Monday, June 18, 2007

ROSSINA CALLING: Na Pammai Ngei


- Hausienmuan Munluo

Tua nitah theikhol loupi’n PVR mai ah nai11:00pm in ka ki tuah uhi. Rossina maisua kisuanla na in adim, ka maisua a lamdang sahna um a hai sih. Ka gintat louna mun a kol tangval toh kamu in ahing kigui sah. Muan, chi’n hinghan in nuihem nanleh Eh! Rossina, nahi maw, chin ka nui hi. Azil nate zou a, sotlou a asepna join ding ahi dante gen in tua kolpa toh umkhom ding ahi dan zong ahing gen hi.

Rossina it ka hi diai mah, tua nitah ihmulou in ka ngaitua hi. Rossina ka senlawm dei, nidang a numei hoi, Christian innsung hoitah a hing khangkhia a, tua zankim nua a etlahuai tah a kichei leh Beer nam lamdang kasa hi. Bang chidan a Delhi a um a, muhkha hilou a, ami asa te lah a hing kihal lou ade aw? Innlam a anu apa gendan toh tua a umdan, Rossina; ka houpi in kei sang in gamtat, khohei dan, Delhi thu a theisiam zaw. Kei ngaidante ama a din nuizat huai a bang ta, ama hing thuhil khat, “Life is a game, play it” in kadip a kawsah. Bang hileh adeidan in umnanleh apilna, siamnate amite lah ah hing zang leh anam mawl in phattuampi di’n ka gingta hi. Tuazan nidang a Rossina tawh Hapi sakol kangtarai dangka-eng a taite ka etlaite uh ka geelkhia hi. Rossina, bang a pil leh siamte’n ilah uah maa puileh dei um hi.

Inam in apoimaw, pil/siam, hoi/fel leh neizoute I khotang leh I nam in a zah khahlou, na kasa hi. Rossina, “Kou aneilou leh mawl, zah theilou teng in bang ding a nam it diah ka di uai? Nou lekhasiam, sepnalian nei, inam in ahing zahtheipen ding leh etton ding pente bang ding a zattheilou leh zawlngai zaw a pang nahi uai? Rossina, na lawmlui na seppi Betsiba anam sung ua zatthei pen in apang. Nang na pilna, hoinate, na siamnate inam in ahing zah khahlou a namdang lah a na mangthang mai ding Rossina, Aw na pammai ngei………

Kumkhat zou zankim in call hing pei a, ka loipa’n ‘Rossina!’ chin, hing pia hi. Houpi nuam nanleng a line kitat. Rossina, nang nadei bang namdang kol le vai vabel, kenvang “Namdang kol le vai, English, Hindu nungah, hamtuam thaw sang in eimi nungah, puanten siam, pu le pa tawndan thei Zogam dingdi kana guhngai ta…” chia ka zahkhom a ka phunlai in, call hing pei a mobile ka et leh Rossina calling.....kigiel in, inammi khat vangsia, imi khat hing liangvai taisan thei tuanlou ka hi manin’ hello! Rossina’, chi’n ka hing kihou uhi. [ BEITA]

No comments:

Post a Comment