Manipur simlam singtang gam a lampi poimoh mah mah, a diak a Paite mite tenna khua poimoh teng tawnkha GUITE ROAD tuh British-te hunlai a kipan na om hita hi.Manipur a Paite khua tamzawte Guite hauhsakna khua ahih banah Paite mite lak a nampi khat ahihziak in a gam pumpi genna in Vuite/Guite kual chih in na om a, huai dungzui in hiai lampi zong Guite Road na kichi hi.
Hiai lampi tuh 1926 kum in mihing leh ganhing khawng a dia zinlam (bridle path) a bawl in na om hi. 1960 kum a kipan in Tribal Welfare Dept, in Jeep tai theihna dia bawl ding in pan na la ua, tua hun a kipan in “Guite Jeepable Road” chih in na om hi. Pu S. Thangkhopau Ngaihte (tua hun lai a SDC/TW) tuh hiai lampi a mohpo dia seh a om dungzui in aman zong chihtak suah in a na semtou a; lohching mah mah hi. Huai hunlai a Chief Commissioner Pu Baleswar tuh hiai lampi en dia jeep a kuan in May 8, 1968 in Thanlon khua tan taitung theita hi.
Tua nung in PWD-te’n puah zel mahle uh tuktui luan chiang in kise zel a, kumtawn in kizangthei suak ngeilou hi, Hun sawtpi apan Election kuan teng in Candidate-te’n paulap a nei in Guite Road khuangpi sat gige ua, mipite’n tuabang thuchiam a zak chiang un a taktak ding sa in khut beng puak zua zua zel mahleh uh, kum 5 toh beikhawm zel hi. Khenkhat ngial in houh a lampi bawl naksang in a min khen ding peuh buaipih in lungsim kochiik taktoh vaihawm sawm pawl bang om in kigen hi.
Kum 60 vingveng a min lel a Road a na hih nung in 1985 kum in hiai hun lai a PNC General President Pu T. Phungzathang hahpan na ziak in hiai Guite Road tuh BRTFte bawl dia piak khiak in hong om khong khong a, a min zong Guite Road mah chih ding in order suah thak hial hi. BRTF-te’n leng theihtawp suah a panla in September 26, 1985 in nasep panpah in Lamlianpi (pucca road) mah suahsak sawm in Bulldozer toh pang in phutnasa uah gari lian kipelthei ziah ziah di’n koih uhi. Hiai lampi tuh Sinzawl khua ah Sinzawl-Khawzawl Road toh kitun tuah a, Mizoram toh kikawmtuahna lampi poimoh tak suak hi. Tuni tan in Guite Road bawlna paitou zel in DoNER tungtawn in North Eastern Council (NECx) in Rs. 8251.79 Lakhs sanction ana bawlta a, Rs. 4.50 crores piakkhiat hita hi.
--------------------------------------------------------------------------------
SOURCE: YPA Central Lamka Bulletin.
No comments:
Post a Comment