Biakna leh nampi lungsim

H Kham Khan Suan

-----------------------------------

Biakna leh nampi lungsim a tonkhawm den hi a, Zomi Christian Fellowship, Delhi (ZCF, Delhi) zong hih sung pan hong piangkhia ahi hi. Biakna i gen ciangin a bia ding ‘mi’ kisam a, tua mite’n amau tungah a uk, thunei, leh a vanglian Pasian khatpeuh um in a san/pom kim ding uh thupi hi. Tua bang a piantheihna dingin mite sungah kituah-kilemna (kilunghualna), kipawltheihna leh ki-ukzawhna kisam hi. Biakna in mi kaikhawmin kihotheisak a, kilungtuaksakin kipumkhatna piangsak a, kiit, kilemna meng khiasak hi. Khristiante sungah hih bang thuphate a om ding pelmawhin kingaihsun hi. Bang hang hiam cih leh Pa, Tapa leh Kha Siangtho a kipumkhat bangin thu um mite zong kipumkhatin i om ding ahi hi. India ah zong ZCF kici kipawlna khuapi lian tengah nei ta ihih manin lungdam huai hi. ZCF in Zomite sungah ki-it, kilemna, kipumkhatna leh nampi lungsim hong piangsak takpi mah hiam cih pen i lungngaih kikkik ding thu lianpi khat a suak hi.

ZCF bang hangin ci sese i hi hiam?

Mundang, gamdang ah a zinkhia zo i tam nai loh hangin, India gamsung a om Zomite adingin 1980 pawl i gamlek hun hi a, Shillong, Allahabad, Delhi leh India khuapi lian tuamtuam ah laisim, nasem, sum metbawl in i om a, giautau kisa in kipawlkhop ding i lunggulh tek hi. Zo ngeina, lai leh minam hihna (identity) a kisapna zia i phawkkhiat san hun zong ahi hi. Hih bang minam kipawlkhopna pen i theihsa bangin Kawlgam ah 1952 in Hakha, Falam leh Tedim biakna makaite’n Zomi Baptist Convention phuanin na pankhia zo uh hi. Zo minam sungah a tangzai zaw in Pasian na semin, biakna bangci hatsak ding cih lunggulhna pan ZBC hong piangkhia hi cih zong i phawk hi. India gamah zong hih bang ngaihsutna mah nei in ZCF i phuankhia hi. Delhi pan a kipankhia kipawlna pen a tungin Zomi Fellowship bek na kici hi. Kum 1988-89 pawlin Zomi Fellowship pan Zomi Christian Fellowship ciin kilaih hi. A tangthu tawm sut pak leng ZCF pen nam itna leh awlmawhna, kikholhkhopna/kipawlna kician lunggulhna leh Zomi hihna kepbit nadingin kiphuankhia ahihna thu i mu thei hi.

ZCF, Delhi hanciamna tawh Zo minam sung pau tuamtuam panin late khilkhawmin in ZCF labu i neithei hi. I paukam tuamtuam tawh lungkihualin biakna nei thei ihih manin manpha hi. Mun tuamtuam pan kipanin, pawltuamtuam ah a om kimlai Zo minamte sungah kimuh, kikholh, kithu santuah theihna hong piangsak a, sanggam-laizom i hihzia leh minam khat i hihzia hong phawksak semsem hi. Kha thu bek hilo in ci leh sa lamah zong kipumkhatna hong piangsak hi. I nasep theihna ding gam hong keksak a, i lungsim ngaihsutna hong tangzaisak hi. I pau leh lai, ngeina leh biakna hong kepbitsak in minam lungsim lianpi hong neisak hi. Zomi Christian International kici thukizakna a simkhate in limtak tel ding hi. Ahi zongin khuapi tuamtuamah a om ZCF-te’n tu dongin kizopna i nei thei nai kei hi. I omna tek ah eimau lamsa Biakinn zattang ding kician i nei zo nai kei hi.

