By- Tungnung, Zamlunmang Zou
(This article was written & published on May 2006, ZOKUOMTHAWN ISSUE)
Jîng ninou hing suoh san singseng a, singna louna leh zu-levate'n siempa phat in au veng vung uhi. Hinanleh Lunneu melsuoh ah kipana ang in lunghelmel akilang jawhi. Khosung mite'n Jiing ann nejou, sepna diing munchiet uh juonta ua, tuachi'n Chingnou zong Delhi juon iing in aippi leh a vante toh Bus munlam hing juon tahi. Lunneu zong ai ngui ngiiungeu in Chingnou thahte lah a vatel a, Chinnou Bus a kal masang in tambang in vaihahna thu hing genkhe vaphieu tahi. "Kaiit, ka seenngai Chingnou aw, mailam tuongjawt in, siemna'n hing kai n, muol-le-taangte'n hing hal nan leh ka lunglai ah vaibang thaam en diing hichie, ginum tah in umvai aw, na hing tunkia hung diing gaahla taha gaaldot zing diing kahi. Chinnou ginum in aw". Achileh hingnou in "Hitham Ulunneu lungkham sin, nang adi'a det zing diing kahi. Kenzong hing ngai ing, hinanleh I maban diing geelkawm in panjaw vai", chi'n abieng nou ngiingeei ah iitna luonhi hingluonghiethiet a, Lunneu in zong Chingnou tuachilou e chi'n abieng a mittuite asiehhul sah tahi. Ki iittah leh kikhela tah in Chinnou Bus sung ah luutta hi. Bus taitum vungvung Lunneu in kimantaang thei leh chi ngaitua pum in a entum vingveng a, sunsawt naubang kap a Chingnou sulnuo puldou di'n kinuole kia tahi.
After one month:
Melhoi leh duongchingtah nungah, etmei a zong chimul thouthei, Chingnou in Delhi a A Nuneute inn apat sepna Call Centre ahing muta a, atang a kitou deltheita ahiman in, a tuom in inn ahingluo tahi. Tomkhat sung, inn lam a a iit a Ulunneu iitna in huoituup jou nanleh, melhoi leh etla huoi ahi ban ah, taimel leh kamsiemtah ahi man in tangval ahel atamthei mama hi. Laisim a um, eimi tangval, Thangnou in amu niapat, eheu! Hasuo lou diing chia tong ana chiem ahi man in, valu thitheta a, atawpna ah hing lawching tahi. Chinnou in damsung a ginum di'a a simthu chiente theipha nawnlou hi.
Hun hingpei jel a, thangnou toh akingaina uh hing piching kuonta a, achang chang chieng in Thangnou vagieh jel a, agiehloukaal chieng inChingnou vagieh jel hi(Jaanchie a bawlte uh theichietna hai maw?).
Tuabang a hinkhuo a'ng zah chieng un Thangnou laisimna lam ah kiemsuh huoihuoi a, hinanleh Chingnou in a guuh in ana khiinkhiet sawm gige hi. A sepkhawmpi, Thangnou saang a hoijaw, haujaw leh bawlthei jaw khat um a a guuh a hope anape gige dan ahita hi. Thangnou lah khen chieh lou, inn lam a ana ngaahzing a Ulunneu lah khentuom lou, tua kol tangvalpa, Rahul ana bawl deudeu tamei hi. Nikhat Rahul in theipien sim ahiman in Cold Drinks dawn di'n achiel tahi. Hinanleh, Chinnou zong a ut taluo hinapi, a utlou kipang in hing ngaisiem in hun kaneisih achi poupou a, a lungsim ah hing chiel teitei leh achi gu veve hi. Ani ani'n hing kinel sewmsem ua, nikhat Rahul in Night Club a hawdi'n chiel a, Chingnou in yes zong chiman nailou in a car sung ah kailuut a, abieng san ngiingeei tawp toh a aang a pomkip athuo tahi. Chingnou zong a du ankamtui hawp bang mei in kidaw hiithiet hi. Night Club umna mun hing tung ua, a sung ah laam nopna di'n a sanchi hing kitul tuo ua, hing lampanta uhi. Chingnou in Tv. Rahul ngawng kawi leh Rahul in Chingnou tawbou khal tittet akhut a me pum in a aangnem uh taattuoh in hing lam ta uhi. Nai a et uleh jiingmawng lam nai 2.30 ana hita ahiman in peivai ang sawm ta uhi.
Inn lam hing juon ua, car sung ah akip akawi kimawitua zutzut uhi. Tuajaan Chingnou inn hingtung lou(Hei a gieh hiva nachi uai le? Ke'n kathei kiiukieu.) Chingnou zong tua nitah apat giehna mumal neilou in, nikhat gilbem ah, nikhat giljawl ah, tua chi'n hindan mumal aneinawn sih hi. Giljawl a a gieh nita khat in, Thangnou in a umdante muongmawh ahi man in, a va endap tahi. Juoilah!! A gintaat bang chet in Chinnou leh Rahul in khovel a zap laitah uh ava tuakhata a, Thangnou zong zum leh lungthah kisa in a guuh in a'ng kinuole tahi.Tuani'a pat a keengpi mu Chinnou umna lam zong akawhsah nawn tasih hi. Tomkhat jou in, Chingnou hing gai ta a, Rahul toh nau asuh khiet uleh, vangsiet huoitah in ashi lawh tahi. A damlai a achetthei banglou, a luongdom di zong koima umlou, mi'n kami kasa chi diingzong zumhoui asa uhi. Khawhna e khawh nalawmlawm e maw.
BEITA
(Tam article ahileh koima kawhna leh kaapna ahisih hi. Author in sil hing tungthei ahi china toh a vision a amudan ana gel thu ahi).
No comments:
Post a Comment