Editorial, The Lamka Post July 08, 2008
British Kumpi a hatlai in nitum ngeilouhna lalgam ah vaihawm uhi. India leh Burma ah leng vaihawm ua, hiai gam nihte tehtuahkal, ei singtangmite tenna tua North East India i chih ah leng vai ana hawm uhi. Huai hunlai a NE bial a ana teng ei singtangmite i niam mahmahlai ziak un British Kumpi’n ahihtheihtan in humbit honna sawm sam hi. Huailai in NE India bial ah tulai dan in state tuamtuam om naikei mahleh singtangmite tenna bial deuhte bel theihsiamna toh etkol in om hi. Hiai singtangmite tenna bial ah huai hunlai in Sapte chihlouhngal Vaite hi’n Kawlte hitaleh, a lut om naikei mahleh, khophawk nailou, khanglou nailou singtangmite pu-pa ngeina, tawndan leh khosakna bangkim hun hong paizel a mangthang thei ding, nam changkang leh tamzawte’n nawmvalh thei ding chih muhkholhna sautak neih ziak in British Kumpi’n hiai singtangmite bial ah phalna neilou a kuamah a luttheihlouhna ding un dan bawl hi. Bengal Eastern Frontier Regulation 1873 tungtawn in Inner Line Permit (ILP) bawlkhiak in om a, huai dungzui in India khua-le-tui hihna neite nangawn leng hiai dan a kizatna bial ah phalna neilou in lutheilou uhi. British Kumpi’n hiai dan a bawl pen vaihawmna a hong kikheng, India in zalenna a hon muh nung in leng zattouh in om a, Arunachal Pradesh, Mizoram leh Nagaland a hong pian nung tunitan in leng hiai state-te ah zat in om hi.
Singtangmite khualna ziak in Inner Line Permit pen India sorkar in zangtou mahleh ILP in gamdangmi gentaklouh India khua-le-tui hihna neite khualzin-vakvel ding nangawn dal ahihna ah Constitution a Fundamental Rights lak a khat ‘freeom of movement’ kalh hi. Huai ziak mah in North East Plains People’s Traders and Youth Federation in hiai thu court a tut dungzui in Gauhati High Court in hiai dan zat ding Mizoram ah tuma 13-6-2008 in hon kham tadih a, India khua-le-tui hihna nei himhim kuapeuhmah Mizoram in ILP neihlouh ziak a man in thonkhe theilou hi. Hiai dan kibawl tung in NE a singtang gam ah chial thoh nangawn in leng a hithei liai teng kuamah ut ding un gintakhuailou hi. Huai ziak mah in singtangmite bit dan khat in i bit uhi. Himahleh, hun a hong paizel a, ILP a kizatlouhna Tripura state bang i et chiang in, nidanglai in singtangmite vaihawmna gam himahleh tuni chiang in Tripura a singtangmite a gam mah uah ‘minority’ a suak uhi. Huai ziak in, hiai ILP in singtangmite a dia bitna hon tun mah ahihdan theih in om hi. A lehlamtak ah, India in NE a Tourism industry puahhoih sawm in panla mahleh ILP a om sung teng deih bang taktak theilou ding suak hi. Huai ziak in, bitna hon tun kawmkawm a i khantouhna ding uh daltu khat ahihna chiang leng om zel hi.
Midang, mundang toh kikawmtuahna leh kisumdawnna hoihtak omlou in khantouhna taktak pianglou ding a, huai ding in nawmvalh a om khak ding lau kawmkawm a khosak thil hitheilou khat suak hi. ILP ziak in pau-le-ham leh tawndan bit mahleh sumdawnna toh kisai in state piching Arunachal Pradesh, Mizoram leh Nagaland bang nawmvalh a om khinta a hihna chiang uh om hi. ILP in singtangmite a dia bitna hon tutna chiang om mahleh bitna taktak hon tun tuanlou ahihna leh a lehlam a khantouhna ding daltu khat suak ahihna ah, huchi thouthou lakkhiak hivet leh houh singtangmite a kimetzaw diam? Khantouhna dia ‘risk’ la dan a kingai in leh ILP lakkhiak ziak a ‘negative impact’ om ding pen ‘price of development’ dan a ngaithei hileng i pangzou d’uam? Singtangmite gam a zin-le-lengte leh phaizangmite’n innmun-loumun a hong neihtheihkei nak ua leh panzoh in omnalou ding hiam? Nawmvalh a om khak ding lauh ziak a kikulkhum in bangtan mah hon tunlou ding a, den chiang a North Korea mah bat theih ding bang hi.