I pawlcin tawh kituakin pawltuam ngaihsutna, a tuamin kituun, kihuaikhopna lungsim hong piang hi. Sum leh pai zekna ah i sanggam lom sung (tribe) ading mah ngaihsutna hong khang a, gamkek in, kigawm in a kipumkhat semsem ding kimlai kikhen thaangin kiamlam i manawh zawsop hi. Pawlkhatte’n hih bang a kikhenthaangna in nampi lungsim a neitheilo minam i hihna hong pulak hi ci thei kha ding hi. Amau ngaihsutna panin hih bang thu hong om pen dahhuai in limtak a lungngaih phat huai thu ahi hi. India leh leitung kiuli ah biakna kipawlkhop ding, gamkek ding mah a kithupi gen laitakin Zo minamte sungah neucikcik kilemlohna leh kitelkhialhna hangin pawltuam phuan in, kitamkham gawp ding i bang hi. A kigawm theilo minam hi lim i hiam cih hong lungngaisak hi.

Pawlkhat leuleu in hih bang a meengkhiatna leh pawltuam phuatna hangin khantohna leh gamkekna, nasep tangzaisakna in ngaihsun thei leuleu uh hi. Hih bangin a ngaihsunte in paubing siksanin pawlsatna, a za huaplualo in kikhenna in pawlpi sungah khat leh khat ki-it, kilemna leh kipawlkhopna hatsakin, pawlpi mite limtakin van zo zaw hi ci uh hi.

A thulai gen le hang: Pawlpi (biakna ahi a, biakna hilo ahi zongin) vai khat peuhpeuh pen thupisakin tangzaitak in na i sepkhiat theih nadingin pawlmi khat leh khat kithei in, tha kipiaktuah theih ding kisam hi. Ukpi leh ukneu a hunkhop mah kisam ding a, amaute limtak kizomin thu kihual ding hi. Thutanna leh ngaihsutna/gelkholhna khatpeuh kiciantakin nei in, limtakin zong semkhia thei ding hi. Mipi lungsim, uk, deih leh lunggulh, haksatna leh thanemna limtak theisiam in a kihualin na a semkhia thei leh mipi so a dom thei ding kipawlna kisam hi. Tua in pawlpi lawhcin nadingin milip leh pawltampi a kikhen kisam masa pen lo hi cih hong lak hi. Ki-ukzia leh kipawlkhopzia tawm laihin limtak vaihawm khawm thei le’ng na lianpi leh a thupi zaw na tampi kisem thei ding hi cih hong phawksak hi. United Nations kici leitung kipawlna lianpen nakpitak a lawhcinna in vaihawm siamna leh tavuan limtak hawmsiamna pan hong kipan hi ci le’ng kikhiallo ding hi. Roman Catholic Biakna leitung kiuli tengah kizelin tangzai takin Rome pan Pope ukna nuaiah a om theihna zong tuabang uksiamna/vaihawmsiamna pan hong kipan ahi hi. Nasep leh tavuan hawmsiam le’ng milip then za, then tul i val phial zongin ki-ukna hamsa tuan lo ding hi. Mosi leh Joshua in Israel-te Egypt gam saltanna pan honkhia in, gammang lakah kum 40 sung limtak a makaih theihna dingin Pasian in vaihawmsiam thusim a lak hi: Israel nam 12 sung panin makai ding telkhiasakin tuate tawnin limtak vai a hawmsak hi. Minampi lungsim ngaihsun sakin, kipawlkhawm sak a, a lunggulh tawntung uh ‘khuaizu leh bawngnawi luanna gam’ Kanaan gam lutpih hi (Paikhiatna leh Joshua Laibu limtak sim in).

A tomin gen pak le’ng: kipawl/kizopna in khat leh khat hong kitelsak semsem ding hi. A cingtak minam in minautang sungah a hoih leh a hoihlo, a thulim leh a thulimlo, a hat leh a hatlote theisiam in lungkihualin na semsak thei hi. Si leh sa ah kinaite kaikhawmin ‘kipawlkhop lunggulhna’ (corporate will) pia ding hi. Minampi tawh kisai laigelh minthang mahmah Hans Kohn in, “Hih bangin ‘kipawlkhop lunggulhna’ a om ciang bekin pau leh ham, ngeina leh khangthu, biakna leh nam kibangte tuunkhawmin kaikhawm thei ding a, gam leh minampi bawl thei bek ding hi.” ci hi.

