- S.Mung
“Migiloute jieh in kisulungkham suo sinlen, sil hoilou bawlte jong thaangsiet vaateh sin...................”
Mihingte pen mel leh puom(twins loungal) a kibang umlou a, ngaituona, lunggel, tatdan, ngaidan, lamjawtdan, mithadan, tuathamlou in nuidan nasan kibang kimlou hi. Gamsung khat gentahlou state sungkhat, district sungkhaat, organisation/assn sungkhat ah lamkaite ngaidan kibangkim lou a, mipite lunggel leh etdan jong kibangkim theilou hi. Tuathamlou in inn sungkhat a umkhawm tengel jong ngaidan leh lunggel kibang lou hi. Kamsung khat a umkhawm Lei jong Ha in petkha theijel sam veve hi.
Nam sungkhat a be-le-phung tuomtuom te lunggel leh ngaidan kibangkim lou a, tuathamlou in be-le-phung khat sung ngel a umte jong a ngaidan uleh a tuotdan uh kibang theilou a, kibang ngeilou a, kibah jong sawmlou ua, kibang jong kibang ngailou ding hi. Hinanle kituohtah a umkhawm kul leh poimaw mama jel.
Nam khantouna ding in Pasien thei poimaw masa pen hi. Tuachieng in kituona, kilemna etc. etc chite pieh belap a’ng hiding hi.
Ngaidan kibanglou tampite a kibah theina dia poimaw ahile khat leh khat ingaidante uh sunkhawm leh genkhawm a, tuachia atamjawte ngaidan jui a, awnkhawm vadiem - shi nading ahin,hinna ding hitale jong- ngai hi. Tualeh ngaidan khat ineipen reasonable deu mai ahingai hi. Tualou ah eima ngaidan hikholsih nanleh na U, na sanggam ahiloule najatat mikhat ngaidan vamawh pawng gup chipen adihlou vawt te lah a khat ahi. Ngaidan kikupkhawm na a telsam, bangma genlou hiuhieu hinanle akikhelnuo chieng a mingaidan teng gense khop, tuathamlou in kikhop khawmna a lah tel ngel mang lou hinanle gen ding leh sahding hauthei mama mai. A tamjawte ngaidan sunkhawm pompieh malah a ‘Oh ! hichi.....khachi jawding hia, ahichi bawl uh,a khachi bawl uh’ chia numei-naupang bangma thei loute kung a da...da.di di . chia phunkhop chipen adihlou leh dihlou tungtuong topkhoh vawt ahi a, khat in khat ngaidan dihsih, hitheisihva chia pawngpan tinten chite pen in kituona, kilemna piengsah theilou a, a tualemah in nampi kiahniemna suosah hi. Migilou kichite pen koima dang ahisih a nampi sung,be-le-phung sung, pawlpi sung khat a ama ngaidan peipi liuliau tualeh mipi ngaidan/thupuosahte adihsih chia thu thejah koikoi chite ahi uhi.
‘Nou hingsai uou, hingbawl ta uou’ chite ahilou leh ki ‘senior sah’ ichi jaw diei, tualou ah sempei manglou, bawlpei tuomlou jong pangpeih khollou, hinanle athu peiding/kilah ding dei mama mai, tha leh jung a lah pangpei ngellou, sum leh pai lah thaw ngap tuonlou, hinanle akipei, alamkai leh sum leh pai a pang sunsunte gense khop chite pen nampi leh pawlpi ding a poison hattah ahiloule AIDS natna hihpi tawh kibang ahi.
Lamkai minthang tahtah te pen in ateh avuoi nua unjong nampi, pawlpi hatna din pan ala ngap nalai uhi. Eilawi lah Delhi a kum 30 um jong ki um nailou, kum 50 pha mi jongki um nailou, nampi leh pawlpi adia kum 5 continuous a nasem jong ki umlou maithei nalai. I lungtang ingaituona leh ibawlthei hun laitah uleh nampi leh pawlpi sung a ja huaitah, imel jong mungamlou phiel a mite a umlai in, nang leh kei abang chi. Mi’n ateh avuoi nua ajong “ .......miles and miles to go before I sleep....” chi ngiangua theisam a, ei a te abang chi tuom !!!!!!!!
Thou un, thou un, thou un, athou nailoute thouvai in inampi leh pawlpi pupa’n mabang apatsa - socially, economically, politically, culturally, traditionally leh scientifically, in hatsah in khangtousah vai. Mite nuadel hinonsih hai. Mite’n ( Diplomatically, ideologically, strategically) a a’ng del nasat laitah uh himaithei hi, tuajieh in inuo a hing taite galmu pha a jong i um sawmlou hun ahita hi. Migiloute pen nampi, pawlpi leh society ading a obstacle, khanmawbawte ahi ua, tuate jieh a kisu lungkhamlou a, abawlte uleh a gente uh jong jop tuomlou a, thangsiet vateh lou a, anuo ujong jui tuomlou ding in hanlung chiem vai in, hunkhat chieng a Zoudawn apat KALAISAI chia thumvei kisam jua jua in Zou khoteng leh Zokuom a thawn suoh jung jung ni ding galdot jawvai.
Genkhiel genval a umle ngaidam diideeeee................a lai veeeee
No comments:
Post a Comment