ZOMITE MABAN DIING (Basic Steps for Re-Unification)

- Upa N. Chinsum, New Delhi

“If you don’t have a cause that is worth dying for, you
very likely don’t have anything worth living for.” - Unknown

THUPATNA: ‘Zomite Maban Diing’ chih thulu piaka om-a, thumal 2000 apat 5000 kikal gelhkhe dia hamphatna ka tan in, kei-le-kei ka ki-en a, tang lian (tang gol) ka kisa. Kei lam akipan piakkhiak theih om bangbang piakkhiak (gelhkhiak) uthuai sakna nei in ka na kithawi giap sam hi. Ahihleh, thugelh koi-a pan diing? Bangchi paipih diing? Bangchidan-a zou diing? Chih tungtang ah lungbuaina hunpi khat in ahonpha. Siamsinpawlpi, Shillong Branch heutute hon ngetna ‘pianglou diing’ ahi de aw chi’n, kua theihpih louh in, ka na patau sim man hi.

Zomite’ kihumbitna leh hatna Jehovah Pasian, mangbat lai-a huh pahpahpa, naai gige ahi. Laisiangthou Thu pansan in, leh ei sunga sawk phak tan en kawm in thugelh akipan a, mimal muhdan leh ngaihdan bukimlou ahihdan pom in, u-le-nau khenkhatte’ aa telsak pawl leng a-om. August 1995 nunglam Lamka leh a’ sehvel-a hun zangkha ginalou ka hihna ah, pawlpi leh mimal min lawh khaak-a omte’n hon theisiam a, I thugelh-a kilawmlah deuh sak a-om taak leh zong, chillum tawh hon na valhsak hamham di’n k’on ngen masa. I thugelh, Zogam it vaang leh hoih deihna ziak liauliau ahi. Thugelh leh a’ simtute TOUPA’N vualzawl hen!

Koi-ah om in bangteng seem mah le’ng, amah Pu V Paukhansiam @ V Siampu in, LAIZOM TENG AW Keset-a, “Selung mawl in mawl zavei zong le’ng, Ka pianna gamlei ka ngilh thei diing maw…?” ana chih ngoihngoih chihpih mi bangzahhiamte laka khat a kihihna ah, Zomi/ Zogam Thu ahih chia’n limsaang baih in om mahmah. Lawmpa Thangkhanlal Ngaihte in, “…a man standing atop Mission compound hills will get a better picture of Lamka town than someone walking along Tedim Road,” a-na chi. Tua na simsuk diing thu Raisina Hill, New Delhi akipan teenna Zolei en kawm-a gelh, ‘The Alternative Approach’ zong chih theih khat ahi.

IN SEARCH OF IDENTITY (1986): Hiai laibuta ah Pu L S Gangte in ‘Who are We?’ chih pansan in article gelh a, a’ thugelh hibang in pan hi – A quest for identity has been one of the main concerns of the world since the dawn of civilization. All nationalities try to establish their identity and it is for this reason that government of every country has been confronting with political turmoil. With passage of time even dormant nationalities begin to exhibit their identity to the world. This, therefore, shows that, we also as other, ought to know who we really are.

‘Who are We?’ article sung-ah, Pu Gangte in CHIN, KUKI, MIZO, leh ZOMI te hong kipatdan abanban in suutna nei hi. Zomi pen hibang in - The term Zomi is the oldest and generic name of the so-called Kuki-Chin group. The Pong Chronicle (which was translated into Meitei language by Capt. R B Pemberton in 1830) recorded the people as Zomi. The word Zomi is said to have been derived from “Zo” the ancestor. Hiai-a tamlou I taklatte akipan, Pu L S Gangte in thudik omsa a’ gelhkhiak siamdan amuh theih hi.

KIKHAIKHAWMNA: Hoihvek, bukim sipsip chih omlouhna khawvel ah Zo suante khaikhawmtu di’n or, kikhaikhawmna di’n min tuamtuam vawkkhiak ana hita chih I theihdan tangpi ahi. Tua minte lak ah, Indian context a gen in, a naupangpen min khuksak theih tuh ZOMI ahi. A’ khawvak mu masalam Pu T Gougin, M.A. leh mi bangzahhiamte’n 21st January 1972 in Daijang khaw-ta, Ccpur district Manipur ah Zomi National Congress (ZNC) ana pan ua, tua pen Zomi nationalism ei lak-a hong kipatna hidan in a suut theih hi. “Himahleh, mi tampi, masapen a omte tuh, nanungpen in a om diing uh; nanungpen a omte leng masapen in a om diing uh.” (Matt. 19:30).

