Dukan tuamtuam 6 mei in kang tum
Lamka, Dec 28: New Bazar Thangzam Road a T. Dongzakai Gangte Cinema Hall kim vel a kibawl dawr tuamtuam zan nitak zanlai dak 12:30 vel in mei in kang a, Thangzam Road lampang dukan 6 kang tum hi. Meikang Fire brigade leh a kim a mi omten kidelh huan in nasatak in phelh ua, mun dang peh manlou in phelh mit uhi. Huai a dukan/dawr bawlte bel Lalrempara of Saikot Ladies Shoes, Kamminthang of New Lamka, Variety Store, Hoihnu of Hill Town, Vegetable Godown, Boinu of D. Phailian Vegetable Shop, G. Gouthianlal of New Lamka, Shoes Store leh Roukung Gangte of Bijang Pharmacy ahi.
Fire Brigade apan thutut kingah dan in, hiai dawr kang a van kang se tengteng a sum a hisap in Rs.2,50,000/- vel man pha ding hi’n gen uhi. Meikang kipatna theih hikei mahleh electric hi ding a gintak ahi.
SSPP 60yrs Diamond Jubilee
Lamka, Dec 28: Siamsinpawlpi 60yrs Diamond Yearlong Celebration Grand Final Count Down hong tung ding January 3-13, 2007 sung, CCpur Govt. College a Diamond Hall ah zat hiding hi. Hiai hun zatn sung ah, Pu T.K. Hangzou, IDAS, Dy. Finance Adviser, NEC, Pu Doukhomang Khongsai, MLA, Manipur, Pu PC Lawmkunga, IAS, Principal Secy. Govt. of Manipur, Pu O. Ibobi Singh, IAS, CM Manipur, Pu H. Rouhlun, MLA, Mizoram, Pu Brig. Sarmah, AR, Pu V. Dongzathang, IRS (Rtd), Patron member, Pu V. Hangkhanlian, MLA, Thanlon, V. Thangzasiam, IAS, Pu T. Phungzathang, Minister Power, Manipur, Ambika Soni, Minister of Tourism, Delhi, Pu Vung D. Tombing, SSPP Patron, T. Hangkhanpau, MLA, Singngat, leh Pu Thangtawn, IAS, Director (TD) Govt. of Manipur ten Chief Guest, Guest of Honour, Functional President leh Chief Host hihna toh uap chiat ding uhi.
Ex-Gratia sum Rs.13,90,000/- hawm khia uh
Lamka, Dec 28: Kumlui Dec 21, 2006 ni a Tuila Bus accident a sihna tuak leh liam mi 68 te kiang ah zangna dopna (Ex-Gratia) sum cheque a piak khiakna Hq. Veng IB Road a KKL Complex ah tuni’n nei uhi. Tuni sunnung dak 2:30 in KSO/CCpur saina in Programme sau lou nei ua, huai hun ah Kuki Innpi Manipur, Kuki Innpi CCpur, KKL ban ah Government Official SDO/BDO Henglep CCpur leh Singngat te’n uap ua, DC/CCpur om louh ziak in Thuamkhansuan SDC/Hq in Cheque pekhia hi. Accident a si mi 16 sung kuante kiang ah Rs.50,000- zel pia ua, a liam serious deuh mi 22 te kiang ah Rs.20,000/- zel leh aliam serious lou deuh mi 30te kiang ah Rs. 5000/- pia uhi. Tuila Bus neitu Palmeswor in accident a liamte hospital a ki-etkolna ah Rs. 9 lakh val bang sengta hi’n kigen a, tuni’n aman siat batna dan in Vok khat gou in ankuang um uhi.
T.Ensong Bike in phu liam
Lamka, Dec 28: Tulel a BDO/Kakching T.Ensong(59) s/o (L) Damzachin of New Lamka College veng tuni sunnung dak 1:30 vel in Scooter atai lai Hmar veng Tedim Road ah Bike taiten phu kha in a lulak nasa in amhai a, tun Dist. Hospital lamka ah et kol in om hi.
