By L.Keivom
Senvona Arthatzawl
October 13, 2007 Inrinni. Inhma taka thoa Vunga le David Buhril hai Arthatzawl an ti hmun sirpui ding ka ti kha kan tho inhnuk bakah ruo a sur hmer hmer lei le khaw hrang hranga inthoka hung inleng kan hau bok leiin kan thrul a. Hi Arthatzawl hi kum 1986 kum bul tieng khan Parbunga inthoka inlàna Senvona ka fe trumin ka sir a, ‘Arthatzawl Pawlitiks le Mission Buoina’ ti lekha sei deu ka ziek nghe nghe a. Hi hmun poimawna san hi mi tam lemin ei hriet naw ka ring leiin a tawi thei ang takin hang hril ei tih.
Arthatzawl hi tien lai khawser an thaw changin ran takngiel khom inhrâm an phal naw hlak leiin hi hmuna hin an arhai an thak khawm hlak a, chu leia ‘Arthakzawl’ ti hming hung put tah nia hril an um a. Hril dan danga chun, âr thata an inthawina hlak bawlhmun a ni leia Arthatzawl an ti nia hril pawl an um bok. Kum 1914-a Watkin Roberts mission phun enkol dinga hung R. Dala chun hi lai hmuna hin in a bawl a, Arthatzawl hi a in huon a nih. Kum 1920-a Tinsuong khuoa Mission hmunpui an son hnungin Arthatzawl hi rausanin a um a, kum ruk sung chu a hming hril rikin a um ta nawh.
January 11, 1921-a R.Dala a thi hnungin a hmun chu H.K.Dohnunin a hung hluo a, mission hmunpui khom Tinsuonga inthokin Lakhipur (Hmarkhawlien) tieng an son a. Kum 1926 khan H.K.Dohnun, Field Secretary inrawina hnuoiah Senvon-a hin Presbytery a um a. Chu taka inthok chun Arthatzawl hi a hung inlang nawk tah a nih. Hi inkhawmpuia hin Manipura Field Superintendent dingin Mizorama inthoka hung mi pathum Rohmingliana, Lalnghinglova le Vanchhunga hai laia pakhat an dit tak thlang dingin palaihai chu Dohnunin a hril a, sienkhom tu khom an thlang nawh. Hi trum hin a mission phuntu Watkin Roberts le a kaiza vengtu H.K.Dohnun suot thlak tuma phierrukna nasa tak a um a, chu chu a nih Arthatzawl pawlitiks tia ei hril hi.
Hieng hun laia thoktu lien po hi Mizorama inthoka hung vong an nih. Sienkhom, Watkin Roberts mi ring le a ruol thra Dohnunin Field Secretary a chela inthokin Hmarhaiin thuneina iengkim an chalai bika ngaina a um leiin anni pahni suot thlak dan lampui dap pawl an um nia hriet a ni a. Chuonghai laia a hnunga chieng êm êma hma latu laia pakhat chu Tripuraa inthoka hung Lianhawla, R. Dala thi hnunga a nuhmei hung neitu kha a nih. Chuonghai huoihot chun zanah a rûkin Hmar mi ni lo hnam dang po Arthatzawla hin an inkhawm a, chu thu chu a hnung daiin a pût suok chauh a nih. A kum nawkin hi hmun, eini ta dinga ‘Akeldama’ hi khawhrawngin a sawi chim vong a nih. Threnkhat chun Pathienin an thu phierruk a awi naw leia sawi chim niin an ngaibel nuom hiel. Hieng laia thu phiertuhai le a hnunga NEIGM American Council-a General Secretary H.H.Coleman chu inthuruolin kum 1929/30 khan Watkin Roberts chu an hung suot thlak tah hrim a nih. Arthatzawl pawlitiks tirdakum tak hin kansar angin voisun chen hin ei hnam le kohran a la fak siet char char a nih. Coleman chu a thi ta a, a dam lai ngeiin a Mission inchu thlakpek NEIG Mission khom vui liemin a um a, sienkhom thla a la maksan rawn khop el. Chuong mihai chun Centenary hung tlung ding chen khom hi a ni taka thaw neka Arthatzawl pawlitiks zaizira a ni naw lem inser an la tum ngar ngar a hoi. Suol hin taluo a nei nawh.
