LAMKAITE ZAHTAT SIHNA AHI

[ Hih thugelh sung a lamkai kichi in Pawlpi khat phot a lamkaite, Saptuam a lamkaite, nampi lamkaite leh MLA/MDC te genna ahi.]

Tulai akhangtou ihi ding uai, akiamsuk ihi ding uai, miteng in lamkaite zahtat ding, sang a upajawte zahtat ding, zahtat dan kizil ding chih igen thupi thei mahmah uhi. Lungdam huai! Khantouhna khat ahi ichi mai ding. Hinanleh, lamkai teng, sang a upazaw teng mok zahtat ding maw, zahtat dial kilawm te maimai zahtat ding chihpen kuamah in kigen kha zel lou hi. Kua teng zahtat ding hita?

Tu chiang in eimite sung ah mipil khat lamkai ut nonlou hi. Lamkai hih sang in member maimai hih ding ki ut chiat zaw ta mok hi.WHY? A reason chu keisang in zong theichian zaw chiat ding ihihman in gendah mai ni. Tulai a ilamkaite muantheih, belhtheih leh guptheih ding um lou phial ahita hi. Mipi ding a nasem ut a lamkai hilou in a title deihna ziak chihvel, ama mimal phattuamna ding ziak chihvel, ahihkeileh kuamah lamkai a ut louh ziak a chingkha chih bang ahi tangpi hi.

Lamkai khat chu amah personality hoih in hoihlou taleh zahtat dia kilawm mah ahi a, mipi te’n izahtat chiat ding uh ahi, en izahtat keileh kua’n zahtat ding. Lamkaite izahtat ding a, hinanleh amihihna itheihchet zawh nung leh anasep te mipi phattuam nading himaw hiloumaw chih itheichet zawh in zahtat lai ding maw zahtat nonlou ding chih mipite’n itheihsiam mahmah uh poimawh hi. Bang deihna tawh lamkai a itelching ahiai chih mipite’n amasapen a itheihchet uh kisam hi. I telching na bang un na asem na uai chih etkhiak zel zong poimawh hi. I telching na bang ua na asep kei uleh bang lawh ding hita?

Mipi lamkai khat hingal a, mipi phattuam na ding nasep khat zong neilou chu bang dia izahtat teitei ding uh e. Tua bang lamkai zahtat a gum teitei mite hamsiat in umta hen. Mipi phattuam na ding silkhat zong bawlkhe lou lamkai neih sang in lamkai neihlouh hoihzaw hi.

Tuni a anasep enlou a lamkai hina chia imok zahtat ziak ua, ilamkai te ki liansak a mipi khuallou a amau mimal phattuam na ding maimai khual uh hikha moh lou ding uhi. Bangmah sem kei lei zong kiching kik nave chih ngaihdan nei uh zong himaithei uhi. Lamkai khat kichi pen mipi te’n itel ahia, (mipi tellouh te pomlouh ding ahi) mipi tamzawte deihna bang a na asep kei leh akhek theihna zong mipi te’n power inei uhi. Hih power pen mipite’n izang thei naikei ua, izaktheih hun chiang in ilamkaite zattheih pan ding uhi.

Lamkai zahtat ding dan ahihleh ama mimal hindan, personality, educational background, family, sum leh pai neihdan te etsang in mipi a ding a anasepdan et a zahtat na piak ding ahizaw hi. Eite’n a nasep enlou in ama mimal hindan, personality, education leh adang dang te en in lamkai khat zahtatna ipia ua, tuni’n I lamkaite bang achi ua le ? imu in ithei chiat uhi. GUAI ! ibawl khial ta uh hilou maw ! a hausa, laisiam te maimai I zahtat ua tuni’n igam tulpan kai ding zong um nonlou in vutvai khu in dimta hilou maw. I lamkaite, I MLA te’n sunglasses bulh in leivui khute mulou kipang ta uhi.

Tuni apat in mipi te’n mipi phattuamna ding nasem lou lamkai neih sang in lamkai neihlouh itelzaw ta ding ua, nasem lou lamkai zahtat louh ding dan zong ikizil ta ding ua, tualeh nasem lamkai zahtat a pahtawi ding in ikichial uhi.

[Feedback at hangpizou@yahoo.com]