J. M. Ngul Khan Pau
December 21-23, 2007 sung Lamka khua kong pha a, lungsimah ngaihsutna hong suakte tawm khat kikum leng ci-in hih lai kong gelh hi
1. Piangthakte tenna khua: Lamka khuapi zah a pianthak thu kigenna leh pianthak nadingin camp kibawlna khuapi dang om dingin ka um kei hi. Piangthak sate ciamtehna (statistical record) om hi leh piangthak tamna pen khuapi hi dingin zong ka um hi.
Tua bang khuapi hi napi-in bang hangin piangthakte' tenna tawh kibang thei lo hiam? Bang zah vei I pianthak ciangin “piangthak” taktak I hi ding hiam? Sawltak Paul in “Lungdamna Thu (gospel) in Pasian vangliatna hi”(Rom 1:16) a cih lai-in bang hangin ei gama piangthakte'n tua vangliatna nei lo I hi hiam? Nungzui suahna (Discipleship) tawh kisai awlmawhna om loin tuni dong pianthak camp bek mah I buaipih uh hi. Tuni dongin I piangthak toto uh a, hi leh zong I gam sungin “piangthak mite tenna gim” nam lo hi.
Ka lungngaih kikkik ciangin I gam sungah thu kigen tam penpen “vangam tun theih” nading bek hi a, hih leitungah I ten dingzia sangin vantung I tun ciangin a nop ding dan cih lam bekbek kigen hi-in ka thei hi. “Pialgaal theology” pen I lasakte leh pulpit tung pan a I gen tam pen hi dingin ka um hi. Tua hangin tuhun a I tenna khua leh tui “bawlphat” ding I thupi sim kei uh hi. I tenna ding van khuapi ahih manin hih leitung nate I nutsiatpah ding hi cih lungsim tawh kinungta hi leh kilawm kasa hi. Singkung lopa suan ding leh puah dingin I ngaihsun kei uh hi. Pasian in a bawlsa nate en a, “Hoih hi” ci hi. Tua nate a kem dingin Ama tatsa mite I hi uh hi. “Na gam hong tung hen,” ci a thungetna I neih ciangin “Pasian Gam” hih leitungah tuni I zat theih pah nading ngetna hi a, nung cianga I tenna ding vangam thu hi lo hi.
Mi khat in Khris sungah nuntakna ka nei a cih leh ama nuntakna in tua bang “gah” hong nei ding hi. Bang hang hiam cih leh a kam tawh a gen bek hi loin ama nuntakna mahmah in a lah khiat ding hi. Topa Jesu in, “Amau gah panin na thei ding uh hi. Thang lingkung panin mite in lenggah a lo ngei uh hiam? Lingkung panin theigah a lo ngei uh hiam? Tua mah bangin singkung hoih in a gah hoih a gah hi, singkung hoih loin a gah hoih lo a gah hi,” na ci hi. (Mat 7:16-17). Lamka gam sung I gahte ka et ciangin gah limci leh nektak bang zah I om tam maw? Na kam tawh na kitat khiat gige hangin na gah in gah pha a gah kei leh, na nuntakna kikhel lo hi cihna hi. Rev. Prim Vaiphei in, “Meiteite cik ciangin a piangthak taktak a hi diam,” a cih bangin “Lamka khua Zomite' piangthak I kicih ciangin bang I genna hiam?”
