Editorial, Lamka Post
Midangte leh gamdangte’n CCpur district a hon meltheih dan uh tuh ‘A land of Presidents’ chih ahi hial hi. CCpur district sung ah Nam tuamtuam a tam mahmah a, tuate tuh Paite, Thadou, Hmar, Lusai, Zou, Simte, Gangte, Kom, Vaiphei chih leh a dangdangte ahi. Hiaite kikhai khawmna ding in Union/Association/Organization nei chiat ua, tua ah President leh Secretary chih min vuah ahi chiat hi. Hiaite nuai ah Youth Association, Students Association tuam chiat a nei ua, tuate ah tuh President leh Secretary tuam chiat a nei nawn uhi. Tua banah, Nam khat sung ah beh tuamtuam tampi a sawm a sim chiat a om a, tuate’n beh-le-phung kihui tuamna in Union/Association/Organization a nei chiat lai ua, gentehna ding in Guite Phungpi Organization President chi bang pian in a dangte’n leng chi tuamtuam i nei uhi. Hiai teng hong kigawmkhawm tuh President tamtak a phat a, himahleh tuate ban ah district level in organization/Association tamtak a om nawn, etsakna ding in CDSU, ITLC, Pensioners Assn. chih leh a dangdang gensenglouh a omlai hi. Hiaite’n president khat chiat a nei uhi. Tuate ban ah leng namchih in saptuam a tuamchiat i nei lai ua, biakinn tuamchiat i nei lai ua, tuate’n makai a tuam chiat a nei lai uhi.
President tam ziak a muanna-le-bitna leh dan-le-thupiak hoih ding hileh i gamsung uh tuh USA, Russia chih leh gamdangte sang inleng nakpitak in bitna a om ding a, tuabang mah in President tamziaka gam sung khantouhna om ding hileh gamdang kuamah khantouhna toh kisai in i eng kei hial ding uhi. Saptuam leh saptuam makai tamtak om ziak a i gam sung Gospel in luahdim ding hileh, England, USA leh South Korea gamte toh i kigamlat law kei ding hi. Bangziak a President hichilawmlawm a tam i hi ua, chih a ziak sui tham thil kiselgu om hiphial ding inleng ngaihtuahna ah a om sek hi. Bangziak a pawlpi hichilawm lawm a tam ahia, pawlpi kibawlte’n bang hamphatna nei ahi ua, pawlpi kibawlte ziak a mipite’n bang hamphatna ngah i hua, chih leh a dangdang ngaihtuah tham ching mahmah hi’n i ngaihtuah hi. Pawlpi tamtakte tuh mipi a ding a phatuam sem a, a poimohna a mipi sik-le-tang a ding tamtak a om ding a, tuabang mah in pawlpi tamtak tuh mipi-sik-letang a ding tuanlou a, mi tawmchik committee member tawmchikte a ding lel a phattuam tamtak leng a om ding in gintakhuai hi. Tuabang zel in, leader tamtakte tuh minister/MLA leh DC te mai a sanction nget theihna ding chiang lel a President dinmun let ut tamtak om i hiding uam chih theih ding in om hi.
CCpur district sung a pawlpi lian deuhdeuh leh a president te leh Tribe leader a President te tuh a vangim in security toh kisai, development works toh kisai leh thil tuamtuam ah DC makaih in meeting a nei zel ua, meeting na mun ah thu hoihtaktak DC maivilna kawm in a gen ua, meeting zoh chiang in tuh a tuamchiat a DC kimuhpih in IAY leh sanction neuchikchik khong ngen chih ahizel hi. Tuabangmah in sepaih sapliante toh meeting neihna mun ah leng meeting zoh chiang a Whisky buk khat buk 2 a Leadership zuak theizel tamtak om hih tuak hi. Sanction neuchik a ngen theitu makai leh Whisky buk 1 a ngen thei Nam heutu leh pawlpi makai tuh banchi’n DC in heutu’n a sim thei dia? bangchi’n sepaih samte’n heutu in a sim thei dia? chih ahi. Amau kizuak ahi kei ua, i nam pumpi Whisky buk khat ahihkeileh IAY sanction khat khong a zuak ahizaw uhi. Leader hihna toh sumdawn a a kiton lai teng mite’n leader in a hon koih thei kei ding ua, leader hihna ziak a hamphatna ding chan ngam leader tuh mite’n leader chi thei pan ding uh ahi chih theih poimoh hi. Amaute mohsa kawmkawm in mipite’n leng hiai bang thil neuchik enlah guigui ding in i makaite uh koih kei thei le uthuai mahmah hi.
