in MU buaiding ngaihngam huai hetlou a, a minsiat ding leng phal huailou bang hi. State Govt hailou ahih dungzui in ATSUM leh MUTSU te’ ngetna pe’n etzui sak ding in chiam uh a, Prime Minister Dr Manmohan Singh leh Human Resource Development Minister Arjun Singh tanpha kimuhpih uhi.
Manipur ah phaizang mi leh Singtangmi kal ah kikhenna lian mahmah chih ngaihdan mi tamtak in a neihlai in, Manipur University pe’n Centre Univeristy ding in dopsang in om a, Centre Govt employee te facility ngah bangbang amau leng a ngah sam ding un kilawm hi. Himahleh, admission quota leh employee reservation tawh kisai ah leng University in a tup mawng uhia chih theih ding in hihkhelh hau mahmah uh a, ATSUM leh MUTSU kiphinna pe’n thudik mah suak hi.
A lehlam ah, khawvel a Association leh JAC tamna pen Manipur a de aw chih theih din om a, demand tuamtuam nei in, strike leh bandh tanpha pumdim hi. State Govt leng pil petmah zaw ahi ngei ding a, demand tuamtuam omte khemdaih dan siam mahmah in tuni chiang in ATSUM leh MUTSU ngetna leng bangtan tungta hiam chih theih zawhlouh khop ding in selmang uh bang hi.
ATSUM leh MUTSU in mass exodus thupuan aneih uh mi tamtak in kipahpih a, Manipur University zop nawnlouh a, huai a kai singtangmi student teng in pawtsan ding chih ahi. Huai hileh, a impact bang om ding hiam chih state Govt in amat luat ziak ua hiai thubuai meekmit daih uh adiam chihtheih in om hi. Huaiziak in, tu a dan a i pai ningneng leh mi’n bangmah a hon ngaihlouhsa uh hon muh niam behbeh lai ding ua, tuasang mah in, singtangmite adia Univeristy tuam phut ding ahih kei leh, Univeristy dang zop ding chih khawng Student leader te’n ngaihtuahzaw le uh, Manipur singtangmite ading in punna thupitak a hizaw diam chih khong ngaihsut tham ching hi.
Employment News:
Government of India, Ministry of Home Affairs nuaia sem ding post hunkhop kila ding a, North-east bial ah Imphal(Code No. 14), Aizawl(Code No. 03), Kohima(Code No. 18),Shillong(Code No. 28), Agartala(Code No. 01), Itanagar (Code No. 15) leh Guwahati(Code No. 12) leng Exaimation Centre hiding hi.
1. Asst. Central Intelligence Officer: 200
(Reservation: ST 15/SC 30/OBC 54)
Pay: Rs. 5,500-175-9,000
Age: Upto 27 years(ST/SC upto 32 yrs)
Qualification: Graduate from a recognized University
or equivalent.
Atung a post kitaklang adia chitna leh siamna nei a candidate dinga lunglut kuapeuh in application format omsa enton in ordinary post tungtawn in thon ngai hi. Application thonna envelope tunglam veilampang ah bold letter in “Application for the post of Assistant Central Intelligence Officer Grade-II/Executive” chih gelh ngai a, huailouin application form ah passport lamlek candidate in a malampang a suai a kaih belh a ngaih banahapplication tawh thonkhawm ngai admit card ah leng lemlak khat belh ngai hi,
Application leh document poimawhte kimtaka thuah in Employment News March 29-April 4,2008 issue ah hiai post advertisement kisuah nung kha 1 tana tungman ding in anuai a address ah thon ngai hi.
Assistant Director(G),
Post Box No. 5319
Post Office- Chanakyapuri
New Delhi-110021.
(Detail information, application format leh thuchian kimzaw munuam leh chiantaka theinuamte adingin Employment News(March 29-April 4,2008) ah et-theih ding a, huai copy mu lemtangloute adingin Manipur Express office ah leng nasep hunsung(working hour) zinglam dak 10.00 akipan nitaklam dak 5.00 tan in et-theih ding hi).