‘Tulai a Class X/ XII pass-te a naupan theihtheih uh tawh, nidanglai X/ XII te sang banga a’ mark muh uh tamthei zaw thamtham mawk a,’ I chih sek bangdeuh un ‘Zo suan minam sunga ‘min’ vawkkhiak a omte lak ah ZOMI, naupang nave’n, mite hiip in a’ huang (Zomi fold) a omsate mah zong ki-it in kingaina te-tet ve uh aw’ mi dangte honchih diing I utpen leh thumna ahi. Tua hileh Zomi in gam keek, a’ maban limchi ahi diing. Gingtu masate hinkhua akipan bang zil theih I nei ale? “Huan, sawltakte hilh in, kithuah in, tanghou balkham in, thum in phatuamngai tak in a om nilouhlouh uhi. Huan, mi chih in a lauta ua; sawltakte’n thillamdang leh chiamtehna tampi ahih ua. Huan, a gingta peuhmah in bangkim a kikopkhawm uh.” (Nas. 2:42-44).

A tunga I gen tangtunna di’n, A hihkhialsate’ bawlkhelh (mistake) apan I zil sek chih thu akipan lesson lathei minam I hih kisam hi. I chihna in, Zomi meisel tawitute’n a-tawidan siam a, suangtu kibang UNAUTE kikhaikhawmna min dia vawkkhiak a na omta Chin/ Kuki/ Mizo te’ hatlouhna leh kisuihna suangbawk hitheite theihpih (muhpih) kilkel kawma pilvangtaka kalsuan hih diing I gennop ahi. Tua hileh, leitung leh a’ sunga om tengteng neitu, Sian in lumbang honsung dia, ni khat ni chia’n ‘ZOMI puanbuuk’ sung ah Mongolian race Zo suante, “Nou pawl, kou pawl…” kichihnate bei in, itna khau henchip a om in, tawlnga kim thei diing hihang.

A KITHEIDAN IN: I buaina uh I ‘kigawmkhawm sawmdan’ ahi. A ut teng hipah chichip, a utlou deuh pa vakhoih pah sawm; vau pian in, kigawmkhawm nopchi loupi suaksak. Huchia, ‘kigawm’ chih man-a innsung neukha khat a, mimal-a I ngaih khollouh, I theih ngei luatlouh khawng tawh omkhawm di peuh kisa. Uthuai chi salou. Ngaklahhuai salou. A khente bang in kigawm khaak diing bang lau zezen, chih khawng OMTHEI. Antoine de Saint-Exupery kichi mi khat in, “Long hoihtak khat bawlkhiak na ut leh, gamlak-a vahawh a, singte kaikhawm a, aat-a, huai khit chia singpekte kilhkhawm di’n mi sawl het ke’n. Huai sang in tuipi ngaihnat-huaina lampang sinsak zaw in,” a chi.

Shiv Khera in YOU CAN WIN chih laibu a gelhna sung ah, “The best teachers will not give you something to drink, they will make you thirsty,” chi hi. I Makaipa Jesu in, Samari numei hinna-a tangtawn hinna kaaplut (inject) A sawm in, “Tangtawn hinna ka hi (n’on thei hia?),” chipah samlou hi. Minu pen ‘dangtaak-sak’ (kineelsak) phot ahive. Shiv Khera mah in hichi’n a chi: “When our value system is not clear, getting what we want can be a bigger tragedy. The story of King Midas says it all.” I ‘value system’ uh kiveelphat tuak I sa hia? Koilai ah I ding ua?

MUHKHOLHNA: Siamsinpawlpi international’ discussion forum, SSPPNet 11th May 2004 ah, Mumbai-a heutu muanhuai khat in hibang in a’ chi: “Nikhat tak Zogam khopi I hong neih chiangin gamdang tawh business I hong hih ut chiangin, Marketing expert, Sales expert, Human Resources expert te in na siamna uh na hong zang ngei ding uh a, I neihsa Doctor siamte, Engineer siamte leh Civil Services a I muan mahmah official te leh Service dangdang hoih pipi a I Officer/ Manager-te leh inn lam a I nam aa dinga a nasem gige organisation tuamtuamte tawh Pangkhawm zuaizuai ngei ding I hi chih ‘vision’ a nei kawm in I hihna peuh ah chihtakna nei in, hahpan chiat ni… Pathian mahmah Phat in Muang gige ni. I organisation/ department aa dingin muanhuai ni. I heutute aa dingin muanhuai ni. I seppihte tawh kingeih mahmah in amaute ahi I seppih ding chih thei in amaute tung ah kamsiam sawm gige ni.”

