Manipur ah March 2008 tan in sepna zong 6,05,840 om
Imphal, April-22: Manipur a Employment Exchange tuamtuam ah sepna deih ziaka min pelut(registered job seekers) March, 2008 tan in 6,05,840 om a, huaite lak ah pasal 4,35,498 hi a, numei 1,69,342 hi uh chi’n Directorate of Employment Exchange, Lamphelpat in thusuah bawl hi.
District tuamtuam a Employment Exchange omte ah sepna deih ziaka min pelut zah bel Imphal West ah 2,08,233 hi a, huaite lak ah pasal 1,44,389 tel a, numei 63,844 hi uh. Imphal East ateng 85,587 hi a, huai lak ah pasal 60,707 leh numei 24,471 hi uhi. Thoubal district ah sepna zong a min pelut teng 88,458 lak ah pasal 69,381 leh numei 19,117 hi uh a, Bishnupur district ah 55,261 lak ah pasal 40,421 leh numei 14,840 hi uhi.
March 2008 tan in CCpur district a sepna deih a min pia 54,311 hi a, huai lak ah pasal
40,950 leh numei 13,361 hi uhi. Ukhrul district ah sepna zong mi 24,075 om lak ah pasal 16,836 leh numei 7,239 hi uh a, Senapati district ah sepna zong mi 44,292 om lak ah pasal 32,219 leh numei 12,073 hi uhi. Tamenglong district ah sepna zong mi 20,575 om uh a, huaite lak ah pasal 14,268 leh numei 6,507 hi uh a, Chandel district ah sepna deih ziaka min pelut mi 20,675 lak ah pasal 14,168 leh numei 6,507 om hi.
Special Employment Exchange for Physically Hadicapped Persons ah March 2008 tan in mi 2,171 in min pia uh a, huaite lak ah pasal 1,484 leh numei 687 tel uhi. Huchih hunsung mah in Canchipur a UEI & GB ah pasal 2,444 leh numei 2,594 kigawm mihing 5,038 in min pelut uhi.
LOCAL NEWS:
CMO makaihna medical team hongtung
Lamka, April-22: Dr.S.Gouzalam, CMO/CCpur makaih in April 18,2008 a Tipaimukh area a zinkhia Dr.T.Hartlang DFWO, Dr.P.Nengzadou. District TB Officer, Dr.Khenzamung Samte, MO leh Medical Staff te zan in Lamka hongtung uhi.CMO makaih in Medical team te’n Pherjol, Damdiai, Taithu, Parbung, Lungthulien, Senvon, Situm, Leisen, Rovakot leh Tinsuong khua pha uh a, epidemic omleh omlouh vasui uhi.Doctor hongtungte apan kizadan in naupang tamtak awmna(pneumonia), sungkhawh leh santen asi ahi hi’n gen uh a, hileng (epidemic ) omlou hi’n leng thuchiang thei uh hi’n gen hi.
Takvom ah inn 2 kaangtum
Lamka, April-22: Takvom khua ah zan sunnung dak 1:30 vel in Hausa incharge G.Donglam s/o Sohmang leh Upa V.Tualkhanlian s/o Chinkhotuan te tenna inn mei in kaangtum dimdem in bangmah lakkhiat man omlou hi’n thu kiza hi.Thu kizadan in khawsunga nasemthei teng lou ah mangtom in kuankhia uh a,naupangte kia omlai in G.Donglam tenna inn mei akang naupangte’n mu in “Hausapa’ inn mei in kaang” chi’n kikou ua, agei a Upa.V.Tualkhanlian’ inn leng pehphei in kangtum hi.Khawsung mi loukuante’n a theih un lou apan delh huan ua, inndangte peh manlou in panla thei uh hi’n thu kiza hi. Meikang koi akipan hiam chih leng athei kuamah om tuanlou hi’n gen uhi.
Mi 2 a sepna ua pan kaisang
Lamka, April-22: T. Khaikhanmuan s/o J. Thangzalian of Bungmual in hun sawt kuamtak SBI, Belgaum(Karnataka state) ah Assistant Manager alet nung in departmental promotion examna a lawhching in Manager in kaisang hi. Tualou in, IIT (Delhi) apan B.Tech zou Justin Thonzakhup s/o Rev N Phungzapao of Bungmual in Mumbai a Reliance Company a Dy. Manager alet nung in tu’n Manager ah kaisang chihthu kiza hi.
Workshop & Social Audit kisinsakna
Lamka, April 22: Upper Lamka ah YPA Hall ah April 24-25 in Workshop & NERGS tawh kisai a Social Audit kisinsakna(training) training t om ding hi. April 24 zinglam dak 10.30 in Lamka, Tuibuong, Samulamlan, Saikot leh Sangaikot TD block te’n Workshop & training nei uh a, April 25 in Tipaimukh, Vangai range, Thanlon, Henglep leh Singngat TD block te’n nei ding uhi. Huai training ah khawteng a Vigilance & Monitoring Committee a Chairman & Secretary teng banah Village authority a Secretaty teng tel ding a theihsak hi uh a, TA/DA leng piak hiding uh chihthu om hi.
STD buai : Internet kisia
Lamka, April-22: Lamka ah April 19,2008 nitaklam akipan in BSNL-te zat Optiical Fibre(cable) hoihlouhna omziak in STD line buai in Internet leng kisia a, huaiziakin SBI/CCpur Branch ah leng zan apan tuni tanpha transaction om theilou hi. SBI te’n BSNL ah report bawlpah mahle uh tuni’n Kwakta area lak ah a siatna om chih suikhe pan uh hi’n thutut kingah a, April 23, 2008 in Imphal apan technician-te’n hong bawl hoih theih uh kinep huai chih hilai hi.
Bishnupur apan electric lading uh
Lamka, April-22: Samulamlan Block sung a om Tlangnuomphai,Maojang,Gellienjang leh New Dampi khuate’n Electricity Deptt/CCpur Divn apan Transformer a ngahlouh ziakun kumkhat vel electric meivak mulou uh a, tu’n Electricity Deptt/Bishnupur Division in transformer pe ding uh hi’n gen uh a, tunung sawtlou in electric meivak mu ding a kinem uh ahihdan thutut kingah hi.
SSC tungtawn in mi 2 in sepna muthak
Lamka,April-22: Ministry of Statistics & Programme Implementation, Govt of India nuaia Statistical Investigator(Grade-IV) of Subordinate Statistical Service(SSS) semding lakna ding in Staff Selection Commission(SSC)saina in June 28,2007 in open competitive examination ah candidate 453 lawhching uh a, huaite adia interview om Nov 12,2007 in a result suak a, huaia lawhching candidate 227 sepna piak dingin SSC in recommend hi. Huaite laka singtangmi 2 anuai ate tel uhi.