www.zogam.com
Midangte leh gamdangte’n CCpur district a hon meltheih dan uh tuh ‘A land of Presidents’ chih ahi hial hi. CCpur district sung ah Nam tuamtuam a tam mahmah a, tuate tuh Paite, Thadou, Hmar, Lusai, Zou, Simte, Gangte, Kom, Vaiphei chih leh a dangdangte ahi. Hiaite kikhai khawmna ding in Union/Association/Organization nei chiat ua, tua ah President leh Secretary chih min vuah ahi chiat hi. Hiaite nuai ah Youth Association, Students Association tuam chiat a nei ua, tuate ah tuh President leh Secretary tuam chiat a nei nawn uhi. Tua banah, Nam khat sung ah beh tuamtuam tampi a sawm a sim chiat a om a, tuate’n beh-le-phung kihui tuamna in Union/Association/Organization a nei chiat lai ua, gentehna ding in Guite Phungpi Organization President chi bang pian in a dangte’n leng chi tuamtuam i nei uhi. Hiai teng hong kigawmkhawm tuh President tamtak a phat a, himahleh tuate ban ah district level in organization/Association tamtak a om nawn, etsakna ding in CDSU, ITLC, Pensioners Assn. chih leh a dangdang gensenglouh a omlai hi. Hiaite’n president khat chiat a nei uhi. Tuate ban ah leng namchih in saptuam a tuamchiat i nei lai ua, biakinn tuamchiat i nei lai ua, tuate’n makai a tuam chiat a nei lai uhi.
President tam ziak a muanna-le-bitna leh dan-le-thupiak hoih ding hileh i gamsung uh tuh USA, Russia chih leh gamdangte sang inleng nakpitak in bitna a om ding a, tuabang mah in President tamziaka gam sung khantouhna om ding hileh gamdang kuamah khantouhna toh kisai in i eng kei hial ding uhi. Saptuam leh saptuam makai tamtak om ziak a i gam sung Gospel in luahdim ding hileh, England, USA leh South Korea gamte toh i kigamlat law kei ding hi. Bangziak a President hichilawmlawm a tam i hi ua, chih a ziak sui tham thil kiselgu om hiphial ding inleng ngaihtuahna ah a om sek hi. Bangziak a pawlpi hichilawm lawm a tam ahia, pawlpi kibawlte’n bang hamphatna nei ahi ua, pawlpi kibawlte ziak a mipite’n bang hamphatna ngah i hua, chih leh a dangdang ngaihtuah tham ching mahmah hi’n i ngaihtuah hi. Pawlpi tamtakte tuh mipi a ding a phatuam sem a, a poimohna a mipi sik-le-tang a ding tamtak a om ding a, tuabang mah in pawlpi tamtak tuh mipi-sik-letang a ding tuanlou a, mi tawmchik committee member tawmchikte a ding lel a phattuam tamtak leng a om ding in gintakhuai hi. Tuabang zel in, leader tamtakte tuh minister/MLA leh DC te mai a sanction nget theihna ding chiang lel a President dinmun let ut tamtak om i hiding uam chih theih ding in om hi.
CCpur district sung a pawlpi lian deuhdeuh leh a president te leh Tribe leader a President te tuh a vangim in security toh kisai, development works toh kisai leh thil tuamtuam ah DC makaih in meeting a nei zel ua, meeting na mun ah thu hoihtaktak DC maivilna kawm in a gen ua, meeting zoh chiang in tuh a tuamchiat a DC kimuhpih in IAY leh sanction neuchikchik khong ngen chih ahizel hi. Tuabangmah in sepaih sapliante toh meeting neihna mun ah leng meeting zoh chiang a Whisky buk khat buk 2 a Leadership zuak theizel tamtak om hih tuak hi. Sanction neuchik a ngen theitu makai leh Whisky buk 1 a ngen thei Nam heutu leh pawlpi makai tuh banchi’n DC in heutu’n a sim thei dia? bangchi’n sepaih samte’n heutu in a sim thei dia? chih ahi. Amau kizuak ahi kei ua, i nam pumpi Whisky buk khat ahihkeileh IAY sanction khat khong a zuak ahizaw uhi. Leader hihna toh sumdawn a a kiton lai teng mite’n leader in a hon koih thei kei ding ua, leader hihna ziak a hamphatna ding chan ngam leader tuh mite’n leader chi thei pan ding uh ahi chih theih poimoh hi. Amaute mohsa kawmkawm in mipite’n leng hiai bang thil neuchik enlah guigui ding in i makaite uh koih kei thei le uthuai mahmah hi.
www.zogam.com
No comments:
Post a Comment