KIKHEKNA: Ruskin in, “Change must come but it is ours to determine whether change of growth or change of death” ana chi hi. Rev Dr J M Ngul Khan Pau, Council of Baptist Churches in North East India (CBCNEI) General Secretary in 1995 kum a D Miss. a ngah na’ng a dissertation thulu a’ teel pen, “When the World of Zomi Changed” chih ahi. A’ zawhkhiakna mun Western Conservative Baptist Seminary, Portland, Oregan (USA). Sia Paupu’ thesis in ‘Kikhekna’ (Change) sung-a bangteng tuunkha hiam chih I theih louh lai in leng, Toupa’n pha Asak leh, Zomite’ leitung nuntakna ah KIKHEKNA thupi, tu akipan sim touh kum 50 sung in bel hongtung sam nalou di hia maw? Tua diing-a abul kipan khinta ahihmel zong bang I thei a! “What the mind of a man can conceive, and believe, it can achieve.” ‘Change of growth’ ngim sam ni hang.

Paite National Council (PNC) kichi heutu masa, viz. (1) Rev Nengzachin (2) T Thangkhai (3) Rev Siamkung (4) Van Lalau (5) T C Tiankham, IAS (6) T Tualchin (7) L Nengzatun (8) Thang-au leh adangdang te’n 1949 kum a lungsim ngaihtuahna lianpi tawh “Chin/ Zomite gam khat, Kumpi khat nuai-a gawmkhawm” chih thupi nei-a ana pat uh ahi. Hun hongpai zel in, Tribe khat kia pen National hitheilou, Tribe tuamtuam kigawmte’n Nation/ National name dia ZOMI pomta chih ziak in, PNC Kumsim Khawmpi 48na, thupukna No. 5 dated 27th June 2003 dungzui-in Paite National Council (PNC) pen Paite Tribe Council (PTC) chi-a khek in om. PTC tup-le-ngim point gukte lak-ah, a’ khatna leh gukna I taklang, (1) Zomite gam khat, Kumpi khat nuai-a gawmkhawm; (6) Zomi sung-a nam tuamtuam (tribe-te) pankhawmna dia nasepna.

NGAIHSUT PHAT TUAK: Rev Dr J M Ngul Khan Pau in Khanglai khoppina khat ah hibang in gen: “Martin Luther King Jr., THE STRENGTH TO LOVE chih laibuta gelhtu, America a Civil Rights’ movement bul pantu leng hi in, Khawmial hawlkhiakna diing in khawmial na zat uh leh mial seemseem diing hi. Khawmial hawlkhiakna diing in khawvak zang un. Khawvak hong piilut peuh le-uchin, khawmial taikhe diing ahi. Muhdahna hawlkhiak na’ng in muhdahna zang kei un. Muhdahna pen a hawlkhiak na’ng in itna zang un. Itna a omna peuhpeuh ah muhdahna paikhe diing hi.

…midang it diing ahi. Mi it le’ng maw, mi’n hong mudah lou eive! …mihing pen it sawm diing ahi. Mi pen muhdah sawmlouh diing ahi. Ong mudah le-uchin kua sum zaw ale? Nang sum zaw na’i ve. …Bangzah in ong mudah in ah, santen zen in ong mudah lechin zong, kei, ka an nek diing zah na ne diing in, ka zing thawh hun a na thou diing in, nang agim himai na hi. Mi na muhdah uh leh, NOU gim. …Mi’ khelhna na ngaihdam uh chiang, mi khat in freedom tang. A freedom tang pen, a suakta pen kua hiam, I chih leh, a ngaidampa na hi leltak. A ngaidampa in suahtakna tang in, I ngaihdam pen en a suakta sa in, ‘Na hampha mahmah ve, pai awh’ khawng chi zaw-mah lai…

…midang it ni. Mi it ni, mi simmawh kei ni. Pau dangte simmawh kei ni. ‘Nam dang’ kichite simmawh kei ni; it diing ahi. Tua tan a I nuntak lebel maw, I nuntakna tawldamhuai lua. Ahangin ah, e’n mi mudah kei le, ei kibuailou hiphot a. Tua zawh chiang in, mi’n ei hong mudah sang in hong mudah ngamlou in hong itthuk kiik diing ahihman in. Tuni’n mi dawmsang le, chi’n I kihasuan ahi.” {BYF (EBC) Lamka Division Annual Conference, Upper Lamka, from 5-8 September 2002}. Aw I vek in pang chiat ni, I lungtang leh tha tawh…