1. Joseph Lalremruot (Roll 4210335)
2. Henminlun Haokip(Roll No. 4210420)
NEIGRIHMS apan lawhchinna ngah
Lamka, April 22: Central Government in Shillong a hospital a bawlthak North Eastern Indira Gandhi Regional Institute of Health and Medical Science (NEIGRIMHS) a staff Nurse sem ding lakna ding a inyerview om a result puankhiak hi a, Lamka lam mi anuai ate lawhching uhi.
1.Chistina Hmangte 2.Esther Lalhmangai Sinate, 3.Lamkhochong Haokip, 4. Kaphnuni
5.K.Vanlalruati,6.C.Lalrinawmi,7.Vanlalhmangaihzuali 8.Kimhatching, 9. Lailienching, 10.Mr. S. Paominlen Haokip, 11.C. Lallawmthari 12.Reheboth Keivom Hmar, 13.T.Ngainianching, 14. Roselyn Lalthangkim 15.Laltanpuii Pautu, 16.Nenghoikim Lhouvum 17.Goungaihlian Hauzel, 18.K. Lalrinchhani 19. Jessie Rose Haokip, 20.B. Vanlalmangaihi 21.Darsangmawi, 22. F. Laldingpuii 23.Laldangloi, 24. Lhingneilam, 25.G. Niangmanvung Paite 26.C. Vannunsangi 27.K. Zosiami 28.Kimsanmuan 29.Chongpilhing Sithlou 30. K. Eden Parmawii 31.Hilda Zarzokim 32. Niangbiakching 33.C. Thansangpuii 34.T.Nemngaihvung 35.Nancy Thangneizo 36.Kimi Vaiphei 37.Lhingkhovei Chongloi 38. Lamneithem Kipgen 39. Kholneivah Kipgen 40.R. Lalremtluangi 41.C. Biaknungi, 42.Lalhmunsiami Hlondo 43.Lalparvul, 44. Lallawmtluangi, 45.H. Saizampuii, 46.Hoihneikim leh 47.H. Dimsawmcing hi uhi.
Gospel Audio-Visual Album
# Lucy Lhinghoikim Kom d/o L. Akhup Kom in Pathian pahtawina la a sak “Hallelujah Volume-II” kichi Gospel Audio Visual Album thak April 27,2007 sun dak 12.30 in
Synod Hall, IB Road,Lamka ah hon(release) hiding hi.
Thangkai mi 1 in vua
#Thangkai(50) s/o (late) Jamlet of Salbung,tulel a Thingphai a tuilou bawl a omlel, tuni zing dak 6 vel in Paukhai of Boljol tawh innsungthu ah kiselbuai uh a, Paukai in vua in a a ban guh veilam kitan a, nakguh veilam leng nasa in tu’n Hospital ah om hi.
Culvert a niin omte kang
# Tuni nitak dak 7.20 velin Phailian bazar a Chiangkon-lui a culvert a niin omte mei in kang a, Fire Brigade te’n delhpah uh a, mipi in leng kidelh huan in sawtlou sungin meikuang phelh mit uhi.
Dansiangthou in kinei ding uh
# H. Jamginmuan s/o (late) H. Vungzagin of Hebron Veng,New Lamka leh Miss Ningngaih d/o Upa T. Sumzamang of Siloam Veng,Bungmual saptuam dansiangthou in April 23,2008 zinglam dak 10.00 in EBCC Hebron, New Lamka biakinn ah kinei ding uhi.
JSY sum kihawm lel
# Dist Hospital ah Feb 2008 sung in nupi naunei 111 leh Lamka Nursing Home a naunei 17te ading in panpihna sum(JSY) tulel in DFWO/CCpur office ah kihawm a, ala nailou te’n laktheih hi’n thutut kingah hi.
CEO in kal 1 suti la
# Henlianthang Vaiphei, Chief Executive Officer(CEO)/Autonomous District Council,CCpur in innsung buaina ziakin tuni(April 22,2008) akipan in kal 1 sung suti la hi.
Agape Camp 5 veina om ding
# Priscilla Home leh GBC HIV/AIDS Home based Care Project pangkhawm in April 24-30 sung Priscilla Home ah numei saltanna tuamtuam a atangte leh panpih ngaite khualna in Agape Camp 5veina om ding hi. April 30 in Priscilla Home a om nuamte adin interview om ding hi.
DLO tamtak kuankhial
#Tuni sun dak 12 apan DC/CCpur office a Conference Hall ah DLCC meeting om ding chih ziakin Dist Level Officer tamtak vakuan uh a, hileleng CM tawh meeting dinga DC a zinkhiak ziakin Officer tamtak vakuankhial uh chihthu om hi.
DDT damdoi kap uh
# District Malaria Department /CCpur te’n tulai in Singngat Sub-divn sung a Suangdoh area leh Tuining area ah thoukang thahna DDT damdoi kap lel uh a,April 24 in Khoirentak area ah kap ding uh hi’n kigen hi.
IMPHAL NEWS:
Khongjom Day kizang ding
Imphal, April-22: Manipur govt nuai a Home Department inntekna in April 23, 2008 zinglam dak 9.00 akipan in Thoubal district sung a om Khebaching a Khongjom War Memorial ah Khongjom Day zat hiding. Huai ah Manipur Governor Dr SS Sidhu khuallian hiding a, Functional President in Chief Minister O. Ibobi pang ding hi. Khuallian Governor leh Chief Minister in Khongjom War Memorial ah zahna in oak(floral wreaths) koih ding uh a, Paona Brajabashi lem(statue) ah leng zahna pak koih ding uhi. Manipur Rifles te’n zahna pia in Gun salute leng adangdang hih ding uhi. Khongjom Day ziakin April 23, 2008 in Manipur govt nuaia office leh educational institution teng General Holiday hiding hi.
Electric line buai:load shedding kisan ding
Imphal, April-22: Power Grid Corporation of India Limited(PGCI) in Manipur adia meivak hong piakna uh Dimapur apan Imphal kikal a meigui (132-KV transmission line) April 18, 2008 zinglam dak 9.25 in a siat ziakin Manipur in electric meivak a ngahzah nasatak in kiam a, huai bawlhoih nawn masiah meivak lam nawngkaina om ding ahihziakin mipi in theisiam ding in Manipur Electricity deptt a Superintending Engineer/Tranmission Circle in Press Note suah hi.
