Editorial, The Lamka Post July 01, 2008
Manipur ah buaina neuhneuh tam thei mahmah ahihna ah kuate hiam, bang pawl hiam in lungkimlouh lahna, ngetna, sorkar ahihkeileh helpawlte hiam nawkna dan a bandh, blockade, general strike leh economic blockade chihte zang in kiphin uhi. Bandh hiam ahihkeileh general strike kichi a om chiang in a tangpi in ‘minautang khualna’ ziak in school-te, damdawi inn leh damlouhna toh kisaite banah PHED garite chih bang huamsaklouh in om sek hi. Himahleh, bandh, blockade, general strike leh economic blockade kichite’n minautang a dia nawngkaina a tut dan bel haih vual hilou a, hindan ngeina nasatak a buaisak in a diak in nektawm zongte haksatna nakpitak in behlap hi. Huai kia hilou in, hiai bang a kiphinnate ziak in sorkar in kum teng in sum a crore a sim mansuah gige a, a tuat dan ngial un bandh, blockade, general strike leh economic blockade ziak in 2004 apat 2007 January 27 sung in Rs. 1319.96 crore mang ban hi. Kua pawl hi’n bang pawl hitale uh, sorkar hiam ahihkeileh helpawlte tung a phut leh nget a neih ziak ua mipite thuaksak kichi pen thil dik hilou hi.
Democracy a kivaipuak i hihna uah, lungkimlouhna neite bel a ut ua leh kiphin thei mah ahi uhi. A lungkimlouhna uh dik hitamahleh deih leh nget a neih ziak ua mipi tamzawte thuaksak, a right uh bohsiatsak kichi pen siamtan (justify) theih hilou hi. Sorkar in leng hiai bang dinmun haih tuanlou a, tumalam in bandh pen dan toh kituaklou hidan a puang in Cabinet in khamna ana bawlta hi. Cabinet thupukna tungtawn a bandh bawl ding kham ahihnung June 26, 2008 in Law Secretary in senior Advocate 4, N Kerani, P Ibomcha, Th. Modhu leh H. Chandrajit tung ah bandh toh kisai in mohpuakna poimohtak guan hi. Hiai Advocate 4-te mohpuakna ahihleh bandh ziak a sorkar in sum a manloh ding teng court tungtawn a bandh bawlte liausak ding ahi.
Bandh leh economic blockade kichite’n mipi a dia haksatna nasatak a tut dan leh khanmohbawk khat ahihdan thei a bandh leh blockade douna dia hiai bang a pan a lakna kipahpihhuai mahmah hi. Manipur sung mun dang toh teh in Churachandpur district ah bandh leh blockade zang a kiphinna tam lawmlawm kei mahleh Tedim Road dung leh National Highway 39 dung a buaina a om teng in a thuakpen in kipang gige hi.
Huai ziak mah in hiai bang a sorkar panlaknate a hong lohchin ding a diak in ei district a di’n deihhuai mahmah hi. Himahleh, tumalam pek a Cabinet thupukna tungtawn a bandh bawl ding khamna om hizenpi bandh a kiam tuan lam theih hilou hi. Dan bawl in bandh bawl ding sorkar in kham mahleh a sepsuahna lam kuitunglou ahihna ah bangmah phatuamlou hi. Tu’n leng sorkar in bandh bawlte liausak ding, gap ding a hon sawm nawn a, bandh bawl ding douna khat ahihna ah hoih mahmah hi. Himahleh, hiai panlakna in bangchituk in bandh bawl ding a dalzou dia? Dan omsate kembitzouloupi a dan bawl beh bang a phatuam dia?
Ahihkeileh, mipi haksatna theisiam napi a sorkar in leng bandh leh blockade a bei taktak ding deihloupi ahi diam? Bandh leh blockade pen sum muhna dan khat a zat sawm lel ahi diam? Ngaihtuah tham ching khat ahi. Mipite a dia kiphinna ding omlou in sorkar in vaihawm leh bel thil teng veng mai ding himahleh huai hun tunai a hong tung mai di’n kilamethuailou hi. Bangteng hileh, bandh leh blockade, mipite a dia haksatna nasatak tun leh khanmohbawk khat beina ding in bel dan tuamtuam bawl a hoih tham a, himahleh, dan kibawlte palsat a a om ding kepbitna lam ah sorkar a hahpan mahmah ngai ding hi.