MPSC in kum bikhiah thak nawn
Manipur Public Service Commission(MPSC) in Manipur Civil Services Combined Competitive(Preliminary) Examination, 2008 om ding ah upper age limit a bikhiah dan in general category adin kum 30, OBC adingin 33, ST/SC adingin kum 35 chih himahleh March 19, 2008 in thusuah bawlthak in kum 2 chiat behlap hiding chih hi a, application submit hun leng April 19, 2008 tan hithei ding in thusuak om hi.
National Tribal Award apply theih ding
Ministry of Tribal Affairs, Govt of India in kum 2008-09 a 11th Plan hunsung in National Tribal Award kichi anuai abang scheme thak patkhiak sawm a, mimal leh group huai dia lunglut kuapeuh in July 31, 2008 tan Director of Tribal Research Institute,Imphal tawn in apply theih ding a, thu omdan kimzaw leng huai Directorate ah kanchet theih ding hi.
1. Best Janjatiya Award: Hiai award ngahte’n Rs. 2 lakhs, citation leh trophy mu ding uhi. Sports, Education,Culture, Science & Technology, Entrepreurship & Biodiversity conservation leh field dangdang ate’n hiai Award muthei ding uhi. ST pasal 1 leh ST mah numei 1 in ngahthei ding hi.
2. National Award for Exemplary Community Service: Hiai Award ah Rs. 3 lakhs, citation leh trophy kithuahkhawm ding hi. NGOs, voluntary organizations leh community based group khatpeuh community service thila semhoih tungtuante piak hiding uhi.
3. National Award for best performing Integrated Tribal Development Project(ITDP)/Integrated Tribal Development Agency(ITDA): Hiai Award mute Rs. 5 lakhs, citation leh trophy in zui ding hi.
www.manipurexpress.com
Aizawl, March 31: Mizoram state a kialpi a tunna munte enkhe dia Central apan kuan Inter Ministerial Central teamte leh tuni in Mizoram Chief Minister Zoramthanga kimu in, huai ah makai tamtak paikhawm uhi. Thusuak kingah dan in, tuni nitaklam dak 4:30 in Inter Ministerial Central Teamte Pankaj Kumar, Joint Secretary, Department of Agriculture & Co-operation, Govt. of India in makaih a, Chief Minister Zoramthanga in a official Bangalow-ah kimuhpih hi.
Pankaj Kumar in agendan in, March 20, 2008 in Central govt in huai teamte a dinkhiak ahihdan gen in, mautaam tawh kisai in pan naktak a laksawm uh ahihdan CM theisak hi. Chief Minister Zoramthanga in Centre palaite kiangah kum 2/3 paisa apan zusa leh ganhing tuamtuam in Mizoram state leitang sung a om buh le baal te tom siang keuhkeuh in mipi ann ngawlthei ding dinmun ah koih zou uh a, state Govt panlakna ziak in Food Corporation of India in antang bangzahhiam pe mahle uh huai in daih vual ding ahihlouh dan gen in, sum leh antang chihlouh a poimawh omlou ahihdan gen hi.
Zoramthanga in Centre palaite kiang a agenbehna ah kum 47 paisa in Mautaam ana tung ngei a, huai hunlai ana thuak kha mi tamtak Zoram ah damlai ahihdan gen in huai a haksatna atuah uh a mangngilh theihna ding un tutung in Mautaam omlam phawklou khop a State in antang kiningching koih ut ahihna ah, Centre palaite’n naktak in a kithuahpih uh poimawh ahihdan gen hi. Mizoram i chih India khua leh tui hihna nei ahihman in India mi le sa ka hi kichite’n Mizoram nelhsiah theih vual hilou ding chi’n leng Zoramthanga in gen hi.
Inter Ministerial Central Teamte ahihleh Pankaj Kumar ban ah Sarvan Kumar, Director, Planning Commission; Ms. Nalini Pathak, Asst. Director, Ministry of Finance; Sube Singh, Asst. Commissioner, RD Ministry; Dr. S.K.Biswas, Director, Department of Agriculture & Cooperation, Kolkata leh M.K.Gogoi, Gen. Manager (NE), FCI, Guwahati te hi uhi. Huai kihouna ah Mizoram Government sik le tang in, CM ban ah, Home Minister Tawnluia, K.Sangthuama, Minister of State for DM & R etc. leh K.Riachho, Secretary to Govt. of Mizoram, DM & R etc. te ban ah heutu tuamtuam tel uhi. Team leader Pankaj Kumar, IAS bel Nagaland cadre IAS officer ahih dung zui in NE te haksatna thei mahmah a, tutung a Mizoram Government in a kithuahpihna uah kipak mahmah ahihdan gen hi.