I BUAINA NAK: Tuni in, ‘midangte it diing, midangte dopsang diing…’ I chih chia I buaina nak khat uh Tribe vis-à-vis Zomi Identity thu ahi. A khente’n, “Zomi I hih leh Zomi mah kichi ngiatngiat zaw in, a tuamtuam a I kilawhnate uh, eg. PTC, TCU, VNO, etc. paikhia ngam le’ng Zomi hat thei taktak pan diing hi,” chi. Hiai santak ah, ‘Zomi’ pen Zo suan hihna ziaka I hihna khat na hilaw mahleh, Zo suan tribe-te ‘kikhaikhawmna min’ hih thawh phot ahihna phawk tuak hi. Zomi piangta, Zogam piang nailou. Zogam v/s India or Zomi v/s Indian chihte debate ban minam kihilou. India solkar nuai-a bitna leh dinmun hoihzaw lunggulh-a kipeek siangsiang bangdeuh hiphot I vevua.

India Danbupi pansan a I hong ki-et chia’n – I gammi hihna (nationality), Indian; I omkhakna (category), Scheduled Tribe; I sahkhua (religion), Christianity. ST (Paite) nuai-ah hiai lai gelhpa bang Naulak beh, Khristian sahkhua ah ‘Baptist member’ ahive. Hihna (Identity) haute I hi, lah, I hihnate a kikaw-kalh (contradict) om hetlou! Thil chiteng aa diing in hunbi a-om. I beh aa dia ginom mahmah kawm in I tribe aa di’n ginomna I suah thei a, I tribe aa dia ginom mahmah chiat kawm in I kikhaikhawmna ZOMI min-a kiminlawh in leh seem in I khawsa khawm thei lua uhi. Hiai Thu telsiam leh lungsim det nei di’n, simtute, Toupa’n tunglam thupha hongpia hen aw! “Lungsim det neilou tuh a thilhih tengteng ah akip kei hi.” (Jakob 1:8).

Tua ahihman in, Zomite maban diing I ngaihsut lai in, India Danbupi-a gelhlutsa Zomi tribe tuamtuamte’ pankhakna leh poimawhna ngaineu kei hial ni. PTC HQ President, Upa H Nengsong, IFS (retd.) in hichi’n a chi: “Paite mipite lakah Election leh thildang khenkhatte ziakin PTC pawl leh PTC lou chihbang a na omkha a, himahleh tua bang ngaihdante kum 2002-2003 sung in nasatak in ahong kikhengta a, 95% phial (Paite kampau) in PTC mah ka hina chi theita hi. Eite kipumkhat a, tua khit chianga midangte toh leng kigawmkhawm a, nam leh gam bawlkhiak ding PTC maban ahilai hi.” Tribe dang makaite in zong tua bang thuguan nei thei chiat le’ng bang achi dia? Telsuisiam Albert Einstein in, “Everything that is really great and inspiring is created by the individual who can labour in freedom,” na chi hi.

Mi khenkhatte’n, ‘Tribe tuamtuam-a I kiminlawhna pen India vaihawmtute’n eite kipumkhat diing lauhman-a khenzaak inla opkhum in chih thuguan hong zatkhumna ahi’ chih ngaihdan nei. Awm dektak. Tribe minte solkar in hong zatkhum ahihna sang in, Zomi innkuan akipan pau tuam zekzek heutu masate ngetna’ dawnna hizaw. ‘Tribe recognition’ ana ngetna ziak uh, The People’s Representative Act 1950 in, “A candidate seeking for Election both in the State and Parliamentary Constituencies must be recognised group not others” ana chih chet ziak bang ahideuh hi.

A mawngmawng thu’n, India solkar in ei namniam leh tawmchikte tribe tuamtuam-a khenzaak-sawn chih lamlam sang in, gam lailung lama teengte tawh tanbang I kim theihna diing lam thuguan (policy) nei hilim ahi. Scheduled area, Scheduled list, rural upliftment Schemes leh tribal quota chihte Solkar in ei nam tomte hong cheina, hong angvanna hi.

