Written by L.T.Ngaihte
Laibu tuamtuam ka sim khak na te ah,thu lungkhoih tak tak, mi ten ana tuahkhak taak leh ana muhkhak taak te uapan a gelh te uh, tamtak ka simkha ta hi. Adiakin, Pathian lam toh kisai te khenkhat,tuabang a simkha nailou te adia deihsak huai sakna ka nei hi. Hiai thugelh te a pan simtu ten Pathian mel muhtheihna ahih khak leh chih lametna in a tomthei bang in ka hon taklang hi:
1.MIPIL 4 NA
Jesu Kris pian thu toh kisai a,Mipil 4 na kichi pen Russia laigelh minthang khatin a suangtuahna ahi a, ahizong lung khoih veve hi. Tua ah, mipil lina pen amah mimal buaina leh a lampi hilhtu Aksi aman suah manin,Bethlehem Bawngin va tung hak, a va tun chiang in,naupang Jesu pen anu Mari leh apa Joseph in,Herod khut apan suahtaksak sawmin, Aigupta lam ah ana taikhiak pih ta uhi.Mipil 4 na in lungketuan lou in naupang Jesu muh tumin, anung delh hi. Thilpiak tampi a puak toh a sun-azan chilou in a hon delhta a,mun khat ah nupi leh ata gilkial a zot na ding theilou a om,gamdai a si mai ding a hon tuak a, a et chiang in a hehpih mahmah a, it pipi in naupang Jesu a dia thilpiak a tawi manpha mahmah te khat a peta hi.Huchin a hong pai zel a, zan a munkhat a ahong giahna ah, pasal mitdel khat migilou te soisak sa, gim mah mah, si mai ding a hon tuak nawn a,panpihtu ding neilou huchibang amuh chiang in a thuak zou zel ta kei a, naupang Jesu adia atawi thilpiak manpha mah mah dang khat a pe nawn ta hi.Huchibang a ahong paizel na ah, gamdai lamsaupi apai na ah,khualzinmi khat tui duh a si ding khat a tuak nawn a,kidek zoulou in, Jesu a dia thilpiak a omlai pen a pe nawn ta hi.Huchiin, hong pai zel a, thilpiak ding nei nawnkei mah leh Jesu kei mahmah in ka muh matan chi a, hong pai zel, munkhat Kalvari kichi a hong tun takin, mipi tampi ana kikhawm ua, banghiam etnop khat en uh hin a kilang hi. Aman leng amipi lak a lut in ava en a, Aw, a zon zon Jesu kross a kilhden a om ni ana hi a,huai amuhin khasia in aomna mun ah a kapkap ta hi.Thilpiak ding teng lah beita, ka Jesu lah kilhbelh hita, bang ka chi mahmah dia chin a kingaihtuah tuah a, a tawpin, kava mu mongmong ding chi’n Jesu a naih pheita hi. Jesu sih ma deuh in, a kiang ah thu ava gen a ‘Aw Topa, ken ka hon zongzong a, guam tampi, mual tampi kan in ka hon delh delh a, lah ka hon phazou kei.Nang adia thilpiak ka hon tawi teng teng leng midang kiang ka pe beita, bang mah piak ding ka hon nei ta kei, hon ngaidam in’ chin a kap hup hup hi. Huchihlai in, Jesu ahong pau khia a, ‘Na hon thei kei maimai a ahi, na thilpiak te keikiang ngen mah ah ahi.Gamdai a nupi dangtak a om ‘kei’ mah ka hi a, Hotel a misual te vuak a ommitdel leng ‘kei’ mah ka hi a, khualzinmi dangtak a si ding na tuah pen leng ‘kei’ mah ka hi achi hi.A sun zom zel a “Ka dang takin tui na hon pia a, kep ngai a ka om in na hon kem a,ka gilkial in nekding na hon pia, na Pu kipahna a lut in’ achi hi.
2.PATHIAN IN BANG MEL PU HIAM ?
Naupang lianlou khat Pathian toh kimuh ut a om hi.Pathian omna a tenna inn a pan gamlapi ahi chih a gintak ziakin,a kawlzal ah a kimawlna khenkhat leh choklet bang zah hiam guang in, zing khat a hong kipan khia hi.
A inn apan inndang thum lel khawng a pelh nung in, mun awng(park) a pitek khat a hon tuak masa pen hi.Tua pitek in tutna khat a tu in, a kim a vahui om te a en en hi.Naupang pa leng tua pitek gei ah ava tu a, a kawlzal apan tui dawnding la khia in dawn din a hong kisa a,ahuchihlai in, piteknu mit hah apan a gil kial ahi chih a hon thei khia a,a choklet khat a pia hi. Pitaknu’n kipaktakin a sang a, a kipahna a nuihmai toh a langsak hi. Naupang pa’n Piteknu nuihmai kilawm asa lua a, a muh ut nawn ziakin ,dawnding tui leng a pia hi. Piteknu’n kipaktak a sang in, a nuih mai kilawm tak alangsak nawn hi. Naupang pa tua amuh in kipak semsem.
