~ Kimbawi’ PaHiai ka khualzinna thu a bul ka patna lam a ka chih mah bang in kuamah tot louh lampi le hilou, ka muhte le kuamah muhlouh le hilou ahi a, hiai bang gelh khemkhem, a hon chi bang a om tham di. Aizawl ka lut tan ah ka khawl a, ka sepna di mun lam zuan mai thei lou ka hihman in Aizawl ah ka tam hi. Aizawl a ka tam ngal in chi’n Aizawl ka muhdan thu ah ka hong lut tadih di hi. Hiai Aizawl mah le kua muhlouh mu hi-awmtak a gelh khemkhem ka bang zel diam ah.
Lamka a kipan a Aizawl tuna di’n ni nih ka zang bei uhi. Ei’ Zogam lampi setak mualsuah a Mi’ Zogam ka lut nung un lampi hoih in nuam mahleh mual leh kuam lak a hihman in motor a hat tai thei tuan kei. Ka hat tai tawp un le dakkal khat a km 40 (40 km/h) in ka tai mang kei uh. Hiai in Aizawl gamla sak diak hi’n ka thei hi. Lamka leh Imphal kikal a direct bus a i tuan a a-awl tai tawp toh kibang a kitai ahi mai. Sinzawl a kipan a ZL dak 6.30 vel a kipan in Aizawl NL dak 8.30 vel in ka lut uhi. Sumo khawlna a kipan in ka tunna di Tlangnuam ana gamla viau laitei a, taxi ka lak leh a hon concession tawp un Rs. 150/- in a hon hihsak uhi. Hiai in a hon lungke sak dek pah sim hi. Mial ahih toh a kholai omdan ka thei kei a, ak zan gamta ka bang doidoi hi. Taxi pute’ kiang a ‘nam zek’ ut ka hihdan ka gen leh a hon laksak ua, tun khat Rs.100/- ahi a, ei’ lam a ‘macham’ sang in a lim kei zaw lai hi. Aman a hihleh Rs. 80/- bang in a sangzaw thethup. Huchi’n Tlangnuam a ka naute’ kiang a tung in zan masa huai ah ka zang hi. Zingkhua a hong vak a, etna lam teng theihlouh gam ngen ahi a, ka dak ka dak mai hi.
Aizawl ka muh ma a mi’ gen ka zak tam mahmah ‘electric vak mahmah thupi’ achih uh thupilua ka sa khol kei chitchiat hi. Khovak a i dakkhiak leh ‘khua hichi lemlumpi electrict vak kei lai leh bangchi gamtat di a set a’ chih di’n a hoih hi. Ka dak zel a, Shillong toh kibang ka chih dek chiang in Kohima bang kasa zel hi. Hiai, Aizawl, Shillong leh Kohima khopi teng in ki-ekbatna nei uh ahi peuhmah a ahi di. Ka pawtkhiak masakna in a ngaihna ka thei zou kei a, paina sa leh zuihsa teng kibang kasa a, lamhaih in ‘back-gear’ ka zang mun sim hi. Himahleh ka hon theih chet sim chiang in lamtangpi nih hiam lel zui a kipaipai ana hi leltak hi. Huan, ka gintak sang in a khua lian ka sa vanglak a, mi bang le tam hun tak uh ahi. A mun kawchik ziak a tam a kimu hia, ahihkeileh mi tam himhim, chih bel ka thei tuan kei.
Anawn a mi’ hon hilh, a inte uh thupi theihdan ahi. Thupilou chih theih bel ahi kei. A inte ua kipan a asumhauh didan uh teh a mi’ hon hilh ka ngaihtuah a, ahi di mah in ka koih hi. A inte uh hiai bang a adin theihna di’n ‘inkal-kitawi’ zen in bawl kei le uh ding lou di ahi maimah a, thupilua le ka sa khol kei zel. Chihtuh, hiai bang gamsia leh kawl lak a teng teitei ut in sum tampi a sen uh ngai di mah ahi lel hi. Huaiban ah, mun khenkhat a ainte uh thupi, chih di hia, haihuai, lauhuai ka sa mai hi. Aziak tuh kawllak,, lei sa det le hilou, suangmuat tolh lak, lam khou tung khawng a in lianpipi, sawng 6/7 khawng a lam uh tolhkhe mai leh kilawm ka sa hi. Hilele a mun a ka muhma a mi’ gen, ka ngaihsual sim khat a tak a ka muh a kipan a ka theihkhiak khat a om hi. ‘Aizawl lamte’n a in bang uh teklei a sik in a tung uh,’ chih ahi. Ei lam a teklei a sik a kitung lou a hihman in toulou di’n ka gingta hi. Atak a ka muhtak in a poina di om in ka thei kei hi. Aziak tuh a khuam leh beamte siktawn toh hoihtak a kisung a hihman in teklei a sik hin a phei hileh a lamdanna om hi’n ka thei kei.