Police Constable lakna dinga Written Test
Imphal, April-22: Manipur Police Deptt a Police Constable(Male/Civil) lakna ding in Physical Efficiency Test(PET) a lawhchingte adingin Khuman Lampak Sports complex a Main Stadium ah April 27, 2008 zingsang dak 7.00 apan Written Test Examination om dinga telding candidate-te Indoor Stadium a MMTA office lam apan kia a lut ding a theihsak hi uh a, candidate-te lutna ding gate anuai abang hi:
1. Entrance No. 3: Imphal East, Jiribam & Imphal West
2. Gate No. 6 : Chandel, Tamenglong,Ukhrul,Bishnupur(Chest No. 1 to 300) & Thoubal(Chest No. 1 to 1100)
3. Gate No. 10 : CCpur, Bishnupur(Chest No. 301 to 600) & Thoubal(Chest No. 1101 to 2400)
4. Gate No. 14 : Senapati, Bishnupur(Chest No. 601 to 1124) & Thoubal (Chest No. 2401 to 3915)
Candidate teng April 27,2008 zingsang dak 7.00 leh dak 10.00 AM kikal in Khuman Lampak Sports Complex a Indoor Stadium kianga gate ah ki-report chiat ding in Chairman, Recruitment for appointment of Police Constable(Civil/Male), Manipur Police Deptt in theisak a, hunchiam sunga ki-report loute lutsak hilou ding chihthu om hi.
VVIP tamtak in Manipur pha ding
Imphal, April 22: Union Government apan Central palai VVIP official lawikhat in tunung sawtlou in ni 2 om ding in state capital Imphal hong veh ding uhi. Thusuak kingahdan in, K M Chandra Shekhar, Cabinet Secretary, Madhya Gupta Home Secretary, Ms Rita Sharma Secretary (RD), Ms Gina Rirat Rao Secretary, DoNER, Dr Subhash Panion Secretary (Planning commission) Dr Renuka Vishawathan Secretary (Co-ordinator and PG) ban ah official tamtak in April 25 leh 26 in Imphal khawpi hongpha ding ua, State Government in leng amaute state Guest dan in puang hi. Amau’ Imphal a om sung un Railway tawh kisai, Petrol and Natural Gas, Food and Public Distribution ban ah thu poimawh tuamtuam state Government official te tawh houlim ding uh hi’n kigen hi.
PK Mishra in Governor leh CM mu
Imphal, April 22: PK Mishra, Inspector General BSF (Assam, Meghalaya & Nagaland) in tuni in Manipur Governor Dr SS Sidhu, Chief Minister O Ibobi Singh, Director General of Police Y Joykumar Singh IPS te a tuam chiat in kimuhpih in, Manipur a Dan leh thupiak a siat dan tawh kisai tel in thu tuamtuam houlimpihna nei hi. Amau’ Counter Insurgency Operation thu ah leng kihouna nei uh hi’n kigen hi. Mishra in ahihleh, STC/BSF Churachandpur ah Passing Out Parade neih na ah salute hong la hi.
SHDDC in Chief Minister ah memorandum pia
Imphal, April 22: Sadar Hills District Demand Committee in tuni in Chief Minister O Ibobi Singh kiang ah memorandum khat pia in, bangziak a Sadar Hills Autonomous District Council huamsung a Panchayati Raj election saisak a om hiam chih dotna bawl uhi. SHDDC thusuak in ataklatna ah Panchayati Raj Act implementation (zat) ahih na ah, 1983 tan Nepalite dinmun etthak ngai ahihdan taklang ua, tuni chiang in Zilla Parishad nuai ah Chairman hihna leng Nepalite tanpha in lenkhata ahihdan taklanguhi.Kangpokpi sub Division a om Kalapahar Charkhajari Nepali area ah Panchayati Raj election zalentak a om ahihdan gen ua, tua ban ah, Molkon Hangun pat area a Chingmang, Zoulien leh Thangoilong Vaiphei Kuki area ah hiai election neih a om ahihdan taklang uhi. Hiai khuate ahihleh, Saikul Sub Division sung a om ahi hi. Manipur state Government in a na sepdan pen Dan tawh kituaklou (illegal) ahih ziak in hiai tungtang enthak ding in leng theihsakna bawl uhi.
Eimi Meet 10 veina om ding
Imphal, April 22: Zingchiang April 23 in Canchipur a om Manipur University Campus apan sinlai om te’n zingchiang April 23 2008 in Xth Eimi Meet, 2008 kichi Kuki Inn, Imphal ah nei ding ua, huai hun ah thupi ding in, “ Itna in eite hon kaan khawm hen” chih zang ding uhi. Huai hun ah NET, JRF, MPSC, UPSC leh service tuamtuam a lawhchinna ngahte tung ah Meritorious award piakkhiakna om ding hi’n kigen a, tua zawh in Mr & Miss EIMI contest leng neih hiding in gen uhi. Hiai hun ah Chief Guest in V Hangkhanlian Thanlon MLA chial himahleh, amah Thanlon azin ziak in kua zat hiding hiam chih kithei nailou a, Guest of Honour in Thomas Khongsai, Dr Seikhohao Haokip pangding a, Functional President in Dr H John Pulamte President ATSUM pangding hi.
Sangma’ tanu MP din candidate ding
Shillong, April 22: NCP leader P A Sangma,MP(Lok Sabha) in state politics a sai ut ziak in tuma a Meghalaya Assembly election ah MLA in ching a, Tura bial apan MP ahihna apan kitawp hi. Huaiziakin Election Commmission in May 22 chiang in Tura Lok Sabha seat ah by- election om ding in puang hi. NCP in PA Sangma’ tanu Agatha Kongkhal (Sangma) election ah NCP candidate dingin dinsak sawm uhi. PA Sangma in ahihleh 1977 apan Tura parliamentary seat tutkhum in khatvei mahleng ke nailou hi’n kigen hi.
Agatha bel LLB zou hi a, tu in Delhi Bar Council member hi a, Advocate ahih kawm in, Masters in Environmental Management kichi School of Geography, Nottingham University, UK apan in zou hi. Amah Tura seat ah telching ahih aleh amau’ innkuan apan MLA 3 leh MP 1 om ding uh chihna hi. Meghalaya Progressive Alliance(MPA) a om UDP, KHNAM, HSPDP leh BJP te’n NCP candidate gum in concencus candidate in puang uhi. Sangma tapa nih Conrad leh James leng tutung a Meghalaya election ah MLA in chingtuak uh a, Conrad in Minister(Finance, Tourism and Power) len a, James in Parliamentary Secretary for Home len zawmah hi.
Downtown Rangoon ah meikang om
Rangoon, April 22: Downtown Rangoon a Lanmadaw township sung a Lanmadaw street kichihna mun ah zan nitak in meikang thupitak om hi’n thusuak kingah hi. Thusuak in agendan in nitak dak 8:30 in meikuang kipan a, nitak dak 10 in fire engine 20 leh sepaihte ban ah mipi’n a kiphelhhuan nung un mit zoupan hidanin kigen hi. Meikang ahihleh Electric short circuit ziak a kang hidanin kigen a, hiai thu sut ahihtan in innkaang ah mihing a si leh liam omlam theih hilou a, van leh thil tuamtuam bangzah man kangtum hiam chih leng genchet theih hilou hi.
