Editorial, Manipur Express April 15, 2008
Thukhunlui Genesis Bu i et leh Pathian in mihingte abawlkhiakna thu, sing leh guate ban ah, gamsate leh ganhingte a bawlna thu chiangtak in i mu hi. Tua tawh kitonton in, Pathian in a thilbawlte it petmah in mihingte ngial Amah batpih ding in abawl chih ahi. Ganhingte leh tungleng vasate kepbitna ah mihingte’n mawhpuakna liantak i nei chih Pathian thupawt ahi nawn hi.
Eite’tenna mun i etchiang in, Zo huihkhia siang omna mun leh mun thawveng tak ahi hi. Sing leh guate kichinna mun a om in, mun nuam mahmah leitung ah i tangkha uhi. I omna mun a nop mahmah ziak in gamsa leh ganhingte ading in leng ngaihnat huai mahmah ding hi. Huchi kawmkal ah ganhing tung ah thangtatna tam mahmah a, tua ban ah ngainatak a eite hon beltu gamsa leh huangvulh gantate hawldalh leh nekmang in a om mun mahmah hi.
BBC bang, ahih keileh, Animal planet leh TV channel tuamtuamte i et leh, mite’n gamsa leh ganhing tuamtuamte a itdan uh i muthei hi. Himahleh, eite hinkhua ah ganhingte lak a tatsiatna uang mahmah in, gamsate’n leng hon lawi hiaihiaita uh bang hi. Chidaih le, eilawi huhamdan bel, mite’n bird flu sikha lauh a lauh lai un, eilawi in akpul nasan ne in, i tai thei mahmah uhi. Leitung gam tuamtuam in mihingte’ hinna a matphat dungzui in, ganhingte hinna leng manpha mahmah a, mihing leh ganhingte bawltu kibang ahihziak in, ganhingte’n leng leitung a hintheihna ding in rights nei uh ahi, chi uhi. Dik leng adik ding hi.
Nidang hun in singtanggam mun tuamtuam ah gamsa tam petmah a, i pupa hun ua kipan in sa matzah chih khawng kitaitehna chikhat in nei uhi. Sa man tamte bang nungak lak khawng ah luck mahmah uh chih ahi. Hiai kitaitehna pen hoihmah adiam? Vualzawlna ahi na diam chihte kivel kul mahmah hi. I ngaihtuah chiang in, gamlak ah gamsa beng in asun azan in i om peih ua, Pathian deihlouh ahi ngei ding, i mit te vai in, sa beng a kuankhawm chiatchiat mi bangzah hiam in hinna i tanta ua, ei leh ei i ki kaplum khanak uhi. Hiteng thamlou in, nga betna ah leng, bomb tawh kuan in i khut, i khe, i mit te uh i chanlawh sek khanak uhi. Huaiziak in sabet, ngabet chih khawng Pathian deihlouhlam ahi kha diam chih ut-huai ton tam hi.
Nidang hun in i gam sung uah sa tam petmah in, a beng leng tam mahmah a, himahleh, 1997 kum a unau kal buaina ziak in kuamah gamlak a kuanman leng omlou in i sa betna thaulawng teng un ei leh ei i kikaptuah ua, gamsate ading in kipahna liantak ahi ding. Buai hong veng in, gamlak mah ah sabeng ding in i kuan ua, tampi petmah i man uhi. Himahleh tuni chiang in nidang a gamsa tamna i chihte ah leng gamsa muh ding hinawn talou in a langlang i delh ua, gamsate adia lauhuai leh ngaih huai nawnlou suak gawpta i bang uhi. Huaiziak in, i lak ah ganhingte itdan leng i kisinsak zekzek uh poimawh lua hi’n kilang hi.
