Wednesday, April 16, 2008

Manipur Express | April 16, 2008

Innkang a si mi 5 te hihna theihchet hita

Aizawl, April-15: Champhai apan km. 54 a gamla Hnahlan a Tlangnuam Veng ah zan zingsang baihtak dak 2.00 vel dingin innkang ziaka mi 4 si chihthu om thuchiangzaw kingahthak dan in misi 5 hi uh a, nupi 1 leh atate 4 hi uhi. Misite bel Mrs Chawngpari(32) w/o H. Lalremruata banah a tate uh Miss Hmangaihzuali(20) , Lalromawia(10) , Lalchansanga (8) leh Lalrindika(7) hi uhi. Miss Hmangaihzuali bel Lalremruata leh azi masa’ tanu hi a, Lalromawia , Lalchansanga leh Lalrindika bel tulela azi Mrs Chawngpari tawh a tate hi’n kigen hi.Mrs Chawngpari in a gila om naungek kha 5 vel hipan tawh leng sikhawm hi.Lalremruata in a tanu class X pass khinphet maban zilna dingin Aizawl a admission bawl dia a zin laitaka hibang thiltung hi a, a inn uh AT type kangtum vekin innsung apan van bangmah lakhe manlou uh hi’n kigen a, meikang banga kipan hiam chih leng theihchet hinailou hi’n thutut kingah hi.Hnahlan khua ah inn 525 vel om a, a tamzaw grape huan(grape farming) bawla zek zong hi uhi.

Imphal West SP in helpawlte mobile zat number te taklang

Manipur ah helpawl group 39 om in India ah sangpen: Union Home Ministry
Imphal, April 15: Imphal West Superintendent of Police Kailun Lupheng IPS in tuni in Manipur a helpawl tuamtuamte zatsek Mobile number tuamtuam te mipite theihding in taklatna nei a, huai number apan phone ngahtu peuhmah in kintak a Police station naipen ah theihsakna peding in ngen hi. Tuabangkalah, Ministry of Home Affairs, Government of India in India gamsung ah helpawl tuamtuam 175 hial om ahihdan taklang ua, huailak ah Manipur state in helpawl haupen ahihdan taklang uhi.

Union Home Ministry in Mumbai khawpi apan thusuah abawlna uah, India gamsung ah helpawl kichi 175 om a, Manipur ah helpawl group tampen a, zom in Assam leh Jammu and Kashmir pangbaan ahi chi uhi. Union Home Ministry thusuak in ataklatdan in, Home Ministry in helpawl tawh kisai naktak in sui a, tuaban ah agency tuamtuam leh Intelligence source dungzui in helpawl 175 te India gam sung ah active tak in nasem uh hi’n gen uhi. Helpawlte’n India gamsung ban ah gamdang tanpha ah kizopna neih ut in line naktak in bawl uh a, Malsuah bial (northeast) ah genle sak tam petmah ahi chi uhi. India Malsuah bial a om State neuchik Manipur ah tulel in helpawl group 39 om a, Assam in 36 nei a, state leh central intelligence agency te’n helpawlte gamtatdan a kip akawi naktak in enzui lel uh ahi chi uhi.

MHA thusuak dan in, Jammu and Kashmir ah helpawl group 32 om lel a, huchi bangkal ah, numei chauh helpawl Dukhtaran-e-Millat kichi leng Kashmir ah om ahi chi uhi. Tripura ah leng helpawl 30 om ahihdan gen ua, Meghalaya ah 4, Nagaland ah 3, Mizoram ah 2 leh Arunachal Pradesh ah khat om ahi chi uhi.
China tawh ki gamgi North East India ah tulel in zalentak leh maingal tak in helpawl 115 te gamta lel uh hi’n Ministry of Home Affairs in taklang hi.