2. Leivui Khuapi: “Leivui panin hong domto a sangna lam ka tung tung to” cih la I sak hangin I khuasung lampite leivui tawh a kidim ciangin nuam I sa tuan kei uh hi. Rev. S. Vungminthang in Korea panin email hong khaknaah, “Korea-ah kha guk val ka om ta a, tuni dongin ka khedap khat vei zong nawt siang kul nai lo hi,” hong ci hi. Pangzawl khua panin Lamka dong kong pai ciangin khedap vom leh kang kithei lo zah dongin I khe puang khin hi. Lampi gei a vanzuakte ka et ciangin a lei dingte leh a zuakte'n a mai uh puan tawh kikhuh ciat uh hi. Bang hang hiam cih leh leivui kikham lua hi. Sun hun in zong maituam kul a, lampi a pai mite'n mainul (handkerchief) tawh a mai mah uh hum ciat uh hi. Maituamna gam a hong khang khia Zomite adingin maituam kul nawn lohna gam bang zah tak in ngaihhuai ding hiam ci-in ka lungngai hi. Tua hangin Lamka Tung EBC pastor H. Kamzachin kiangah, “ I lampite ka et ciangin piangthakte tenna gam hi dingin ka um kei hi,” ka ci hi. Ka lunghimawh manin bang hangin lampi bawl zo vet loin kinusia hiam ka cih leh, “Arkatara bei khin,” ci uh hi. Hong tung nai lo ahih leh hong tun peuhpeuh ciangin I lampite hong kibawl dinga, state dangte bangin I lampite hong hoih ta ding hi.
3. Gam khangto ciamtehna: Gam khangtote-ah gamsung mipite zat theih dingin lampi, tui leh mei (electric) hoih hi. India kumpi in zong lampi, tui leh mei adingin sum hong pia lo hi dingin ka um kei hi. December kha bul lamin Mizogamah ka hawh a, khua neu leh singtang khua neuah zong mei vak zihziah uh hi. Mei pai loh hun a om ding leh kumpi in newspaper tung tawnin a gam sung mipite hilh kholh uh hi. Lamka gamah mei tawh nasepna (electrical works) nei ding hi leng bang mah sep theih loh ding cihna hi. Mobile phone nangawn zong charging nadingin inverter kizang tang hial hi.
John Naisbitt in, “Gam khangto kitheihna baih lam penpen ahih leh a gam mite'n amau innah ann ne loin annsai-ah (hotel) ann hong nek uh ahi hi,” ci hi. China gam khangto hi cih kitheihna ahih leh amau innah ann ne loin sun leh nitak annsai-ah ann ne uh hi. America ka tun tungin lawmte'n ann hong nekpih ciangin amau innah hong nekpih ding kasak leh annsai-ah hong paipih uh hi. Annsai a kipaipih pen a baih pen khat na hi gige hi. Mikangte'n amau innah hong samin ann hong nekpih uh leh hong it mahmah cih a lahna uh na hi hi. Zomite zong I pianni leh kitenni bek hi loin innkuanin annsai-ah ann I nek khiat theih ciangin a khangto minam I hi ding hi.
Singapore gam I tun ciangin khuapi sung taxi hawlte (drivers) tawh kiho masak masa penpen in om hi. Amau gamah taxi hawlte diplomat ci-in na min vawh uh hi. Ahangin Singapore gam taangin gamdang mite a na muak masa gigete ahi uh hi. Tua hangin Sinngapore a taxi hawlte mi pen mi hopih siam (gentleman) in thudik mahmah uh hi. India gam bangin hong khem dingte hi peuh mah loin amau gam taangin nasem in kingaihsun uh hi. Tua hangin leitung bup in Singapore gam hawh ding lauhna kinei lo hi. Gam khangto dingte gamtatna lim khat ahi hi.
Seoul International airportah zunbuk leh eekbukte, I zat khit peuh ciangin gim namtui tawh a nulsiang ding om a, zun thakna leh dailenbuk siang sitset, I meel kimu thei zah dongin siang hi. I gam sungah zunn leh ek tawh kisai I lunghimawh kei uh hi. Americate'n zun restroom (tawlngakna inn) ci se uh hi. Tua mah bangin ek tha dingte tawlnga takpi uh a, laisim kawm cih bangin tawldam takin zang thei uh hi. Zomite adingin zun leh ekbukte I tawlngakna hi peuh mah lo hi. Khatvei Boston khuapi a lawmte inn khat ka giahna-ah ama zat gige a ekbuk hong zang sak hi. Laibu sim ding kiciangin a dawldawl in koih hi. Amau kinawh cih bang om se loin tawldam takin hih munah laisim hithiat uh hi. Ei zong I khantoh ciangin tua bang I hi ding uh hi.
