Kiten dan a tuamtuam

By -Tual Khan Suan (Suanpi)

Dr. Hau Za Cin in nungak hel dan a tuamtuam ci'n lai hong gelh leh, kei zong a ban hong zom nuam ing. Nungak hel bek tawh lungkim zolo ciat i hih manin kitenna kinei hi. Tua ahih manin ke'n " Kitenna dan a tuamtuam" hong ci ning ei!

Khanglui lai hun in ( a diak zaw deuh in) zi leh ta ding pen mel leh puam, neih leh lam en in na zong masa lo uh hi leh kilawm hi. Lungsim hoihna leh gamtat hoihna te na bulphuh zaw uh hi. " Mel hoih ning tui kidawn theilo, lungsim siang tho vabang pil pha zo ta ee" na ci uh hi. Mel hoihna leh lia leh tang te ki-itna na bulphuh masa lo uh a hih manin zi leh ta ding taktak pen a kiteng ding nu leh pa te'n zon sak zaw uh hi. A hih hangin tu hun teh, " Mel hoih ning tui mah kidawn dawn a, lungsim siangtho vabang pilna zong ki nene thei veve hi. Hoih mah si!

Kitenna ( nupa suahna )pen itna om khit ciang bek a kilam khia thei hituan lo hi. Itna masa lo a kitenna zong i ngeina sungah tampi om hi. Zo ngeina sungah " Ni nung zui, nu leh pa gawm, beh leh phung sung pan kila" cih bangte pen ki-itna masa lo a kitenna hi kha thei ding hi. Kiten khit teh ki itna kipan zong nupa kop tampi om hi.

Nu leh pa, beh leh phung deihsakna tawh kigawm a, kiteng te a dingin " Itna" a om masa hi khin lo hi. Nupa ding a hi lia leh tang te a mau khat leh khat ki it, kingai lo tuak thei uh a, a hih hangin nu le pa thumanna leh mai lam nuntakna dingah hoihna tam zaw ding cih a khensat na uh pan kiteng cih zong om veve a, a kiten khit uh teh ki it lua, kingai lua in , ki-it masa, ki ngai masa nupa kop te sangin a nupa kal uh nop tuak zaw cih bang tampi om hi.1945 kum a kibawl films khat a hi, " Without love" a ki ci sungah a film star pa Spencer Tracy leh Katharine Hepburn te nu pan zong WW II na sungah thu leh la tuamtuam hang tawh kimu kha in, itna omlo ( without love) pi a kiteng a hih uh hangin a nuntak sungah kikhen lo in kiteng suak veve mawk ve uh ee! Hih bang kitenna pen a ki-it lo tuak a kitenna hi ki ci thei ding in um ing.

Zo tangthu sungah kawl mangpa in a zi ding in nungak mel hoih " Leng Tong Hoih" a lakna pen langkhat itna bek tawh kitenna a hihi. Kawl mangpa in nungak Leng Tong Hoih i kisilna pan a kia a sam zang a muh teh hih sam nei nu pen mel hoih hamtang ding hi, va zong unla, ka zi dingin hong puak un, ci'n a nasem te sawl hi. A nasem te'n va zong uh a, Leng Tong Hoih a muh uh teh, a nungak i utna ( without consent) tawh kisai lo in la uh a, Kawl mangpa a puak uhi. Tangval pawl khat te in zong nungak a ngaih luat mahmah te uh, nungak utna om in om ta kei leh a ngah theihna dingin tha tang, sum leh pai, leh zawl ai tuamtuam zang uh a, la teitei thei uh hi. Hih dan te pen langkhat itna bek tawh kitenna ki ci thei ding hi. Kiten khit teh ki it, ki ngai in a kiteng suak zong om veve hi ee!

I it i ngaih pen te tawh zong kiteng lo thei lai hi. Cing Khup ( Zawl Cing a ci zong om) leh Ngam Bawm tangthu ah itna a thupi na leh itna bek tawh nupa ( kitenna ) ki lam khia thei tuanlo a hih na ki mu kawikawi thei hi. Itna bek zong nupa suahna ding a kicing hi lo zel hi leh kilawm kawikawi hi. Zomi te tangthu sungah lawm kingai a hi Cing Khup leh Ngam Bawm pen a thupi pen a hih hangin nupa nuam pen a a omna uh om kha lo hi. Mi tampi te in zong itna mah thupi sa in itna in na khempeuh zo hi ci'n nu leh pa thu manglo in a zawl tai bang tampi om uh a, tua te a kiteng suak lo tampi mah om veve hi. Tua bang in Love Hero a sem ngam te zong nupa kitenna ah a nuamsa pen suak khin kei ve uh aw, mate..

Lia leh Tang te ki itna leh kingaih khit teh, nu leh pa thukim pihna ( a kisap leh) la in kitenna zong tu hun teh hoih kisa zaw tek hi.A ki -it, a kingai lo pi, kiten ding hamsa kisa tek a hih manin khanglui lai a, nu leh pa ngeina zong pai lo, lia leh tang te lungsim zong la kawm in ki tenna pen tu hun teh a hoih pen khat a hihi. Lia leh Tang lah lungkim ding, nu leh pa lah lungkim ding tua khit teh nupa ( kitenna) bawl ding pen a kua mah peuh a dingin hoih mahmah hi.

A hih leh kitenna dan pen bang bul phuh leng nupa kal a nuam pen ding hiam? Nungak leh Tangval lai te'n thei in teh maw...... Ha!! Ha!!!

Hih ci bangin zong mite'n na gen e leh. Benjamin Fraklin in " Itna om lo kitenna ah, kitenna om lo itna om ding hi (Where there's marriage without love, there will be love without marriage." na ci zel veh ee.


Source: Taken from Zonet