Hlapawl inruolsiekna
Zing dar sawmah inkhawmpui ni hmasa tak chu kan tran a. Airuochingin za a ngai meta chu tawp zai rêl loin a la phingphi seng seng a. A hun takah hall kan lut chun indên taka ip sawi muk angin hall chu an lo sip vong ta a, tuolah a keng lo tam tak an ngir bok a. Khaw hnai deua inthoka kea zîng hunghai khom chatlak loin an hung tlung zing bok a. Hun insersuon thum kan nei a. Khawm Khatna (Session One) chu hlapawl inruolsiekna a na, Khawm Hnina (Session Two) chu Baibul (Delhi Version) inhlanna le tlangzarna a na, Khawm Thumna (Session Three) chu an mi fielna le ka hungna san tak Seminar a nih.
Khawm Khatnaa an inruolsiekna chu ‘Lal Isu hming inpâk ei tiu’ ti hla, ei Kristien Hlabua a thluk thumnaa sak ding a nih. Khuo 11-a inthokin hlapawl an hung a, an khuo lien le chin dan inang naw ang bokin an tlawm le tam dan khom an thlâu hle. Hi hla hi iemani kong zawnga ka hla hnâm deu hlak a ni a. Ka hnàmna san khom a chang thumnaah “Lalpa hnam thlang Israelhai….A lungsietnan a sandam cheu” a ti bik laia a chang linaa “Nangni Jentel, misuolhaiin, tuorna theinghil naw ro” a ti nawk bik, a pakhat a sandam tawl leia ropuina inkhumtir dinga a ti laia a Jentelhai chu misuol an ni leia ropuina inkhumtir dinga a ti hi ka ngai thei naw zawng tak a na, a phuoktu hi hmu inla chu a lu ben thlong top ka nuom hlak a nih. Hi hlaa Pathien kuoma chawimawina le ropuina inkhumtir ding a ni thu a hril hi a thrat lai zingin, a hla phuok dan hi chu a ni naw deuh chu a nih. Amiruokchu, a Saptronga mi ka hmu hnung chun, chang thumna tlar khatna le hnina “Lalpa hnam thlang Israelhai, Nangni a chin a lien” tia an inlet hi “ Ye chosen seed of Israel’s race, A remnant weak and small” ti a lo ni dai bakah chang lina tlar khat le tlar hninaa “Nangni Jentel, misuolhaiin, tuorna theinghil naw ro” ti hi “Ye, Gentile sinners, ne’er forget The wormwood and the gall” ti a lo ni nawk leiin ngaidam theiah ka ngai hram chauh a nih. Fimkhur taka hla phuok dan chu a ni naw hrim hrim.
An hang saka leh, eini thluka siem hla an sak phaa rawl puok konga suok kha, inruolsiekna a ni leia an intìm am a ni ding, an rawl suok ding a chenve lai hiel an îp hmang leiin a puok ding angin a puok zo ta nawh. Chun, hi hla thluk siemtu hin thuok lakna ding hun um mang loin a silar inzom zut a. Chu chu Leisen hlapawlhai lem chun bau kak rakna ding a um naw khah dittawk lo ni awm hrimin bau inchip deuthawin an hang silar a, thuok a ip leiin an hmel a sen trawn trawn el a nih. Dannaranin ‘f’ le ‘t’ ri ei lam thiem naw vong. Chun, an sak muong taluo vong a, inhmaw deu metin sakhai sien chu an sawl a nêp deuh bakah a ri khom thoin puok thra lem ngei a tih. A tawpah Parbung hlapawlin pakhatna an lak a, lawmman cheng singkhat an dong bok.