Meshak L.Sinate luang hong tung
Lamka, Dec 28: Meshak Laltanliena Sinate(26) s/o Dartinhau Sinate of Rengkai Bible Hill, zanhal in New Delhi ah Inn sawng apan kia in si a, a luang postmortem bawl ahih nung in, tuni sunnung dak 2:30 in Rengkai khua puaktung in om hi. Aman New Delhi ah M. Com sinlel hi.
Thutut kingah dan in, Mr. Meshak Laltanlien Sinate bel Christmas lengkhawm pai hak, a omna gate kikalh man ziak a dai fencing tung apan lut sawm lai kia a si hi’n leng thutut kingah hi.
Heipi in akhe pek sat liam kha
Lamka, Dec 28: Nemchin (45) w/o Semmang of Tuingamjang tuni zing lam dak 11:30 vel in gamlak a a sing puakna ah Heipi in a vei lam khe pek sat bal kha in tun Dist Hospital Lamka ah etkol in om hi.
NREGS nasep khawl phot
Lamka, Dec 28: National Rural Employment Guarantee Scheme(NREGS) nuai a Job Card nei ten veng sung a nasepna a neih uh Christmas leh kum thak kizat ziak in khawl phot ua, January 2008 kha bul apan nasep pat sawm nawn uhi. Christmas ma in nasep tha man sum muta ua, khua khen khat a hausaten bel sum alak khiak zah uh hawm gailou pawl om chih thu kiza hi.
DC Imphal ah omlai
Lamka, Dec 28: Sumant Singh IAS DC/CCpur Official meeting toh kisai a Dec 26, 2007 ni a Imphal apai suk tuni tan Imphal ah om lai a, DC omlouh ziakin office kai tawm mahmah hi.
Congress in Foundation Day zang
IMPHAL DEC 28: Congress Party phuhkhiak nung kum 122 chin hun zatna tuni’n Congress Bhavan B.T. road Imphal ah, MPCC saina in neih in om hi.
Hiai hun ah Chief Minister O.Ibobi Singh, MPCC President Gaikhangam ban ah Minister leh MLA tamkhop leng kihel uhi. Himahleh, Congress sunga dissident MLA te bel, tulel a Delhi a om ahihziakun hiai hun ah kihel khalou uhi.
122 Congress Foundation Day zatna hun a MPCC Chief Gaikhangam in agenna ah, Congress sunga ngaihdan kibanglou leh kitheih siamlouhna bangmah omlou ahihdan gen in, Political party tuamtuam in mahni party buaipih lou a, Congress thu gen leh sak aneih utoh kisai in huchibang ten amau aa kibuaipih le uh hoihzaw dingin leng gen hi. Congress sung buaipih akul leh ami leh sate mah in buaipih zaw ding ahihdan leng genbeh hi. Tuni tan Manipur a Congress mipi gintak na leh muanna kembit toujel a paithei ahihna ah, hichibang om theihna party worker ten mipi muanna sukmang louh ding ahihdan leng MPCC President in gen hi.
Chief Minister O.Ibobi Singh in agenna ah, Congress sunga buaina kigen pen, party lian tak ahihban ah, inkuan lian khat ahihna ah, lungkim lou omthei mah ahihdan gen in, hichibang ngaihdan leh lungsim kibanglou te beisak na dia congress worker kuapeuh in mohpuakna nei ahihdan leng gen hi.
Tunitan Congress makaih sorkal in sepding achih te pichin toujel hidan in leng gen hi. Sorkal nasep tuamtuam khenkhat agenna ah, Pensioner te list leh sum lakna ding computerize vek hita a, huailou in, department tuamtuam a Manipur Govt. Employee’s List (MGEL) bawl khiak ziakin, fake appointment tamtak leng suikhiak ahihdan gen hi. Hichibang diklou tak a nasem te theihsuah ziaka, sorkal in kha tenga Rs 8/9 crores bang save theita ahihdan leng gen hi. Congress MLA te leh Minister te lak a kitheih siamlouhna om leleng huchibang te kihoulem theih ahihdan leng gen hi. Tuni a Congress Foundation day zatna hun ah, Dissident lam a om dan a gen, FCS minister Y.Erabot tel mahleh, Law & LA Minister Th.Debendra Singh bel tellou hi.