1993 in Khristmas zang dingin Portland panin Los Angeles-ah ka lawmte khat car tawh ka hawh hi. Santa Barbara khuapi phakma Pacific tuipi gei-ah sunlang phial kitai a, a lampi siang bek tham loin kitat cih bang om het lo hi. Sun ann pen a car sung mahah kine a, ahi zongin laithem leh nin lampi-ah paih ding phal hi lo hi. A paai a om leh $ 500 liau ding ci-in kigelh hi. Tua hangin a lampi uh siang kilkel in zat nuam mahmah hi. Singapore-ah zong chewing gum nangawn a paih nading munah na paih kei leh liau ding cihna hi. Tua bangin a gam sung uh siangtho in cidamna hoih nei uh hi. En zong nin bungah nin I paih ciat ciangin leh I lampite nin khawlna I zat nawt loh ciangin a khangto minamte lim la I hi ding hi.
American Baptist-te World Mission Conference kibawlna phualpi Green Lake, Wisconsin-ah li-vei ka hawh khin zo hi. Tua munah sing golpipi om a; sakhi leh sazuk a honin om hi. Zingtung leh nitak ciangin amau omna gam sung pan hong paikhia in inn kiim a lopate hong ne uh hi. Kuaman suang tawh deng lo, a lauhna dingun awng lo uh ahih manin zual mahmah uh hi. Saben hun sung bekin ben theih a, sabeng nuamte'n phalna lai lak kul masa hi. Tua lai a lak uh ciangin sa bang cia a lian kap ding phal leh phal loh cian takin kigelh hi. Tua mah bangin a bengte'n zong kap ding a phal a liatna en kawmin kap bek uh hi. Tham loin a lauh loh nading uh khualna in thau tawh kap phal loin thal bek zat ding thu kipia hi. Zomite'n vasa I muh ciangin suang tawh I deng uh a, zawng hon I muh ciangin hong lauh bawl kei leh peuh heh bawlin suang mah I tawm uh hi. Bang hanga gamsa tawh hi bangin kingai thei lo I hi tam cih ka ngaihsut ciangin, I kitot I kithah hun sawt nai lo ahi ding hi ka ci hi.
Zomite'n gamsa it ding bek hi loin, a bei khit ding (extinct) I lung himawh kisam mahmah hi. Ahangin I paunakte I et ciangin gamsa leh innsa tawh gentehna na tam mahmah hi. Gamsate I don I kep kei leh hong bei takpi ding a, a sawt loin I paunakte in a khiatna hong nei nawn lo ding hi. Khuapi sunga piang leh hong khangto naupangte'n gamsa a taktakin a muh nop uh ciangin sahuan (Zoo) ah pai cih loh buang mu nawn lo uh hi. “Sakhi a pi san a no san” cih leh “Siansinna leh vakiang bu” cih bang I zat nading thei nawn lo khangthak hong piang khin zo hi.
Union Biblical Seminary, Pune-ah ka kah laiin; Siksakol (Cycle) kisaap (hire) thei hi. Tua siksakol neite'n I min gelh se loin seminary 1, seminary 2, ci-in na ciamteh uh hi. Kuaman khem lo ahih manun amau zong mi muang mahmah lel uh hi. Lamka khuapi-ah siksakol tua bangin min gelh loin saap theih ding hi leh bang zah I ngah kik tam? Khristian gam I hih ciangin a kimin ngah kik ni cihna ding om lo hi. Tunai in innkuanpihte ka phone leh gingging ahih hangin phone la lo uh hi. Amau tawh ka kimuh ciangin ka dot leh telephone gui kigu khin a, tuni dongin phone gui kikhung nai lo hong ci uh hi. Hindu gamah mite hoihzaw, muan huaizaw ahih leh I Khristian hihna bang phatuam ahi tam ka ci hi.