Tuabangkal ah, Imphal West SP L Kailun IPS in tuni in Manipur a helpawl tuamtuam te mobile zat number te mipite theih ding in taklang hi. Tua thusuak dungzui in, hiai a nuai a number te tungtawn a call mi himhim in pick up lou a, police station naipen a theisak ding in leng ngetna leh theihsakna bawl hi. SP thusuak dungzui in, mobile number 41 te ahihleh:

9436087464, 9436038020, 9436022964, 9436020938, 9862707168, 9856181314, 9862490912, 9856152116, 9862900648, 9856358850, 9856507361, 9862923162, 9856907149, 9436871856, 9862099873, 9856759590, 9856357290, 9862831450, 9856165968, 9862917606, 9856474782, 9856940485, 9856940488, 9436662594, 9862593630, 9436033898, 9862771950, 9436178469, 9856762882, 9856233198, 9856849290, 9436871856, 9436689575, 9436033033, 9856563616, 9856563619, 9856563618, 9856563617, 9856563615, 9856563614 leh 9862638127 ahi hi.


Local News:

EE akipan in SE ah kaisang

Aizawl, April-15: Mizoram state govt nuaia Electricity/Power Deptt asem T. Thangzagin,EE(Project Division) tunai chin in SE(Superintending Engineer)/Planning in kaisang a, April 9, 2008 in SE(Planning) hihna join-ta chihthu om hi. Huailou in Mizoram a Class XII examination result suak a, huaite lak ah Lalmuan Guite in 1st division ah pass a, Mizoram state pumpi adin Political Science subject ah mark mutampen hi.Huailouin mitdel kawma exam Lianlaldin in 2nd division in pass chihthu om hi.

Medical team zinkhe nawn ding: Additional Director in Lamka hongpha

Lamka, April-15: Dr.M.K.Sharma, Additional Director(Health) in tuni zinglam dak 11 in Lamka hongpha a, Dr.S.Gouzalam Vaiphei, CMO leh Doctor te tawh CMO office ah houlim uh a, huai ah tulai a Parbung area a natna hii(epidemic) leng chih thuthang tungtang genkhawm uhi. Meeting atel Medical Officer-te’n Parbung area ah medical team bangzah veihiam hawh mahle uh epidemic bangmah omlou a, January -April 2008 sunga naupang leh pitek- putek site natna hii leng ziak hilou in natna tuamtuam a si hizaw in gen uhi. CMO office apan report dan in January apan tutan in Lungthulien ah mi 8 si a, Senvon ah mi 2, Damdiai ah mi 2, Pherjol ah mi 3, Leisen ah mi 2 leh Tinsuong ah mi 2 si hi’n kigen hi. Addl Director in apoimawh bang a zatding a damdoi hunkhop a puakte leng CMO khut ah pia hi’n kigen hi. Aman epidemic bangmah omlou ahihleh, kipahhuai sakthu gen a, Medical officer leh a staff te’n a nasep uh sunzom zel ding in theisak hi.

Huailouin Addl. Director thupiak dungzui in Dr.F.Thienkhogin, DMO; Dr.Arke Singh,Physician leh Dr.Kameshore Singh,Child Specialist makaih in April 16,2008 in Medical team te’n Parbung area zuan nawn ding uhi. Amau’ damlou tuamtuam en ding uh a, hong tunkik hun ding ubel theih hilou hi.


CEO in Rickshaw pute theisak

Henlianthang Thanglet, Chief Executive Officer in thusuah abawl Press a kimu in ataklatdan in, Lamka khawpi sung a Rickshaw pu tamtak in registration leh a license uh renew hun ngaihsak lou ua, March 20 2008 tan a sufel dia theihsak himah le uh, a hun behlapsak hi ua, April 30 tan a sufel teitei ding in theihsakna bawl hi.


Sepna apan kaisang


State Bank of India Shillong circle nuai asem tamtak in departmental examination tungtawn a promotion angah utawh kiton in SBI Palel a Clerk semlel Henkhogin Gangte leng Assistant Manager ding in kaisang a, Jorhat ah a va ki report zawh chiang in, a posting na mun ding piak hiding in kigen hi. Huchi kawmkal ah, Imphal Main branch a semlel Timmy H Gangte leng Assistant Manager apan in Deputy Manager ah kaisang a, SBI Ccpur Branch ah hong posting hi.