Hichi’n gen beh le’ng. “INDIA kivaipuakna hatsak na’ng in HINDU kichih ngiatngiat poimawh; a tuam a kilawhna, viz. Punjabi, Bengali, Assamese, etc. min tawh Pawl omte phiat diing ahi,” chih thu om ngei nailou. Imposition hibang thu om taleh, Unity in Diversity buaipha diing, gamsung kipumkhatna liing di aive! W Bengal state akipan, Rabindranath Tagore in Nobel Peace Prize angah pen amah mimal, a’ innkuan, leh Bengali minam minthanna ahi. Huan, India gambup min hoihsaktu zong ahi. Vaiphei, Simte, Zou, Mate, etc. min-a sep-le-bawl omte mah zong ‘Zomi minhoih or minsiat ngahna hi,’ chidan in ana saang chiat phot le’ng… Huan, ‘Zo suan- Zomi’ hihna lam kitheihsiamsakna apai kawm in, pangkhawm-a ZOMI min tawh sep diing common issue omte ngentel deuh-a en-a bawhzui theihte bawhzui sim hehu hoihlou diing adiam?

I DINNA LAI: Bungmual Weekly News (BWN), 9th March 2003-a suak, peek khatna headline item ah, “ZRO Hqtrs Makaihna in Social Work Thupitak Om” chih thu tuang. Banah, BWN, 23rd March 2003 issue news item ah – “Tarikh 18/3 zingkal in ZRO makaihna in Social Work om nawn a, kikuan hoih mahmah, lampi bawl in,” chih thu tuang leuleu. Naa-taang, sepkhawmna kichi thil sia hilou hi. I gam khantouhna dia poimawh ahi. Solkar-a Department-te I ngensiah theih ma I sep touh lai diing uh leng ahikha diing. A sepkhiakna ah, Paite Zomi opkhum bial or khawsung vai ahihleh, huai bial Paite Zomi makaite set hipah henla, Zomi makaite lemtheihna-a kiseem ahihtak leh leng, Zomi Pawlpi min pen kidaihlah kei maileh, BANG ACHI DIA?

Lamka Post, 13th February 2004 a suak news item ah, “Lamka District Hospital Operation Theatre vanzat omlouh ziak-a sawtpi kikhak nung in kihong nawn a, CMO, Surgeon leh staff-te tung ah Zomi Re-Unification Organisation (ZRO) in kipahthu puang uhi…” chih thu tuang. A seem hoihloute etzui-a, a’ seem hoihte akiphu bang uh pahtawina piak diing hithou mahleh, a tunga I gendan mah, Zomi makaite lemtheihna-a O.T. kihong ahihtak leh leng, Zomi Pawlpi min pen dawksak hikei maileh, bang achi dia? Ahi a, mimal leh pawlpi in Newspaper-a Kipahthu Genna I zarbawl mahmah lai un, kipahthu I genna/ tutna diingtak Van Pasian hizaw ahi. Hiai pen mangngilh I hih uh leh, kibawlpha meng ni - Zogam hongmial seemseem louhna diing in.

ZNC phutkhetu President Pu T Gougin in, DISCOVERY OF ZOMI RESURGENCE chih laibuta a’ gelhna sung ah, “Whether Zomis shall sink in or swim across the storming sea of the modern world will depend on their ability to unify the scattered Zomis here and there into one single family or one nomenclature on the basis of their blood relationship and ethnical oneness…Shall we remember and recall the living words of late President Kennedy who stirred his people and the world with these words, ‘United there is little we cannot do in a host or cooperative venture. Divided there is little we can do.’ The word Zomi is not so selfish as we, who are still the slaves of selfishness… When we like to come under the name Zomi we can think of bigger aims, bigger plans as our American brothers do under the common name of America,” ana chi hi.

I MABAN-A CHOUNA: Peter Drucker in, “Ideas move mountains, but it’s the bulldozers that do the job” ana chih bang in, Zomi Pawlpite ah a’ idea hong kipan henla, Zomi bawlkhia tribe-te a’ bulldozer hisak pah le’ng, i kikhaikhawmna ‘Zomi’ puak kungkung mailou diing hia? Zomi apom tribe bingte’ ginomna, hatna leh kithutuahna zahzah in Zomi hat in khang diing hilel hi. Mi dangte in Zomi amuhsit theihna uh leh belhtaak asaktheihna uh zong Vaiphei Zomi, Simte Zomi, Zou Zomi, Mate Zomi leh adangte kilatdan leh sepdan ah bangtanhiam a-kinga. Zomi pom tribe-te sung-ah leng, mimal muanhuaina nei leh innkuan kithutuak (Pasian kihta innkuan) atamna bang zel in…hilai!

“The strength of a nation is derived from the integrity of the home,” chih thudik ahi. Mahni kithunun lou-a, ‘Innsung vai’ zong hawm lah-a; innsung sanga lianzaw Kipawlna-a vaihawm dia kipan mi a-om leh, a’ pii mipite’ thumpihna nasapi’n a-kisam chihna ahi. (Sam 127 sim mah in).