4. Nuntakna Pasian aa hi: Mihing nuntakna pen eima ut tawh lak theih bangin kingaihsun thei hi. Ahizongin I Lai Siangtho I et ciangin nuntakna Pasian aa ahih lam phawk huai hi. Leitungah I neih manpha penpen ahih leh I nuntakna hi. Bang zah in hau leng zong I nuntakna a bei ciangin hauhna in phattuamna nei nawn lo hi. Mipilte'n nuntakna sausak nadingin zatui tuamtuam bawl uh a, nuntakna kep nadingin siamna tuamtuam na sin uh hi. Doctor leh nurse-te nasep I et ciangin nuntakna bang cih a kep ding, cidamna bang ci piak ding cih ahi hi. Mite'n hih zah a nuntakna a thupi bawl lai-in en bang mah a I sim khak loh ding lauhhuai hi.
Khristian biakna-ah a thupi pen ahih leh Jesu in I nuntak theih nadingin Ama nuntakna hong pia hi. Tua hangin I nuntakna pen Pasian Tapa sisan tawh kilei cihna hi. Pasian in hong it mahmah manin a Tapa hong pia cih I thei hi. Pasian it mahmah mi khat nuntakna laksak ding cih pen Pasian vai tawh kituak lo hi. Brian McLaren in a laibu gelh Everything must Change –ah “Leitung Galpi Nihna hunin Juda mite'n German gamah thahna mulkimhuai mahmah a thuak lai-un; Khristiante'n tua bang gamtatna na langpan loin na panpihzaw uh hi,” cih gelh hi. Tua bang lawmlawmin Khristiante' mit mial ken teh na cih khak leh tuni mahmah a I gamsungah kithahna omte kuaman I gen ngam kei uh hi. Ahih leh Khristian gamah hi bang hiamgamna om ding hiam? Rabindra Nath Tagore in Where the Mind is without Fear cih a gelh laiin Bristishte' nenniamna hangin a gelh hi. Tuni I inn munah gaalmuang loin gen ngam loh I nei uh hiam?
I mipilte masa leh hau masate'n Lamka gam mahah inn leh lo hong neih ngam nawt loh hun hong tun ding lauhhuai hi. Khrismas hun leh Kum Thak hun a inn ciah ngam nawn lo hong om ding dahhuai mahmah ding hi. Tua ahih manin Lamka ka vangkhua aw, hong zuangtho in.
[www.zogam.com]
December 21-23, 2007 sung Lamka khua kong pha a, lungsimah ngaihsutna hong suakte tawm khat kikum leng ci-in hih lai kong gelh hi
1. Piangthakte tenna khua: Lamka khuapi zah a pianthak thu kigenna leh pianthak nadingin camp kibawlna khuapi dang om dingin ka um kei hi. Piangthak sate ciamtehna (statistical record) om hi leh piangthak tamna pen khuapi hi dingin zong ka um hi.
Tua bang khuapi hi napi-in bang hangin piangthakte' tenna tawh kibang thei lo hiam? Bang zah vei I pianthak ciangin “piangthak” taktak I hi ding hiam? Sawltak Paul in “Lungdamna Thu (gospel) in Pasian vangliatna hi”(Rom 1:16) a cih lai-in bang hangin ei gama piangthakte'n tua vangliatna nei lo I hi hiam? Nungzui suahna (Discipleship) tawh kisai awlmawhna om loin tuni dong pianthak camp bek mah I buaipih uh hi. Tuni dongin I piangthak toto uh a, hi leh zong I gam sungin “piangthak mite tenna gim” nam lo hi.
Ka lungngaih kikkik ciangin I gam sungah thu kigen tam penpen “vangam tun theih” nading bek hi a, hih leitungah I ten dingzia sangin vantung I tun ciangin a nop ding dan cih lam bekbek kigen hi-in ka thei hi. “Pialgaal theology” pen I lasakte leh pulpit tung pan a I gen tam pen hi dingin ka um hi. Tua hangin tuhun a I tenna khua leh tui “bawlphat” ding I thupi sim kei uh hi. I tenna ding van khuapi ahih manin hih leitung nate I nutsiatpah ding hi cih lungsim tawh kinungta hi leh kilawm kasa hi. Singkung lopa suan ding leh puah dingin I ngaihsun kei uh hi. Pasian in a bawlsa nate en a, “Hoih hi” ci hi. Tua nate a kem dingin Ama tatsa mite I hi uh hi. “Na gam hong tung hen,” ci a thungetna I neih ciangin “Pasian Gam” hih leitungah tuni I zat theih pah nading ngetna hi a, nung cianga I tenna ding vangam thu hi lo hi.
