Lamka, July 21: New Life Ministries(NLM) a founder Director CV John
gamtatna tawh kisai in New Life Ministries makaite'n tuni'n Eden Huan,
Hiangtam Lamka ah Press Conference sam in huai ah Press-te ban ah, saptuam
makai, student leader leh civil ogranisation apan makai bangzah hiam tel uh
a, huai ah CV John in tuma a Press-te kimuhpih in Pathian in a khelhna
ngaidam mahleh mihing in ngaidamlou hi a a gen tungtang thil omdan genchian
uhi.
Upa H Nengsong, Chairman NLM in a genna ah C V John gamtatna in kuapeuh
lungtang sukha ahihdan gen a, a gamtatdan hoihlou tuamtuamte ban ah numei
tung a a thangtatna tawh kisai in lemlak nih hoihtak a mukha ahihdan gen hi.
CV John in "Pathian in ka khelhna hon ngaidam a, mihing in hon ngaidam kei"
a chih tawh kisai hilhchetna abawlna ah CVJohn ngaihdam ding leh ding louh
tawh kisai in a hinkhua et touhtouh a om ahihdan gen a, ngaihdam a ngetma
leh anung ah kilamdanna muh ding a omlouh man in New Life Ministries
Executive Board in ngaihdamna thu puangthei nailou mah ahi chi'n gen a, a
case suizuina pailel tadih lai ahihdan leng gen hi. Aman a gendan in NLM
in Project tuamtuam omte ading telin World Help leh Advancing Native
Missions(ANM), US apan kum teng in panpihna muzel ahihdan gen hi.
Upa Nengsong in a genbehna ah NLM Executive Director CV John in 2005-06 vel
in angkawm ahi chihthu om a, World Help leh Advancing Native Mission in
October 2006 in hiai thu zakha uh a, ANM a Vice President ahihna leng hiai
hun mah in pai uh ahi chi hi. CV John in January 1, 2007 in NLM Chairman
kiang ah angkawm mah ahihdan kipuang chi'n leng gen hi.
CV John in kitawpna apiak tawh kiton in Mr Georgey Varghese in Executive
Director lendia mawhpuakna piak hi a, hiai pen February 12 2007 a Mount
Carmel School Chapel, Muolvaiphei a NLM General Body Meeting om hun ah
thupukna kila ahi chi'n Upa H Nengsong in gen hi.
Mr Georgey in Press-te laka a gendan in, Trivandrum a om a zi in tuni a
Press Conference ding tawh kisai in vauna khauhtak ngah ahihdan gen a, "na
pasal Lamka a Press Conference a atel ngeingei leh dam in na mu nawnkei
ding" chih tanpha thu tung ahi chi hi. Aman agendan in, CV John kichi NLM
in hihminse ut hetlou ahihdan gen in, thumna tawh delhzui den hi'n gen a,
khelh kisikna a neihtheihna ding in nasatak in thumpih mahleh CV John in a
gamtatna tung ah kisikna taktak neilou in apawtham lel in kisik a, ngaihdam
ngen a chih zawh nung nasan in leng tamvei tak a ut dandan in gamtang lai
ahi chi hi.
December 2007 in Trivandrum Bible College charitable trust chi'n mi 3 suaigu
in CV John in society registration ana delh a, himahleh huai leng phelhmit
sak a om ahi chi'n Georgey in gen hi. Trivandrum Bible College (TBC) kichi
mimal a hilou in NLM a hi a, himahleh, C V John in apa kum 92 a upa C V
George tungtawn in Rs 6.5 lakh in TBC Charitable trust kiang ah zuakkhia ahi
chi hi. NLM office leh quarter-te thagum in CV John in chabi in kalh a,
Police-te zang in honkhiak hita a,hileleng aman TBC gam leh leitang
original patta teng leng selmang vek a, himahleh tu in muhkhiak vek hinawnta
chi'n Georgie Verghese, NLM Executive Director in gen hi. Tuabanah, June 5
2008 in TBC student te kiang ah lehkha khak in TBC buaidan, ginatlouhdan
tangkoupih vek in, Benson K Sam kichi tawh pangkhawm in thil gilou taktak
sem uh ahi chi'n Georgie in gen hi. Georgie in a genzelna ah TBC Guest room
chabi CV John in kikep in a sung ah document poimawh pipi kem a, himahleh,
dan tawh kituaklou a kem ahihziak in, guest house hon in om chi hi. Huai
sung ah amah mimal account a NLM sum Rs 15 lakh a deposit na bang, Benson K
Sam kiang a loan a Rs 10 lakh a piakna bang, lemlak kih huaipipi leh
adangdang muh ahi chi hi. Dibrugarh(Assam) a a nungaknu adia inn-mun Rs 3
lakh val a aleisakna thu leng theih a om ahi chi hi. Tuaban ah United States
ah NLM account tungtawn in Trivandrum a ama personal account ah cheque
tungtawn in US Dollar tamtak thunlut ahihdan gen kawm in Georgie in
document tanpha pulak hi. Himahleh NLM Executive Director apan paihkhiak
ahihman in US a bank-te kiang ah thil omdan zaksak ahih ziakin NLM Bank
account pe'n khak(freeze) hita chi hi.
CV John in a thugenna phot ah Kumpi David tawh a hinkhua zatdan kibang hi'
n tehkhin veu a, Kumpi David bel a kisik taktak ziakin Pathian in ngaidam
a, himahleh CV John bel kisik taktaklou ahihdan a gamtatdan ah kilang ahi
chi'n Georgie Verghese in gen hi. CV John in Trivandrum kia ah leng bank
account 2/3 nei in Tamil Nadu ah gam acre 50 val alian nei a, Bangalore,
Trivandrum leh Lamka ah leng Car nei ahi chi'n genbeh hi. CV John gamtatdan
huham pipi atam tawh kiton in Sreekaryam Police station in atung ah case
registered a, dikloupi a Kerala High Court a NLM hekna abawl leng Court in
nawlkhinsak ahi chi'n Georgie in gen hi. NLM in itna tawh CV John entawn
tung a, lungtang taktak tawh a kisik theihna ding in thumna in phawk ni,
chi'n Georgie in gen behlap lai hi.
No comments:
Post a Comment