EDITORIAL:
Tuni Thupi: “Nuntakna ding a taihilhna ngaikhe mi in, mipilte laka om nuamsa hi” Paunakte 15:31
Phaizang mite’n I tenna state uh Sana leibak chi in, chingmi-tammi khat ahi, hing minna se eikhoi… chi in a thu le laa in gengen uh a, a taktak thil ahih chiang in, angma sialna leh ki deidanna in Manipur nawkkha zel adiam chihte ngaihsut tham ching hi.
Hunsawtpi mualliamsa te genlouh in ATSUM te vanglai ni a biiktak in 1980s lak vel in, phaizang mi leh Singtangmi kal a kidei danna khenkhat omte taklatin om a, khang hong kikhengtou zel in, ATSUM makai masate khekhap zui in, khangthak tamtak in pan honla nawn in, I tandia kilawm I tankhaklouh thil tuamtuam te hon phutou zel uhi. Singtangmite’n kiphinna tuamtuam neisek in, a nungsawtlou in I makaite uh khemlung dam in om sek uhi. Eilawi bel thu hoihpipi vawkkhiak I siam ua, himahleh, a taktak thil ah I ki tohtah naak khem uhi. Ahihkeileh, I zawnluat ziak ua sum lepai a awk pahpah I hiding uam chih bang leng theihhak mahmah suak hi.
Student leader hita leh, ahikei leh organization tuamtuam a leader te’n singtangmite haksatna tuamtuam Government ah tun uh a, quota reservation tungtang chauh bangleng issue liantak suahsak theih thil ahi hi. Huaibanah, singtang bial ah Examination centre tuamtuam honkhiak ding chihbang, Education Directorate neihtuam ding chihte tel in, Hospital piching zawsem neih ding chihte leh thil tamtak tak nalhpi pi leh hoihpipi Government ah I na phu trantran sek uhi. Thil phut I siamzawng tak uh ahi a, himahleh, agah muhma in I mangthangsak zel khanak uhi.
Phaizang bial ah office poimoh teng koih in om a, siamsinna kong tuamtuam a University te leng phaizang ngen ah siahkhop in om hi. Thil thupi leh manpha tengteng Phaizang gam a koih a, a etlah huailou teng Tanggam a koih ding chih rule leh Act om adiam leh? Phaizang mite’n Hospital minthang pen RIMS leh JN Hospital te a tut phah ua, siamsinna Inn Manipur Univeristy, Central Agriculture University leh Government Polytechnic te tutkhum vek uhi. Huaiban ah, Office poimohteng leng atut phah uhi.
Kimawlna toh kisai enle hang, Games Village kibawlna Phaizang gam hi a, kimawlna mun ding stadium tamtakte phaizang gam mah ah koih in om a, singtang mite’n National Games hamphatpihna khat mah leng I tangkei uhi. Mun poimoh Doordarshan, AIR Station, Airport, BOSEM Office, COHSEM office, FCI/FCS Go down banah Museum te phaizang ah kivolh dimsak in om hi.
Tutung a Prime Minister in a honkhiak National Institute of Technology bawlkhiakna ding toh kisai in Government in mun le mual zonna buaipih mahmah ua, Langol leh Lamphel kalah koih ding in thupukna bawlta uhi. Imphal khopi sung leh pua ah Inn leh office poimoh taktakte a dim in om ta ding chihna ahi hi. NIT lam khiakna ding toh kisai in Churachandpur District Students Union pawl in leng CCPur District sung ah omsak ding in Government ah ngetna pelut uh a, mun hoih mahmah leh mun lian huntawk khop mun 2 tah uhi. Huai tengteng theikawm in, Government in Langol leh Lamphel kal ah NIT building bawlkhiak ding thupukna bawl teitei uhi.
Tu in leng Langol leh Lamphel lou nasem tamtak in hiai building bawlkhiak ding nang in, Government in agricultural land tam suse lawta chi in tangkoupih ua, NIT Building deihlouh thu taklang uhi. Himahleh, Government in mi phallouh pipi theikawm a, CDSU ngetna pen pampaih a, Langol leh Lamphel kal a NIT a koih sawm teitei pen uh Singtangmite’n hamphatna bangmah mukei hen a chihna uh hilou di hia??? Hiai tungtang ah mipi palai dia I telkhiak te’n Aw bangmah suah ngam lou hive uh maw???
No comments:
Post a Comment