Mi khat in Khris sungah nuntakna ka nei a cih leh ama nuntakna in tua bang “gah” hong nei ding hi. Bang hang hiam cih leh a kam tawh a gen bek hi loin ama nuntakna mahmah in a lah khiat ding hi. Topa Jesu in, “Amau gah panin na thei ding uh hi. Thang lingkung panin mite in lenggah a lo ngei uh hiam? Lingkung panin theigah a lo ngei uh hiam? Tua mah bangin singkung hoih in a gah hoih a gah hi, singkung hoih loin a gah hoih lo a gah hi,” na ci hi. (Mat 7:16-17). Lamka gam sung I gahte ka et ciangin gah limci leh nektak bang zah I om tam maw? Na kam tawh na kitat khiat gige hangin na gah in gah pha a gah kei leh, na nuntakna kikhel lo hi cihna hi. Rev. Prim Vaiphei in, “Meiteite cik ciangin a piangthak taktak a hi diam,” a cih bangin “Lamka khua Zomite' piangthak I kicih ciangin bang I genna hiam?”
2. Leivui Khuapi: “Leivui panin hong domto a sangna lam ka tung tung to” cih la I sak hangin I khuasung lampite leivui tawh a kidim ciangin nuam I sa tuan kei uh hi. Rev. S. Vungminthang in Korea panin email hong khaknaah, “Korea-ah kha guk val ka om ta a, tuni dongin ka khedap khat vei zong nawt siang kul nai lo hi,” hong ci hi. Pangzawl khua panin Lamka dong kong pai ciangin khedap vom leh kang kithei lo zah dongin I khe puang khin hi. Lampi gei a vanzuakte ka et ciangin a lei dingte leh a zuakte'n a mai uh puan tawh kikhuh ciat uh hi. Bang hang hiam cih leh leivui kikham lua hi. Sun hun in zong maituam kul a, lampi a pai mite'n mainul (handkerchief) tawh a mai mah uh hum ciat uh hi. Maituamna gam a hong khang khia Zomite adingin maituam kul nawn lohna gam bang zah tak in ngaihhuai ding hiam ci-in ka lungngai hi. Tua hangin Lamka Tung EBC pastor H. Kamzachin kiangah, “ I lampite ka et ciangin piangthakte tenna gam hi dingin ka um kei hi,” ka ci hi. Ka lunghimawh manin bang hangin lampi bawl zo vet loin kinusia hiam ka cih leh, “Arkatara bei khin,” ci uh hi. Hong tung nai lo ahih leh hong tun peuhpeuh ciangin I lampite hong kibawl dinga, state dangte bangin I lampite hong hoih ta ding hi.
3. Gam khangto ciamtehna: Gam khangtote-ah gamsung mipite zat theih dingin lampi, tui leh mei (electric) hoih hi. India kumpi in zong lampi, tui leh mei adingin sum hong pia lo hi dingin ka um kei hi. December kha bul lamin Mizogamah ka hawh a, khua neu leh singtang khua neuah zong mei vak zihziah uh hi. Mei pai loh hun a om ding leh kumpi in newspaper tung tawnin a gam sung mipite hilh kholh uh hi. Lamka gamah mei tawh nasepna (electrical works) nei ding hi leng bang mah sep theih loh ding cihna hi. Mobile phone nangawn zong charging nadingin inverter kizang tang hial hi.
John Naisbitt in, “Gam khangto kitheihna baih lam penpen ahih leh a gam mite'n amau innah ann ne loin annsai-ah (hotel) ann hong nek uh ahi hi,” ci hi. China gam khangto hi cih kitheihna ahih leh amau innah ann ne loin sun leh nitak annsai-ah ann ne uh hi. America ka tun tungin lawmte'n ann hong nekpih ciangin amau innah hong nekpih ding kasak leh annsai-ah hong paipih uh hi. Annsai a kipaipih pen a baih pen khat na hi gige hi. Mikangte'n amau innah hong samin ann hong nekpih uh leh hong it mahmah cih a lahna uh na hi hi. Zomite zong I pianni leh kitenni bek hi loin innkuanin annsai-ah ann I nek khiat theih ciangin a khangto minam I hi ding hi.