Centre teamte bel March 30 2008 in Delhi apan Aizawl tung uh a, April 2 2008 in Aizawl apan Imphal tungding ua, koi lailai mun pha ding uhiam chih theih hikei mah leh Lamka bel aphak uh gintak-huai a, April 5 2008 in Indigo flight in Imphal apan Delhi zuan in lengkhe ding uhi.
Med. Supdt in Press-te kimuhpih
Lamka, March-31: Dr Thang Khan Piang Hatzaw @ Dr T. Hatzaw, Medical Superintendent, District Hospotal/CCpur in tuni nitaklam in a office ah Press-te kimuhpih in Hospital leh vanzat tuamtuam tawh kisai genpih hi. Aman a genna ah News a kisuah phot mipi in thudik hi a pom uh ahihmanin Hospital tawh kisai a thusuah dingte adik leh diklouh amah contact a thuchian zong masa zel ding in ngen hi. Etsakna ding Hospital a oxygen omlouh hun ah Lamka kia hilou Imphal a JN hospital ah leng omlou sek ahihdan gen hi.
Med. Supdt in a gendan in Hospital a zat dingin 144-KV Generator thak hongtung a, zat ahihchangin Hospital campus a meivak kiching pethei ding a,CT Scan machi8ne leng zat theih hidin gen hi.Huailouin Hospital a ding tuam himhim electric transformer khat hongtung pah din leng gen hi. Huailouin Hospital a thilnin leh paihdingte haltumna ding machine(Incinerator) leng Delhi apan hongtung a,huchibang vanzat J NHospital ah leng om nailou hi’n gen hi. Huaite banah Hospital a zat ding Washing machine 1, Operation Theatre table 2, boyl’s apparatus(naplup piakna table) leh tele-medicine leng hongtung a, huaite mipi adia hatuam taka zat ahih theihna ding in Press te’n leng kithuahpih ding in ngen hi. Dist Hospital ah OPD a damloy ki-ensak, Hospital a damlou om tampi a om bangin emergency thil a Gari poimawhna tam mahleh Hospital in zat ding gari tasam petmah hi’n leng gen hi.
Cycle leh Scooter kiphukha
Lamka, March-31: Kwakta kianga Ukha Gate ah March 30, 2008 nitaklam dak 3:30 vel in cycle atai Lunkhongam (20) s/o Mangboi of Gothol leh Scooter atai Hemlun (50) s/o Lamkhothang of Matiyang kiphu tuahkha uh a, anih tuak ua liam in District Hospital a etkol ahihnung un Hemlun pen a gim ziak in Doctor te’n RIMS a etkol ding in refer uh a, March 30 nitak mahin Imphal ah kipua hi.
Inter Ministerial Team te’n Tipaimukh pha ding
Lamka, March-31: CCpur District ah maupak ziaka Mautaam kialpi tung thu ah amun mahmah a thil omdan enkhe ding in Central apan Inter Ministerial Team te’n April 2 ,2008 in Tipaimukh khua pha ding uhi. Amau Silchar lam apan in Tipaimukh lut ding uh a, DC/CCpur & SP/CCpur in na kithuahpih ding uhi. Pankaj Kumar, Joint Secy. Department of Agriculture&Co-operation,Ministry of Agri.Government of India makaih in Sarvan Kumar,Director of Planning Commissioner; Jo Sharma,Asst.Director Ministry of Finance; Subhash Singh, Asst.Commissioner Ministry of Rural Development; Dr.S.R.Bishwas, Director Dept.of Agriculture&Co-operation; J.P.Pandey,Executive Director NEFCI ban ah Women &Child Development, Government of India apan Officer bangzah hiam in leng Mautaam in a hihsiatna munte enkhe ding in hongzin ding uhi. Amau khua bangzah phading uhiam chih bel theih hilou hi.