Baibul tlangzarna
Hmarram Kristien Thralaipawl Inkhawmpui buotsaituhaiin Seminar thruoitu dinga an mi fielna ka hmu hlima ka fe thei le thei naw ding iengkhom ka la ngaituo hman hmaa ka lungrila thu hung inlang hmasa tak chu: E khai! Gospel hung lutna kotsuoa ngei kan Baibul buoipui lai hi hong le tlangzar dingin Lalpan rem a hung ruot a ni el awm de maw? ti hi a nih. Chu chu mang khoma ka la phan phak ngai lo thil a nih. Thil thei a ni hlauh chun Pathien kut inlangna lei lieu lieu ning a ta, ei histawria thil la tlung ngai lo a ni leiin mellung poimaw tak ni bok dingin ka ngai a. Sienkhom an mi hung fielna hi thla khat sung chu ka don el nawh. Trongtraia Lalpa rawn hmasak phot a, ka hraw dinga lampui a mi ruotpek a ni chun lawm taka pom lem dingin lungril ka siem a.
Chuong lai chu sut dinga computer-a kan rem lai le rem fela um taphot chu a hmatiema final editing le proofreading kan thaw tran lai a nih. Dannarain hi thaw felna ding hin thla ruk vel bek a ngai a, chu sung chun a tlawm takah vêl thum bek en suok vong a ngai ding a na, inkhawmpui hlak chu thla hni chauin a bak ta bok si. A mi enpuitu tak H.K.Kawllienthang hlak ofis tieng namen loa a buoi leiin nuom angin a mi san hman ta bok si nawh. Chu bakah, sut ding chun a lekhapuon man ding nuoi ruk vel pek lawk a ngai a, chu chu pukna ding remchang zong a ngai bok a. Tleirawl Isakin a pa kuoma, “Hi, mei le thing chu a um a, sienkhom pumraw thilhlân ding beramte chu khaw lai am a um a?” ti a’n don a, Abrahamin, “Ka naupa, Ama kuoma pumraw thilhlân ding chu Pathienin mi hung pe el a tih” (Gen 22:7-8) a ti ang khan, Ama lekhabu sutna dinga poisa puk ding chu Ama bokin rem hung ruot dingin ka ring tlat a. Chuong ang tak chun a hun takah rem a hung ruot hrim a nih. Lalpa hi ring tlak le ring phû takzet Pathien a nih. Eini tienga ei thaw ding tak ei thaw phot chun Ama tieng chu ei hni hmain a lo thaw dai tah hlak a nih.
Chuonga sun le zan chawl hman lo khop hiela kan buoipui hnung chun sut thei dingin rem fel a ni ta a. Sienkhom, nuom zat zat lekhapuon inchawk el thei dinga kan lo beisei kha kan hang sut ding meu chun Bible paper an ti hi Delhi tlangah inchawk ding a um tlat nawh. A kawm dinga kan ti ang hmu ding a um bok nawh. Hinduhai holiday infawk khawm tam lai a ni leiin press-a sin nuom angin a fe hrat thei bok nawh. Theitawpa lekhapuon kan hang dap vel chun bu zanga sutna khop kan hmu hràm a. Chu chu hmangin kan sut tran a, Delhi tlanga Pathien kuoma inhlanna le tlangzarna nei dingin October 7 kan ruot a, a tûk inhma taka Senvon pana suok dingin rem kan ruot bok a.
Kan buoipui nawk pakhat chu bu khat rikzie 1.2 kilogram a ni leiin vuongnaa mania phur chun bu khatah cheng sawmriet pei kan chawi bel a ngai ding a ni leiin bu 200 chu air cargo-a Imphal tieng thon a, chu chu Lal Remsiem motor tirin Imphala inthoka Senvon chen a phur hman dinga thon tung a nih. October 7/8 a motor chu suok ding a ni leiin Oct 6 ngeia a tlung a ngai a. Hi consignment bu 200 le Keyboard thon ding chu a hung tlung charin ka car-ah kan thun sok sok a, Tv.Ebenezer leh erpawt tieng kan tlanpui a, aircargo booking an khàr ding trêpin kan tlung a, a phur man cheng singkhat le sanghni vel kan pek nghal a, an thun lut sok sok a, booking office khom chu an khar zui nghal a, a tuk dar sawmah Imphal a tlung hman a nih. Minit sawmin inhnu inlang chu a zing nawk a tlung hman chauh ding a na, buoi hleng a tih. Hi po po ka zuk inzawt san tak chu, harsatna tam tak karah a hun thlap thlapa inpei theia Lalpan rem a mi ruotpek dan ka hril nuom lei a nih.
