Zogam Poimohna

Written by Douzathang Guite

Nitaak khat ann ne khin, khua mui sim jip-jiapta, hih ding poimoh lua om khollou chi’n ka hulliap uah mei leng vak se lou in kei vuak ka tu mial khiip khiap a; dohkan sik a kingai hial mah in ZOGAM POIMOHNA TUAM TUAM THEIHKHIAK PHAMOH SA in kong ki ngaihtuah ek tazen hi. Ki ngaihtuah fuh sim ka hia, a fuhlou lam, JAPAN GAALPI peuh ka ngaihtuah khe thep-thup hi.

Chihbel Japan gaal toh kisai ahih nak leh i sorkar lamte’n Phaipi (Imphal) leh Moirang kia pibawl in, war cemetry/war memorial khong huai ah bawl uhi. Pibawl uh ahihman, tourist hiam, sorkar toh kisai mi poimoh hong pai, hongveh om chia’n tua munte kawkmuh in, amau zong tuamun a phak khit chiang un hun sa gawp in a nna uh zou bang in ki ngai uhi. Moirang khua a Netaji Subhash Chandra Bose saipi tung-tuang a kilang zual chihman lela tuamun thupi bawl luat tuam ding a diam?

Ei Zogam a CHIKHA JAANG, PALDAI LUIKUAM leh MISSION COMPOUND (Tuitha phai) gaalphual masa zawte bang dia poimoh ngaih jaw lou mawk ding! Huai munte lah a ki nak beihna uh gaalphual masa zawte ahi ngal a. Ngaih neep theih vual hi lou hi. Gaalpi in Manipur janggam hon phakma tham in ei Zolei ah nasa tak in na ki nuai khin dim-dem ua, a tawpkuan in Manipur phaijaang hon pha lel hi zaw. A chil lam in Japante hatlaw petmah in Singapore khawng ah British (Allied Forces) te’n theihtawp suah mah le uh nangzou vuallou ua; nan zong nangman lou uh chih theih khop in maban hon suan zung zung ua 1942 in Pegu leh Rangoon la uhi. Huai apan ei Zogam honglut in 1944 in Zogam tua Manipur nuai a om khakna hong lutpan uhi. CHIKHA JANG leh PALDAI LUI KUAM galphualte a theihtawp suah in tunglam leh nuailam ah na ki bei uhi. Allied Forces te’n nang zou lou ahih man un Japan te’n ma hon sawn zel ua.

Chikha jaang tun Myanmar gam sung ah omkha a India gamgi juul Zomi vi-ve mah tenna ahi. Paldai gaalphual pen lah Singngat kho dung hi mai mah!Tuate ahih man Japan gaal ei Zogam in thuak kha hoih ngel chih ding ahi. Tuma kum 30 malam, chizen mah le, ka teirol tung lai khawng in singtang dawn a om, skul kai louh sung peuh mah TUKAWL (Lou khohna tu) tawi a sunni-tang tum a lou khoh nasep ahi mai hi. Loulai a ka pa’n gaalthu hon hilhte bang ka phawk thak thak hial hi. “Japan gaal sukpi lai tak leh na u (kei tung a chiah) pian aki tuah chit chiat ziak in naungek sen neih tawh, sepaihte sukbuai gi ge tawh, buai peetmah in ka buai uh” a chih khawng. Songtal khua a ka inn uh mun ki doh tak ahih man in, tangpanna lem chi in sepaih paisuk-paitou te’n ka in uh enlah ua amau omna dia suk awng gi-ge ngai ahihman khosung a sepaih sukbuai mun pen in na pangkha uhi. Chiangkot leh mankhong bang a na kituak lemchang hi maizen leu na ki “chapa gap” hial kha ding hi. Tulai bang a thaugin jak phet chia lei lak a boh suk pah na chang lah ki thei teuh-teuh lou ahih man. Khawnawl a luiguam leh kawlhawm peuh a ava bukni uh tam hi.

Huchi’n Songtal tang leh Sinjawl taang phei teng sepaihte’n ven chih tak a na veng uhi. A kallak in Japante va paikha tham ua; a ki tuahlem louh ziak uh ahia, eite vang ahia na ki bei kha hial sam lou uhi. Pathianni jing khat Sinjawl khua ah Jet Fighter in khozang a sih gam theih na ding khat va khe ek mawk; kholai tak tu kha zomah! Ahi a, vangphat huai tak in puaklou vanglak. A nung in bel tuivai ngasa tampi in sih lawh aki chi. Puakzak hi maizen le tuh tuni a Sinjawl khua a neilou ding hi kha ding ihi. A khonung a ki gen dan in-huaini pawlte vok gou ding chia singkhuah suang tum toh a vok goh ding uh a delh duam duam uleh tunglam a na lengkha om geih ua, huaite’n pawlte sa neding a lawp ahihlam uh theilou a bomb khiak khum suk ek uh na hi dan ahi.