Silver Jubilee lopna leh biakinn honna
Lamka, March-31: Central Lamka EBC te’n a April 1, 2008 sun dak 12:30 in a biakinn uah Silver Jubilee lom ding uhi. Rev.L.Khamkholun, Gen.Secy/ EBC in Jubilee suangphuh hong in h Pathian kiang ah lan dinga, Pathian thutak genna leng nei ding hi. Huai ban ah April 6,2008 zinglam dak 10.30 in Central Lamka(South) Lailamveng a EBC biakinn thak hon hiding hi. Huai ah Rev.L.Khamkholun mah in biakinn hong in Pathian kiang ah lan ding a, Rev.Dr.B.Luaichinthang, Director of Ministries in Pathian thugen ding hi.
N.Mangi in Lamka hongpha
#N.Mangi Singh, MLA in tuni zinglam dak 11 in Lamka hongpha hi. Aman Meitei Society makaite kimuhpih huainung in mun tuamtuam aphakzawh in Imphal ah kiknawn hi.
Electric Dept te’n singphuk uh
#Khua khal a huihpi nun ding patauh ziak in tuni in Electricity Department /CCpur te’n Singngat line a Electric guipi in ahihkhak theih ding singkung omte phuk uh a, IB line lam ate leng phuk vek sawm uh hi’n kigen hi.
ZWC election neiding
#United Zou Organisation, Gen HQ a Executive te’n tuni zinglam Zogal hall, Zou Veng ah meeting uh a, April 25, 2008 in Daizang khua ah Zou Working Committee election 2008-2009 neih ding in thupuk uh chihthu kiza hi.
Electric voltage in zoulou sek
## District Hospital a zat ding a hongtung CT Scan machine zat theihna ding in electric power (tha) voltage 410- apan 420 tan poimawh gige himahleh voltage 320-330 kikal lel electric meivak tha a om ziakin tunitan in kizang theilou chihthu om hi.
Session kipat ding April 7 in kisuan
## Thawnsau Computech ah April-June,2008 sung training dingte April 1, 2008 a session kipan ding chih himahleh lemtan louhna khenkhat ziakin April 7,2008 in kipan ding a, seat awng tamlou om ziakin a lunglutte adin ngaihvan theih ding hi.
Training ading Compurter
# Rengkai Govt.H/School te’n NEC apan Computer 15 mu uh a, CCpur Govt.H/S in 5 mu uh a, Sagang School in 4 leh Gandhi Memo School in 5 mu uhi. School 4 a teacher-te training piakna ding in March 29 in ZEO/CCpur office ah Computer set 4, hongtung hi
SUUNNA
Mrs Chingkhoniang @ Chingbem(77) m/o V. Ginzanang of Zenhang Lamka sungna ziakin zan nitak dak 10.00 velin si a, tuni in Zenhang Lamka hanmual ah kivui hi.
Tongkhozam (80) s/o (late) Henneithang of Bijang tuni nitaklam dak 5:30 in sungna in si a, April 1,2008 in kivui ding hi.
IMPHAL NEWS:
ADC Bill thu ah ATSUM in thusuah bawl
Imphal, March 31: All Tribal Students Union Manipur(ATSUM) in Manipur Autonomous District Council Bill, 2008 ngai poimawh mahmah uh ahihdan puang uh a, tuni in ATSUM General Secretary in MLA leh mipite theih ding in thusuah bawl hi. Huai thusuak dan in, tuni in Imphal a Kuki inn ah Public Consultation Meeting om a, huai ah singtangmi pawl tuamtuam apan palai tamtak paikhawm in ngaihdan tuamtuam lakkhawm ahihdan taklang hi. ATSUM in huai hun ah thupukna khauhtak la a, Govt ah ngetna tawh thuahpah ahihdan puang kawm in, Manipur Govt in a limsak kei leh kiphinna in a zuih poimawh ding chi’n taklang uhi.
ATSUM in Manipur ADC Billl 2008 pomlou ahihdan puang uh a, Manipur Assembly in Select committee a apiakkhiak ua point kitunte leng pomlouh thu gen in select committee in draft a bawlthakte leng pom theilou ahihdan taklang uhi.
