Zomi Mah Masak Ni

I Khankhiatna tawh kisai

Zomite omna i gam pen i theihsa mah bangin lampi leh kizopna tak zong kinei cian nai lo ahihman in, khat leh khat kikal i ki-it theih vatvat loh zong khialsam khang. Khangkhawmlo, muhna kibanglotek, pianna khuapan khuadang zong paikhia ngeiloteng gamdang tung vat leng pen Cultural shock leh muna kihongna khat kinei ciat hi. Ahizong Zomi tamtak tuni ciang, gamdang om sawt mahmah taleh Khua leh Tui, beh leh phung pen Zomi sang athupisakden kiom lai zen hi.

Namneu lungsim kipaikhia zo nai mahmah nai lo cihding hi. Khamtung aomte kilemloh pen va gensiat theih hinawn ta lo ai ve maw...

Tuhun Dinmun

Hun tawh kizui in, Zomite zong kikhangto kawikawi ta in, minam lungsim awareness khat kinei thei ta hi. Zomi Khangthakte ong en leu chin, ka lungsimpuak uh leh ka ngaihsutnate uh pen khanghamte sang khauhpai zaw ta mawk hi. Zomi mah kicikiptek ta hi. Zomi mah tawh ki lungkim thei ciatta hi. Beh leh phung sang Zomi kimasak nuamta hi. Zomi ading ahihnak leh ci in, Khangthakte kasantek ta hi ung. Kuakua in bang adeih zong Zomi pan kitai thei tuan loding ahihciang, Zomi mah tawh lungkim peuh leng kikhangto baihzaw inteh cih kitelsiam theita hi. Ei hihlohnapi va kineih ding hilo mah hi. I min diktak i theih leh zatpah ziahziah ding hilel hi. Zomi tawh Refugee kingah thei lo khawng peuh isak leh kingah thei lua lel hi. Chin bek tawh Refugee kingah hituan lo hi. Tua deihna tawh Chin kicinuam i omkhak leh cihna hi.

I Lungsim Puakdan Ding

Zomi sungah namneu tampi om pen ahoihlam i zatsiam ding kisam hi. Ong khen ding leh ong kimudahsak ding hi lo zaw a, ong gawmtuah ding hizaw hi. I pianna khuate i minam min hi lo a, tua mah bangin Tedim minam cihbang omthei loding hi.Tonzang minam, Cikha minam cihbagn omlo hi. Zomi minam bek om a, Guite minam, Naulak minam, Gualnam minam, Sukte minam cihbang hilo zaw a, innkuan min hizaw hi. Naulak i tateng Naulak beh ahilel hi. Tuapen Naulak i innkuan khangsimna hilel hi. Tua innkuan minteng kigawm Zomi hi. Tua ahih leh i minam pen Zomi mah ahihi.

Zomi mah masak ni. Zomi mah tawh lungkim ni. Ei sung kilem kei leng ei sung mah supna ong tungsak ding hilel hi. Zomi kici nidang makai sunsunten hihdan dinmun leh ngaihsutna lungsim (Stand) na nei ngam lo uh ahihman, tuni ciang dong atu ata eiteng in i thuak lawh hi. Nidang lai kilakik thei ahihloh hang, tuapan lesson i laktheih ding kisam hi. Khanloh hun hinawn lo phial-a, sephun hizaw ta hi. Zomi noptuam nading i septheih ompak kei leh zong Zomi tawisang in promote leng tua zong minam nasep mah hi.

Deihsakna tawh,

Paul Khaipu

Source: zoforum4zo