Jordan Gaal

Leivang Thawnkhokam Ngaihte.

Tuchiang in Jordan gam ka tun uh kum kim bang hong hita hi. June kha apan November kha kimlai tan bang khua nim ni zong omlou in,ni tang silsel gam ahi.Kumpi gam ahi a, ka tunnung sawtlou in,amau kihilh na ‘Pathian zaw gensiat theih ahi a,Kumpipa bel gensiat theih ahi kei’ chih ka thei ngal uhi.

A khopi uh Amman, Bible(Kilakna 3:7-13) a Philadelphia ana kichih na mun, khopi lian huntawk mual sanglou khakha 19 dapsuak a om ah ka teng uhi.Ka inn uapan km.50 vel ah kum 2000 val paita a Kumpi Herod hunlai apan hihdamtheihna nei a kigen,leitung a mun niamna pen a diil minthang Dead Sea kichi om a,tua mun a ihoh ding chiang in khuavan nuai a minthang Jordan lui gei ah kitai suk a,Topa Jesu baptist tanna mun gei mahmah kitawn kha hi. A veilam ah Mosi in gamchiam a gal etna taang Nebo Tang om hi.A tungvum ah Mosi in gul a khaikangna lim kibawl om a, khawhoih ni in hiai apan Jordan luikuam te ban ah Jerusalem khopi te chiangtak in kimu thei hi.Tua mun ka tot khak chiang in la a isak sek uh ‘Taang ah Mosi’n Kanaan gal in don,Luah zoulou in Topa thukham a pua..’chih te lungsim ah hong lang hi. Huai apan gamla pi lou ah kulhpi Machaerus kichi,Baptistu Johan suangkulh tanna,nungak melhoih Salome Kumpi Herod mai a alaam na(belly dance hi peuhmah din ka ging ta) leh Johan gawltanna mun om hi. Pitu Mosi hi gamchiam Kanaan tungphial pet mah ana hi chih a theih theih a,a din mun a iki koih leh khasiat huai mahmah suak hi.Lungleng mahmah din gingta ing. Ahihhangin a kal ah Jordan lui lung a, nai tawk mahleh huai lui akan mazaw Gamchiam tung thei lou ana hi.Huai akan ding lah Siamtu Pathian in phal ta lou chu !!

Pathian hehpihna a khovel gam tuamtuam sagih bang ka pha khin a, khovel a gen phak mun kilawm leh hoihte bang zah hiam ka muh khit nung a leng ka ngaihna bei thei tuan lou tuh singtang hinkhua ahi. Pianna gam ahih ziak lel hithei din ka koih kei a,huaiziak hikei le lah adang bang ziak hiding chih ka buaipih sek hi. Ngai mahmah la bang,lah tuahtuah tuak ning chi a va dianglut kik ngam lah hi zellou a om in,bang chi ka hi ki chih chih theih din ka om set tawk hi.Ahih kei leh a lung leng mawngmawng lel khat ka hi hia leh,chih bang ka ngaihtuah zel hi. Ak khuang maimai bang,akpi kawkek maimai khong ngaihhuaisak theih zaw tulai khovel a music system hoih penpente leh lasasiam mahmah ten a hoihtheipen a a record khong uh ngaihtheihna mun a om ta hial te a din zaw thil lamdang tak le a hi. Inn nuamtak sung a,lum leh vot I utdantan a koih theihna a tutna nuam leh tawldam huai mahmah dia kumtampi research a bawl nung ua Company ten sum tampi seng a a bawl tung ua tut sang a,singtang laap insung a nangphan maimai tutna ngaih zawk chih bang zaw,mihai petmah ngaihtuahna abang hi.A hai goppetmah le kakisa. Ka tate kiang a eipau a thu kagenchian a theisiam kei ua,a theihsiam ding uh chi a English a ka gen chian lah hilou deuh sakna ka nei. Atheihsiamlouh pau ua va gengen sang a, a theihsiam pau ua va gen geih lah ahidi abang zaw zel. Mi dang omna khenkhat ah, adiakin ei lam Biakna mun te bang ah zumhuaipi dinmun ah kikoih kha sek zomah thei uhi. Ka taten kei bang a munkhat ngaihbikna a hon neitei sam di uam aw bang kachi sek. Ka ta masa Milan(Italy) khopi ,leitung a fashion munpi khat a piang ahi a,Mauritius gam(Port Luois),China gam (Hong Kong),Jordan gam(Amman) leh India(Delhi) te ah a khanglian a,kholak a ak khong a muhchian lamdang asa a,akpi kawkek bang zaw zakha nailou hin le ka thei. Meh lak a ka duhpen sa bang a duh kei a, singthupi khawng,bekan thu khong, sathu khong kihhuai asa mahmah.Eilam lunglenla te cassette a I ngaih pih chian ninhuai(boring) a sa a,a room sung ah Emimen khong Linking Park la, a thu-a la genlouh, asak thoh hia-a gen thoh hia chih le theihtheih louhkhong ngai kawm in lai a sim a,hun awl a neih deuh chiangin,computer ah game, a mik a mak ka theih zohlouh te mawl in anau toh bangmah dang a phok kei uh. Kei neulai toh kateh chian kibanglou lua kasa a,hikei deuh ve aw chihna ka nei. Ka loinun lah nang neulai bang khon hong om mok le uzaw,lungkham huai law ding ahi achih chian hon selphou lah bang lah dik mahmah zel. Ahi ngut,computer game khongsang in, kei neulai a ka hih dan in gawphel peuh,bongek gaw peuh a kidou hon sawm mai mah uhen la, skateboard sang in kangtalai peuh in Jordan lamlian mamtak te ah hong tai mai le u zaw,police ten akin akin hon matsak maimah ding uh ahi zaw. Ka hilh mun peuh leh subuai deuhdeuh ka hi chih kiphawkna ka nei.Huchi ngaihdan toh bang mah genlou a sawtsim ka om chian lah, a utut ua omsak lua ka bang zel. Kei khosakna gam lam deuh a omsak sawm pen lohsap huai pi ahi.Huaisangin amau ngaihtuahna koppih ban in ama khua uh na vensak thei leng adik leh masawn huai zaw tham ding hi. Huchihleng, lauhna hilouin zahtakna a hon nei ding uh,gen gen ngai lou in.Ken tua tan zoulou zel. Inn ning khat a va tu in,ka singtang hinkhua kum 40 val paita khong va ngaihtuah in,kataten a computer game ua America sepaih te toh kidou a buai mahmah lai un, kei mittui toh nun lui ngai kichi in kana mual zen sek hi.