Amun-amual thei kim kei mahleng Aizawl khosung ah ‘KAWN’ a tam mahmah a, amau’ pau a ‘ZAWL’ chih en ‘zang’ I chih uh ahi a, huaiziak in ‘AIZAWL’ chih sang in ‘AIKAWN’ chi zaw le uh houh a dikzaw dia aw, peuh ka chi mawkmawk hi. ‘KAWN’ chih ei’ pau a ‘chiang’ ahi a, eilawi’ phuah hileh ‘CHIANGPI’ chih theih leh kilawm ka sa hi. Bawngkawn, Bungkawn, Kulikawn, Sabualkawn, Saikhamkawn, Vaivakawn, chihte. Huaiaban ah a kim a khua leh munte ‘tlang’ chih a tam get a, a min bul a ‘tlang’ toh amin tawp a ‘tlang’ toh in a um uhi. Beraw Tlang, Pharbawk Tlang, Durtlang, Laipui Tlang, Haidai Tlang, Zotlang, Tlangnuam, chihte. ‘Tlang’ hilou a ‘mual’ chih le a hun khop a om zawmah. Luangmual, Maumual, Rangvamual, Mualpui, chihte. Rangvamual bang kei a dia meltheihhuai mahmah mun hi pahdan hi’n maw. Hiai ‘mualte’ ‘mual’ hilou a ‘tlang’ chia sap hi zawmah leh Aizawl min di’n ‘TLANGPUI’ chih theih leh a kilawm lai hi. Amun min hia, a veng min, chih ka thei kei, Aizawl khosung a mun lun deuhte ahihleh Chanmari, Zarkawt, Dawrpui leh Khatla ahi uh. Huan, Aizawl khosung veng tuamtuam Village Council a kipua ahi a, village bangzah a kikhen ahia, chih bel ka thei kei. Tam sim di’n ka gingta hi. Huchi hinapi in a kholai ah City Bus a tai zungzung a, a diktak a gen di hileh City Bus, chih sang in ‘Inter Village Bus’ chile uh kituakzaw leh kilawm ka sa lai hi. Ngaihtuahna maimai ahi a, mi demna a hiaite ka taklat ahi zenzen kei.
Aizawl kholai lamlian a paisual a baihlam mahmah, ‘traffic rule’ mun dang a toh a kibatlouh zek ziak in. ‘Left is right; right is wrong,’ chihte a kizang kei. Lampikhou a om louhna lamlam ‘right side’ ahi mai. Huai mangngilh a veilam va naih khak doidoi a baihlam mahmah. Huaiban ah lampi kan (cross) siam a haksa hi. Mun dang a ‘side’ khat en a motor a paikhit chiang a baihlamtak a lampi kan himahleh Aizawl ah huai ahi kei a, lampi kantan di teng a ‘side’ nih en a pai a ngai hi. Aizawl kholai a motor tam leh tawm (traffic flow) holiday leh holiday lou kal a kigamla mahmah. Holiday ni chiang in a awng mahmah hiuheu thei hi. Huchilou nite in ah haihuai bang hial in lampi ah motor a kineh mahmah.
A sung a mite ei toh i kibang ua, a diak in pasalte i kibang uhi. Eilamte bang a pasal in kichei luat ngai salou uh ahi sam di e. Numei lamte eilam numeite toh a kicheina uh tuam deuh in ka mu hi. Jean khekol pakta diak uh adia aw, chih bang ka ngaihtuah hi. A kilawm toh, kilawmlou toh a teng etut geuh uh. Huan a mit uh a nuhvom deuh vek un ka mu hi. Mitvom thanlai phukha ka hi mahna! A dawr kaidan uh Burma lam toh kibatna khat nei in ka thei hi. Dawr ngak numei, nungak or (?) kichei taktak dawr teng phial ah muh di a om. Hiailam thu ah Karimganj a ka omlai toh a kikelki ngial hi. Karimganj lak a chu dawr ngak malak a bazaar kai numei muh omlou ahi mai. Burma lamte’n ahihleh numei a hahzat uh. Huai toh Aizawl a tehkhin thei di.