Chikha jaang leh Paldai lui kuam a aki beihsan lai ua Jet fighter a sun a jan a alen kawm a kap athuah khawng mitkha’n a mang mawh hial achi uhi. Asi, aliam leh damlou a si lah tam..a diak in Japante supply bang a paihoih thei kei a; gamlak a nektheih- nekmawh ne in om ua; gawtuai bang a hah nek luat man un santan a sihloh bang a tam uh aki chi. Huchihlai in i gamsung a pasal ngalhat leh hangsan taphot galdou bel hilou; camp luh chi in kidouna nung camp taihsante a thil nawtsiatte deihna in galphual a alut-apawt ki phamat zen uh hih tuak. A khente ngial in sepaih sisate tuamna, komol bang lemkhia in a la uh a ki chi. Chidaih le, Japante thau bel neu tiuh-teuh a pahtak huai tung tuan a chi uh. Paldai galphual ban a Japante’n ma hon sawn tou zel in Tuitha phai manoh in hong ki niltou zel ua, Imphal, Moirangte bel Hiangkot tang peuh tawn a Tuithaphai pan a alut uh hi zaw. Tuithaphai leh Mission Compound hon naih luat tak un April 5,1944 in Pu Duncan (tulai SDO i chihte ahi di chu) va hoh in mipite kin-le-buang a pot-dok di’n thu vapia hi. In hoih tak tak leh buh-le-bal khempeuh haltum in na om hi. Galziak a inhal chihpen tunai zek a pan hilou a,hun sawtpi apan na kipansa ahi vial ka.. Thukhunlui hunlai pek a na kipan hi zomah hihtuak (A theihak lam houh ihi di e).

Huailai a khalam a hon makaih Pu Rostadte nupa Tuitaw gam juan in potkhe thei ham ham ua, huchilou Mission nasem dangte leh Tuithaphai mipite bel singtanglam ki denna uh hih tuak. Galtaite Hiangkot tang khong a gimtak a apailai un Japan sepaihte toh tuakkha ua,pelh a leng pelh senglouh a pha uh a ki chi. A khente singlem puak bang a kalhsiat sak zomah ua, huchihlai a Mission sumkemtupa Pu H.L.Sela in sumtang a kepRs5000/-a laksak ding uh lau in aman paw ngamlou in a tapa Pu Zalal(naupang lai) posak hial hihtuak. NEIG Missionte vanneih teng Pu Rostadte room sung a kalhkhum zok a taihsante uh ki hal tum dim-dem hi.Pasal khenkhat lah ut leh utlouh thu hita lou in vanpaw ding leh lamhilh ding in alang tuak tauk suk buai in na om uhi.

Japan gal tuh i Zogam in na thuak nasa petmah a; kidouna phual na hi kha hi.Information kim deuh a history lam saikhate sui di’n i koih dia..Eh! Kaihlam jou nawng kawm ah lenna khat bang hong ke kha zo mah hi ei. Hiai bang a i Zogam in ana thuak khak gaalpi; athuak kha hetlou bang a hon bawltheite nuai a i om khak pen a vangtah huai lua nasa kei maw? Ki ngaihtuah thak zel in Singngat khaw taw a Tedim Road leh Guite Road kituahna thuampi bang ah mualsuang thupi deuh mai phut khe ngek ngawk in huai ah (etsakna lel) hi chi bang pian in gelh le: IN APRIL 1944,THE MIGHTY JAPANESE AND INA FORCES LED BY NETAJI SUBHASH CHANDRA BOSE PASSED THROUGH THIS ROUTE AFTER A FIERCE BATTLE AT CHIKHA JAANG WHICH IS HARDLY____KMS FROM THIS PLACE AND THEY FOUGHT ANOTHER FIERCE BATTLE AT PALDAI RIVER BANK,A LITTLE DISTANCE AWAY FROM HERE..

Hichibang deuh khong a clue omthei khat bek na bawlkhe phawt in; history hoihtak a gelh thoh bang omlai leh, gaalpi ziak in tourist mun poimoh bang i neihloh ding, i climate, sing-le-lou hinga i gam lah nuam ngal. Tourist Lodge hoihtak bang hong ki lamkhe pah khamoh lou ding hi. I makaite bang in pan hon la ngial le uh. Ei leh ei iki suk poimoh kei leh kuan hon su poimoh leh hon domkang ut lah hilou ahih chia’n..pan na la in i theih kham kham na hih le ni khat ni chiang in a tak hong suak ding hi.
--------------------------------------------------------------

Hiai thu hi Pu Douzathang, D.Guite chi a theih lar, Manipur apan khualzin lam bansamte’n a theih vek uh, Zogam vei, akhanna ding geel leh ngaihtuah tuah in talsawn zen a ki ngaihtuah a agelh ahi . A laigelh in Zomite’n maban i khual leh sorkal a kingak a mau ngak mai lou a i hih theih theih lam chiteng a i na hih a i pat ding ahi’h hon phawk sak.

Source: ZogamOnline.com/blog