Zomi Re-Unification Organisation (ZRO), 1993 kum in Phapian, Kachin state of Myanmar ah piang chih I na theihdan ahi. A’ phutkhetu President Pu K Guite in a’ genna ah, “A land or people which was once a union need to be re-unified… A broken nation needs to be patched up. Hence, Re-Unification,” chi hi. Zomi nampi (Zomi nation) gen leh zuun tuakte zuun dia Pawlpi phuhkhiak ahihlai in, tua Pawlpi in kazam tuamtuam, viz. ZC, ZIC, ZCF, ZSF, ALSOSA, ZYA, ZMA, ZAA, etc. anei hi. Tua kazamte’n tribe sunga a’ kigui-zoppih pawlnou zelte, eg, ZC-PTC, tha a-piak siamna ah (as a facilitator) leh kikoptheih vai (larger interest/ common issue) a’ geelkhiak siamna ah ‘ZOMI’ maban diing nasapi’n kinga hi

John Haggai in, “The leader seeks to communicate his vision to his followers. He captures their attention with his optimistic intuition of possible solutions to their needs. He influences them by the dynamism of his faith. He demonstrates confidence that the challenge can be met, the need resolved, the crisis overcome,” a chi. Hiai John Haggai thugen-a ngaihnathuai I sakbiik ‘capture attention of followers’ chih ahi. Ei sung ah, pawl atam mahmah. Pawl minlawh tuam omlou in, I pii-te’ attention mankha Makai khat I hih leh I lamzang-in, I maitaang lai diing. Tua hilou a, a’ bangbang uh hiam mankha phet I hih leh, lungmuang theilou diing, hi tutuih diing I hi.

‘Zomite Maban Diing’ thuneu lou hial ahihna ah genkhawm keukeu mah, kikupkhawm timtim mah, leh kaang khakha-a kalsuan mah NAM DAMNA hikha diing hi. Nam damna a’ manpha ngal a! Huaiziakin, mi piching 87 telna “Zomi Leaders and Intelligentsia Consultative Meeting”, 5th August 1998 a Lamka zaang a sai-a na omta bangbang “tu hun-a” sap (call) nawn zai rel hileh hoihlou diing adiam? Thau a-gin louh ziak leh bandh bawl omlouh ziak mai-a ‘huntawksa’ I hih khak leh, “True peace is not merely the absence of tension; it is the presence of justice,” (Martin Luther King Jr.) chih hilai dan eive. Tehkikna, evaluation kibawl zelzel tuak ahi, lawmte.

A tunga I gen, 5th August 1998 meeting-a thupukna laak-a om point thumte lak-ah, “Zomi re-unification awareness campaign shall be carried out by all Zomi Organisations,” chih tel. Kipahhuai. Solkar-a nget I neihnop le-zong, tua pen genkhiak ahihma-a moral-social integration om theihna dia Zomi awareness campaign apai ngakngak phot mah hoih hikha diing hi. A’ihleh Zomi Pawlpi & a’ kazam tuamtuam - ZC, ZSF, ALZOSA, ZYA, ZAA, etc. te’ progress report card ah bangbang atuang a, tuni’n? Demand nop pen genkhiak ma-a off record-a debate neih masak, expert committee phuan, leh heutute’ thu zuih diamdiam chihte thil demand nei, pawl ettontaak khenkhatte lampi tot ahi.

A tunga I gen ‘lampi’ namdangte’n atot theih leh, ba’ Zomite’n tawn theilou tuan diing?

“Khai le I mit zang ni, khaile I bil zang ni,
Khai le I khut zang ni, khaile I khe zang ni;
Khai le I khuak zang ni, Lungtuak’n ma-zam khawm le’ng,
Ei zong Sian’ siam hi hang, kuata’n khing zoulou diing.

Tualniam seinou zatam domsaang diing in,
Ma-zam khawm le’ng;
Mualdawn khuak bilh ningzu bang hongthou dia,
Kaangtui vualte’n ei sulnung zui diing hi.” (J C Mangte)

Zo suan sunga tribe tuamtuamte kigawmkhawm theihluat ahi chih a-gingta, lawmte khat in hichi’n gen ngei hi: “I ‘hihna’ paaikhe tuanlou a kigawmna leh pankhawmna omthei ahi chih genkhiak siam angai. Tulai a kigen-gen, Coalition Government bang lesson laak theih luatna ahi. Nambing teng I hihna paikhe ni chih hek-hawk mawk sang in Common Minimum Program (CMP) hiam, Memorandum of Understanding (MOU) bang kikumkhawm in, hiai lam ah hichibang in I pangkhawm di ua, huai lam ah noulam in mawh honpua unla…chi’n MOU bang signed thei le, kizil patna dia hoih mahmah kha diing hi. Coordination leh review lam dia lah I ZRA hiam O te hiam hoih law di hia.” ZNC or ZC bang le omlai…

