Lamka, July 12: New Life Ministry (NLM) a Founder Director Rev. C.V. John in tuni sunnung dak 1:30 in New Lamka a PCI® HQ Conference Hall ah Press Meet sam in Lamka pansan thuthak saite kimuhpih hi.
Rev. C.V. John in a genna ah, Kerela pan Manipur ah 1964 in honglut a, sinsaktu na bangtan hiam a sepnung a, tawpsan in thugentu apang in mun tuamtuam ah thugen in vialvak hi. Missionary sawlkhiat a huaite chawm ding, tagah leh meithaite etkol ding leh khantouhna nasep tuamtuam sepsuahding ngimna in Sielmat khua ah July 1979 in New Life Ministry (NLM) phutkhia ahihdan gen hi. Hiai hun in NLM ah board member 7 om ua, 1981 in Imphal ah Registrar of Society nuai ah NLM registered uhi. Tagah kepna masapen ding in Mission Compound a Mrs. Niengpi Singson ta 5 te kem ua, huai zoh in Arunachal Pradesh tel in mun tuamtuam apan in naupang tagah kaikhawm in kem uhi. A tagah kepte uh 10 a phak apan in Rev. John in amau inn neusa in mi inn khat luah in huai ah a tagah kepte omsak hi’n gen hi.
A tagah kepte laka khat Ms. Lalnunnem in Bible college apat a Graduate khit in Sielmat a Dam veng ah innkhat bawl ua, huai ah Ms. Lalnunnem in tagah naupang dangte enkol tou hi. NLM min mah zang in 1989 in Trivandrum ah gam 1.25 acre a lian lei in huai ah Trivandrum Bible College (TBC) hongkhia ua, tu’n huai ah B.Th leh M.Div. course sintheih hi. NLM Board Member 7 hisek pen kum 2002 apan in 13 in behlap touh in om a, huaite etkolna nuai ah Project 7 omlel ahihdan Rev. CV John in gen hi. Angkawm ziak a kumpaisa 2007 January apan a dinmun keniam a, himahleh NLM Constitution dungjui a Founder Director bel tawpsak theihlouh ahihdan gen hi. Tu’n a khelhna kisik in Board member pihte kiangah ngaihdam ngen in amah pom nawn ding in mahleh ngen mahleh tutan in a ngetna pomsak hilou ahihdan gen hi. Member bang a ngaih ahihnawnlouh ziak in apaisa June 3, 2008 in TBC campus sung a atenna inn apan in a innkuan un Police in vanohkhia ahihdan gen hi. Tutung a Manipur hongphakna leng NLM Board member-te toh kilemna bawl ding a tupziak hi a, huai dungjui in member-te kiangah palai sawl a, himahleh memberpihte’n kilemna omtheilou ding hidan in gen uhi. NLM Constitution kalh a Founder Director ahihna apan tawpsak ahihtoh kisai a maban a bangchibang a panlak sawm hiam chih dotna pen NLM neih-leh-lam deihgoh louh ahihdan gen in a tenna inn a a tentheih nawnna dia member khat a pom ding a ngen lel ahihdan leh legal tak a sualsawmlou ahihdan gen hi.
Children Home a Project Manager dia aguan in amah (CV John) pen Children Home huangsung a sikkhak ding leng phallou ahihdan gen in amah apan lehkha mu in helpawl khat in leng Hmar area sung sikngei nawnlou dia vau uh ahihdan huai lehkha pan theih ahihdan gen hi. Tulel a NLM nuai a Project tuamtuamte mikhat kia khutnuai a om toh kibang ahihman in huai pen mikhat khutnuai a omlou a, organisation etkolna nuai a a om a deihdan leng gen hi.
NLM sum thelthangsak leh numei tamtak tung atatsia hidan a ngohna om toh kisai dotna adawnna ah NLM sumte thelthangsak ngeilou ahihdan leh sum poimohlou ahihdan gen in a aangkawmpihnu chihlouh numei dang tung a huchibang a gamta ngeilou hi’n thuthaksaite dotna dawng hi.
Rev. C.V. John bel, kum paita a lasiam minthang mahmah Lalruotmawi toh kilawmloutak a om ziaka Trivandrum a va om mang hi a, NLM Board member te toh kal a mun-le-mual thu a kinoktuahna a om ziak a, tuate bawl lemtheih dan lampi a om hiam chi a Lamka hong ahi.
Source: http://zogam.com/index.php?option=com_content&task=view&id=3634
No comments:
Post a Comment