EDITORIAL:
Tuni Thupi: “Huchi’n Pathian in, i kibatpih, ei mahmah bang in, mi i bawldia, amau tuipi a ngasate tungah, tunga leng vasate tung ah, gan tungah, leitung tengteng ah, ganhing leitung a khupbawh a pai tengteng tung ah thu i neisak ding, a chi a.” - Genesis 1:26
Lamka in ‘Earth Day’ hamphatpih ni
Tuni in leitung pumpi ah Earth Day (Lei Ni) kichi zat hi a, United Nations makaihna nuai ah New York khawpi ah leng kizang hi. Hiai Earth Day kichi ahihleh kum 38 paisa apan kizang hi a, leitung mihingte(global population) khawlum leh nisa apan bittak a om theihna ding leh planet apan leitung bittak a a om theihna ding ngimna a Earth Day kichi kizang ahi hi.
Lei i chih chiangin mihingte tenna mun hi a,tamtak in i tenna mun pe’n i zahtak ding ahi chi in Earth Lovers chih tanpha om in, lei simmawh ding hilou a, lei zatdan siamding ahi chi pawl leng om uhi. Lei kichi ahihleh Laisiangthou gendan tak in leihoih leh leisia kichi om a, haichi bang leng leihoih ah i tuh leh pou ut baihdeuhse a, leise tung ah bel pou leng pou theilou hi. Leitung um kimvel tui ahi kichi a, leinuai ah leng tui mah om nawn hi. I lak ah leng tuikulh(well) i tawh chiang in, athuk zawh khop leh tui tam deuhdeuh a, leitung tui in um kimvel chih pen dik mahmah ding hi.
Tualou in 2004 in Tsunami thupitak a om ziak in leitung mun bangzah hiam tum in tuni chiang in a leite(gam liantak) zat theihnawnlouh in om a, mihing tenna ding in nip mahmah a, tuaban ah haichi hiam singnou hiam pawina ding in leng zattak nawnlouh chih ahi. Scientist-te’n a gen chiang un, lei kichi manpha mahmah in zat khelh (mis-used) kichi om theitham ahi chi uhi.
I tenna leitung in hoihlam sang in siatlam a nawtzaw chih i thei hi. Artic a polar cap bang se ta a, huai in mipil leh siamte patausak mahmah a, Artartica a ice berg tui zungzung in, khawlum thuakzou nawnlou in om hi. Leitung ah mizawng kibehlap deuhdeuh in gamlak a sing-le-gua omte ban ah nek ding chi tuamtuam omte bei hulhul a, gamsate kiam hiaihiai in leitung etlawmna te’n manthatlam nawt hi’n kigen hi. Huan(garden) a kichiing mehtheihte’n nidang bang in khamkhawp ding piangsak zou nawnlou in tuilou a buh omte leng apiang zah kiam hiaihiai ta hi. Lei apan piangkhia thil tuamtuamte muhding om nawnlou in mangthang(extint) phialphial in omta a, huaite kepbitna ding ah panlakna naktak in pailel hi.
Huihkhua apan Ozone layer leaked(keh) chihthu in mi tamtak a patauhsak kawmkawm in America-te spy-jet kisiat ziak in Indian Ocean ah satellite leh missile tungtawn in kapkhiak in om chi’n kigen mahleh a taktak hiding hiam chih document proof omlou a, Pentagon thusuak pe’n mipite’n valhhak sa mahmah hi. Ozone hong sia hiam, aksi hongkia henla, zingling, gialpi leh huihpite hong nung in, nek ding hong kiam in khawvel etlawmna hong beita leh a thuaktu ding leitung a mihingte mah hi veve hi.
Solkha(planet) kimvel ah niteng in huihniin million tons 70 bang kikhawh tou gige chih ahi. Huchi ahihleh, north polar ice cap in kum 20 a daihzoulai diam chih Scientist- te’ muanmawh ahi hi. Ozone hong kia henla, North polar ice cap hong tui ta leh leitung mihingte minute 10 in keu gai, guhvuak in ki om mailou ding hiam chihtheih khawpin patauhhuai hi. Huihkhua a thil om tuamtuamte leh leitung a om sing-le- guate ban ah gamsate tung a thuneitu ding in Pathian in leitung mihingte abawl ahi. Khawvel a ganhing chi tuamtuam (species) omte 30 per cent bang kiamzou hidanin gen ua, air pollution ziak liauliau in leitung ah kumteng in kumching lou a si mihing million 2 bang phazou gige ahi chi uhi.
Huihkhua leh leitung ah Carbon dioxide tawm hiaihiai in i maban ding uh kum 50 hongtung ding ngaihngam huailou a, huihsiang(oxygen) ngial bang leinuai feet 10 apan mangthei dinmun ah omta hi. I lak ah well tawhna ziak leh well sung a huihsiang bei a, huihniin(carbon monoxide) dikkhak ziak a si tamtak omta hi. Kum 38 sung in leitung 38 vei a kipeikiim vel chihna hi a, huai kawmkawm in asung a teng mihingte’n gamsung puah naksang a hihsiat sawmna ngen lungtang ah om ziak in leitung pen kise deuhdeuh a diam chihtheih in om hi.
Nidang hun in Mission Compound tang apan i dakkhiak chiang in Lamka khawpi ah tuilou ban ah sing le suangte telin luiluang kilawmtak muhding om ban mahleh tuni chiang in tuilou i neih sunsunte uah mihingte tengdimta a, Industrial site leng om tuamlou in, alom atang in i omkhawm ua, ei context et in Lamka khawpi kilawmna mangthang (extinct) hita lou hiam chi ut i hi. Lamka khawpi sung ah kum tam hetlou paisa leh amalam in nitak chiang in a kuakua in blanket silh in zingkal in huihsiang dik ding tamtak om mah leh tuni chiangin khawlak i pawt leleng noise pollution adim in i omta a, factory a sem mah bang in i keu un i niin thei mahmah uhi. Huih niin hipmangtu ding sing- le- loute phuk bei in gam awng leh huihsiang omna teng ah inn i tungdimta ua, gamlak ah sing-le-guate i phuk bei phialtak ziak un i lui(stream) neih sunsunte uah tuikai ding i mu zounawnta kei uhi. Duh se lua akta kilawhkhup chih piandeuh in ei leh ei kigawtna dia nasemsem kha houh i diam chihtheih hun tam mahmah hi. Huaiziak in tuni in leitung mun tuamtuam ah Earth Day a kizat bang in Lamka leng dry Lamka apan Green Lamka suahsak a, global warming apan Free Lamka i hihsak poimawh petmah hi.
www.manipurexpress.com
Imphal, April-22: Manipur a Employment Exchange tuamtuam ah sepna deih ziaka min pelut(registered job seekers) March, 2008 tan in 6,05,840 om a, huaite lak ah pasal 4,35,498 hi a, numei 1,69,342 hi uh chi’n Directorate of Employment Exchange, Lamphelpat in thusuah bawl hi.