Senvona bu 200 phur thlak dinga kan thon kha Lal Remsiemin tam taluo dinga a ring leiin bu 100 chauh an motor a lo inphurtir a, a dang po chu Imphal laia zor dingin an maksan a. Aizawl tieng hrawa Delhi-a inthoka hung pawlin bu 36 kan hung phur a, bu 24 chu Senvon kan hawn tlung a. Calcutta-Aizawl inkarah kan Baibul phur man cheng sangkhat le zanga chuong kan chawi bel bok a. Delhi-a inthoka Senvon chen vuongna le motor-a Baibul thon chu a hautak el ni loin a man a to a nih. Pathiena hmangaina thrang loa taksaa unau inhmangaina lei ringot chun thaw rop chi a ni nawh.
Hlapawl inruolsiekna an zo chun sun dar 12 kan tlung phak ta a. Chawl um loin Baibul inhlanna le Manipur le India hmar sak tienga hmang dinga tlangzarna khûn takin kan nei a. Baibul (Delhi Version) buotsai a ni dan tawite ka hril hnungin pastor le upa po poin kut innghata Pathien kuoma inhlanna an nei a, chu zoah tlangzartu dinga inkhawmpui thruoituhaiin an ruot Rev. Thangchuoiloin a tlangzar a. Ka ngen angin khaw tina mi Halelujah Chorus sak thei po, mi zathum chuongin rawl tawp insuoa Pathien ropuina le chawimawina dinga Hmar trong hlaka an hang sak chu, inbuotsai lawkna nei der naw hai sien khom an thiemin a ropui a, a ri kha Lalpa hmaa rimtuia inchang dingin van tieng panin a fawn tung hlup hlup el niin ka hriet.
Baibul kan tlangzar zoin chu nia pastor, upa le tirko hunghai chu bu khat sengin kan sem a. Hi taka kan semhai hi Delhi tlanga inthoka DHCF le mi hrang hrang pek bu 40 lai le Lal Remsiem le Lalzomthang pek bu 48 lai niin ka hriet. Thil inpek po po laia hlawk tak le thaw rop chia ka hriet chu Baibul inpek a nih. Thuhriltuin 11:1), “Tui chungah i bei pei rawh, ni iemani zat hnunga chun i hmu nawk ding a ni si a”a ti indikzie hre nuom le fie nuom chun a mamaw si, inchawkna ding nei si lohai kuomah chatuon hringna bu Baibul pe rawh. A tiemtu taphothai kuoma chawl loa Pathien thutak hril theina, thuhriltuhai thuhriltu ngirhmun chel theina a nih.
Tuta Delhi Version Baibula Genesis-Thupuong inkara thil dang thrang sa loin thumal 8,65,754 a um a, thumal pakhat pei hi cheng khat hua hisapin cheng nuoi kuo vel hu a nih. Dannaranin, Indian newspapers liena thu ziek hin a tlawm takah thumal pakhatah cheng riet vel an pek niin ka hriet a. Chuong anga mihriem thila Baibul hlutna hisap chun cheng nuoi sawmsari chuong hu a nih. Baibul hlutna tak ruok chu mihriem siem thil ieng anga hlu khoma inchawk thei lo, chatuon hringna bu a nih. Chu el bakah, ram le hnam le trong dam khawsuokna chabipui a nih. Chuong anga thil hlu tlangzara a um theina dinga Lalpan hmangruoa a mi hmang nuom el dam hi vangneina chunga vangneina, malsawmna chunga malsawmna a nih.
