Thursday, August 07, 2008

Manipur Chief Minister leh a tapa in NLYC Silver Jubilee lawpna uap

Lamka, Aug 6: New lamka Youth Club Silver Jubilee Celebration Committee saina in tuni sunma dak 10 apan nitak dak 5 tan PT. Sports Complex, Khominthang, New Lamka ah thupitak in lawm uhi. Hiai hun zatna ah Manipur Chief Minister Pu O. Ibobi Singh in khuallian hihna toh uap a, tuabanah, Power minister Pu T. Phungzathang, Works Minister Pu K. Ranjit Singh leh IFCD Minister Pu N. Biren te’n Functional President, Guest of Honour leh Chief Host hihna toh uap uhi.

Khuallian in hiai hun a genna ah, PT Sports Complex piching ahihna ding in ahih theihtawp a panla ding ahihdan gen in NLYC phungvuhna ding in Rs. 50,000/- pia hi. A ban a genzelna ah, Khuga dam pen December 2008 ma a honkhiak ahihtheihna ding in kuapeuh in kipthuahpih ding in ngen a, Khuga dam kizou siang leh Churachandpur in Electric lam ahaksatna aneih leng bei ding in gen hi. Tuai lai tamtakte khamtheih tuamtuam a kibual lou a omdan hoih leh Laisiamna lam uang bawl ding inleng hasuan hi. Functional President Pu T. Phungzathang in a genna ah, PT Sports Complex pen, New Lamka Youth Club te a ahi kei a, district pumpi a hizaw a, NLYC te pen hiai mun enkoltu Chowkidar banglel ahizaw uh chi’n gen hi. A man Manipur ah SPF Govt hoih ziakin development works tamtak muh theih omta a, Centre apan NREGS tung tawn in miteng in sum muh theihna ding hong pai in huai leng mipiten phattuampih mahmah uh chi’n gen hi. CCpur khangthu a ding in tuni’n Chief Minister tapa, USA a laisim a omlel inleng suty hong pai lai toh a kituahkhak ziakin tuni a hiai hun hong uap theihziak a kipahthu gen kawm in mipite lak ah etton tak valnou ahihdan leng pulak hi.

Chief host apang N. Biren Singh in a genna ah, NLYC in Silver Jubilee hun zang thei a om ziakin kipahthu puang a, tua banah, Manipur Manipur State Leaque a tel ban ahihna uah kipahpih thu puang a, kimawl dia a kuan chiang ua Uniform set khat pe ding ahihdan gen hi. Abana a genna ah, Khuga Dam area beautification ding toh kisai a CDSU ngetna bang in Rs.3.5 lakhs bei abawl hi ding leh Aug. 18- 20, 2008 sung in Awaereness Programme neih hiding in gen hi. Aman leng NLYC kithuahpihna ding in Rs. 5000/- pia hi.

Guest of Honour apang K. Ranjit Singh Minister ( Works) in tuni’n CM Programme zui ding a kisa himahleh Manipur a Night landing toh kisai a mun tuamtuam Heibokching, Mabokching leh Chingphei lak Solar koihna ding leh lamlian bawlna ding etkai a ngaih ziak a zekai ahihdan gen hi. New Lamka PT Sports Complex paina approach road a kin theilam a bawl hiding in gen hi. Lamka to Singngat Via Guite Road Mizoram tan leng National High way hun tawmchik sung a hipahta ding hi’n leng gen hi. Aman leng NLYC kithuah pih na ding in Rs. 7000/- pia hi.

Tuni a Silver Jubilee lawpna hun ah Lamka apan DC/CCpur, SP/CCpur ban ah District Level Officer teng kim phial uhi. Imphal apan CM team hon zui Dr. Tonsana Singh, Chief Engineer, PWD, Manipur, Mr. V. Zathanga, IPS IG (L&0-lI) leh Official hun khawp in hong zui uhi.

New Lamka Youth Club bel kum 25 paita August 6, 1983 a phuhkhiak a om hi a, hiai hun in New Lamka YPA Unit in a kipatsatna ding un Rs. 35.50 a, hiai toh kipankhia hi uhi.

Source: http://zogam.com/index.php?option=com_content&task=view&id=4039

No comments:

Post a Comment