District tuamtuam a Employment Exchange omte ah sepna deih ziaka min pelut zah bel Imphal West ah 2,08,233 hi a, huaite lak ah pasal 1,44,389 tel a, numei 63,844 hi uh. Imphal East ateng 85,587 hi a, huai lak ah pasal 60,707 leh numei 24,471 hi uhi. Thoubal district ah sepna zong a min pelut teng 88,458 lak ah pasal 69,381 leh numei 19,117 hi uh a, Bishnupur district ah 55,261 lak ah pasal 40,421 leh numei 14,840 hi uhi.
March 2008 tan in CCpur district a sepna deih a min pia 54,311 hi a, huai lak ah pasal
40,950 leh numei 13,361 hi uhi. Ukhrul district ah sepna zong mi 24,075 om lak ah pasal 16,836 leh numei 7,239 hi uh a, Senapati district ah sepna zong mi 44,292 om lak ah pasal 32,219 leh numei 12,073 hi uhi. Tamenglong district ah sepna zong mi 20,575 om uh a, huaite lak ah pasal 14,268 leh numei 6,507 hi uh a, Chandel district ah sepna deih ziaka min pelut mi 20,675 lak ah pasal 14,168 leh numei 6,507 om hi.
Special Employment Exchange for Physically Hadicapped Persons ah March 2008 tan in mi 2,171 in min pia uh a, huaite lak ah pasal 1,484 leh numei 687 tel uhi. Huchih hunsung mah in Canchipur a UEI & GB ah pasal 2,444 leh numei 2,594 kigawm mihing 5,038 in min pelut uhi.
LOCAL NEWS:
CMO makaihna medical team hongtung
Lamka, April-22: Dr.S.Gouzalam, CMO/CCpur makaih in April 18,2008 a Tipaimukh area a zinkhia Dr.T.Hartlang DFWO, Dr.P.Nengzadou. District TB Officer, Dr.Khenzamung Samte, MO leh Medical Staff te zan in Lamka hongtung uhi.CMO makaih in Medical team te’n Pherjol, Damdiai, Taithu, Parbung, Lungthulien, Senvon, Situm, Leisen, Rovakot leh Tinsuong khua pha uh a, epidemic omleh omlouh vasui uhi.Doctor hongtungte apan kizadan in naupang tamtak awmna(pneumonia), sungkhawh leh santen asi ahi hi’n gen uh a, hileng (epidemic ) omlou hi’n leng thuchiang thei uh hi’n gen hi.
Takvom ah inn 2 kaangtum
Lamka, April-22: Takvom khua ah zan sunnung dak 1:30 vel in Hausa incharge G.Donglam s/o Sohmang leh Upa V.Tualkhanlian s/o Chinkhotuan te tenna inn mei in kaangtum dimdem in bangmah lakkhiat man omlou hi’n thu kiza hi.Thu kizadan in khawsunga nasemthei teng lou ah mangtom in kuankhia uh a,naupangte kia omlai in G.Donglam tenna inn mei akang naupangte’n mu in “Hausapa’ inn mei in kaang” chi’n kikou ua, agei a Upa.V.Tualkhanlian’ inn leng pehphei in kangtum hi.Khawsung mi loukuante’n a theih un lou apan delh huan ua, inndangte peh manlou in panla thei uh hi’n thu kiza hi. Meikang koi akipan hiam chih leng athei kuamah om tuanlou hi’n gen uhi.
Mi 2 a sepna ua pan kaisang
Lamka, April-22: T. Khaikhanmuan s/o J. Thangzalian of Bungmual in hun sawt kuamtak SBI, Belgaum(Karnataka state) ah Assistant Manager alet nung in departmental promotion examna a lawhching in Manager in kaisang hi. Tualou in, IIT (Delhi) apan B.Tech zou Justin Thonzakhup s/o Rev N Phungzapao of Bungmual in Mumbai a Reliance Company a Dy. Manager alet nung in tu’n Manager ah kaisang chihthu kiza hi.
Workshop & Social Audit kisinsakna
Lamka, April 22: Upper Lamka ah YPA Hall ah April 24-25 in Workshop & NERGS tawh kisai a Social Audit kisinsakna(training) training t om ding hi. April 24 zinglam dak 10.30 in Lamka, Tuibuong, Samulamlan, Saikot leh Sangaikot TD block te’n Workshop & training nei uh a, April 25 in Tipaimukh, Vangai range, Thanlon, Henglep leh Singngat TD block te’n nei ding uhi. Huai training ah khawteng a Vigilance & Monitoring Committee a Chairman & Secretary teng banah Village authority a Secretaty teng tel ding a theihsak hi uh a, TA/DA leng piak hiding uh chihthu om hi.
STD buai : Internet kisia
Lamka, April-22: Lamka ah April 19,2008 nitaklam akipan in BSNL-te zat Optiical Fibre(cable) hoihlouhna omziak in STD line buai in Internet leng kisia a, huaiziakin SBI/CCpur Branch ah leng zan apan tuni tanpha transaction om theilou hi. SBI te’n BSNL ah report bawlpah mahle uh tuni’n Kwakta area lak ah a siatna om chih suikhe pan uh hi’n thutut kingah a, April 23, 2008 in Imphal apan technician-te’n hong bawl hoih theih uh kinep huai chih hilai hi.
Bishnupur apan electric lading uh
Lamka, April-22: Samulamlan Block sung a om Tlangnuomphai,Maojang,Gellienjang leh New Dampi khuate’n Electricity Deptt/CCpur Divn apan Transformer a ngahlouh ziakun kumkhat vel electric meivak mulou uh a, tu’n Electricity Deptt/Bishnupur Division in transformer pe ding uh hi’n gen uh a, tunung sawtlou in electric meivak mu ding a kinem uh ahihdan thutut kingah hi.
SSC tungtawn in mi 2 in sepna muthak
Lamka,April-22: Ministry of Statistics & Programme Implementation, Govt of India nuaia Statistical Investigator(Grade-IV) of Subordinate Statistical Service(SSS) semding lakna ding in Staff Selection Commission(SSC)saina in June 28,2007 in open competitive examination ah candidate 453 lawhching uh a, huaite adia interview om Nov 12,2007 in a result suak a, huaia lawhching candidate 227 sepna piak dingin SSC in recommend hi. Huaite laka singtangmi 2 anuai ate tel uhi.
