Singtangmite leh a diak a sinlai naupangte khualna in All Tribal Students'
Union Manipur (ATSUM) in pan ana la gige sek hi. Huaiziak mah in Manipur
University a SC/ST reservation tungtang leh Manipur singtangmite a dia
university tuam lieuliau bawlkhiak ding sorkar kiang ah ngen uhi. Huai
banah, Manipur hill district 4 a skulpu kidaihlouh thu naktak in tangkoupih
ua, contract basis a teacher lak a omte contract hun behlapsak ding leng
naktak in phu uhi. Sorkar toh leng hiaite toh kisai in kitheihsiamna leh
kilemna nei mahle uh a sepsuah ding lampang sorkar in a limsaklouh ziak in
nohna leng bangzahvei hiam leh Economic Blockade tanpha bawlta uhi. Huai
nung nangawn a sorkar lampang apat kalsuanna muh ding a omlouh ziak in ATSUM
in khauhzawsem a sorkar nohna ding in July 10, 2008 a helna pat nawn sawm in
July 1 in thupuan hon bawl uhi. Helna pen NH-39 leh NH 53 a economic
blockade bawl ding leh hill district teng a govt. establishment leh ZEO-te
boycott in zui ding hi'n puang uhi. Huai banah, ATSUM toh sorkar in kihouna
a neihlai ua Manipur sik-le-tang a ding Education Minister L. Jayantakumar,
PHE/IPR/Tourism Minister T.N. Haokip leh TD/Hills/Vety & AH Minister DD
Thaisii leng ATSUM in boycott ahihdan uh puang hi. Hichituk a ATSUM in pan a
lak nung in a ngetnate uh pichin nak sang in kiphinna ding behlalptu di'n
sorkar in school 171-te huhna piak tawpsan ding in thupukna hon bawl zomah
hi.
A ngetnate uh sukpichin ahihlouh ziak in hill district-te a student
leader-te toh kithumuh in tu'n ATSUM in nakzawsem in pan hon la hi. Zan a
ATSUM in thusuah a bawl dan dungzui un August, 2008 sung daih ding kiphinna
chituamtuam, a nem deuh a kipan a khauh hiaihiai ding in programme guang
uhi. A sawm dan un August 4-9 sung teng Class IX - University student-te'n
badge vom belh ding leh ZEO-te khak ding. August 10 zankim apat August 14
tan, dakkal 96 sung Manipur pumpi bandh ding. August 15 chiang a Indian
Independence Day lopna a tribal student-te kihellouh ding, lah sukbuai
tuanlouh ding. August 18 apat 23 sung singtang bial a private leh govt.
school tengteng khak vek ding leh singtang bial a govt. office tengteng
kimvel a nasemtheilou dia koih a kiphinna (picketing) neih ding. Hiai tan a
sinsaktu kiningching leh school a dia poimoh tuamtuamte guan ahihkei a leh
August 25 apat hunchiam omlou a singtang bial a govt. school tengteng khak
vek ding. Hiai bang a kiphinna tuamtaum neih ahihzoh tan a leng sorkar in
ATSUM ngetnate a pichinsak kei lai a leh August 30 chiang a Manipur Tribal
Students of Delhi in Delhi a 'protest rally' neih ding ATSUM in sawm hi.
Phualpi sorkar hi'n state sorkar khat peuhpeuh hitaleh, a mipite'n zaidamtak
a lehkha khiak tungtawn khong a nget-le-sak a neih chiang un
'kingengkhaisak' uh hia ahihkeileh bang chi uh hiam ah, ngaihsaklou mawk
uhi. A huchih chiang in mipite a ding in leng sorkar in a tungtang uh a
ngaihkhiak teiteina dia ut leh utlouh thu hilou a, thawm ngaih theitawp a
kiphin poimoh khat suak mah ahi. Himahleh, tua ATSUM program guante a
paisuak a leh bel, bandh bawllou a kiphinnate hi'n bandh hitaleh, huai
banah, bandh in school, college, medical, PHE, electricity leh sahkhua
programme-te huaplou ding hilehleng mipite a di'n nawngkaina nasatak tun
ding hi. Lamka a mipi 10000 in lamlian i zuih noihnoih sang ua mi 500 vel in
Delhi a lamlian a zuih uh phatuamzaw dia gintakhuai a, ATSUM in a tawpna dia
a koih pen masasak leh mipi a dia nawngkaina tamtak pumpelh ding ihihna uah
bang a chi dia chih bang ngaihtuahna ah piang hi. Lohsam kha leng maban a
kalsuan ding dan bei pian mawk ding chih ngaihtuahna ATSUM heutute'n nei uh
hiding in gintakhuai hi. Himahleh, tua ATSUM in program a guan dan un leng
lohchinna a hon tun ngeingei ding chih theih hituanlou hi. Bang teng hileh,
Manipur sorkar tung a kiphin nuamte a di'n August kha sung ahihleh hun
kibichilh mahmah hiphot peuhmah hi.
======================
NGAIHDAN LAKKHAWMNA
Manipur a buaina tuamtuamte ziakin bandh, general strike, economic blockade
kichi om mun mahmah a, a chimtakhuai kia hilou in minautang hindan ngeina
naktak a a sukbuai banah a tangpi thu in supna nasatak hon tun hi. Ei
Churachandpur district mipite ahihleh i tei mahmah ua, khualzin vakvel
kitatsatlou in i om den uhi. Imphal toh Lamka kikal a bandh a om zek chiang
in, thil poimoh tamtak a kikhelsek a,mawlchik a gen in, rel leh lenna ticket
lasate'n sum seng thawn uhi. A diak in Bishenpur hiam ahihkeileh Moirang
hiam a 'Lamka Mawltual chia' huam sung lel ding khong a bandh a om chiang
inleng suangkulh lianpi sung a khumkhawm mah i kibang uhi. Thiltung khatpeuh
ziak a kibawlkhia JAC teng gentaklouh, 'JAC Against the Brutal Killing of H
Somendro Singh and M Somen Singh' kichi ziak maimai in leng ni 4 sung bang
Imphal toh i kikawmtuahna uh nawngkai a, khumbichilh in i om uhi. Apaisa
Pathianni July 27, 2008 a Imphal a exam ding tamtak exam theilou in om ua, i
maban ding uh naktak a khaksak in om uhi.
Huai ziakin, bangchibang in panla leng hiai bandh apan mipite suakta thei
ding? Imphal toh kikawmtuahna dia Moirang leh Bishenpur tawnlou lamlian,
bypass poimoh hia? ahihkeileh bandh a om teng a khualzinte makaih ding
security escort kimansa gige poimohzaw hiam? Sorkar kiang a nget-le-sak neih
ding hihleh Assn. bawl beh zel ding hia? ahihkeileh, pawlpi omsate lak a
koipen bang in panla leh hoih ding hiam? Tedim Road mipite hinna gui ahi
chih thei kawm in ngaihdan hon kum in.
Ngaihdan tuamtuam i neihte uh sungkhawm leng haksatna i tuahte uh dou ding
dan a hong pian lamen i hihna ah na ngaihdan uh hon kum khawm ding in kon
ngen hi. Hiai toh kisai ngaihdan na neihte uh message tungtawn in mobile #
9856363681/9862159009/9856594139 ah leh email: lamkapost@yahoo.com
Sd/- Editor
Source: www.zogam.com
No comments:
Post a Comment