ZCF Babel Tausang suaksak liang ding i hiam?

Thuciam Lui sungah tausang a tallang mahmah pen Babel tausangpi ahi hi. Noah hunlai, Tuiciin tunkhit ciangin mite pilna, siamna leh thupina a langsak dinga kibawl hih tausangpi pen tu hun tumlam ah gam/nampi lungsim piankhiatna a sut/kante’n thu gentehna in zang thei uh hi. Babel tausang pen thupi in a etlawm mahmah hangin a cim (collapse) dingin a kilam na hi lel tak hi. A tau cip pen a pammaih hilo zaw a, a lipkhap huai zaw thu in: a cip ma in minampi leh paupi khat a nei Noah’ suante pen tausang a cip khit ciangin nam tampi, pau tampi in hong kikhen uh a, kithutuah leh kipumkhat nading piang thei nawnlo hi (Piancilna 11). Tua mah bangin ZCF hong piankhiatna in a thupi pen leh a tawpkhawk i tunna lim (symbol) hisak liang ding i hiam ngaihsun pha ni. Kei ngaihsutna panin ZCF pen Zo minampi ngaihsutna (national consciousness) a om lai teng manglo ding a, hong kho semsem in hong manpha semsem zaw ding hi.

Biakna leh nampi lungsim

I biakna, ngeina leh hihna a tangzaizaw in i kep ut leh ZCF i phungvuh semsem kul hi. ZCF in Zo minampi bawl nading tavuan lianpen in nei lo ding hi. Ahi zongin ZCF hangin mi namdangte’n Zo minamte pen ‘Pasian tel minam, minam hamphate hi’ cih hong muh theih ding thupi hi. Tua bangin hong piantheihna dingin khat-leh-khat ki-it, kikem, kizun in i kipawlkhawm theih kul hi. India leh gam tuamtuam ah a om ZCF kipawlkhawmnate hangin kizom in limtak thu kikumkhawmin i kalsuan ding hi. Sangamlom (tribe) pansanin biak kipawlna a neite tawh thu kisangtuah in, i pangkhawm ding hi. Mizawng, tagah, meigong, pagong leh khanghamte i huh ding hi. A nangte huhin, thazawm (sa leh khalam) a kisate tha i pia ding hi.

I gamah Lungdamna Thupha hong tun cil lai in a Thu bek hong lut lo hi cih zong i tel ding hi. Zomi Baptist Convention phuat ding a kingaihsut lai in Lokhawh Sang (Agriculture Institute), Zato (Hospital) leh Laisiangtho Sang (Bible College) tawh phuh ding na limbawl uh hi. Lungdamna Thupha in khalam thu bek tawh kisai hilo a, pumpi cidamna, laipilna leh nek leh tak zonna ah cihtheihna tawh zong kizom hi cih mangngilh kei ni. Laphuah siam khat in ‘Jesuh pen samsiatna a kizelhna dong ah gupkhiatna a pia dingin hong pai hi’ na ci hi. Biakna in gupkhiatna i ngahna, Topa minthanna, itna leh hehpihna i phawkkhiatna ahih ding ahi hi. Khat leh khat kizomin, i kilem theih nading, kipawlthei in, i kipumkhat theih nading (Johan 15) leh nampi lungsim i neih theih nading i Biakna in hong sinsak hi cih lungngai kikkik ni. Zo minampi ading bek hilo in leitung bup mikhempeuh nampi khat hi in, Topa lenggah huanah a om lenggah hiangte hi hang a, i lengggah kungpi pen Jesuh hi cih i tel semsem ding hi. Jesuh sungah pumkhat a suak ding hi hang cih i phawk den ding hi.