‘Tlawmngaihna’ leh ‘siangthouna’ thubel a nei a tangkou a hihziak mah uh ahi dia, lampi dung teng a van zuak kivual himahleh ninlom muh di a vang a, ettonhuai uh ka sa mahmah hi. Kuva haisan ziazua, kuva tunna dia plastic zang ua, huaiban a van khaina dia zang uh hinapi polythene neng dalh nengnung, chihte ka mu kha kei hi. Huan a zunbukte uh a siangthou thei a, ei’lam bang a ek neng, nin kihhuai pipi om, chihte a kimu kei. Zunbuk kim a tengte’n buaksiang zel uh ahi, a chi zawmah uh. Hiai geih chu copy tak mahmah eive.
Ei lamdan a gam buai a kithah, kimat, strike, dharna, bandh, chihte a omlouhman in a newste uh a kilunglut thei kei a, chimthawina di a vang hial hi. Huaiban ah, gam galmuang e, chilou in dawr leh bazaar a khak baih thei ua, city bus bang a bei baih thei mahmah mawk hi. Himahleh eilam toh kilehbulh geih in nitak pawt bang zan sawt deuhdeuh leh lauh di omlou deuhdeuh di a bang hi. Huan a cable TVte ua a khahte uh Korea film, Hindi film, English film leh cartoon tan in amau pau in a pausak ua, naupangte’n a en ut ua, a liante’ a dia et di a vang mahmah. La lam a hihleh a hon lohzou namah ua a pi bawl ngial uh.
Keimah thutum (Personally Speaking): Ka utut gen in k’on zohbawl di. Haihuai simpi khawng i gen leh khatveivei a nuam philphel ut thou a, thutaklua bang le khamhuai thei ahihna ah ka utut in k’ong pau di. Biakin in a hon zol louhna a sawt ta a, ka zuan kha nawn kei mawk hi. Mun khat a kipan a mun dang a kisuan khawng in biakin i naih leh kimeltheih baihnapen ahi, chih theinapi in ka zuan kha khol kei nak. Dimapur a ka kisuan lai in khatvei ka va kai puk a (Lienkhothang Tonsing’ quarter hi zawmah) aban ka kai nawn kei. Biakin bawl a social work bang in ka kuan veu thethup. Aizawl a Pathianni nihvei zang himahleng biakin ka naih kha kei zel hi. Dimapur a ka va kikhop in eimi, huai a kikhawm-khawmte a tawm mahmah ua, a Upa-pa uh kiang a, ‘Khai, eilawi tawmchik hiai a kikhawmkhawm peuhset, sakhi su amah khom in amul, a chih uh hi awmtak,’ ka chihleh a nuihza mahmah a ‘chitchiat eive’ a hon chi hi. Huaidan in tua k’ong pai ua ka paisuak theihlouh ziak un ka khua uh, Phaitong ah zan khat ka va giak a, huai ah ‘Hall Thak’ lawm in mike toh ana kikhawm ua, la solo bang om in ana phaphet sam kei uhi. Huai ah, huai mah ka va chi a, ‘I khote ule sakhi su amah khom in a mul, chih bang deuh a nana mul ni uh ei ve maw,’ ka chihleh a nuihza mahmah uhi. Hiaidan mah in Aizawl ah biakin naih kei mahleng saptuam in sports ana nei ua, huai ah ka va hoh nawn a, huai le ‘sakhi su amah khom a mul,’ chih mah ana bang nilnel uhi. Dimapur sang in zaw adan om zaw deuh sam.
Skylab kiak kum lak a Mimbung a skul ka kai lai in a khote’n ‘Thanga, Aizawl ah college va kai le chih nuam na sa viau di. Kholai a nungakte’n “ka nawi in mi a nawr kha kei di” chi hi-awmtak a pai uh e’ihkha,’ chi’n a hon hilh uhi. Ka Tax Assistan khat uh, Pangalte, Aizawl a kisuan a hong pai in a hon hilh a, ‘Sir, Aizawl dadi nute yame, city bus tongadi dama thengbani,’ chi’n a hon hilh hi. Hilele a bang vangtahna ka diam ah kal khat ka om sung in khatvei le ka hetkha himhim kei. Tup zel lai di hia, ngim ngam lai di. Ha!
Source: http://zogam.com/index.php?option=com_content&task=view&id=4765&Itemid=32
No comments:
Post a Comment