(November 30, 2007, Delhi)
http://www.sinlung.com/Articles/Senvon-Diary-7.html
Senvona Arthatzawl
October 13, 2007 Inrinni. Inhma taka thoa Vunga le David Buhril hai Arthatzawl an ti hmun sirpui ding ka ti kha kan tho inhnuk bakah ruo a sur hmer hmer lei le khaw hrang hranga inthoka hung inleng kan hau bok leiin kan thrul a. Hi Arthatzawl hi kum 1986 kum bul tieng khan Parbunga inthoka inlàna Senvona ka fe trumin ka sir a, ‘Arthatzawl Pawlitiks le Mission Buoina’ ti lekha sei deu ka ziek nghe nghe a. Hi hmun poimawna san hi mi tam lemin ei hriet naw ka ring leiin a tawi thei ang takin hang hril ei tih.
Arthatzawl hi tien lai khawser an thaw changin ran takngiel khom inhrâm an phal naw hlak leiin hi hmuna hin an arhai an thak khawm hlak a, chu leia ‘Arthakzawl’ ti hming hung put tah nia hril an um a. Hril dan danga chun, âr thata an inthawina hlak bawlhmun a ni leia Arthatzawl an ti nia hril pawl an um bok. Kum 1914-a Watkin Roberts mission phun enkol dinga hung R. Dala chun hi lai hmuna hin in a bawl a, Arthatzawl hi a in huon a nih. Kum 1920-a Tinsuong khuoa Mission hmunpui an son hnungin Arthatzawl hi rausanin a um a, kum ruk sung chu a hming hril rikin a um ta nawh.
January 11, 1921-a R.Dala a thi hnungin a hmun chu H.K.Dohnunin a hung hluo a, mission hmunpui khom Tinsuonga inthokin Lakhipur (Hmarkhawlien) tieng an son a. Kum 1926 khan H.K.Dohnun, Field Secretary inrawina hnuoiah Senvon-a hin Presbytery a um a. Chu taka inthok chun Arthatzawl hi a hung inlang nawk tah a nih. Hi inkhawmpuia hin Manipura Field Superintendent dingin Mizorama inthoka hung mi pathum Rohmingliana, Lalnghinglova le Vanchhunga hai laia pakhat an dit tak thlang dingin palaihai chu Dohnunin a hril a, sienkhom tu khom an thlang nawh. Hi trum hin a mission phuntu Watkin Roberts le a kaiza vengtu H.K.Dohnun suot thlak tuma phierrukna nasa tak a um a, chu chu a nih Arthatzawl pawlitiks tia ei hril hi.
Hieng hun laia thoktu lien po hi Mizorama inthoka hung vong an nih. Sienkhom, Watkin Roberts mi ring le a ruol thra Dohnunin Field Secretary a chela inthokin Hmarhaiin thuneina iengkim an chalai bika ngaina a um leiin anni pahni suot thlak dan lampui dap pawl an um nia hriet a ni a. Chuonghai laia a hnunga chieng êm êma hma latu laia pakhat chu Tripuraa inthoka hung Lianhawla, R. Dala thi hnunga a nuhmei hung neitu kha a nih. Chuonghai huoihot chun zanah a rûkin Hmar mi ni lo hnam dang po Arthatzawla hin an inkhawm a, chu thu chu a hnung daiin a pût suok chauh a nih. A kum nawkin hi hmun, eini ta dinga ‘Akeldama’ hi khawhrawngin a sawi chim vong a nih. Threnkhat chun Pathienin an thu phierruk a awi naw leia sawi chim niin an ngaibel nuom hiel. Hieng laia thu phiertuhai le a hnunga NEIGM American Council-a General Secretary H.H.Coleman chu inthuruolin kum 1929/30 khan Watkin Roberts chu an hung suot thlak tah hrim a nih. Arthatzawl pawlitiks tirdakum tak hin kansar angin voisun chen hin ei hnam le kohran a la fak siet char char a nih. Coleman chu a thi ta a, a dam lai ngeiin a Mission inchu thlakpek NEIG Mission khom vui liemin a um a, sienkhom thla a la maksan rawn khop el. Chuong mihai chun Centenary hung tlung ding chen khom hi a ni taka thaw neka Arthatzawl pawlitiks zaizira a ni naw lem inser an la tum ngar ngar a hoi. Suol hin taluo a nei nawh.
