Friday, May 30, 2008

Min tungtawn a hihna kepbitna

Editorial, The Lamka Post May 30, 2008

Khovel in singtangmite kepbitna leh dopsangna ding a awlmoh mahmah dungzui in India in leng reservation bang bawl in singtangmite duat mahmah hi. India a Vai singtangmite lak ah a diak in Rajasthan leh a sehvel a Meena-te siamsinna lam ah sang mahmah ua, Northeast a singtangmite’n leng kiphalou hi. Himahleh, a tangpi thu in Vai singtangmite tuantual mahmah ua, Northeast bial a ei singtangmite bel amau toh teh in changkangtak ihi uhi. Apaisa kum 100 mailam zek a leng sumtawng bia a kithawite himahlehang Khristian sahkhua a hong lut ziak in a hoihlam hi’n a hoihloulam hitaleh, kikhenlamdangna nasatak i lak uah tung hi. Pathian Thu ziak in i pu-pa ngeina dan tamtak khen theih leh bawl lamdang a zat teitei theih liai teng i zang hamham ua, Khristian sahkhua toh kituaklou hi a i theihte uh ahihleh tawpsan siang leng ina hi uhi. A hoihloute tawpsan a, a hoihte lak kichi thil hoihlua hinapi in a zuih taktak bel thil haksapi ahihman in a hoihloute leng sutzop pawl bang, a hoihte laklouh pawl bang tamtak i nei uhi.

Kisapna min phuah dan toh kisai a Northeast singtangmite lak i et chiang in, Pathian Thu a lut masakna mahmahte lak a khat Meghalaya bang ah Khasi te’n amau min taktak, pu-pa ngeina dan a kisapna min, singtangmi min ana kiphuahte uh mangthang in Sap min mak deuhdeuh phuak mawkta uhi. Pathian Thu a hatna mahmah Mizoram ah leng huchimahbang in mi’n Sap min hahzat mahmah uhi. Nagaland ah leng Meghalaya leh Mizoram bang hial hikei mahleh Sap min zat kichi om thou hi. Manipur ah ahihleh tutung Class XII leh Class X result suak ah Sap min zang a tamlam muhtheih in om a, a diak in Churachandpur district ah huchibang min nei tam mahmah hi. Tua Class XII leh Class X result suak pansan in Kuki, Vaiphei, Paite, Zou, Simte, Gangte etc. lak ah ahihleh Sap min zang omthou mahleh Hmar lak ah Sap min zang tampen ding in gintakhuai hi. Mi khenkhatte bel nu-le-pa hiam ahihkeileh tanau-lainate’n deihtohtak in pu-pa ngeina dan in ei singtangmi min i kiphuah sekte banah Sap min phuak uhi. Tanau-lainate’n deihthohtak a singtangmi min a phuahsak uh bang zanglou in a khente’n amau leh amau bang Sap min kiphuah uhi. Mi khenkhatte lah mi a ding khualsiam mahmah ua, Kawlgam-Vaigam a om chiang un mi’n ei singtangmi min pen loh/lam haksa salua uh chih ziak in Kawlte-Vaite “khualna” in Sap min bang kiphuah uhi.

Mahni leh mahni min kiphuah hi’n nu-le-pa ahihkeileh tanau-lainate’n a hon phuahsak uh hitaleh, Sap min a hong hih chiang in nawngkaina tampi om thei hi. Pu-pa ngeina dan a ei singtangmi min toh Sap min pen zatkhawm, gelhkhawm ahihchiang in i minte uh sau petmah a, application form khenkhat bang ah talou in omthei mawk hi. Saulua chih ziak a laktom a gelh ahihchiang in ei singtangmi min pen mang mawk hi. Huchibangte min i simkhak chiang in American, British ahihkeileh Austrialian peuh ahi dia aw chih theih in om a, himahleh, a mel uh i muh hial chiang in mit bing cheichei, sam vom, vun eng leh neu lingleng khong ana himaimah ut uhi. Thudik ahihleh ahihlouh bel thutuam, mi khat ngial a min a ei singtangmi min himhim dawklou ahihna ah, a sepna a leng Scheduled Tribe hidia ana gingtalou un, (South Indian Christian hidia gingta uh) a kaisang ding hun a kaisang khalou bang om hi’n kigen hi.

Ei singtangmi min hilou phuah kichi pen a ziak tuamtuam zong in, Westernisation, Modernisation, Christian influence ahihkeileh akpi ziak chimahlehang, min kichi pen i hihna (identity) taklangtu ahihna ah ngaih poimoh tuak mahmah khat ahi. Khovel a Nam thupi leh changkang taktakte dan a Pu-pa Ngeina leh Tawndan hoih leh bittak leng neiloute ihihna uah, ei singtangmi min pen singtangmi, eimi i hihna uh taklatna kia hilou in, i Pu-pa Ngeina leh Tawndan kepbitna khat ahi. Sap min hiam ahihkeileh ei singtangmi min hiloupi zat pen Nam manna ahi a, hihna kichian neihlou a mi hihna koppihna ahi. Sorkar nangawn in leng ei singtangmite hon dopsang sawm leh i hihna uh kepbitna ding in reservation tungtawn leh scheme tuamtuam tungtawn in panla mahleh, ei mahmah in i hihna uh i paih in i zuak nakkhem uhi. Ei singtangmi min loh/sap haksa sa Vaite khong khual kichi pen suanlam chinglou ahihman in khual ngai mahmahlou ua, a hon saptheih masiah uh hilh nilouh leng hoihzaw ding hi. Huai ziak in, i hihna uh i kepbit theihna lampi om khat zui pah in, i hihna uh taklangtu ei singtangmi min mah zang leng hoihzaw ding in gintakhuai hi.

Soure: www.zogam.com

No comments:

Post a Comment