India Dan bupi nuai a singtangmite hamphatna ding tamtak kigelhte huai bill in nuai tomvek ahihdan taklang uh a, ST hihman lel a muh ding thil khenkhatte nasan muhsak sawmlouh hi a, state Government leh MLA te’n hiai hamphatnate amau sakhau ah kuahsawm a ngawh in huai thil singtangmite muhsitna ahi chi uhi.
Hiai tungtang April 3 2008 in Assembly ah puaklutnawn leh luikhiak hiding a, huai a thu kigente leh thil omdan ATSUM in enzui ding ahihdan taklang in singtangmite hamphatna om sunsunte koihdap a dikloutak bill namdet ahih veve leh ATSUM lungkim hetlou ding ahihdan taklang uhi.
PWD A/E 1 kaplup in om
Imphal, March 31: Tu nitak dak 7:30 vel ding in Public Works Department a Assistant Engineer sem K Nabachandra (49) s/o K Ibotombi of Utlou Kangjeibung Mamang Leikai kaplup in om hi. Thusuak in agendan in, a zi leh tate tawh bazaar a hawh a kiklam ua a gate bul uah Kangleipak Communist Party (City Meitei) pawl in akaplup uh hidan in kigen hi.
RIMS ah sit-in-protest nei
Imphal, March 31: Regional Institute of Medical campus ah tuni in KCP pawl in RIMS a semte vauna abawl ziak un, lungkimlou in RIMS a sem staff leh Doctor tengteng in sit-in-protest nei uhi. Amau zingchiang April 1 in sunzom nawn ding uhi.
MCS Officer 3 in IAS ngahthak uh
Imphal, March-31: Manipur govt nuai a senior MCS Officer 3 in IAS dinmun a kaisang ding in India govt in lemsakpih in IAS hihna conferred hi. MCS apan IAS ngahthak Officer-te leh tulela a dinmun let uh anuai bang hi.
1. H. Deleep Singh,MCS, Director(Institutional Finance) ex-officio Managing Director/MSCB and Director(Treasury & Accounts) & Additional Secretary(Finance).
2. M. Lakshmikumar Singh, MCS, Director(Settlement & Land Records) & ex-officio Additional Secretary(GAD/Sericulture).
3. K. Radhakumar Singh,MCS, Additional Secretary(Finance) & ex-officio Director(Small Savings) and Director(Local Fund & Audit).
Assembly ni 1 sung tu ding
Imphal, March 31: Manipur Autonomous District Council Bill 2008 tungtang ah Manipur Assembly special sitting 2vei om a, house in Select committee ah a piakkhiak ziak in Select committee in suggestion abawlte luikhiakna ding in April 3, 2008 in ni 1 sung Assembly special session om nawn ding hi. Hill Areas Committee makaihna in March 27,28 leh 31 in hiai bill tawh kisai in singtangmi MLA teng in meeting nei uhi.
Imphal Bazar area ah gari lut ding kham lai
Imphal, March 31: Transport Director in February 2 2008 a thusuah abawl dungzui in, Ima Market leh Khwai Bridge lak a gari lut ding a kham paizom zel in kha khat sung daihding chih himahleh, kha khat mah behlap lai uh ahihdan gen uhi. Transport Director thusuak in ataklat dan in Sewage project pailel zawh siang hinailou a, gari lut leh buaina lianpi tungding ahihman in Motor Vehicle Act 1988 Section 5/7 dungzui a a kham ahihdan taklang hi.
Assembly bomb thu ah mi 2 suspend hinawn
Imphal, March 31: Manipur Assembly complex sung ah March 8, 2008 a bomb paihlut tawh kisai in tuni in Imphal West SP L Kailun in Police constable 2 ahihna ua pan suspend nawn hi. Thusuak kingahdan in, Constable Sh Sunil Sharma of Imphal West Police Commando Unit leh Head Constable SH Khamba Singh of Imphal Police Station te huai thiltun ni in a duty na mun uah omlou uh ahihdan taklang kawm in suspend ahihthu puang hi. Amau suspend a a om sung uh Imphal Reserve line pawtsan theilou ding in leng gak hi.