Huchibang in, nekna leh nuihna in hiai naupang leh pitek in hun nuamtakin a hon zang khawm ua, ahihhang in akihoupih himhim kei uhi.
Khua mial ding ahih tak ziakin,naupang pa gim leh tawl ta ahih toh,innlam a kik ding in hong kisa a,saulou chik a pai nung in hong leh tai kik in,tua pitek nu a hong pom hi.Pitek nu kipak lua in,nuih mai hiau hiau toh naupang pa a en hi.
Naupang sawtlou in a inn a hong tung a, a room ah lut ngal hi.A nu’n ava muh chian,naupang mel a kipahna om ahi chih a thei ngal a, ‘Bawi, tuni bang va hih na hia,na kipak mahmah chih na mel ah a kilang thei hial a ?’ chi’n a dong hi.
Naupang in ‘Pathian toh sun an kane khawm ua ahi’ chin a dawng hi.Anu’n bang mah dang a gen man ma in,naupang in ‘Amah ka muh khak laklak a nuihmai kilawm pen a nei’ achi zawmah hi.
Huchih hunlai mahin, pitek nu leng nuihmai sel vuallouh toh, a innlam ah a hong kik ta hi.
A tapa in ana muh chian lamdang a sa hial a, ‘Nu, tuni a bang va hih kha na hia,hichi lawmlawm a na hong kipah ?’ ana chi pah hi.
A nu’n ‘Tuni’n Pathian toh pam zek a Park ah choklet khong ka ne ua ahi’ chi hi. A tapa in bang mah dang agen man ma in ‘Ka gintak sang mah in a naupang mel kasa’ chih khum zawmah hi. -Julie A. Manhan
3.ANGEL IN BANG MEL PU HIAM ?
Ka gen khiak ngamlouh hang in,ka lau gu mahmah a, Coffee Shop a ding in ka pam a Hospital chu ka gal et a, zingchiang a huai a ki admit ding,nungzang guh natna ziak a ki-aat(spinal surgery) ding ka hita hi.
Ka ki atna ding doctor te gen dan in mun haksa tak leh ka natna hihdam haksa mahmah a a ngaih te lak ua khat ahi a, ahihhang in, ken bel ka lungsim in kinepna mahmah bel ka nei hi.A kal paita a ka pa vui liam khin phet ka hih toh, hiai leitung hinkhua a hon pipa om nawn lou zaw mah,van lam nga in ‘Aw Van Toupa, ka thawm hau mahmah a, hon ompih di’n Angel te khat bek hon sawl ve..’ chi’n ka thum hi.
Huchia Coffee shop nuse dia ka kisak lai in, nupi teksim mahmah sumpiakna mun lam manoh a hongpai ka mu hi.Ken leng sum pe ding chi’n tua nupi nung ah ka ding a, a kichei na puan kilawm tak-asan bang, a sandup deuh bang, a ngawng a aawh silk puan nem nilh nelh bang, a aang a a belh thil lem(brooch) leh a lukhu sandang silh selh te ka enen a, a tawp in ‘Hon ngaisiam dih Nu, kilawm hina mai chia, nang ka hon muh khak ziakin nuam kasa mahmah tuan ka chi’ka chi hi.
Tua nupi nu a hong kihei a, ka khut a khut nih a hon len phei in, hichibang in a hon gen hi ‘Nungaknou,vualzawl in om in,ka khut langkhat a lem ahi a,a langkhat siik toh hen belh maimai ahi. Ka khe te leng kei a taktak om kei, bawl tawm a hon bulh sak uh ahi.Huaiziakin, kholak pawt dia ka hong kisak chian,tua kasilh puan te ka taksa tung a ka lepkhit vek na din hun sawtpi ka pawimoh zel hi.
Ahihhangin, ka hih theih tawp suahin, hichibang in haksa tak a pan ka laknung in, ka hong pawtkhe thei zel.Hun tamzaw ah kuamah in a hon theipha ngei kei ua,tuni a nang hichibang a non houpih in mikhat tak mah non bang sak a,Pathian in hon vualzawl zel hen,nungaknou,A mah Angel te lak a khat na hi peuhmah ding’. Hiai teng gen a ahon paisan chian, kei natna leh lungkhamna bangmah ahi sam a chihna a hon neisak a,a thugen leh a omdan apan bangmah gen tam ngailou in,hiai nu chu ‘angel’ khat ahi peuh mah ding ka chi hi. -Tami Fox
(both taken from ‘A 3rd Serving of Chicken Soup for the Soul’):27.4.07.
No comments:
Post a Comment