Tuesday, March 25, 2008

LUNGTANG TAH TAH AHILOULEH........

- Manlun Khamlianlal Zou

I gam leh I mi nam dinmun ka gel a, bangzieha khotang leh hattuom sung a khantouna tahtah umtheilou e? chi ka khualchien leh “silzousie lungtang tahtah a I bawl lou zieh uh hiva” ka chi hi. Pu leh Pa te khang a lunsa Zouvontawi bang zieh a tunia mite nuadel del I hi uoi? Lunggel hunta hi… I Pu leh Pa te mi hat ana hi ua, koima’n ana nang zousih ua, zougam ah ana thang mama ua, khangsawnte khuolna in genthei chinteng ana thuoh uhi. Siemna leh silchinteng ah ana ka ningching ua, koima ana englou uhi. (Tun I nam dinmun uh bangchi nasa ei?)

Hun peisa leh tu tan chieng in enlei silbangkim ah Zou te silsiemdoh in I pang zel uhi - ZNC movement pandohtu, Organization min hoitah tah phuadohtu, tualeh laa phuosiem pipi te enlei I mi nam te ana hi uhi. ZSP kipat tung lai-in Student Association dang tamlou hi. I sannem laa te uh bang a laa ngai ding nam dang in neilou uhi. Bangdia tunia mite phazou nonlou I diei le?

Adih hi..I mi nam pen bangtan e khat vang hundang sang in khantouna I neizaw uhi. Siemzilna leh sil dang dang ah hoilam I manaw na uhi. Hizongleh hoitah in khuolchien lei lungtung huoi lou hi. Khangtha te I Nu leh Pa te khupkhel zou ding ki umnonlou hi. Doctor khat a retire leh a zomding umlou a, officer khat pension ahichieng in koima a zui ding umlou zel a, tamte enchien lei lunggel hunta mama a, sangnaupang te’n ding in kipat hunta hi. I mawpuah na uh lien mama hi.

Mihing khat a I pieng leh Pasian in talent khat toh ahing siem ahi a, I talent suidoh pen I mawpuahna masa pen ahi. Tuami talent I suidoh zouchieng in lungtang tahtah toh ihina bangtah a kizang a, I hitheina bang a panlah pen I silbawl ding thupi pen ahi. Leitung ah nang bang bang koima umlou ahi chi geldoh inlen, na septhei pen pen guntutah a nasep ding na mawpuahna thupi pen ahi. I mi nam sung a daahuoi mama ahileh silbangkim ah - Bawl mai mai…Sep mai mai…Gen mai mai…Ngai mai mai…Sim mai mai…Zil mai mai…adg, adg, tamseng a, “MAI MAI” I chi chi kaal in mite’n hing khupkhel zel uhi. Tami “MAI MAI” pen “TAH TAH” chia I khelthei masang sie bangtan in khangtou sawm lei zong hitheilou ding hi.

I nam sung a I peidan uh tangpi – Siemzil te’n nu leh pa te zieh, ahilouleh nasep thasiet zieh in school leh college kai mai mai ua, Pastor tampi te chimaw leh beidong man in Pasian naasem ding in kipe mai mai ua, mi nautangte um mai mai ki tam seng hi. Tuabanah mi kipilsah kitam seng a, ama thulou thu salou leh ama angma ding chauh gel kitam seng ta hi. Tamte zieh in I nam tuontual seng ta hi. Mipil tahtah te pen kipilsah lou ua, mite thugen ahoilou te lemtuah dan siem ua, ahoite lahdan zong siem uhi.

Leitung a mi lawching leh nam khangtou te enlei a chitah te ana hizel uhi. Florence Nightingale in Nursing school apatdoh nang in sun leh zan in naa sem hi. Abraham Lincoln in USA President ahi nang in lekha lampi a meivah (street light) nuai ah anasim zel a, alawching nang in tamveipi lawsapna ana tuah hi. Gandhi, Father of the Nation-India ahina ding in lungtang tah tah toh India ding in pan nala a, genthei chinteng ana tuah hi. Noah in ama leh a innkuon te toh hundam ahina ding in kuong chitah tah in ana bawl hi. A dang gen nonsih nanlei zong tam atung a igente lawching na khu LUNGTANG TAH TAH a ana pang zieh uh ahi.