Advisory member di’n mi 2 guangthak
Imphal, March 31: Manipur Govt in National Security Act(NSA) a Advisory Board member ding in tuni in mi 2 guangthak uhi. Thusuak dan in, Manipur Home Department in April 12 2002 in Chairman ding in retd Justice SP Rajkhowa sep a, tua ban ah member ding in L Shyamkishore Singh, Senior Advocate, Gauhati High Court leh Retd Director(Prosecution) M Nabakumar Singh guang uh a, himahleh helpawlte apan vauna a ngah munluat ziak un member 2 ahihna uapan kitawp uh hi’n thusuak in gen hi.
Hiai thu ah State Home Deptt in March 6 2008 in thusuah bawl nawn a, order omsa phiat in Dr Yamini Kanta Phukan, Senior Advocate/Gauhati High Court leh Joginder Singh, Sr Advocate/ Gauhati High Court te member ding in septhak ua, Chairman ahihleh, Rajkhowa mah in lenlai ding hi. Thusuak dingzui in member 3 te’n sitting a neih peuhmah chiang un ni khat in Rs 2500 mu ding uh a, tua ban ah Dearness allowance leng nikhat in Rs 350 hiding in kigen a, lenna pai man tengteng leng ahun leh amun zir in State Govt in sengding chihthu om hi.
BRTF truck 3 tuni in kihalsia
Imphal, March 31: Tuni nitaklam dak 3 vel ding in Lamlai a Baruni Chingkhong Kourinagar mun ah meltheihlouh pawlkhat in Border Road Task Force (BRTF) te gari zat truck 3 khamkhawl in halsiatsak vek uhi. Huai Truck 3 te’n cement pawchiat uh hi’n thusuak in gen hi.
AR post kap tu PLA hi’n kipuang
Imphal, March 31: Manipur-Myanmar gamgi jula Assam Rifles post om Ningani paisa a vakapte phaijang helpawl PLA hi’n kigen hi. Revolutionary People’s Front (RPF) thupuangtu in a taklat dan in RPF armed wing PLA cadre te gamtatna ahihdan gen in, a si leh liam tungtang bangmah taklang lou hi. Official thusuak in bel CCpur district sung a Behiang Border a 9th Assam Rifles post kaptu diktak theih hilou hidan in taklang a, huai kikaptuahna ah sepaih lam a si leh liam omlou ahihdan gen uhi.
SPORTS NEWS:
Sawmpau Memo. Football kidemna
Sahara leh Nghathal Youth Club pangkhawm a a organized ding uh “5th SAwmpau Mermnorial Football Tournament” April 1, 2008 sunnung dak 12.30 in Nghathal Playground ah kipan ding hi. Huai ah Chief Guest in Major R. Malik, 3-Assam Rifles pang ding a, Guest of Honour in Dr VC Pau, District AIDS Officer/CCpur pang ding hi. Huai Tournament kipatna ding in YPA HQ leh YMA HQ team kimawl masa ding uhi.
EDITORIAL:
Tuni Thupi:
“Pathian aw, ka naupan chik akipan nang non hilh a; tutan in na thil lamdang hihte ka theisak gige hi. ” Sam 71: 17
University thubuai in bangtan daihding?
India malsuah gamte i zawnkhal mahmah lai in Guwahati University nuai ah i ki binkhawm a, hun hongpai zel in, North Eastern Hills University(NEHU), Manipur University, Nagaland University leh adangdang hongpawt khia in, tuni chiang in state tamtak mahni khe in i dingthei uhi. Himahleh, sinna tuamtuam ah University facility om te’n a daihzawh louh ziak in Guwahati University i kop hun uh omlai hi. Etsakna ding in, Manipur in General Nursing Midwifery leh ANM study centre nei mahleh, Assam Board nuai ah tuni tan exam lai veve uh a, state in board/council tuam nei zou nailou hi.