THUMAL NIH: Leitung mun tuamtuam a kizang, lah a’ success rate gina hetlou thumal nih a om. Tuate ‘imposition’ leh ‘prohibition’ ahi. Pasian sinsakna kalh zong ahi. Huaiziakin, hiai thumal nihte ZOMITE mailam nawt zelna ah zat leh genkhak hinawn takei hen! “Kihazatna leh kidemna omna ah buaina leh thilhihkhelhna chiteng a om naknak ngal a. Tunglam akipan pilna bel, a tung in a siangthou phot a, huai khit in kituah a ut-a, a nunnem a, a chihnuam a, hehpihna leh gah hoih in a dim a, khentuam a nei kei-a, a lepchiah kei hi.” (Jakob 3: 16,17). Huaiziakin, “Let there be love shared among the Zomis, Let there be love seen in our eyes; Let NOW our love sweep this nation, Cause us O Lord to arise. Give us a fresh understanding, O Brotherly Love that is real,” I chi hi.

Hinna pia leh lakiik thei khat kia a-om. Huai tuh Van Pasian ahi. Ama’n huai thuneihna kuamah A pesawn kei. Huaiziakin, Agenda I neih khat paulam-a ‘thununna leh gawtna pia’ I kichih lai in leng Pasian phalna tan thei kiukiau in, pilvang mahmah ni. Pasian’ thuneihna tuh (zatsak) mi khat or pawlpi khat hikei ni maw. Lungtang tengteng-a Amah it diing, leh Amah hon-it bang ngiat-a eite khat-le-khat na ki-it a, huchia awilou mite’n Amah aa I hihdan amuh diing uh Pasian thiltup ahi. Love is patient. Hehna I neih leh zong, hehden mawklou in, Pasian awn ni. Ama’n hon ngaihdam taak bang in ‘kingaidam ni.’ ‘The one who forgive first wins the day.’

Gamlei neipa Pasian. Ama’n minamte zong bawl. A’ utte tungding/ kaainiam, a khente bang chiman zaw-mah. “Minam na itluat leh minam aneilou Jesu tawh na kituak thei kei diing,” Billy Graham in a’ chi. Minam it Zomite, Laisiangthou pansan in ki-enchian zelzel ni. Laisiangthou-a I muh, Tapa taimang kiiknawn, a’ pa kipahna ah a-lut. A’ u pa, dik leh hoih kisa mahmah pen, mi buaihuai asuak. A’ naupa it loupi khat ana hilai! Mahni dik kisak luatna Pasian tawh kigamlatna hi. Sanggam it, na kiikna diing ‘Pa’ khat a-om. Tua kiang’h na kiikta hia? “Mi gentheite vakna diing in ka sum tengteng pe vek…mahle’ng, itna ka neih kei leh, kei diing in bangmah a phatuam kei hi,” (1 Kor. 13: 3). Zakna diing bil nei in za hen!

TEHKIKNA: Paw-lam, a’ gal akipan I sung uh et ahih chia’n, gen-le-sak neneuh, kimawhsakna lam atam hi. Hiai pen, kithuzaktuahna atawm ziak, leh thunung-thuma & thiltung lel kitheihsiamsakna lam apai tawm deuhlai ziak ahi diam, chih in a om. Vantang sim theih dia Thu I suah sunte lah VAUNA, viz. ‘A huchih leh amawh a-kipuak diing,’ etc. tawh ton vek tel-a. I vai uh, Lal leh Van Vaihawmpa hawmsaklou I hikha diing uh e! Mipi vaihawmna solkar nuai-a, ei, ‘sepaih thuneihna’ tawh ana kipaw-sawn bang dekdek I hi. Golden Temple, Amritsar, Punjab-a Khalistan hel kibute luhkhiakna-a makailian, Shri K P S Gill, IPS in, “Transparency and openness had been one of the reasons for the success of Punjab Police,” a chi. E’n la, lawhchinna/ lawhsapna leh aziak bang gen diing I nei-a?