Source: http://zogam.com/index.php?option=com_content&task=view&id=3596&Itemid=2
British Kumpi a hatlai in nitum ngeilouhna lalgam ah vaihawm uhi. India leh Burma ah leng vaihawm ua, hiai gam nihte tehtuahkal, ei singtangmite tenna tua North East India i chih ah leng vai ana hawm uhi. Huai hunlai a NE bial a ana teng ei singtangmite i niam mahmahlai ziak un British Kumpi’n ahihtheihtan in humbit honna sawm sam hi. Huailai in NE India bial ah tulai dan in state tuamtuam om naikei mahleh singtangmite tenna bial deuhte bel theihsiamna toh etkol in om hi. Hiai singtangmite tenna bial ah huai hunlai in Sapte chihlouhngal Vaite hi’n Kawlte hitaleh, a lut om naikei mahleh, khophawk nailou, khanglou nailou singtangmite pu-pa ngeina, tawndan leh khosakna bangkim hun hong paizel a mangthang thei ding, nam changkang leh tamzawte’n nawmvalh thei ding chih muhkholhna sautak neih ziak in British Kumpi’n hiai singtangmite bial ah phalna neilou a kuamah a luttheihlouhna ding un dan bawl hi. Bengal Eastern Frontier Regulation 1873 tungtawn in Inner Line Permit (ILP) bawlkhiak in om a, huai dungzui in India khua-le-tui hihna neite nangawn leng hiai dan a kizatna bial ah phalna neilou in lutheilou uhi. British Kumpi’n hiai dan a bawl pen vaihawmna a hong kikheng, India in zalenna a hon muh nung in leng zattouh in om a, Arunachal Pradesh, Mizoram leh Nagaland a hong pian nung tunitan in leng hiai state-te ah zat in om hi.
Singtangmite khualna ziak in Inner Line Permit pen India sorkar in zangtou mahleh ILP in gamdangmi gentaklouh India khua-le-tui hihna neite khualzin-vakvel ding nangawn dal ahihna ah Constitution a Fundamental Rights lak a khat ‘freeom of movement’ kalh hi. Huai ziak mah in North East Plains People’s Traders and Youth Federation in hiai thu court a tut dungzui in Gauhati High Court in hiai dan zat ding Mizoram ah tuma 13-6-2008 in hon kham tadih a, India khua-le-tui hihna nei himhim kuapeuhmah Mizoram in ILP neihlouh ziak a man in thonkhe theilou hi. Hiai dan kibawl tung in NE a singtang gam ah chial thoh nangawn in leng a hithei liai teng kuamah ut ding un gintakhuailou hi. Huai ziak mah in singtangmite bit dan khat in i bit uhi. Himahleh, hun a hong paizel a, ILP a kizatlouhna Tripura state bang i et chiang in, nidanglai in singtangmite vaihawmna gam himahleh tuni chiang in Tripura a singtangmite a gam mah uah ‘minority’ a suak uhi. Huai ziak in, hiai ILP in singtangmite a dia bitna hon tun mah ahihdan theih in om hi. A lehlamtak ah, India in NE a Tourism industry puahhoih sawm in panla mahleh ILP a om sung teng deih bang taktak theilou ding suak hi. Huai ziak in, bitna hon tun kawmkawm a i khantouhna ding uh daltu khat ahihna chiang leng om zel hi.
Midang, mundang toh kikawmtuahna leh kisumdawnna hoihtak omlou in khantouhna taktak pianglou ding a, huai ding in nawmvalh a om khak ding lau kawmkawm a khosak thil hitheilou khat suak hi. ILP ziak in pau-le-ham leh tawndan bit mahleh sumdawnna toh kisai in state piching Arunachal Pradesh, Mizoram leh Nagaland bang nawmvalh a om khinta a hihna chiang uh om hi. ILP in singtangmite a dia bitna hon tutna chiang om mahleh bitna taktak hon tun tuanlou ahihna leh a lehlam a khantouhna ding daltu khat suak ahihna ah, huchi thouthou lakkhiak hivet leh houh singtangmite a kimetzaw diam? Khantouhna dia ‘risk’ la dan a kingai in leh ILP lakkhiak ziak a ‘negative impact’ om ding pen ‘price of development’ dan a ngaithei hileng i pangzou d’uam? Singtangmite gam a zin-le-lengte leh phaizangmite’n innmun-loumun a hong neihtheihkei nak ua leh panzoh in omnalou ding hiam? Nawmvalh a om khak ding lauh ziak a kikulkhum in bangtan mah hon tunlou ding a, den chiang a North Korea mah bat theih ding bang hi.
Source: http://zogam.com/index.php?option=com_content&task=view&id=3596&Itemid=2
No comments:
Post a Comment