Manipur a siamsinna inn sangpen bang a i koih Manipur University June 5 1980 in honkhiak ihi a, huai apan Manipur University hong khangtou hiaihiai in mahni kitoudelh bangtuk in hong om hi. Himahleh, Manipur in kong tuamtuam ah haksatna a phut dungzui in huai apan suahtak theihna ding ahih khak leh chikawm in October 13 2005 in Central Govt in neitu hihna leh thuneihna la nawn leuleu hi. Manipur University phiat hilou in aneitu (ownership) Central Govt a kikheng chihna hilel hi.
Manipur University Act 2005 enthak ding chilehang, ngaihdan tamtak a om ding hi. Manipur University Act, 2005 kichi bawl a hihlai in, Central University Act bang a pomtheih ahi kei a, a ziakbel Manipur ading liauliau ading a bawlkhiak ahi hi. MU in Centre University status a dopsangna ngah mahleh, a min Manipur University pe’n khek louh ding chihna ahi hi. A min kheklouh ahihhang in, Centre apan panpihna leh phungvuhna hong paite a buai ding chihna hituanlou hi. MU Act nuai a chiangtak a kigelh khat ahihleh, Rights & privileges chih hi a, section 4(d) nuai ah, MU a sem peuhmah in, pension, leave, gratuity, provident fund leh adangdang ngeina bang a a muhthou ding uh chih ahi. A Act pe’n thutuam hiphot ta leh, Manipur University nuai ah affiliated college 72 om a, Manipur Institute of Technology (MIT) leng pom hikhin hi. Centre khutsung ah Manipur University a lut hang in, Manipur State a dia kibawl liauliau mahbang in kilang hi.
Central Govt in Reservation tawh kisai in policy hoihtak a nei chih kuapeuh theihsa hi. Central Govt in sepna leh siamsinna ah reservation policy a neih dungzui in, All India level himhim a Competitions/employment leh further studies a ding in reservation percentage pen, All India population basis in Scheduled caste te ading in 15% koih a, Schedule Tribe te ading in 7.5% kikoih hi.
Tulel a Manipur state sung a government office omte a reservation percentage ding in SC 1%, ST 27% leh OBC 22% hi leuleu hi. Himahleh, hiaite a diktak a zuih ahihlouh ziak in All Tribal Students Union Manipur(ATSUM)_ leh Manipur University Tribal Students Union(MUTSU) makaih in University campus ah kiphinna om a, Chief Minister makaihna in ATSUM leh MUTSU team in Delhi a va phak nung uh hiai thawm dai vengveng hi’n kilang hi.
Manipur adin MU kichi siamsinna lama sangpen ahih ziak in laisiam leh mi upa thil ngaihtuah thei tamtakte ading in MU buaiding ngaihngam huai hetlou a, a minsiat ding leng phal huailou bang hi. State Govt hailou ahih dungzui in ATSUM leh MUTSU te’ ngetna pe’n etzui sak ding in chiam uh a, Prime Minister Dr Manmohan Singh leh Human Resource Development Minister Arjun Singh tanpha kimuhpih uhi.
Manipur ah phaizang mi leh Singtangmi kal ah kikhenna lian mahmah chih ngaihdan mi tamtak in a neihlai in, Manipur University pe’n Centre Univeristy ding in dopsang in om a, Centre Govt employee te facility ngah bangbang amau leng a ngah sam ding un kilawm hi. Himahleh, admission quota leh employee reservation tawh kisai ah leng University in a tup mawng uhia chih theih ding in hihkhelh hau mahmah uh a, ATSUM leh MUTSU kiphinna pe’n thudik mah suak hi.
A lehlam ah, khawvel a Association leh JAC tamna pen Manipur a de aw chih theih din om a, demand tuamtuam nei in, strike leh bandh tanpha pumdim hi. State Govt leng pil petmah zaw ahi ngei ding a, demand tuamtuam omte khemdaih dan siam mahmah in tuni chiang in ATSUM leh MUTSU ngetna leng bangtan tungta hiam chih theih zawhlouh khop ding in selmang uh bang hi.