Bal Kendra nasep hong en uh

Lamka, April-15: Tuni zinglam dak 11 in L.H.Dhawan, Consultant Bal Bhawan/New Delhi; N.S.Dishat, National Bal Bhawan/New Delhi leh S.Shert Kumar. Joint Director (WCD) Department of Social Welfare/Manipur te’n tuni zinglam dak 11.00 velin Lamka hongpha uhi. Amau’ Rengkai Government High School a Bal Kendra nasep etkhiakna nei ua, nasep hoihsa in kipaktak in nitaklam in Imphal ah kiknawn uh hi’n kigen hi.


Mizoram a Tanklorry Drivers Assn-te strike

Aizawl, April-15: Mizoram a Tanklorry Driver Association pawlin Assam a tax a sun uh a tamluat ziaka lungkimlou in tuni apan strike uh a, Mizoram ah thautui haksatna thupitak a tun ziakin tuni in Haukhum Hauzel,IAS, Chief Secretary to Mizoram makaihna in genkhawm uh a, Tanklorry driver-te’n strike tawpsan a thautui ngeina banga paw ding in ngen uh a, hileleng Driver pawlin dawnna bangmah bawl nailou uhi. Assam in Mizoram Tanklorry-te apan tax a lak uh a receipt a sangin a sum tamzaw sek a, huai tungtang ah driver leh Gari neite kalah leng kitheihsiamlouhna tun hi’n kigen hi.


Chief Secy makaih in meeting ding

#Jarnail Singh,IAS, Chief Secretary makaih in April 16, 2008 zinglam dak 11 in Secretariat Conference Hall ah Immunisation Strengthening Project meeting om ding a, huai ah Lamka apan Dr.S.Gouzalam Vaiphei, CMO/CCpur, D.Khuala Vaiphei, DPM leh official khenkhat huai meeting ah vatel ding uh hi’n thusuak om hi.


Guta- te’n Fibre optic gui gumang

#Meltheihlouh guta kuate hiam in Bijang leh Hmar Veng kikal a culvert ah BSNL fibre optic gui nibangzah hiam paisa in guta pawlin gumang uh a, zan akipan in BSNL department te’n bawl uhi. Fibre optic gui mang ziak in SBI/CCpur Branch te’n transaction hihthei lou uh a, a zawhma uh transaction bawl theilou ding uh hi’n kigen hi.


JSY ading list submit theihta

##District Hospital leh Lamka Nursing Home ah Febuary & March 2008 sung a nauneite’n JSY ading in a list kimtak in DFWO office ah submit theih hi’n thutut kingah hi.

SUNNA:

Pauchinlian (34) s/o Kamkhenthang of New Lamka GCK veng, Cancer natna in tu zingkal dak 1:45 in si a, nitaklam in CYA Hanmual ah kivui hi.

IMPHAL NEWS:

KNF 2 leh HNA khat mankhia

Imphal, April 15: Imphal East Police thusuak kingah dan in, zan nitaklam dak 4:30 in Sanjenthong leibul ah Imphal East Police Commando te’n KNF member nih leh HNA member khat mankhia uh hi’n kigen hi. Matkhiak aom KNF member te ahihleh, Letkhokam Haokip @ Leet (33) of Tuibuong Village, CCpur leh Nehsei Haokip (38) of Kohchung Village, CCpur te hi ua, HNA member ahihleh, Henpao Haokip (38) of Khawlmun Village, CCpur hidan in kigen hi. Amau’ ahihleh finance department a om chiat hidan in Police thusuak in taklang hi.


Mipi’n KRA (U) member nih mankhia

Imphal, April 15: Police thusuak kingah dan in, tu zing dak 8 vel ding in National Highway 39 in a totkhak Sekmai Bazar ah KRA (U) member 4 in gari taivel te apan in tax khon ua, huai ah truck te apan in kumkhat tax ding in Rs 4,000 ngen uhi. Truck hektute leh KRA (U) member te naktak in kisel ua, truck driver te’n tax su kiam ding in ngen uhi. Leikai mite’n huaithu a zak utawh kiton in kidelh huan in, KRA (U) member nih manman ua, nihte taimang man uh hi’n kigen hi. Mat a om mi 2 te ahihleh, S/s Sgt Khundom Boboi @ Boi (28) of Pukhao Laithem leh Lance Corporal Potsangbam Leibakchao @ Tomba (36) of Phukhao Terapur te hidanin kigen hi. Buaina kawmkal a kihem man mi nihte ahihleh I Sony (22) leh Yaima @ Nanao (23) te hi’n gen kigen a, amau KRA (U) ah S/s Corporal tuak len uh hi’n kigen hi.