Kolkata a Director of American Centre Mr Douglas G. Kelly in a genna ah mihingte lak ah hiamgamna uang deuhdeuh in, tungleng vasa leh gamsate ban ah luidung a ganhing tuamtuam leh ngasate bei hiaihiai in tuban kum 100 nung in khawvel ah ganhing tuamtuam ban ah miksi nasan a mangthangta diam, chi hial hi. Aman a genbehna ah, ganhingte tung a itna i neihlouh ziak un, i lak ah natna hii Avian Influenza, SARS, Ebola Virus leh tuberculosis-te hong om adiam chih ut-huai phial ahi, chi hi. Coalition Against Wildlife Trafficking (CAWT) ngial in mihingte sang a ganhingte it huaizaw ahi chi phial uh a, mihingte’n bukna ding leh kikepna ding inn nei ua, himahleh ganhingte’n ngaihtuahna nei in ki itna nei mahle uh bukna ding leh kikepna ding inn neilou ahih ziak un hehpihhuai mahmah uh ahi, chi uhi.
Huangvulh ganta tawh kisai enle hang, ui i vulhte khawng i gawh dek hiam, i zuakkhiak dek chiang un, kap ngaungau thei ua, tuabang mah in, vok leh bawngte nasan in a sihding lam uh theikhawl mah bang in, a ma ni khawng in ann duhlou bang in om thei ua, ngaihtuah banghiam bel nei uh ahi chih a chiang mahmah hi. Dr. Anupam Sarmah, Director WWF North Brahmaputra Project in a genna ah North East ah ganhing tung a tatsiatna uang diak a, kum 1996 apan 2003 kikal sung lel in Assam ah sai 70 leh chingpi tamtak thah in om ahi, chi hi.
Manipur in Iroisemba ah Zoo khat nei a, huai ah ganhing chi tuamtuam tamlou om hi. Ahihziak in gamsa kepna ding taktak in mun kiching neilou a, Keibul Lamjao ah Sangai kepbit in a om chihlouh gending pilua omlou hi. Huaiziak in, State Government nuai a Forest Department bang in hon ngai poimawh deuh henla, state sung ah wild life sanctuary/national park dinmun a dopsang theih ding khat khawng hon bawlkhe le uh chih deihhuai hi. Ganhingte ki-itdan leh kingaihnatdan atak a i muh chiang in en leng ganhingte tung ah hehpihna i neisam diam chih ginna i nei hi.
www.manipurexpress.com
Thukhunlui Genesis Bu i et leh Pathian in mihingte abawlkhiakna thu, sing leh guate ban ah, gamsate leh ganhingte a bawlna thu chiangtak in i mu hi. Tua tawh kitonton in, Pathian in a thilbawlte it petmah in mihingte ngial Amah batpih ding in abawl chih ahi. Ganhingte leh tungleng vasate kepbitna ah mihingte’n mawhpuakna liantak i nei chih Pathian thupawt ahi nawn hi.
Eite’tenna mun i etchiang in, Zo huihkhia siang omna mun leh mun thawveng tak ahi hi. Sing leh guate kichinna mun a om in, mun nuam mahmah leitung ah i tangkha uhi. I omna mun a nop mahmah ziak in gamsa leh ganhingte ading in leng ngaihnat huai mahmah ding hi. Huchi kawmkal ah ganhing tung ah thangtatna tam mahmah a, tua ban ah ngainatak a eite hon beltu gamsa leh huangvulh gantate hawldalh leh nekmang in a om mun mahmah hi.
BBC bang, ahih keileh, Animal planet leh TV channel tuamtuamte i et leh, mite’n gamsa leh ganhing tuamtuamte a itdan uh i muthei hi. Himahleh, eite hinkhua ah ganhingte lak a tatsiatna uang mahmah in, gamsate’n leng hon lawi hiaihiaita uh bang hi. Chidaih le, eilawi huhamdan bel, mite’n bird flu sikha lauh a lauh lai un, eilawi in akpul nasan ne in, i tai thei mahmah uhi. Leitung gam tuamtuam in mihingte’ hinna a matphat dungzui in, ganhingte hinna leng manpha mahmah a, mihing leh ganhingte bawltu kibang ahihziak in, ganhingte’n leng leitung a hintheihna ding in rights nei uh ahi, chi uhi. Dik leng adik ding hi.