Hlapawl inruolsiekna
Zing dar sawmah inkhawmpui ni hmasa tak chu kan tran a. Airuochingin za a ngai meta chu tawp zai rêl loin a la phingphi seng seng a. A hun takah hall kan lut chun indên taka ip sawi muk angin hall chu an lo sip vong ta a, tuolah a keng lo tam tak an ngir bok a. Khaw hnai deua inthoka kea zîng hunghai khom chatlak loin an hung tlung zing bok a. Hun insersuon thum kan nei a. Khawm Khatna (Session One) chu hlapawl inruolsiekna a na, Khawm Hnina (Session Two) chu Baibul (Delhi Version) inhlanna le tlangzarna a na, Khawm Thumna (Session Three) chu an mi fielna le ka hungna san tak Seminar a nih.
Khawm Khatnaa an inruolsiekna chu ‘Lal Isu hming inpâk ei tiu’ ti hla, ei Kristien Hlabua a thluk thumnaa sak ding a nih. Khuo 11-a inthokin hlapawl an hung a, an khuo lien le chin dan inang naw ang bokin an tlawm le tam dan khom an thlâu hle. Hi hla hi iemani kong zawnga ka hla hnâm deu hlak a ni a. Ka hnàmna san khom a chang thumnaah “Lalpa hnam thlang Israelhai….A lungsietnan a sandam cheu” a ti bik laia a chang linaa “Nangni Jentel, misuolhaiin, tuorna theinghil naw ro” a ti nawk bik, a pakhat a sandam tawl leia ropuina inkhumtir dinga a ti laia a Jentelhai chu misuol an ni leia ropuina inkhumtir dinga a ti hi ka ngai thei naw zawng tak a na, a phuoktu hi hmu inla chu a lu ben thlong top ka nuom hlak a nih. Hi hlaa Pathien kuoma chawimawina le ropuina inkhumtir ding a ni thu a hril hi a thrat lai zingin, a hla phuok dan hi chu a ni naw deuh chu a nih. Amiruokchu, a Saptronga mi ka hmu hnung chun, chang thumna tlar khatna le hnina “Lalpa hnam thlang Israelhai, Nangni a chin a lien” tia an inlet hi “ Ye chosen seed of Israel’s race, A remnant weak and small” ti a lo ni dai bakah chang lina tlar khat le tlar hninaa “Nangni Jentel, misuolhaiin, tuorna theinghil naw ro” ti hi “Ye, Gentile sinners, ne’er forget The wormwood and the gall” ti a lo ni nawk leiin ngaidam theiah ka ngai hram chauh a nih. Fimkhur taka hla phuok dan chu a ni naw hrim hrim.
An hang saka leh, eini thluka siem hla an sak phaa rawl puok konga suok kha, inruolsiekna a ni leia an intìm am a ni ding, an rawl suok ding a chenve lai hiel an îp hmang leiin a puok ding angin a puok zo ta nawh. Chun, hi hla thluk siemtu hin thuok lakna ding hun um mang loin a silar inzom zut a. Chu chu Leisen hlapawlhai lem chun bau kak rakna ding a um naw khah dittawk lo ni awm hrimin bau inchip deuthawin an hang silar a, thuok a ip leiin an hmel a sen trawn trawn el a nih. Dannaranin ‘f’ le ‘t’ ri ei lam thiem naw vong. Chun, an sak muong taluo vong a, inhmaw deu metin sakhai sien chu an sawl a nêp deuh bakah a ri khom thoin puok thra lem ngei a tih. A tawpah Parbung hlapawlin pakhatna an lak a, lawmman cheng singkhat an dong bok.