Lou kituhna ah si luang 1 kikham

Imphal, April 15: Tu zingkal dak 7 vel ding in Mayang Imphal suahlam a om unau nih a pa uh gou kituh kawm in, a tuilou tungtang uah kiselna liantak piang a, huai ah Md Bur-a-uddin @ Apik (24) s/o Md Siroj Ahmed in a pa neuta Md Sabir Khan (18) s/o Md Tomba of Miphu Tentha thau in kaplum hi. Mipi thangpaite tuni in Apik te building inn va satsia ua, a tung leh a bangteng leng sat chim vek uh hi’n thusuak in gen hi.


GoC 3rd Corps in Imphal pha

Imphal, April 15: Lt General MS Dadwal AGSM, VSM, GoC 3rd Corps in tuni in Imphal hongpha a, Major General DK Chenggapa AGSM, IGAR (South) in amah ana vaidawn hi. Lt General Dadwal leh Maj General Chenggapa te’n Manipur law and order dinmun, security te mawhpuakna ban ah, thu tuamtuam genkhawmna nei in, nitaklam in Rangapahar, Dimapur zuan in kiknawn hi.


Imphal-Moreh ah gari tainawn ding

Imphal, April 15: Tuni in Imphal – Moreh Transporter JAC pawl in Sumang Sangleen, Palace Compound ah meeting poimawh tak nei in, huai ah helpawlte ziak a Imphal to Moreh transporter te’n haksatna a tuahte uleh strike aneih tungtang uh genkhawmna nei uhi. Helpawlte’n gari subuai nawnlou ding leh tax tanpha dong nawnlou ding uh ahihdan a hilh utawh kiton in zingchiang (April 16) apan Imphal-Moreh passenger gari taisak nawn ding in lemsakna bawl uhi.


Gorkhali Youth Association in panpihna pia

Aizawl, April 15: Tuni sunnung dak 12:00 vel ding in Mizoram Gorkhali Youth Association te’n Mautam panpihna ding in Rs 20,410/- Home Minister Tawnluia khut ah piakkhiakna nei uhi. Tawnluia in agenna ah, a neu pen apan lianpen tan, Saptuam leh khawtang vaipawte ban ah pawl tuamtuam apan mautaam douna ding in kuapeuh in panlak ut vek ahihdan gen a, tuni tan in civil society leh saptuam tamtak apan panpihna honglutta ahihdan gen in, Government in leng a hih theih tawp suah a, suah tou zel ding ahi chi hi. Thil piak piakna hun ah, H.B. Thapa, President, MGYA, Tamlal Lohar, Vice President, Purna Prasad, Treasurer leh makai tuamtuam kihel ua, C.Ralkapa, Director, DM & R leh Malsawma Hlawndo, Under Secretary te leng kihel uhi. Home Minister Tawnluia in agenna ah, Government hilou mi phatuam ngaite apan mautam panpihna ding in Government in Rs 5,13,418.00 muta ahihdan gen a, huai in antang bag 145 leizou a, media tungtawn a campaign bawlna ding in Government in Rs 12,300.00 sengta ahihdan leng gen hi.

EDITORIAL:

Tuni Thupi: “TOUPA lah i vaihawmpa ahi a, TOUPA lah dan hon pepa ahi a, TOUPA lah i Kumpipa ahi: aman a hon hondam ding hi.” - Isai 33:22

Lamka mipite mamawh: Damdawi inn

CCpur District in Mautaam(bamboo flowering) ziak a kialpi i thuak uh phawk kawmkawm thou in, Lamka mipite mamawh mahmah Damdawi inn leh damloute adia panpihna bang om thei ding hiam chih tungtang genkhawm ut huai isa hi.

