Sialkop go sa zong kikhen thei

Taang Pauno ci a kithei masa, tunai ciang Lengtong Pauno ciin a kigen minthang zaw pen Zomi lak pan thu leh la siam mahmah khat hi a, laphuak a siam bek hilo in a sak zong siam mahmah ahih manin ama kammal khat peuh ngaih in bun diak a, a za mi peuhmah in khatvei zak bek tawh hun sa ngeilo uh hi. Kiza kikkik nuam a, kingai kikkik nuam hi. Tua banga a la phuak tampi tampi lak ah thugil tampi leh paunak tampi kihel a, kamgen (sayings) tampi zong kiphumcip hi. Tua thu leh la manpha kiphum te Zomi te'n damdam in leisung sum kiphum bangin tokhia, kalkhia saan ding uh hi.

Ama'n, 'itna hauhna sum leh pai' ana cih mah bangin khanglui te in zong 'sialkop go sa zong kikhen thei' na ci uh a, itna i cih zong a kho mahmah a kip mahmah hi tuanlo hi cih a genna ahi hi. Kingakna khat nei, thupi man, liat man, hauhman bek hi tuan lo in kingakna tuam khat na nei hih tuak hi.

Mi khat in, 'nungak tangval khawng zi leh pasal a neih ma ni/zan tan kuamah a hi nai lo hi,' ci hi. Pawlkhat in, 'vasa lenglai a kapkhia siamsiam hi mai hi' zong na ci uh a, 'uino leh numei a zol siamsiam hi' zong na ci uh hi. Itna hauhna sum leh pai bek hi tuanlo in, zolsiamna, kamsiamna, lunglutsak siamna te zong a kisam mahmah hi mawk hi.

It mahmah pong in ahi zonga itna laksiamlo cih sang, it mello napi a it banga kibawl siamte in mi lungsim zo zaw thei hi mawkmawk hi. Tua ahih manin 'a hun leh a mun ah gamtat siam' zong a lampi hoih mahmah khat hih tuak leuleu hi.

Mikhat in namdang pasal neih sawm a, 'pammaih si cia minamdang adingin,' ka cih uh ciang, 'ka kiten mazan tan uh kei ading nong pai nak uh leh hong zui ding, kua mah in nong tenpih nop loh pi uh,' hong cih ciangin kipau ngam nawnlo hi. Kitenna pen itna leh ngaihna hi masa khin tuanlo a, a kilemlem khat cih zong na om veve mawk hi. Hong deih dang om nawn kei kha leh kol leh vai hi ta leh, a ngalsau in, a ngal tom ta leh, a vom a kang zongin ciin a muh khat peuh a sutpi pom mai om hih tuak hi. Tua ahih manin itna a om loh hang zi leh ta pen kinei veve hih tuak hi.

A hauhmanin a kizui, a ki it masa hi tuanlo, a kilem khak mana kiteeng cihte zong a hauhna bek uh tawh kigawm in a teen khop tei uh hangin a lupna kikal vuah ling tampi kiphah a, delhphah nuai ah ling tampi in sun thei veve hih tuak hi. Tua ahih manin kiitna om khin tuanlo a, kingaihna bukim tuanlo hi. A hauhna uh tawh Sialpi Sialtal go in, khuasung mipi pahtawi in ankuang umpih in, nuamsa in, a minthang uh hangin, lupna tunga ling kiphah te hangin sawtpi lupkhop nuamsa nawnlo uh a, a kum tam deuh deuh leh nuamlo deuh deuh ahih manin amau ekthakna masa lam a zuatkik uh pen tawldam zaw ahi hi.

Tua manin Sialkop go a, a Ton leh Aih a bawlsa, a hausa leh mi nuamsa, nupi nuamsa tampi kikhen kik veve uh hi.

Hauhna hilo, liatna hilo, thupina hilo, akilemkha hang hilo hi. Khantawn kitenga, kitul i cihte atuate hang hilo a, sepkhawm siamna, lungsim kituakna leh pilna-haina kikim (compatible) cihte in nuntakna lampi totna ah lamnuam hong tawnsak in, lupna tungah patpuan kiphah in, ling leh vukvotte kiphah lo hih tuak hi. (Thei nai sam kei hang)!

A kitengsa te zong a kikhen theilo hi lo a, a kiteng nailo te zong a kikhen theilo hi lo a, a kiteng dingte zong a tuabang mah. Leitung pen ama kihei in a kihei diamdiam hi lel a, akihei tuak hun a, a kipelh hun om hih tuak lel hi. Tua ahih manin HI DING, HILO DING cih kigenkhol thei khinlo hi.

Tu leh ta suang, nupa nuam, a ki it penpen a kiteng, Sialkop go sa nangawn kikhen uh a, A Fairy Tale like Love Story a cih uh Prince Charles leh Princess Diana zong mi khempeuh muh in kikhen hilhial uh hi.

"The only thing constant in life is change" (A kikhel ngeilo khat bek om a kikhelna hi).


Hau Za Cin
Phuitong Liim