Dr V C Pau, Chairman, SSPP HQ S/C in, “Credit taking mimal hiam pawlpi hiam hilou a, credit giving minam I hihleh, I khangtou diing,” chi. A tangpi thu in, Pawlpi vaipawte hi’n mipi vantaang lam hile-hang, gen tam, seem tam leh thawh tam kisa baih theilaw deuh I hikei uh maw? Toupa Jesu’n zaw, “Na khut taklam in ahih na khut veilam in theidah heh,” chi eive! ‘A suang peuh in Toupa suan diing, Thupina I Pasian piak diing…’ (Laisiangthou) chihte manlou, theisiam zoulou I batna lai uh tam mahmah. Minam vai ah, lam pailai, tawlnga dek nailou I hi. Sep diing vum-a-vum ahihman in, capacity tuamtuam-a I pan chiat lai in, pahtawina kampau (reward) lampang kineemlou phot in, hun neihsung a a-tam theipen seemkhia hih sawm tek le. “…sepaih kuamah kidou lai-in hiai damsung khawsaknate in a kisubuai ngeikei.” (2 Tim. 2:4b).

Mizogam akipan Ulian khat in, SSPPNet 4th June 2004 ah hibang in gelh a, a’ simkha mite lungsim a-vut mahmah hi. Tua thu bel, “Dear friends, let us have long term, medium term and short term aims and objectives…Have we sufficiently concerned about the absence of education and primary health care infrastructure for our unfortunate brethens in the villages? What about immunisation of children? In that case, BPL ration card, noon day meal etc. etc.? Let SSPP collect the statistics of Human Development Index (HDI) in the hill area. Let us see whether it is better than present day Somalia or Burndi. Please think a moment about the pathetic condition of our own people in the hill? They live the lives of wild animals. How long, how long it will be? Please tell me, how long? Our condition is unacceptable. Definitely unacceptable…”

MAILAM ETNA: “Na khut-a bang ahia?” Pathian in Mosi kianga A chih in, Mosi in chiangkhun tawi ahi, chih a-kithei a, hitamahleh, Pathian in huai chiang manpha leh lamdangtak-a zangthei ahi, chih a’ thei naikei hi (Eks. 4:2, 20). Sanggam it, tuni’n na khut a om bang ahia? Innsung’ pa na hihleh, na innsung (na ji leh tate) na khut ah a om. Saptuam makai na hihleh, na kep saptuamte. Pawlpi makai na hihleh, huai pawl a mite. Tua bang zel in, solkar nasem, laisim lai, etc. Toupa’n i khut-a om pen manpha leh lamdang in zang nuam hi. I mawhpuakna masa zel, i.e. khut-a om pen, ginom taka seem mi khat I hihleh, a’ sangzaw-a hon tawisang di’n Toupa akiman gige. Halleluijah! Isai 59:1-3 sim mah in.

Awle, Mumbai khawpi a heutu khat in, ‘MI THUPI, MI PHATUAM, MI HOIH leh I nam a gum ngam leh I nam aa dinga hangsan mahmah, leh Corrupt hetlou,’ ana chih, 1980 kum a Congress-I ticket tawh Outer Manipur Parliamentary Constituency akipan MP (Mipi Palai) kaai kha kua eita? Phamsa Pu N Gouzagin S/o Enpum Naulak ahi. A’ Bungalow tawh kisai, Bangalore khawpi-a heutu suanhuai khat gensak ni: “7 Canning Lane, New Delhi hi Zomi te adia Hqs. masa ahi, chih kei chiamteh dan ana hi. Hiai mun ah ALZOSA bang, Zomi Christian Fellowship bang phuhkhiak ana hi a.” (in SSPPNet). Kalaisai!

THUSITNA: Ngaihsun mah, Kum 10 melmu ahih nung sawt kihallou-a website kichingtak khahkhe thei Pawlpi khat om a, Lamka khawpi a Zomi Nam Ni 20th February 2004 zatna hun ah (www.zogam.org), tua pawlpi ZRO ahi. Zomi nationalism chii Suangdawh khua, eh, DAIJANG khua-a tuh ahihnung kum 10 paikhit a New Delhi tualpi-a tuh thei lian-a hongbawl, mong neilou itna tawh hong zongkhia, leivui pan-a hong laamtou, TOUPA Pasian pen I tung ua hoih lua hilou maw? Toupa Pasian pen Zomite tunga A hoih mahmah ziak in bang I pethuk diing ua le? “Ka hinna aw, TOUPA phat inla; ka sunga om tengteng aw, A’ min siangthou phat in!” I chi diam?

“Bring back our captivity, O LORD, as the stream in the South.
Those who sow in tears shall reap in joy.” (NKJV Ps. 126: 4, 5)

Source: ZOGAM.COM