Singapore gam I tun ciangin khuapi sung taxi hawlte (drivers) tawh kiho masak masa penpen in om hi. Amau gamah taxi hawlte diplomat ci-in na min vawh uh hi. Ahangin Singapore gam taangin gamdang mite a na muak masa gigete ahi uh hi. Tua hangin Sinngapore a taxi hawlte mi pen mi hopih siam (gentleman) in thudik mahmah uh hi. India gam bangin hong khem dingte hi peuh mah loin amau gam taangin nasem in kingaihsun uh hi. Tua hangin leitung bup in Singapore gam hawh ding lauhna kinei lo hi. Gam khangto dingte gamtatna lim khat ahi hi.
Seoul International airportah zunbuk leh eekbukte, I zat khit peuh ciangin gim namtui tawh a nulsiang ding om a, zun thakna leh dailenbuk siang sitset, I meel kimu thei zah dongin siang hi. I gam sungah zunn leh ek tawh kisai I lunghimawh kei uh hi. Americate'n zun restroom (tawlngakna inn) ci se uh hi. Tua mah bangin ek tha dingte tawlnga takpi uh a, laisim kawm cih bangin tawldam takin zang thei uh hi. Zomite adingin zun leh ekbukte I tawlngakna hi peuh mah lo hi. Khatvei Boston khuapi a lawmte inn khat ka giahna-ah ama zat gige a ekbuk hong zang sak hi. Laibu sim ding kiciangin a dawldawl in koih hi. Amau kinawh cih bang om se loin tawldam takin hih munah laisim hithiat uh hi. Ei zong I khantoh ciangin tua bang I hi ding uh hi.
1993 in Khristmas zang dingin Portland panin Los Angeles-ah ka lawmte khat car tawh ka hawh hi. Santa Barbara khuapi phakma Pacific tuipi gei-ah sunlang phial kitai a, a lampi siang bek tham loin kitat cih bang om het lo hi. Sun ann pen a car sung mahah kine a, ahi zongin laithem leh nin lampi-ah paih ding phal hi lo hi. A paai a om leh $ 500 liau ding ci-in kigelh hi. Tua hangin a lampi uh siang kilkel in zat nuam mahmah hi. Singapore-ah zong chewing gum nangawn a paih nading munah na paih kei leh liau ding cihna hi. Tua bangin a gam sung uh siangtho in cidamna hoih nei uh hi. En zong nin bungah nin I paih ciat ciangin leh I lampite nin khawlna I zat nawt loh ciangin a khangto minamte lim la I hi ding hi.
American Baptist-te World Mission Conference kibawlna phualpi Green Lake, Wisconsin-ah li-vei ka hawh khin zo hi. Tua munah sing golpipi om a; sakhi leh sazuk a honin om hi. Zingtung leh nitak ciangin amau omna gam sung pan hong paikhia in inn kiim a lopate hong ne uh hi. Kuaman suang tawh deng lo, a lauhna dingun awng lo uh ahih manin zual mahmah uh hi. Saben hun sung bekin ben theih a, sabeng nuamte'n phalna lai lak kul masa hi. Tua lai a lak uh ciangin sa bang cia a lian kap ding phal leh phal loh cian takin kigelh hi. Tua mah bangin a bengte'n zong kap ding a phal a liatna en kawmin kap bek uh hi. Tham loin a lauh loh nading uh khualna in thau tawh kap phal loin thal bek zat ding thu kipia hi. Zomite'n vasa I muh ciangin suang tawh I deng uh a, zawng hon I muh ciangin hong lauh bawl kei leh peuh heh bawlin suang mah I tawm uh hi. Bang hanga gamsa tawh hi bangin kingai thei lo I hi tam cih ka ngaihsut ciangin, I kitot I kithah hun sawt nai lo ahi ding hi ka ci hi.