Tulai tak in mipite lak ah i gam in bang a mamawh pen a chi in kidong lehang, tamtak te’n antang i chi dingua, dawndan kibangvek kholkei mahleh, mautaam ziak in antang chi a adawng tampen ding in ngaihsun a, huai kawmkawmin antang lam saipawl om ding a, damtheihna tawh kisai leh education lam poimawh ahi chi pawl leng om ding in i ngaihsun hi.

Civil organization tuamtuamte ban ah mipi palaite leh a nominee-te’n gilkial a sidingte hutkhiaknang a PDS antang leh item tuamtuamte a sai kawmkawm un civil society dang te’n banglam ah pan i lathei a chihte kivel hun mahmah hi. I gengen taksa mah bang in eilawi bel lom pai chiing mahmahte i hi a, antang a i buai leh i vek nautang a saivek sawm in buai noinoite ihi ua, mawhpuakna kiguansiamlou Zosuante i hi de aw chih hun om sek hi.

Tuni in Lamka zang ah mipite adia poimawh mahmahte lak a poimawh diak i sak thil khat genkhawm lehang -i theihchiatsa mah bang in damdawi inn ginatak leh damloute adia panpihna leh hamphatna om theihna dia state Solkar in pan alak hun mahmahta hi. Mautaam ziak in antang i tasam ding a, NREGS a sum i lawhkhiak sunsunte antang man ah hong bei ding a, damlouhna a ki-etkolna ding sum i neikei ding uh chih muhkholhsa ahi hi

Bangzahta a damdawi inn poimawh hiam chih mi damtheite’n ngaihsun kha khollou ding ua, himahleh, damlouhna tuakte’n damdawi inn poimawhdan News a gelh hetlouh in leng thei mahmah uhi. Manipur adia khawpi nihna a om i hih ngal leh damdawi inn bang leng lupna 500 omna tanbeek i neih uh poimawh hi. Infrastructure tawh kisai in Zomi Human Rights Foundation in National Human Rights Commission a ngetna abawl dungzui un hospital vanzat ding kumlui apan tuni tan in tamkhop hongtung hi. Huai kipah kawm in, lupna behlapna ding tawh kisai in panla theite’n la le uh chih huai hi.

Lamka a damdawi inn (District hospital) i hawh leh, sanitation tawh kisai leng ki sam mahmah a, ek inn, zunbuk gina omlou a, lupna leng kidaih lou in damlou/naupang a tuamtuamte damdawi inn varanda ah lum phengphung mawk uhi. Tuate genlouh in damdawi inn gim himhim leng namse mahmah in, ekbuk kongkhak ahong a om chiang in ward sung a om sung hat loute ading in luak zoihzoih theih ding tanpha in om hi. Huai ziak in, Health Department in damdawi inn kemsiang zoulou a, toilet-te puah zoulou ahih vet ua leh, private company khawng a piakkhiak suk a, ahihkei leh, Sulabh Toilet Complex khawng bawlkhiak a, sum seng a dailen leh kisil bang ut-huaizaw hi. Thuneitute’n enkai le uh chih deihhuai mahmah hi.

Tuaban ah, Mizoram Govt in zan zek in damlouhna tawh kisai in nautangte adia hamphatna thupitak om ding scheme hoihpi khat honpan khia uh ahihdan puang uhi. Mizoram Govt in a patkhiak bang scheme hihiam i chih leh, mipite damtheihna kepbitna ding health care scheme ahi chi lel ua, a sung ah thil tamtak tunkhawm a theih ahi. Mizoram State Health Minister R Tlanghmingthanga in a genna ah April 1, 2008 apan hiai scheme zatpat hi a gen in, innkuan khat in kum khat in damlouhna ziak in Rs 1 lakh tan ngah thei ding uh chi tazen hi. Central, State leh Corporate hiam a sepna neilou, medical reimbursement nang neilou himhim mi nautang khawsak haksa mahmahte’n hiai hamphatna ngah theiding a, a biktak in sepna neiloute khualna ziak a hiai bang scheme patkhiak a om ahi chi in R Tlanghminthanga in gen hi. Mizoram Govt a pahtak huaina nawnsawn khat ahihleh, hiai scheme ading in state annual budget apan Rs 50 crore sepkhia ua, Reliance General Insurance Company Limited tawh pangkhawm in, hiai na semsuah ding uh chih hinawn hi. Mizoram Chief Minister Zoramthanga nuai ah Mizoram Health Care Society kichi kiphut khia in, hiai scheme implement na ah dinmun poimawhtak nei ding ua, mi zawng leh gentheite panpihna piak masak hiding uh ahihdan gen uhi.