Source: http://zogam.com/index.php?option=com_content&task=view&id=3537
Manipur ah buaina neuhneuh tam thei mahmah ahihna ah kuate hiam, bang pawl hiam in lungkimlouh lahna, ngetna, sorkar ahihkeileh helpawlte hiam nawkna dan a bandh, blockade, general strike leh economic blockade chihte zang in kiphin uhi. Bandh hiam ahihkeileh general strike kichi a om chiang in a tangpi in ‘minautang khualna’ ziak in school-te, damdawi inn leh damlouhna toh kisaite banah PHED garite chih bang huamsaklouh in om sek hi. Himahleh, bandh, blockade, general strike leh economic blockade kichite’n minautang a dia nawngkaina a tut dan bel haih vual hilou a, hindan ngeina nasatak a buaisak in a diak in nektawm zongte haksatna nakpitak in behlap hi. Huai kia hilou in, hiai bang a kiphinnate ziak in sorkar in kum teng in sum a crore a sim mansuah gige a, a tuat dan ngial un bandh, blockade, general strike leh economic blockade ziak in 2004 apat 2007 January 27 sung in Rs. 1319.96 crore mang ban hi. Kua pawl hi’n bang pawl hitale uh, sorkar hiam ahihkeileh helpawlte tung a phut leh nget a neih ziak ua mipite thuaksak kichi pen thil dik hilou hi.
Democracy a kivaipuak i hihna uah, lungkimlouhna neite bel a ut ua leh kiphin thei mah ahi uhi. A lungkimlouhna uh dik hitamahleh deih leh nget a neih ziak ua mipi tamzawte thuaksak, a right uh bohsiatsak kichi pen siamtan (justify) theih hilou hi. Sorkar in leng hiai bang dinmun haih tuanlou a, tumalam in bandh pen dan toh kituaklou hidan a puang in Cabinet in khamna ana bawlta hi. Cabinet thupukna tungtawn a bandh bawl ding kham ahihnung June 26, 2008 in Law Secretary in senior Advocate 4, N Kerani, P Ibomcha, Th. Modhu leh H. Chandrajit tung ah bandh toh kisai in mohpuakna poimohtak guan hi. Hiai Advocate 4-te mohpuakna ahihleh bandh ziak a sorkar in sum a manloh ding teng court tungtawn a bandh bawlte liausak ding ahi.
Bandh leh economic blockade kichite’n mipi a dia haksatna nasatak a tut dan leh khanmohbawk khat ahihdan thei a bandh leh blockade douna dia hiai bang a pan a lakna kipahpihhuai mahmah hi. Manipur sung mun dang toh teh in Churachandpur district ah bandh leh blockade zang a kiphinna tam lawmlawm kei mahleh Tedim Road dung leh National Highway 39 dung a buaina a om teng in a thuakpen in kipang gige hi.
Huai ziak mah in hiai bang a sorkar panlaknate a hong lohchin ding a diak in ei district a di’n deihhuai mahmah hi. Himahleh, tumalam pek a Cabinet thupukna tungtawn a bandh bawl ding khamna om hizenpi bandh a kiam tuan lam theih hilou hi. Dan bawl in bandh bawl ding sorkar in kham mahleh a sepsuahna lam kuitunglou ahihna ah bangmah phatuamlou hi. Tu’n leng sorkar in bandh bawlte liausak ding, gap ding a hon sawm nawn a, bandh bawl ding douna khat ahihna ah hoih mahmah hi. Himahleh, hiai panlakna in bangchituk in bandh bawl ding a dalzou dia? Dan omsate kembitzouloupi a dan bawl beh bang a phatuam dia?
Ahihkeileh, mipi haksatna theisiam napi a sorkar in leng bandh leh blockade a bei taktak ding deihloupi ahi diam? Bandh leh blockade pen sum muhna dan khat a zat sawm lel ahi diam? Ngaihtuah tham ching khat ahi. Mipite a dia kiphinna ding omlou in sorkar in vaihawm leh bel thil teng veng mai ding himahleh huai hun tunai a hong tung mai di’n kilamethuailou hi. Bangteng hileh, bandh leh blockade, mipite a dia haksatna nasatak tun leh khanmohbawk khat beina ding in bel dan tuamtuam bawl a hoih tham a, himahleh, dan kibawlte palsat a a om ding kepbitna lam ah sorkar a hahpan mahmah ngai ding hi.
Source: http://zogam.com/index.php?option=com_content&task=view&id=3537
No comments:
Post a Comment