1. Joseph Lalremruot (Roll 4210335)
2. Henminlun Haokip(Roll No. 4210420)
NEIGRIHMS apan lawhchinna ngah
Lamka, April 22: Central Government in Shillong a hospital a bawlthak North Eastern Indira Gandhi Regional Institute of Health and Medical Science (NEIGRIMHS) a staff Nurse sem ding lakna ding a inyerview om a result puankhiak hi a, Lamka lam mi anuai ate lawhching uhi.
1.Chistina Hmangte 2.Esther Lalhmangai Sinate, 3.Lamkhochong Haokip, 4. Kaphnuni
5.K.Vanlalruati,6.C.Lalrinawmi,7.Vanlalhmangaihzuali 8.Kimhatching, 9. Lailienching, 10.Mr. S. Paominlen Haokip, 11.C. Lallawmthari 12.Reheboth Keivom Hmar, 13.T.Ngainianching, 14. Roselyn Lalthangkim 15.Laltanpuii Pautu, 16.Nenghoikim Lhouvum 17.Goungaihlian Hauzel, 18.K. Lalrinchhani 19. Jessie Rose Haokip, 20.B. Vanlalmangaihi 21.Darsangmawi, 22. F. Laldingpuii 23.Laldangloi, 24. Lhingneilam, 25.G. Niangmanvung Paite 26.C. Vannunsangi 27.K. Zosiami 28.Kimsanmuan 29.Chongpilhing Sithlou 30. K. Eden Parmawii 31.Hilda Zarzokim 32. Niangbiakching 33.C. Thansangpuii 34.T.Nemngaihvung 35.Nancy Thangneizo 36.Kimi Vaiphei 37.Lhingkhovei Chongloi 38. Lamneithem Kipgen 39. Kholneivah Kipgen 40.R. Lalremtluangi 41.C. Biaknungi, 42.Lalhmunsiami Hlondo 43.Lalparvul, 44. Lallawmtluangi, 45.H. Saizampuii, 46.Hoihneikim leh 47.H. Dimsawmcing hi uhi.
Gospel Audio-Visual Album
# Lucy Lhinghoikim Kom d/o L. Akhup Kom in Pathian pahtawina la a sak “Hallelujah Volume-II” kichi Gospel Audio Visual Album thak April 27,2007 sun dak 12.30 in
Synod Hall, IB Road,Lamka ah hon(release) hiding hi.
Thangkai mi 1 in vua
#Thangkai(50) s/o (late) Jamlet of Salbung,tulel a Thingphai a tuilou bawl a omlel, tuni zing dak 6 vel in Paukhai of Boljol tawh innsungthu ah kiselbuai uh a, Paukai in vua in a a ban guh veilam kitan a, nakguh veilam leng nasa in tu’n Hospital ah om hi.
Culvert a niin omte kang
# Tuni nitak dak 7.20 velin Phailian bazar a Chiangkon-lui a culvert a niin omte mei in kang a, Fire Brigade te’n delhpah uh a, mipi in leng kidelh huan in sawtlou sungin meikuang phelh mit uhi.
Dansiangthou in kinei ding uh
# H. Jamginmuan s/o (late) H. Vungzagin of Hebron Veng,New Lamka leh Miss Ningngaih d/o Upa T. Sumzamang of Siloam Veng,Bungmual saptuam dansiangthou in April 23,2008 zinglam dak 10.00 in EBCC Hebron, New Lamka biakinn ah kinei ding uhi.
JSY sum kihawm lel
# Dist Hospital ah Feb 2008 sung in nupi naunei 111 leh Lamka Nursing Home a naunei 17te ading in panpihna sum(JSY) tulel in DFWO/CCpur office ah kihawm a, ala nailou te’n laktheih hi’n thutut kingah hi.
CEO in kal 1 suti la
# Henlianthang Vaiphei, Chief Executive Officer(CEO)/Autonomous District Council,CCpur in innsung buaina ziakin tuni(April 22,2008) akipan in kal 1 sung suti la hi.
Agape Camp 5 veina om ding
# Priscilla Home leh GBC HIV/AIDS Home based Care Project pangkhawm in April 24-30 sung Priscilla Home ah numei saltanna tuamtuam a atangte leh panpih ngaite khualna in Agape Camp 5veina om ding hi. April 30 in Priscilla Home a om nuamte adin interview om ding hi.
DLO tamtak kuankhial
#Tuni sun dak 12 apan DC/CCpur office a Conference Hall ah DLCC meeting om ding chih ziakin Dist Level Officer tamtak vakuan uh a, hileleng CM tawh meeting dinga DC a zinkhiak ziakin Officer tamtak vakuankhial uh chihthu om hi.
DDT damdoi kap uh
# District Malaria Department /CCpur te’n tulai in Singngat Sub-divn sung a Suangdoh area leh Tuining area ah thoukang thahna DDT damdoi kap lel uh a,April 24 in Khoirentak area ah kap ding uh hi’n kigen hi.
IMPHAL NEWS:
Khongjom Day kizang ding
Imphal, April-22: Manipur govt nuai a Home Department inntekna in April 23, 2008 zinglam dak 9.00 akipan in Thoubal district sung a om Khebaching a Khongjom War Memorial ah Khongjom Day zat hiding. Huai ah Manipur Governor Dr SS Sidhu khuallian hiding a, Functional President in Chief Minister O. Ibobi pang ding hi. Khuallian Governor leh Chief Minister in Khongjom War Memorial ah zahna in oak(floral wreaths) koih ding uh a, Paona Brajabashi lem(statue) ah leng zahna pak koih ding uhi. Manipur Rifles te’n zahna pia in Gun salute leng adangdang hih ding uhi. Khongjom Day ziakin April 23, 2008 in Manipur govt nuaia office leh educational institution teng General Holiday hiding hi.
Electric line buai:load shedding kisan ding
Imphal, April-22: Power Grid Corporation of India Limited(PGCI) in Manipur adia meivak hong piakna uh Dimapur apan Imphal kikal a meigui (132-KV transmission line) April 18, 2008 zinglam dak 9.25 in a siat ziakin Manipur in electric meivak a ngahzah nasatak in kiam a, huai bawlhoih nawn masiah meivak lam nawngkaina om ding ahihziakin mipi in theisiam ding in Manipur Electricity deptt a Superintending Engineer/Tranmission Circle in Press Note suah hi.