Baibul tlangzarna
Hmarram Kristien Thralaipawl Inkhawmpui buotsaituhaiin Seminar thruoitu dinga an mi fielna ka hmu hlima ka fe thei le thei naw ding iengkhom ka la ngaituo hman hmaa ka lungrila thu hung inlang hmasa tak chu: E khai! Gospel hung lutna kotsuoa ngei kan Baibul buoipui lai hi hong le tlangzar dingin Lalpan rem a hung ruot a ni el awm de maw? ti hi a nih. Chu chu mang khoma ka la phan phak ngai lo thil a nih. Thil thei a ni hlauh chun Pathien kut inlangna lei lieu lieu ning a ta, ei histawria thil la tlung ngai lo a ni leiin mellung poimaw tak ni bok dingin ka ngai a. Sienkhom an mi hung fielna hi thla khat sung chu ka don el nawh. Trongtraia Lalpa rawn hmasak phot a, ka hraw dinga lampui a mi ruotpek a ni chun lawm taka pom lem dingin lungril ka siem a.
Chuong lai chu sut dinga computer-a kan rem lai le rem fela um taphot chu a hmatiema final editing le proofreading kan thaw tran lai a nih. Dannarain hi thaw felna ding hin thla ruk vel bek a ngai a, chu sung chun a tlawm takah vêl thum bek en suok vong a ngai ding a na, inkhawmpui hlak chu thla hni chauin a bak ta bok si. A mi enpuitu tak H.K.Kawllienthang hlak ofis tieng namen loa a buoi leiin nuom angin a mi san hman ta bok si nawh. Chu bakah, sut ding chun a lekhapuon man ding nuoi ruk vel pek lawk a ngai a, chu chu pukna ding remchang zong a ngai bok a. Tleirawl Isakin a pa kuoma, “Hi, mei le thing chu a um a, sienkhom pumraw thilhlân ding beramte chu khaw lai am a um a?” ti a’n don a, Abrahamin, “Ka naupa, Ama kuoma pumraw thilhlân ding chu Pathienin mi hung pe el a tih” (Gen 22:7-8) a ti ang khan, Ama lekhabu sutna dinga poisa puk ding chu Ama bokin rem hung ruot dingin ka ring tlat a. Chuong ang tak chun a hun takah rem a hung ruot hrim a nih. Lalpa hi ring tlak le ring phû takzet Pathien a nih. Eini tienga ei thaw ding tak ei thaw phot chun Ama tieng chu ei hni hmain a lo thaw dai tah hlak a nih.
Chuonga sun le zan chawl hman lo khop hiela kan buoipui hnung chun sut thei dingin rem fel a ni ta a. Sienkhom, nuom zat zat lekhapuon inchawk el thei dinga kan lo beisei kha kan hang sut ding meu chun Bible paper an ti hi Delhi tlangah inchawk ding a um tlat nawh. A kawm dinga kan ti ang hmu ding a um bok nawh. Hinduhai holiday infawk khawm tam lai a ni leiin press-a sin nuom angin a fe hrat thei bok nawh. Theitawpa lekhapuon kan hang dap vel chun bu zanga sutna khop kan hmu hràm a. Chu chu hmangin kan sut tran a, Delhi tlanga Pathien kuoma inhlanna le tlangzarna nei dingin October 7 kan ruot a, a tûk inhma taka Senvon pana suok dingin rem kan ruot bok a.
Kan buoipui nawk pakhat chu bu khat rikzie 1.2 kilogram a ni leiin vuongnaa mania phur chun bu khatah cheng sawmriet pei kan chawi bel a ngai ding a ni leiin bu 200 chu air cargo-a Imphal tieng thon a, chu chu Lal Remsiem motor tirin Imphala inthoka Senvon chen a phur hman dinga thon tung a nih. October 7/8 a motor chu suok ding a ni leiin Oct 6 ngeia a tlung a ngai a. Hi consignment bu 200 le Keyboard thon ding chu a hung tlung charin ka car-ah kan thun sok sok a, Tv.Ebenezer leh erpawt tieng kan tlanpui a, aircargo booking an khàr ding trêpin kan tlung a, a phur man cheng singkhat le sanghni vel kan pek nghal a, an thun lut sok sok a, booking office khom chu an khar zui nghal a, a tuk dar sawmah Imphal a tlung hman a nih. Minit sawmin inhnu inlang chu a zing nawk a tlung hman chauh ding a na, buoi hleng a tih. Hi po po ka zuk inzawt san tak chu, harsatna tam tak karah a hun thlap thlapa inpei theia Lalpan rem a mi ruotpek dan ka hril nuom lei a nih.