ATSUM leh MUTSU in mass exodus thupuan aneih uh mi tamtak in kipahpih a, Manipur University zop nawnlouh a, huai a kai singtangmi student teng in pawtsan ding chih ahi. Huai hileh, a impact bang om ding hiam chih state Govt in amat luat ziak ua hiai thubuai meekmit daih uh adiam chihtheih in om hi. Huaiziak in, tu a dan a i pai ningneng leh mi’n bangmah a hon ngaihlouhsa uh hon muh niam behbeh lai ding ua, tuasang mah in, singtangmite adia Univeristy tuam phut ding ahih kei leh, Univeristy dang zop ding chih khawng Student leader te’n ngaihtuahzaw le uh, Manipur singtangmite ading in punna thupitak a hizaw diam chih khong ngaihsut tham ching hi.
Employment News:
Government of India, Ministry of Home Affairs nuaia sem ding post hunkhop kila ding a, North-east bial ah Imphal(Code No. 14), Aizawl(Code No. 03), Kohima(Code No. 18),Shillong(Code No. 28), Agartala(Code No. 01), Itanagar (Code No. 15) leh Guwahati(Code No. 12) leng Exaimation Centre hiding hi.
1. Asst. Central Intelligence Officer: 200
(Reservation: ST 15/SC 30/OBC 54)
Pay: Rs. 5,500-175-9,000
Age: Upto 27 years(ST/SC upto 32 yrs)
Qualification: Graduate from a recognized University
or equivalent.
Atung a post kitaklang adia chitna leh siamna nei a candidate dinga lunglut kuapeuh in application format omsa enton in ordinary post tungtawn in thon ngai hi. Application thonna envelope tunglam veilampang ah bold letter in “Application for the post of Assistant Central Intelligence Officer Grade-II/Executive” chih gelh ngai a, huailouin application form ah passport lamlek candidate in a malampang a suai a kaih belh a ngaih banahapplication tawh thonkhawm ngai admit card ah leng lemlak khat belh ngai hi,
Application leh document poimawhte kimtaka thuah in Employment News March 29-April 4,2008 issue ah hiai post advertisement kisuah nung kha 1 tana tungman ding in anuai a address ah thon ngai hi.
Assistant Director(G),
Post Box No. 5319
Post Office- Chanakyapuri
New Delhi-110021.
(Detail information, application format leh thuchian kimzaw munuam leh chiantaka theinuamte adingin Employment News(March 29-April 4,2008) ah et-theih ding a, huai copy mu lemtangloute adingin Manipur Express office ah leng nasep hunsung(working hour) zinglam dak 10.00 akipan nitaklam dak 5.00 tan in et-theih ding hi).
MPSC in kum bikhiah thak nawn
Manipur Public Service Commission(MPSC) in Manipur Civil Services Combined Competitive(Preliminary) Examination, 2008 om ding ah upper age limit a bikhiah dan in general category adin kum 30, OBC adingin 33, ST/SC adingin kum 35 chih himahleh March 19, 2008 in thusuah bawlthak in kum 2 chiat behlap hiding chih hi a, application submit hun leng April 19, 2008 tan hithei ding in thusuak om hi.
National Tribal Award apply theih ding
Ministry of Tribal Affairs, Govt of India in kum 2008-09 a 11th Plan hunsung in National Tribal Award kichi anuai abang scheme thak patkhiak sawm a, mimal leh group huai dia lunglut kuapeuh in July 31, 2008 tan Director of Tribal Research Institute,Imphal tawn in apply theih ding a, thu omdan kimzaw leng huai Directorate ah kanchet theih ding hi.
1. Best Janjatiya Award: Hiai award ngahte’n Rs. 2 lakhs, citation leh trophy mu ding uhi. Sports, Education,Culture, Science & Technology, Entrepreurship & Biodiversity conservation leh field dangdang ate’n hiai Award muthei ding uhi. ST pasal 1 leh ST mah numei 1 in ngahthei ding hi.
2. National Award for Exemplary Community Service: Hiai Award ah Rs. 3 lakhs, citation leh trophy kithuahkhawm ding hi. NGOs, voluntary organizations leh community based group khatpeuh community service thila semhoih tungtuante piak hiding uhi.
3. National Award for best performing Integrated Tribal Development Project(ITDP)/Integrated Tribal Development Agency(ITDA): Hiai Award mute Rs. 5 lakhs, citation leh trophy in zui ding hi.
www.manipurexpress.com
No comments:
Post a Comment