Nidang hun in singtanggam mun tuamtuam ah gamsa tam petmah a, i pupa hun ua kipan in sa matzah chih khawng kitaitehna chikhat in nei uhi. Sa man tamte bang nungak lak khawng ah luck mahmah uh chih ahi. Hiai kitaitehna pen hoihmah adiam? Vualzawlna ahi na diam chihte kivel kul mahmah hi. I ngaihtuah chiang in, gamlak ah gamsa beng in asun azan in i om peih ua, Pathian deihlouh ahi ngei ding, i mit te vai in, sa beng a kuankhawm chiatchiat mi bangzah hiam in hinna i tanta ua, ei leh ei i ki kaplum khanak uhi. Hiteng thamlou in, nga betna ah leng, bomb tawh kuan in i khut, i khe, i mit te uh i chanlawh sek khanak uhi. Huaiziak in sabet, ngabet chih khawng Pathian deihlouhlam ahi kha diam chih ut-huai ton tam hi.
Nidang hun in i gam sung uah sa tam petmah in, a beng leng tam mahmah a, himahleh, 1997 kum a unau kal buaina ziak in kuamah gamlak a kuanman leng omlou in i sa betna thaulawng teng un ei leh ei i kikaptuah ua, gamsate ading in kipahna liantak ahi ding. Buai hong veng in, gamlak mah ah sabeng ding in i kuan ua, tampi petmah i man uhi. Himahleh tuni chiang in nidang a gamsa tamna i chihte ah leng gamsa muh ding hinawn talou in a langlang i delh ua, gamsate adia lauhuai leh ngaih huai nawnlou suak gawpta i bang uhi. Huaiziak in, i lak ah ganhingte itdan leng i kisinsak zekzek uh poimawh lua hi’n kilang hi.
Kolkata a Director of American Centre Mr Douglas G. Kelly in a genna ah mihingte lak ah hiamgamna uang deuhdeuh in, tungleng vasa leh gamsate ban ah luidung a ganhing tuamtuam leh ngasate bei hiaihiai in tuban kum 100 nung in khawvel ah ganhing tuamtuam ban ah miksi nasan a mangthangta diam, chi hial hi. Aman a genbehna ah, ganhingte tung a itna i neihlouh ziak un, i lak ah natna hii Avian Influenza, SARS, Ebola Virus leh tuberculosis-te hong om adiam chih ut-huai phial ahi, chi hi. Coalition Against Wildlife Trafficking (CAWT) ngial in mihingte sang a ganhingte it huaizaw ahi chi phial uh a, mihingte’n bukna ding leh kikepna ding inn nei ua, himahleh ganhingte’n ngaihtuahna nei in ki itna nei mahle uh bukna ding leh kikepna ding inn neilou ahih ziak un hehpihhuai mahmah uh ahi, chi uhi.
Huangvulh ganta tawh kisai enle hang, ui i vulhte khawng i gawh dek hiam, i zuakkhiak dek chiang un, kap ngaungau thei ua, tuabang mah in, vok leh bawngte nasan in a sihding lam uh theikhawl mah bang in, a ma ni khawng in ann duhlou bang in om thei ua, ngaihtuah banghiam bel nei uh ahi chih a chiang mahmah hi. Dr. Anupam Sarmah, Director WWF North Brahmaputra Project in a genna ah North East ah ganhing tung a tatsiatna uang diak a, kum 1996 apan 2003 kikal sung lel in Assam ah sai 70 leh chingpi tamtak thah in om ahi, chi hi.
Manipur in Iroisemba ah Zoo khat nei a, huai ah ganhing chi tuamtuam tamlou om hi. Ahihziak in gamsa kepna ding taktak in mun kiching neilou a, Keibul Lamjao ah Sangai kepbit in a om chihlouh gending pilua omlou hi. Huaiziak in, State Government nuai a Forest Department bang in hon ngai poimawh deuh henla, state sung ah wild life sanctuary/national park dinmun a dopsang theih ding khat khawng hon bawlkhe le uh chih deihhuai hi. Ganhingte ki-itdan leh kingaihnatdan atak a i muh chiang in en leng ganhingte tung ah hehpihna i neisam diam chih ginna i nei hi.
www.manipurexpress.com
No comments:
Post a Comment