Police Constable lakna dinga Written Test
Imphal, April-22: Manipur Police Deptt a Police Constable(Male/Civil) lakna ding in Physical Efficiency Test(PET) a lawhchingte adingin Khuman Lampak Sports complex a Main Stadium ah April 27, 2008 zingsang dak 7.00 apan Written Test Examination om dinga telding candidate-te Indoor Stadium a MMTA office lam apan kia a lut ding a theihsak hi uh a, candidate-te lutna ding gate anuai abang hi:
1. Entrance No. 3: Imphal East, Jiribam & Imphal West
2. Gate No. 6 : Chandel, Tamenglong,Ukhrul,Bishnupur(Chest No. 1 to 300) & Thoubal(Chest No. 1 to 1100)
3. Gate No. 10 : CCpur, Bishnupur(Chest No. 301 to 600) & Thoubal(Chest No. 1101 to 2400)
4. Gate No. 14 : Senapati, Bishnupur(Chest No. 601 to 1124) & Thoubal (Chest No. 2401 to 3915)
Candidate teng April 27,2008 zingsang dak 7.00 leh dak 10.00 AM kikal in Khuman Lampak Sports Complex a Indoor Stadium kianga gate ah ki-report chiat ding in Chairman, Recruitment for appointment of Police Constable(Civil/Male), Manipur Police Deptt in theisak a, hunchiam sunga ki-report loute lutsak hilou ding chihthu om hi.
VVIP tamtak in Manipur pha ding
Imphal, April 22: Union Government apan Central palai VVIP official lawikhat in tunung sawtlou in ni 2 om ding in state capital Imphal hong veh ding uhi. Thusuak kingahdan in, K M Chandra Shekhar, Cabinet Secretary, Madhya Gupta Home Secretary, Ms Rita Sharma Secretary (RD), Ms Gina Rirat Rao Secretary, DoNER, Dr Subhash Panion Secretary (Planning commission) Dr Renuka Vishawathan Secretary (Co-ordinator and PG) ban ah official tamtak in April 25 leh 26 in Imphal khawpi hongpha ding ua, State Government in leng amaute state Guest dan in puang hi. Amau’ Imphal a om sung un Railway tawh kisai, Petrol and Natural Gas, Food and Public Distribution ban ah thu poimawh tuamtuam state Government official te tawh houlim ding uh hi’n kigen hi.
PK Mishra in Governor leh CM mu
Imphal, April 22: PK Mishra, Inspector General BSF (Assam, Meghalaya & Nagaland) in tuni in Manipur Governor Dr SS Sidhu, Chief Minister O Ibobi Singh, Director General of Police Y Joykumar Singh IPS te a tuam chiat in kimuhpih in, Manipur a Dan leh thupiak a siat dan tawh kisai tel in thu tuamtuam houlimpihna nei hi. Amau’ Counter Insurgency Operation thu ah leng kihouna nei uh hi’n kigen hi. Mishra in ahihleh, STC/BSF Churachandpur ah Passing Out Parade neih na ah salute hong la hi.
SHDDC in Chief Minister ah memorandum pia
Imphal, April 22: Sadar Hills District Demand Committee in tuni in Chief Minister O Ibobi Singh kiang ah memorandum khat pia in, bangziak a Sadar Hills Autonomous District Council huamsung a Panchayati Raj election saisak a om hiam chih dotna bawl uhi. SHDDC thusuak in ataklatna ah Panchayati Raj Act implementation (zat) ahih na ah, 1983 tan Nepalite dinmun etthak ngai ahihdan taklang ua, tuni chiang in Zilla Parishad nuai ah Chairman hihna leng Nepalite tanpha in lenkhata ahihdan taklanguhi.Kangpokpi sub Division a om Kalapahar Charkhajari Nepali area ah Panchayati Raj election zalentak a om ahihdan gen ua, tua ban ah, Molkon Hangun pat area a Chingmang, Zoulien leh Thangoilong Vaiphei Kuki area ah hiai election neih a om ahihdan taklang uhi. Hiai khuate ahihleh, Saikul Sub Division sung a om ahi hi. Manipur state Government in a na sepdan pen Dan tawh kituaklou (illegal) ahih ziak in hiai tungtang enthak ding in leng theihsakna bawl uhi.
Eimi Meet 10 veina om ding
Imphal, April 22: Zingchiang April 23 in Canchipur a om Manipur University Campus apan sinlai om te’n zingchiang April 23 2008 in Xth Eimi Meet, 2008 kichi Kuki Inn, Imphal ah nei ding ua, huai hun ah thupi ding in, “ Itna in eite hon kaan khawm hen” chih zang ding uhi. Huai hun ah NET, JRF, MPSC, UPSC leh service tuamtuam a lawhchinna ngahte tung ah Meritorious award piakkhiakna om ding hi’n kigen a, tua zawh in Mr & Miss EIMI contest leng neih hiding in gen uhi. Hiai hun ah Chief Guest in V Hangkhanlian Thanlon MLA chial himahleh, amah Thanlon azin ziak in kua zat hiding hiam chih kithei nailou a, Guest of Honour in Thomas Khongsai, Dr Seikhohao Haokip pangding a, Functional President in Dr H John Pulamte President ATSUM pangding hi.
Sangma’ tanu MP din candidate ding
Shillong, April 22: NCP leader P A Sangma,MP(Lok Sabha) in state politics a sai ut ziak in tuma a Meghalaya Assembly election ah MLA in ching a, Tura bial apan MP ahihna apan kitawp hi. Huaiziakin Election Commmission in May 22 chiang in Tura Lok Sabha seat ah by- election om ding in puang hi. NCP in PA Sangma’ tanu Agatha Kongkhal (Sangma) election ah NCP candidate dingin dinsak sawm uhi. PA Sangma in ahihleh 1977 apan Tura parliamentary seat tutkhum in khatvei mahleng ke nailou hi’n kigen hi.
Agatha bel LLB zou hi a, tu in Delhi Bar Council member hi a, Advocate ahih kawm in, Masters in Environmental Management kichi School of Geography, Nottingham University, UK apan in zou hi. Amah Tura seat ah telching ahih aleh amau’ innkuan apan MLA 3 leh MP 1 om ding uh chihna hi. Meghalaya Progressive Alliance(MPA) a om UDP, KHNAM, HSPDP leh BJP te’n NCP candidate gum in concencus candidate in puang uhi. Sangma tapa nih Conrad leh James leng tutung a Meghalaya election ah MLA in chingtuak uh a, Conrad in Minister(Finance, Tourism and Power) len a, James in Parliamentary Secretary for Home len zawmah hi.
Downtown Rangoon ah meikang om
Rangoon, April 22: Downtown Rangoon a Lanmadaw township sung a Lanmadaw street kichihna mun ah zan nitak in meikang thupitak om hi’n thusuak kingah hi. Thusuak in agendan in nitak dak 8:30 in meikuang kipan a, nitak dak 10 in fire engine 20 leh sepaihte ban ah mipi’n a kiphelhhuan nung un mit zoupan hidanin kigen hi. Meikang ahihleh Electric short circuit ziak a kang hidanin kigen a, hiai thu sut ahihtan in innkaang ah mihing a si leh liam omlam theih hilou a, van leh thil tuamtuam bangzah man kangtum hiam chih leng genchet theih hilou hi.