Highway Traffic sukbuai in om
IMPHAL, Dec 28: State Education Department a official khat pimang ahihna toh kisai in tuni in Imphal-Moreh Road NH-39 khaktan leh sukbuai in om a, kintak a official pimang a om khahkhe ding in phut uhi. Thusuak in ataklatna ah, December 15 in Education S nuai a Engineering Cell a sem Salam Indrajit Singh Section Officer meltheihlouh pawlkhat in Babupara, Imphal a Education Office gate mai ah pimang uh a, Police khut ah report in om mahleh, tuni tan dong a tanchin suikhiak hilou hi. Singjamei area lak tuni in naktak in sousang a, zingkal dak 6 apan hun sawttak lampi khak bing uhi. Manipur ah tukum sung chauh in Government official tamtak pimang in om ta hi.
Panchayati Raj Institution te a din convention
IMPHAL DEC 27: Manipur Legislalture Forum on HIV/AIDS leh Department of RD & PR kithuah in tunin, Imphal East Porompat a Panchayat Hall ah, Panchayati Raj Institution te adingin one day state level convention on HIV/AIDS neih in om hi. Hiai hun a khuallian Chief Minister O.Ibobi Singh in athugenna ah, kuapeuh in lauhuai asak natna HIV/AIDS kichi Manipur a singtang leh phaizang a kigawm, state dang toh teh a tam mahmah ahihdan gen in, hiai pen Manipur mipi adia vangsiat huai asak dan leng gen hi. Hichibang natna hoihlou Manipur a beisak nadia kuapeuh in mohpuakna neivek ahihdan leh, abiktak a mipi palai dia teelching ten nei uh hidan in gen hi.
MLA kuapeuh in mahni bialsunga hichibang natna in ma asawn louhna dia panla chiat dingin leng chialna bawl hi. Hichibang natna apat kivenna ding khota tuamtuam a Panchayati Raj institution in nei ahihman in, hichibang a sem ten mohpuakna naktak a lathak dingin leng chialna nei hi. President apang, Assembly Speaker Dr.S.Buchichandra Singh in agenna ah, khota te a HIV/AIDS bang hihiam chih leh hiai natna lauhuai ahihlam theilou mi tamtak omlai ahihman in, hichibang te kuapeuh in atheih chia Manipur khangtou theipan ding ahihdan gen hi. Hichibang natna deih huailou omlai teng society nuam hingei lou ding ahihdan leng gen hi. Hiai hun ah RD Minister Md. Alauddin Khan ban ah, Director Y. Neta leh MLA bangzah hiam leng kihel uhi.
Zu zuakna In haltum
IMPHAL DEC 28: Zan nitak dak 8 vel dingin, Sekmai Police Station huamsung Awang Leikinthai makha leikai a K.Kumar in zu azuak vadawn pasal nih lak ah, Ksh.Rajen @ Dhijo (43) s/o (L) Bheigo kichi zu zuakna mun a puksia in sihna tuak hi. Hiai toh kisai in mipi thangpai in Zu zuakna In tuni’n mei in haltum uhi.
Mikhat pimang nungin kaplum
IMPHAL DEC 28: Police apat thutut kingah dan in, zan nitak in meltheihlouh pasal nih in Sekmai PS huamsung Senjam Chirang Mayai Leikai mun a teng H.Boiboi Singh (34) s/o H.Kanhai kichi a In apat vapikhia uhi. Hichibang kal ah, Boiboi sisa in tuzingkal in Senjam Chirang loukon lak a muhsuah in om chih ahi. Hiai siluang tuni’n RIMS morgue a post
Mortem zoh in asungkuan ten la uhi. A sungkuan te gendan in, Boiboi kuamah toh
kinalou leh, helpawl kuamah toh kizopna neilou ahihna ah, kua thah hihiam chih leh aziak tualthat tuten puang dingin ngen uhi.
Views: 64
www.zogam.com
No comments:
Post a Comment