Delhi a um sangnaupang lawchinna mutha hunkhoptah umte kipapina leh lungdamna ankuong umkhawmna vaiguon apeisa June 03, 2007 ni’n Branch Office, Pu Khakhai Zou inn, Vasant Vihar ah thupitah leh lawchingtah in kineita hi.
Tutunga lawchinna ngathate ahileh
01. Pa Mangkhogin @ Ginboi (IPS) s/o Pu Jamlet of Hmarveng
02. Tv. Paulienhang @ Hangpi (Tax Asstt.) s/o Pa Tunzachin of Zomun
03. Nh. Nuamhoikim (Librarian, Secretariat) d/o Pa Ginkhosoi of Tribal Colony
04. Nh. Cicily Nianghaulun (Staff Nurse) d/o Late. Khupkhantang of Singngat
05. Nh. Lamneihoi (Staff Nurse) d/o Pa Dongkhomang of Zoveng
06. Tv. Laangneilal (Preventive Officer) s/o
07. Pa Robert S. Ginlunmang (Medical Officer, Pondichery)
08. Dr. Mary Grace, PhD (1st PhD among the Zou Ladies)
09. Nh. Kiki Daisy Mate (Hostess, Zet Airway) d/o Late Albert G. Mate of Tuibuong
Vaiguon taangpi tambang in kinei hi
Hunkepna, ZSPDB Vice President Tv. S. Thangsuonmung hi a, Hunpat thumna ahileh ZSPDB Moral & Religion Secretary, Mr. T. Thangminlien in nei hi.
ZSPDB General Secretary Mr. M. Soilienmang in lawchinna ngathate pulaahna leh ZSP tahzet a alawchinna tung ua kipapi ahidan gen a, tuozaw in President Mr. T. Paulienthang in vaidawn thugenna nei in thumsahna leh hasotna ZCF Pastor, Rev. G. K. Samte in nei hi.
Rev. G. K. Samte Thugen
Pastorpa’n Psalm 28:9 na tungtawn in hasot thugen houlimna tam bang in nei hi.
Amasapen in alungsim a um zing; Eima angma mei khuollou in, Delhi ah Zou Study Point khat kibawl doh henlen, lungluutna nei tinten leh ama kichawm zoulou mi 2/3 hoitah in ha 8 sung bang ki chawm leh kum teng a Civil Service khat tei ki siemdoh diing ahidan gen hi. Agenzelna ah, mi khat in ha 8 sung, nikhat a naikal 8 lai asim gige a ahileh, a ‘I’ sese hisih nanleh, Indian Officer khat tei pen geldoh thei ahi chi hi. I laisimna ah mani mimal a di’a simlou a, Pasian leh I nam a di’a chitahna toh I sim leh lawchinna pen ei a ahi chi hi. Deina tahtah toh kukaltah a laisimte’n atawpna ah aga lou zel uhi chi’n lawchingte tunga khut ngam in thumsahna toh ahun zou hi.
Pa S. K. Mung (ZOD Representative)
Pa SK Mung in thu agenna ah; alienpen nahi nuom leh a neupen in pang phot angaihi chi hi. Tuni’n nalah ua upapen Pa Ginbawi in noute a diing in etsahna hoitah hing siemkhie hi. Ka upata, ka ji, katate’n hing subuoi chi vate lou in asepna a buoi pumpum in kukalna toh pang vevaw a tuni’n lawchina akikhuh vialvuol tahi. Laisim hun, kholai va hun, kimawl hun chite thei angai hi. Tutung Civil Service a paste tanchin isim leh chimul thaw ahuoi hi. Apate uh Rickshaw tawl, lamgei a plastic leh laisie tomkhawm chi tate hunkhoptah a pang hi. Eilawi ipate leh nute tuobang lah um naisamlou hang a, I maban lampi ki hong ahi. Chitahna toh lai isim leh bang di’a sepna mula di ihiei? Etsahna’n: “len septe’n akhatveina ah nga mansih nan uleh, lungkelou a asese chieng un mekhop diing toh in tungkia thou thou uhi” Eima lam a ki hambawlna umlou in Pasian guolzawlna ki dong theilou hi. Tun chu hospital ah hawlei zong eimi nurse hunkhoptah umta, parliament secretariate ah haw leilah eimi ana um zel, Income tax office ah vahawlei zong ana um zel kiata dih, Police toh kibuoi kha zuol leilah I kam saang di mi kinei panta, lenna lam ah tuon leilah eiham a hinghoupi dih mi ana um zel.. kalu lien huthut panta ei, chi’n ahun zou hi.
Evan. Totong
A laibu simkha, “Tanzania Olympic Runner khat, tai kidemna pang, alawmte tung siengta, a ente zong peisieng phielta, a judgete zong pei manta, hinanleh gal apat mikhat tai zoulou, hing kilie zel, hing pei zel khat agalmu uhi, bang hiding ahia chia aet uleh kidemna apangte khat anahi hi. A nga ua, amapa zong atawp khong in azawna line kigiit pen a keeng in hing tuon a kiliesuhta hi, Pressmen ten del ua, imchimit in thu adongta uhi. Ama’n adawnna ah – ka gamte’n a kipatna line tuona akimlai a khawl dia a’ng sawl uh ahisih a, atawp tan tung dia a’ng sawl uh ahiman a chimaw leh basam pum a hing tung kahi“ chi’n dawn hi.
