Kitenna ah bang teng kisam?

By - Phuitong Liim

Zomi te pen a khangtoto ihih tawh kiton in nungak leh tangval khut kilen a lamsiau khawm, lampai khawm hialhial bangin leitung sum leh pai leh hauhna te tawh i ngeina zong na ton khawm veve hi mawk hi. Nungak tangval a ki ngai a om ciangin kihel in kingai in, ki it semsem uh a, gual i khen zawh loh, pianna nu leh pa na ngawn in a khenzawh loh bek hilo in sihna na tawm in a khen ngamloh ding zah in a ki it takpi uh ciangin nu leh pa in deihsak hoih pipi nei tazenpi mah leh a kiitna uh mual suah dingin a kiteeng uh hi.

A nu phalloh zahtak zolo in, apa temhiam sikliam ngam in sangkil kan in innsung nusia in a Leel tawh inpua pial ngam a, a it a ngaih kiang a khenuai a sisan luang zuazua tawh a zuan ngam minamte ihi hi.

Tua banga phalloh pen zong a pai khiat ngam ciangin nu leh pa in maisak kik in, "a ki it te lah khen ding hi kei, a kingailo lah gawm ding hi kei" ciin kampau khat na nei uh hi.

Tua banga a kiteng teitei te hi ta leh, nu leh phalna tawh akiteng te hi ta leh, a ki it a kingai masa hi hetlo, nu leh pa in a gawm te uh hita leh kitenna dan khat leh zuih dan khat na nei uh a, tua pen kitenna ah a kisam te ahi hi.

Khanglui hun ah kitenna ah a kisam teng:

1. Tu: Lo kho ahih manun nasepna dingin Tu ki keng sak hi.
2. Hei: Singkhul ding singtawmna Heipi khat ki keng sak hi.
3. Puanbu: Zan ciang a silh ding puanbu khat, nupa in a silh theih ding ki keng sak hi.
(Hih a tunga teng pen numei tavuan hi).
4. Numei man: Numei man pen pasal in pia hi.

Tulai khangthak kitenna ah a kisam (i sak) pawlkhat:

1. Mopuan (The Dresses): Numei hi in pasal hi ta leh kizemna Mikang kizemna dan khat kisam sak pong. (A kisam takpi hiam thei kei ing).

2. Zungbulh (The Rings): Kei a hi ciin a ciamtehna khutme zungbulh khat kisam sak teitei. A pua thama kiciamteh lo pi leh pu te kitenna kipzaw tawh kibang. Zungbulh in kitenna kipsak ahia, a limlahna bek ahia, mikang ngeina i zuih pak ahia.

3. Mo nungzui (Bribesmaids) : Numei hi in pasal hi leh kitenna ah nungzui khat nei in, zum selna danin kinei hi leh kilawm. Tua a lawm pen a kisam takpi mah ahi tam?

4. A mun (The Venues): Kitenna mun ding pen biakinn sung teek mah ahih kisam ahia, innsung khat peuh, mun awng khat peuh hi thei a hia, ahih kei leh khuasung, gamsung mun khat peuh hithei a hia?

5. Kua teng cial ding (The Guest): Kitenna ah pawlpi mi khempeuh a kihel teitei kisam ahia. A kiteng dingte leh a kitengsak ding pa/nu bek kisam lel a hia. Lawm leh gual i kitenna a mu ding, hong theihpih ding, hong uap ding i sapnop a tuam in om a hia. I cial loh, i sap loh te hong pai i deih veve hiam? Mi khat nekzonna nawngkaisak in hong kihel teitei ding zong ka lamet ding ahi diam?

6. Bang thulu (The Theme): Kiten ciangin kikhoppi bangin kitenna thulu neih ding kisam hiam, ahih kei leh thulu neih sese loh a kitenna neih mai ding hiam?

7. Tumging (The Music): Kitenna ah tumging leh lasa khawng neih kisam sese hiam? Kitenna bek neih a, kamciamna zawh ciang zawh suk pah ding ahi hiam? Ahih kei leh kitengsak te in kitengte thuhilhna (sermon) ciltui kaai liang mahin a neih hoih hi hiam?

8. Nitaak ann (Dinner): Kitenna ah annek khawm teitei a kisam hiam? Mipi mopawi uap teng ciah sak phot in tua zawh ciang a inntek deuh teng leh lawm nai deuh teng tawh special a ann nekna neih pen a kilawm mah hiam? Mipi te in annekna nei uh (amau bekin) cih thei veve ding ci leeng, kitenna pawi a uap uh a kisik kha diam.... he he
He he..... a thei lo penpen in a theizaw te kuppih ding lamen in kong at mawk hi e.

Christian i suah ma-in nu leh pa in hong puisak ziau ziau uh a, amau hoih sak bangbang tawh a kigawm ahi hi. Christian suah zawh ciang ci ding i hi hiam, i nuntakna hong kikhek a leitung minam tuamtuam hih dan i muh, i theih, i zak ciang ci ding i hiam - i zat dan hong kikhel a. Zomi te ngeina pen a sia ahih manin a kikhek hi ding hiam, ahih kei leh midang cih dan khat peuh a hoih zaw dinga upna neih man ahi diam? Gualphakna, leh mi batna dan in ngaihsun i hi diam?

Christian suah zawh ciang mikang hih dan zuih teitei ding sa i hi tam?

Khanglui kipui bangin kipui pen biakna palsatna sa i hi tam? Gual bat lohna sa i hi tam? Ahi thei nawnlo mah hiam? Ahi thei veve mah ahi diam? Mopuan ciin mikang kizem (white dress) mah thupi pen sese ahi diam? Zopuan silh in hi leh hi theilo ahi diam?

Christianity kong lam pan hong lut ciang Zomi ngeina phaitam lam ah hawlkhia ding i hi hiam?

Hau Za Cin
Phuitong Liim
Note: Taken from Zonet posting