Zomite'n gamsa it ding bek hi loin, a bei khit ding (extinct) I lung himawh kisam mahmah hi. Ahangin I paunakte I et ciangin gamsa leh innsa tawh gentehna na tam mahmah hi. Gamsate I don I kep kei leh hong bei takpi ding a, a sawt loin I paunakte in a khiatna hong nei nawn lo ding hi. Khuapi sunga piang leh hong khangto naupangte'n gamsa a taktakin a muh nop uh ciangin sahuan (Zoo) ah pai cih loh buang mu nawn lo uh hi. “Sakhi a pi san a no san” cih leh “Siansinna leh vakiang bu” cih bang I zat nading thei nawn lo khangthak hong piang khin zo hi.
Union Biblical Seminary, Pune-ah ka kah laiin; Siksakol (Cycle) kisaap (hire) thei hi. Tua siksakol neite'n I min gelh se loin seminary 1, seminary 2, ci-in na ciamteh uh hi. Kuaman khem lo ahih manun amau zong mi muang mahmah lel uh hi. Lamka khuapi-ah siksakol tua bangin min gelh loin saap theih ding hi leh bang zah I ngah kik tam? Khristian gam I hih ciangin a kimin ngah kik ni cihna ding om lo hi. Tunai in innkuanpihte ka phone leh gingging ahih hangin phone la lo uh hi. Amau tawh ka kimuh ciangin ka dot leh telephone gui kigu khin a, tuni dongin phone gui kikhung nai lo hong ci uh hi. Hindu gamah mite hoihzaw, muan huaizaw ahih leh I Khristian hihna bang phatuam ahi tam ka ci hi.
4. Nuntakna Pasian aa hi: Mihing nuntakna pen eima ut tawh lak theih bangin kingaihsun thei hi. Ahizongin I Lai Siangtho I et ciangin nuntakna Pasian aa ahih lam phawk huai hi. Leitungah I neih manpha penpen ahih leh I nuntakna hi. Bang zah in hau leng zong I nuntakna a bei ciangin hauhna in phattuamna nei nawn lo hi. Mipilte'n nuntakna sausak nadingin zatui tuamtuam bawl uh a, nuntakna kep nadingin siamna tuamtuam na sin uh hi. Doctor leh nurse-te nasep I et ciangin nuntakna bang cih a kep ding, cidamna bang ci piak ding cih ahi hi. Mite'n hih zah a nuntakna a thupi bawl lai-in en bang mah a I sim khak loh ding lauhhuai hi.
Khristian biakna-ah a thupi pen ahih leh Jesu in I nuntak theih nadingin Ama nuntakna hong pia hi. Tua hangin I nuntakna pen Pasian Tapa sisan tawh kilei cihna hi. Pasian in hong it mahmah manin a Tapa hong pia cih I thei hi. Pasian it mahmah mi khat nuntakna laksak ding cih pen Pasian vai tawh kituak lo hi. Brian McLaren in a laibu gelh Everything must Change –ah “Leitung Galpi Nihna hunin Juda mite'n German gamah thahna mulkimhuai mahmah a thuak lai-un; Khristiante'n tua bang gamtatna na langpan loin na panpihzaw uh hi,” cih gelh hi. Tua bang lawmlawmin Khristiante' mit mial ken teh na cih khak leh tuni mahmah a I gamsungah kithahna omte kuaman I gen ngam kei uh hi. Ahih leh Khristian gamah hi bang hiamgamna om ding hiam? Rabindra Nath Tagore in Where the Mind is without Fear cih a gelh laiin Bristishte' nenniamna hangin a gelh hi. Tuni I inn munah gaalmuang loin gen ngam loh I nei uh hiam?
I mipilte masa leh hau masate'n Lamka gam mahah inn leh lo hong neih ngam nawt loh hun hong tun ding lauhhuai hi. Khrismas hun leh Kum Thak hun a inn ciah ngam nawn lo hong om ding dahhuai mahmah ding hi. Tua ahih manin Lamka ka vangkhua aw, hong zuangtho in.
[www.zogam.com]
No comments:
Post a Comment