Thil omdan i et vengveng leh Mizoram state in a hihtheih leh en bangziak a hih theilou ding i hi ua chihte ngaihsut tham ching hi. Ei lawi bel Mizoram sang aleng tuantual zawthamte i hi ua, X-ray/CT Scan leh adangdang gentaklouh ki-etsakna man leng pekhop teekte i hi uhi. Damdawi inn ah operation i neihdek chiang un Generator ading thautui kitawite i hi ua, huai leng neih leh neihlouh genlouh in a poimawh ziak in i lei uh ahi zaw hi. State dang a medical check up a paiding chih bang van a gah tawh kibang in i omlai ua, tuaziak in, State Govt ah a nawhthei te’n nawh a, Manipur Health Care Society khat dinkhiak a, Rs 1 lakh gentak louh Rs 10,000 tan bek damloute adia ngahtheihna om leh damlou tamtakte ading in damna hong suak hial lou ding hia i chi hi.
-------------------------

ZILLAI
General Headquarters
(Vaiphei Students’ Association)
PO Box-55, Churachandpur – 795128, Manipur.


PRESS RELEASE
Churachandpur, The 14th April 2008.

The Zillai (Vaiphei Students’ Association) General Headquarters, Churachandpur, Manipur strongly condemned the life attempt and kidnapping of Pu Lunjapau Vaiphei, Principal, Moreh College who was an Ex President Zillai GHQ by unidentified group while he has done no wrong.

The Zillai GHQ express its sincere thanks and gratitude to the leaders of KSO HQ, and AMSU Hq for their tireless efforts to bring about justice and communal harmony in the State.

The Zillai appeals to the State Government, NGOs and Civil Societies to extend full cooperation in booking the culprits & prevent unwanted occurrences in future.

Sd./-

(D KHUALA VAIPHEI)
General Secretary
Zillai General Headquarters.
-----------------------------------------------

Churachandpur District Private Schools Association (CDPSA)
Churachandpur, Manipur.

Press Release
The 15th April, 2008

This press release is made by the Churachandpur District Private Schools Association (CDPSA) in the interest of the students and for the information of the public and different organization/association operating in the district. That,

1. Henceforth, no organization/association can involve students of CDPSA member schools in mobilizing public movements and as a tool in organizing strike, demonstration, dharna etc. however, if the proposed movement is a student related issue and students involvements cannot be avoided altogether a written request should; be made to the chairman and secretary of CDPSA, at least one week ahead of the scheduled programme. The CDPSA will deliberate on the reason for the movement and any decision taken by the CDPSA would be binding on the member schools.
2. further, no organization/association operating within and outside Churachandpur district can impose/collect fund/donation/fees etc to the member schools of CDPSA.
3. No parents, teachers or Principals and Headmasters would like the seat of learning to be vitiated or abused in such a way that the precious time of one’s life within the portals of the institution is wasted for purpose other than one’s enlightenment.

It would be more than welcome to the organization if our leaders, eminent educationists and organization working for the welfare of the students join hands and fight against the insulation of the campus from the pernicious influence of destructive politics.

Let us not, for heaven’s sake, inject the poison of unruly behavior in the academic life of the leaders of tomorrow. Let the young grow untainted by the scars of the present day strain of politics.

“Let our students seek education in an undisturbed environment”

Sd/- Than Zamuan Tombing Sd/- R Tusing
Chairman Secretary
Churachandpur District Private Schools Association (CDPSA)

www.manipurexpress.com

No comments:

Post a Comment