EDITORIAL:
Tuni Thupi: “Huchi’n Pathian in, i kibatpih, ei mahmah bang in, mi i bawldia, amau tuipi a ngasate tungah, tunga leng vasate tung ah, gan tungah, leitung tengteng ah, ganhing leitung a khupbawh a pai tengteng tung ah thu i neisak ding, a chi a.” - Genesis 1:26
Lamka in ‘Earth Day’ hamphatpih ni
Tuni in leitung pumpi ah Earth Day (Lei Ni) kichi zat hi a, United Nations makaihna nuai ah New York khawpi ah leng kizang hi. Hiai Earth Day kichi ahihleh kum 38 paisa apan kizang hi a, leitung mihingte(global population) khawlum leh nisa apan bittak a om theihna ding leh planet apan leitung bittak a a om theihna ding ngimna a Earth Day kichi kizang ahi hi.
Lei i chih chiangin mihingte tenna mun hi a,tamtak in i tenna mun pe’n i zahtak ding ahi chi in Earth Lovers chih tanpha om in, lei simmawh ding hilou a, lei zatdan siamding ahi chi pawl leng om uhi. Lei kichi ahihleh Laisiangthou gendan tak in leihoih leh leisia kichi om a, haichi bang leng leihoih ah i tuh leh pou ut baihdeuhse a, leise tung ah bel pou leng pou theilou hi. Leitung um kimvel tui ahi kichi a, leinuai ah leng tui mah om nawn hi. I lak ah leng tuikulh(well) i tawh chiang in, athuk zawh khop leh tui tam deuhdeuh a, leitung tui in um kimvel chih pen dik mahmah ding hi.
Tualou in 2004 in Tsunami thupitak a om ziak in leitung mun bangzah hiam tum in tuni chiang in a leite(gam liantak) zat theihnawnlouh in om a, mihing tenna ding in nip mahmah a, tuaban ah haichi hiam singnou hiam pawina ding in leng zattak nawnlouh chih ahi. Scientist-te’n a gen chiang un, lei kichi manpha mahmah in zat khelh (mis-used) kichi om theitham ahi chi uhi.
I tenna leitung in hoihlam sang in siatlam a nawtzaw chih i thei hi. Artic a polar cap bang se ta a, huai in mipil leh siamte patausak mahmah a, Artartica a ice berg tui zungzung in, khawlum thuakzou nawnlou in om hi. Leitung ah mizawng kibehlap deuhdeuh in gamlak a sing-le-gua omte ban ah nek ding chi tuamtuam omte bei hulhul a, gamsate kiam hiaihiai in leitung etlawmna te’n manthatlam nawt hi’n kigen hi. Huan(garden) a kichiing mehtheihte’n nidang bang in khamkhawp ding piangsak zou nawnlou in tuilou a buh omte leng apiang zah kiam hiaihiai ta hi. Lei apan piangkhia thil tuamtuamte muhding om nawnlou in mangthang(extint) phialphial in omta a, huaite kepbitna ding ah panlakna naktak in pailel hi.
Huihkhua apan Ozone layer leaked(keh) chihthu in mi tamtak a patauhsak kawmkawm in America-te spy-jet kisiat ziak in Indian Ocean ah satellite leh missile tungtawn in kapkhiak in om chi’n kigen mahleh a taktak hiding hiam chih document proof omlou a, Pentagon thusuak pe’n mipite’n valhhak sa mahmah hi. Ozone hong sia hiam, aksi hongkia henla, zingling, gialpi leh huihpite hong nung in, nek ding hong kiam in khawvel etlawmna hong beita leh a thuaktu ding leitung a mihingte mah hi veve hi.
Solkha(planet) kimvel ah niteng in huihniin million tons 70 bang kikhawh tou gige chih ahi. Huchi ahihleh, north polar ice cap in kum 20 a daihzoulai diam chih Scientist- te’ muanmawh ahi hi. Ozone hong kia henla, North polar ice cap hong tui ta leh leitung mihingte minute 10 in keu gai, guhvuak in ki om mailou ding hiam chihtheih khawpin patauhhuai hi. Huihkhua a thil om tuamtuamte leh leitung a om sing-le- guate ban ah gamsate tung a thuneitu ding in Pathian in leitung mihingte abawl ahi. Khawvel a ganhing chi tuamtuam (species) omte 30 per cent bang kiamzou hidanin gen ua, air pollution ziak liauliau in leitung ah kumteng in kumching lou a si mihing million 2 bang phazou gige ahi chi uhi.
Huihkhua leh leitung ah Carbon dioxide tawm hiaihiai in i maban ding uh kum 50 hongtung ding ngaihngam huailou a, huihsiang(oxygen) ngial bang leinuai feet 10 apan mangthei dinmun ah omta hi. I lak ah well tawhna ziak leh well sung a huihsiang bei a, huihniin(carbon monoxide) dikkhak ziak a si tamtak omta hi. Kum 38 sung in leitung 38 vei a kipeikiim vel chihna hi a, huai kawmkawm in asung a teng mihingte’n gamsung puah naksang a hihsiat sawmna ngen lungtang ah om ziak in leitung pen kise deuhdeuh a diam chihtheih in om hi.
Nidang hun in Mission Compound tang apan i dakkhiak chiang in Lamka khawpi ah tuilou ban ah sing le suangte telin luiluang kilawmtak muhding om ban mahleh tuni chiang in tuilou i neih sunsunte uah mihingte tengdimta a, Industrial site leng om tuamlou in, alom atang in i omkhawm ua, ei context et in Lamka khawpi kilawmna mangthang (extinct) hita lou hiam chi ut i hi. Lamka khawpi sung ah kum tam hetlou paisa leh amalam in nitak chiang in a kuakua in blanket silh in zingkal in huihsiang dik ding tamtak om mah leh tuni chiangin khawlak i pawt leleng noise pollution adim in i omta a, factory a sem mah bang in i keu un i niin thei mahmah uhi. Huih niin hipmangtu ding sing- le- loute phuk bei in gam awng leh huihsiang omna teng ah inn i tungdimta ua, gamlak ah sing-le-guate i phuk bei phialtak ziak un i lui(stream) neih sunsunte uah tuikai ding i mu zounawnta kei uhi. Duh se lua akta kilawhkhup chih piandeuh in ei leh ei kigawtna dia nasemsem kha houh i diam chihtheih hun tam mahmah hi. Huaiziak in tuni in leitung mun tuamtuam ah Earth Day a kizat bang in Lamka leng dry Lamka apan Green Lamka suahsak a, global warming apan Free Lamka i hihsak poimawh petmah hi.
www.manipurexpress.com
No comments:
Post a Comment