Singtang hinkhua ngai a lunglenla te lak ah anuai a Lushai la ngaih leh nem kasa pen hi-

Ka rawn fang leh hmanah kan truanna tlang,
Truahpui leh vau an vulleh ta;
Kan sulihnu khuarei an chang zo tah,
Hring leh thar hnah nemte’n lo bawm.

Mihing hinkhua leng tua bang hi a,tuni a ka lom leh ka tanau te ka tu kata te toh kithei den lou ding ua,a kitheisate si ding ua,a kitheinailou te hong kithei zel ding uh pen khovel hinkhua a nopna omsun hi tou zel ding hi. Theihlouh I hauh lai a nop lai hi gige hi. Tuabang in singtang hinkhua zong a tawpchian hong bei deuhdeuh ding a,khovel thak a om masiah tuabang hinkhua omnawn talou ding hi.Huaiziakin, ka lungtang in ka khankhiakna ahih man in ngaih mahmah na ka nei gige hi. Five star hotel nuam tak a ka tun khak a,lupna nemtak spring toh kithuah zen a ka lup chian leng,ka neulai a ka nu kapa te toh buh la lougiak a,buktau a buhpawl lum hithit tung a ka luplai nuam kasa zaw hi. Huchibang deuh in ,nek leh tak chituamtuam a hon luikhiak te uh sang in Lawibual khua a kanun’ belawi ta-ngal sathu meh a a huan ka duh zaw tham.Khovel a zu hoih pen a kigen te sang in ka nu maisan tui huan mah ka duh zaw gige ding. Khovel a mun kilawm a kigen Italy a Florence te,Isola Bella te,Venice te,Hong Kong a Ocean Park te ka en en a,huaite sang in singtang a kalou ua buhte gai panpan ta,buh a min chia sekkhawm nang buktau bawl lai in, phavang ni siangtak a hong tang a, lou tawlam apan huih zang awl in hong nungtou a,buh hing dimdim te amual amual in a hon mut ling tou diai diai a,huaite kilawm sa a kipak mahmah hileh kilawm in buk sak zek a zikngal kung ah khankha nupa leeng kawm in a hong kinou ham ging chik chik ua, van sang a mei lom hat tak a taiten nisa hon liah in, alim nungzuiin nisa zung kilawm takin buh leh bal hing dimdim te aban aban in hon tan sial sial uh bang zaw ..a tung a gen te toh tehin aleh tampi in a kilawm zaw hi. Lushai la phuaktu khat mah in tuate kilawm sa lua in,Pathian Tapa neihsun leng huaite mu dia leitung a Pa’n a piansak houh a hi ding anachi hial hi. Singtang lokuan vaipai tamtak kiton lai lamkoi na mun ah, chih simsim nun a hon en ngeiding chih beisei a I et laitak a honna en petmah bang zaw tulai a atomic bomb in hon dengkha bang tuk hial hi din ka ging.

Midangten Jordan gaal a bang om din angaihtuah ua chih ka thei kei na a, gamchiam, bawngnoi leh khuaizu a dim,nopna kimna,paradise,lei lungkham omnonlouhna mun,a honna paisansa I nu leh pa,uleh nau te toh ki muhtuahna mun,si leh gim omnonlouhna mun te a tang pi a laphuaktu te a pan Jordan gaal omdan hi a theih ahi. Khenkhat in vangam bang le achi kha di u e. Kei ngaihdan in zaw Jordan gaal ah bang a om a chih theih chet sang mah in kipahna leh khamuanna I muhna mun dia I LAMET hi’n koih leng hoih kasa pen. Mimal I tuam dungzuiin,I Jordan Gaal uh leng a kibatvek ka gingta kei. I ngaihdan leh I lamet dan zil ahi ding. Kei mimal adin zaw ka Jordan gaal zaw koimah dang hilou in singtang hinkhua ahi! Hongtungding hinkhua ah Pathian in adang dang sang mah in singtang hinkhua hon pe nawn hen la,louna seem in,buk peuh lam in,buh min te kaikhawm in buh pawl tung te ah hon lumsak nawn leh ut huaisa hina mai zen ing e. Topa hon panpih in.