Lawchingna I chipen nuamtah a ki mu pai pai ana hilou a, a guntu tah tah te ana lawching ana hi bou uhi. Eite pen tomkhat I bawl a lawchinna I neilou leh lungke pai pai..Bangchin lawchingna I nga thei diei? Sil neupen a pat a lienpen tan ah guntuna leh chitahna ngai hi. Nu leh Pa, Lawm leh Gual, Nungah leh Tangval kingaina mai mai zong chitah mama ngai hi. Tua ahilouleh lawchinna umlou hi. A mai mai chite pen silbangkim ah hoilou hi. A mai mai a silbawl sang in bawllou hoizaw ding hi.

Tuni’n I mi nam zuun ding; khantouna del ding chi in pan la nanlei michin in eima mimal a chitahna I neilou leh hitheilou ding hi. Nam khangtou ding I deileh michin in I sep leh bawl chinteng ah chitah leh guntu in sem pan va ui. Tuachia michin in I hitheina bangchiet a khantouna I neichieng in I NAM uh pen gen se se ngailou a khangtousa ahi. Eite pen “Sakhi thatlou ngaltang tum” chi bang in eima khangtou sawmlou in I nam a pumpi a khangtousah sawm te ki hi a, tuami pen hasa mama hi. Khangtouna pen mimal a kinga ahibou hi. Gam nuam mama leh michin in a lunggul uh United States of America khantou zieh ahileh michin in a dinmun uh siempha chiet ua, koima englou sawm tei tei uhi. Tualeh atangpi in government hileh mi nautang hileh dihtat mama uhi. Tuachia michin dinmun ahing hoi chieng in a gam pen gen se se ngailou in ana khangtou zouta hi. Tuazieh in I nam khangtou heh I chileh I mimal dinmun chiet siempha va ui in, I sep leh I bawl tapou ah I dihtat ding uhi.

Tuaziehin Siemzil te’n zil tah tah ding, Pastor te’n Pasian naa sem tah tah ding, Politician te’n zuun tah tah ding, laa sa te’n s tah tah ding: mizousie’n lungtang siang tah in I sep leh bawl teng ah pan la “TAH TAH” ding, tuabanah lunglien kuo ding. Tuahileh lawchinna leh khantouna ei a ahisa ahi. Bible in “Dihtatna in nam a tawisang a, hinanleh dihtatlouna in nam liengvai sah hi” achi hi (Prov. 14:34).

Tuni’n tami pantu ding in SANGNAUPANG, NUNGAH leh TANGVAL te’n mawpuahna lienpi inei uhi. Nang na pat louleh koi in a pan diei? Khantouna kichi a bul pantu ngai hi. Tuami ding in NANG leh KEI kipat hunta hi. Tualeh I thei ding a poimaw mama ahileh-Bangkim I pat nang in Pasian kung ah kile kia in-lungtang siangthou leh nunnemna, dihtatna leh kukalna, hatna leh chitahna ngen kia in, tuachin Pasian deibang in naa semlei I nam khangtou van in, khangsawn te’n a ga hinglou va un, Pasian gualzawl nam ihi chieng in I gam leh nam hing nuam mama ding hi.

Atawpna a ka gen nuam ahileh - “Zou te ding a khantounang lampi umsun khu Pasian deidan a tawn ding ahi.” Aziehpen Bible in silbangkim hing hilchien thei pen a: kithuhil nang, kisiemphat nang, dihtat dan zil nang in hoipen hi (2 Timothy 3:16).

Na nam leh na khangsawn te khuolna in tunin nang bang na bawl diei?

********


Address:
PO Box ABC,
Bradley, West Virginia 25818
USA
Email: lalpyzou@yahoo.co.in
Ph. 001-304-877-3760 ext. 6316

4 comments:

  1. Lawm Lalpu, na thu gen te dih thei mam2 ei,khang loh hun tah chu hita maw.

    ReplyDelete
  2. KATAKALAI SAI TAMBANGPI NA GELPEN HOIH SA MAH MAH ING SIM SIM NUAM ING KHAANGLO HUN MAH MAH TA THOU UN THOU UN

    ReplyDelete
  3. DI MAH MAH KOIPOU IN TAMMI THEI TONTUNG VAI TAM BANG THUHOIH HUNG SUN ZOM JEL IN

    ReplyDelete
  4. Thupi mah mah Hung suun jom jel ding in hung ngen ung

    ReplyDelete