Law chingvang I chi leh akipatna line a kipan a akimlai a tawp sawmlou ham diing ahi. Lawchinna diing in mang (dream) nei angai hi. Mang neiloupi a sep-le-bawl I nei chieng in a ki bazang ah suhna diing kimaimaw zel hi. Ken dream kanei ahileh – kum bangza zaw ahiei khat chienga Delhi khopi a Biehinn lienpi khat sunga kolte toh kikhop zoizoi ahi. Tuoleh tuo nu-le-pa neilou naupang ka chawmte khu nikhat nichieng a Indian Oficer lien tahtah hisah khu ka mang kiakhat ahi. Pasian in a’ng siem tuungin nahina dia kilawm bangin hingna muzouta hi. Anuozuite zong ahina diingbang chiet un mu a tuo amuna bangin gamtaang ua, lawching chiet uhi. Pasian in tuomi a hidia a’ng nabawl pen ahiloulam ah pawmpang nanlei kilawching theilou hi. Pasian in banglam a di’a hing dei ahiei chi I thei chet angai hi chi’n ahun zou hi.
Lawchinna Ngate
Tam teng zaw in lawchina ngate’n khat khat in self introduction nei chiet ua, ahobbies uleh laisimna lam a pan analah dante uh tomkim in genchiet uhi.
Amaute’n agenna uapat ettonta mama khat ahileh – nursery apat khatvei zong laivuonna a ana fail khaloute leh sang pipi ngen a ana paste ngen ahi uhi. Khen khatte bang exam khatvei abawlna ua sepna mu pai, hinanleh khenkhatte ahileh lung kelou leh kukal tah a ana pang tantan tea hi uhi. Pa Ginboi ahileh Civil Service 11 vei abawlna ahita hi. Hinanleh lungke nailou a, tutung in musih nanleh ama masang leh a kum a over masang a bawl sawm ahi nalai seet hi. Tv. Hangpi ahileh SSC Tax Assistance khatvei abawlna a lawching pai ahi a, Cicily, Hohoi leh Hoikimte zong khatvei abawlna ua lawching ngen ahi chiet uhi.
Amaute’n thugenna anei zaw un, mipi peikhawmte’n mikhat tungah thudoh 5 chiet kinei a, feltah leh chiengtah in thu ki dongte dawng zetzet thei uhi. A taangpi a agen uh ahileh, kukalna leh tupna zieh a lawching ngen in ki geen uhi.
Pa Ginbawi in dohna adawngna ah – Civil Service exam diing hivanga coaching chite pan teitei ngai khollou hi. Hinanleh I panzaw a ahileh ahoi chi a, adang khat ah – exam I bawl leh I lungluutna pen hoitah a peipi tinten a digest pen ahoi hi, tuoleh zi-le-taa toh kikhen zong apoimawna tampi um a, ki daitha pen sil hoi mama khat ahi chi hi.
Pa Khakhai Zou (Adviser, ZSPDB)
Pu Khakhai Zou in Kukalna ichi lawchinna bulpi ahi chitoh hun pan hi. Govt. sepna pen atawm deudeu ta a, hinanleh mi kukal leh tupna giltah toh laisimte diing in kham um veve hi chi hi. Asat avot chite a I laisim nawngkai sah nelnul diing ahi sih hi. Tuni’n Civil Service a hing lawchingte ataangpi in society a ana kibuolte ahi ut diehin ka thei hi. Society ah kibuol vai in, I hunting subei vai kachina ahituon sih a, laisimna leh society a kibuolna hun hawmsiem apoimaw hi. Civil Service leh exam dang dangte ahahsa deudeu a, min bawlta chiman a bawl poupou ihileh pen lawching ngaingai lou diing ihi. I bawl ngal leh kukal tah leh tupna kichientah toh bawl diing ahi. I mutt oh thuo a laisim niingniengte pen akim bazang a dawn gaw diing uh ahi. Kolte’n kumpi nasepna a enla sih uh I chi ua, capacity hoi tahtah neite a di’n etla huoilouma ahi. Private company ah zong sang pipi tung thei tham hi. Hinanleh eima kisahkholna a um masah angai hi. Laibu simlou diing tampi khop saangin khat chouh nei in a pum in pum thei suoh lei lawchinna hizaw diing ahi. Laisimte bang bang dandeu a laibu chituom tuom nei lemlum, lah sim lou, a min a mi mu di’a guol chite kham muna hilou ahi. Result suoh china ZSPte bangza apang ei chi kana etna asawtta hi. Entou zel nalai diing kahi man in hing hapan chietta un. Tuoleh sepna mute’n zong nang umlou chieng a something incomplete chithei phiel diing in hing hapan ta un chi’n ahun zou hi.
Vote of Thanks
Tam teng zaw in ZSPDB Joint Secretary Mr. Malsawm in nuomthu genna nei a, Pastor Nu Niengzadim in thumna toh hun khana nei in, lungdamna ankuon ki um khawm zaizai a, ki khen ahita hi.
Mi Kiphalte
Kiphaltah leh phuut sese lou a ZSP Fund di’a contribution bawlte ahileh:
1. Pa T. Zamlunmang Zou Rs. 100
2. Nh. Cicily Tungnung Rs. 100
3. Nh. Hoikim Rs. 200
4. Nh. Hohoi Rs. 100
5. Rev. G. K. Samte Rs. 100
6. Evan Totong Rs. 100
7. Pa SK Mung Rs. 100
8. Tv. Kamminthang Rs. 200
9. Pa Ginbawi Rs. 50
No comments:
Post a Comment