Senvona bu 200 phur thlak dinga kan thon kha Lal Remsiemin tam taluo dinga a ring leiin bu 100 chauh an motor a lo inphurtir a, a dang po chu Imphal laia zor dingin an maksan a. Aizawl tieng hrawa Delhi-a inthoka hung pawlin bu 36 kan hung phur a, bu 24 chu Senvon kan hawn tlung a. Calcutta-Aizawl inkarah kan Baibul phur man cheng sangkhat le zanga chuong kan chawi bel bok a. Delhi-a inthoka Senvon chen vuongna le motor-a Baibul thon chu a hautak el ni loin a man a to a nih. Pathiena hmangaina thrang loa taksaa unau inhmangaina lei ringot chun thaw rop chi a ni nawh.
Hlapawl inruolsiekna an zo chun sun dar 12 kan tlung phak ta a. Chawl um loin Baibul inhlanna le Manipur le India hmar sak tienga hmang dinga tlangzarna khûn takin kan nei a. Baibul (Delhi Version) buotsai a ni dan tawite ka hril hnungin pastor le upa po poin kut innghata Pathien kuoma inhlanna an nei a, chu zoah tlangzartu dinga inkhawmpui thruoituhaiin an ruot Rev. Thangchuoiloin a tlangzar a. Ka ngen angin khaw tina mi Halelujah Chorus sak thei po, mi zathum chuongin rawl tawp insuoa Pathien ropuina le chawimawina dinga Hmar trong hlaka an hang sak chu, inbuotsai lawkna nei der naw hai sien khom an thiemin a ropui a, a ri kha Lalpa hmaa rimtuia inchang dingin van tieng panin a fawn tung hlup hlup el niin ka hriet.
Baibul kan tlangzar zoin chu nia pastor, upa le tirko hunghai chu bu khat sengin kan sem a. Hi taka kan semhai hi Delhi tlanga inthoka DHCF le mi hrang hrang pek bu 40 lai le Lal Remsiem le Lalzomthang pek bu 48 lai niin ka hriet. Thil inpek po po laia hlawk tak le thaw rop chia ka hriet chu Baibul inpek a nih. Thuhriltuin 11:1), “Tui chungah i bei pei rawh, ni iemani zat hnunga chun i hmu nawk ding a ni si a”a ti indikzie hre nuom le fie nuom chun a mamaw si, inchawkna ding nei si lohai kuomah chatuon hringna bu Baibul pe rawh. A tiemtu taphothai kuoma chawl loa Pathien thutak hril theina, thuhriltuhai thuhriltu ngirhmun chel theina a nih.
Tuta Delhi Version Baibula Genesis-Thupuong inkara thil dang thrang sa loin thumal 8,65,754 a um a, thumal pakhat pei hi cheng khat hua hisapin cheng nuoi kuo vel hu a nih. Dannaranin, Indian newspapers liena thu ziek hin a tlawm takah thumal pakhatah cheng riet vel an pek niin ka hriet a. Chuong anga mihriem thila Baibul hlutna hisap chun cheng nuoi sawmsari chuong hu a nih. Baibul hlutna tak ruok chu mihriem siem thil ieng anga hlu khoma inchawk thei lo, chatuon hringna bu a nih. Chu el bakah, ram le hnam le trong dam khawsuokna chabipui a nih. Chuong anga thil hlu tlangzara a um theina dinga Lalpan hmangruoa a mi hmang nuom el dam hi vangneina chunga vangneina, malsawmna chunga malsawmna a nih.
(November 30, 2007, Delhi)
http://www.sinlung.com/Articles/Senvon-Diary-7.html
No comments:
Post a Comment