Sunday, October 05, 2008

Monu nuntakna masuan thak

By Tual Khan Suan

Kitenna pen Kawlgam Zomite in Mopawi ci uh hi. Cope Topa in Zipi-pawi ci-in hong teisak hi. Mopawi pen leitung minam khempeuh aadingin Pawi nuampen hiding hi. Nuntakna nih pumkhat suahsakna pawi ahi hi. Bangkua-thak sung lutna leh bangkuanu bangkuapa suahna ahi hi. Amau aadingin leitungthak kipan hi. Muhnathak theihnathak tawh kalsuan kul hi.

Topa Jesu in Mopawi pen Christ leh Pawlpi kizopna tawh na genteh hi. Topa Jesu in Pa nusia aa, Pawlpi aading a nuntakna hong pia hi. Laisiangtho sungah " Pasal in a nu a pa nusia a," acih tawntung pen, kitenna in Jesu leh Pawlpi kizopdan limciing lua ahihman ahi hi. Ei ngeina tawh kilehbulh ahih ciangin telhal kisa hi. Israel te zong zipinam mah ahi hi. Pasal pen in Jesu limciing a, numei in Pawlpi limciing hi.

Eden huanah Adam leh Ave kitenna pen abul-abaalin hong kigen khitloh hangin, Pasian in Jesu tungtawn a, hong tatkhiatna leh hong tenphihna limciing khol ahi hi. Tua ahih ciangin hih Mopawi pen zangkhaizat ngam ding hilo hi. Satonna omlo, paubanna omlo, limci takleh siangtho takin bawlding ahi hi. Kiphatsakna, hauh leh tungnun kidemna leh gualnopna bang lel a bawl ding hilo hi. Muhtheihloh vantung mite in zong hong zoo ding uh hi. Nungak siangtho leh tangval siangtho kiteeng hihding thupi hi.

Mopipa leh Mote bangkua nopsakna pen a kitenni-in kipan pah hi. Gentheihna kamsiatnate zong tua-ni mahin kipan hi. Setkan, minute, anai, ani-in huntawh kisawtto pah ditdit hi. Tua hunpaipaite in amau nupa pen tuihual bangin paipih hi. Gunkuanghawhna haat keileh tuihual in khuplet ding hi. Tua gunkuanghawhna pen Jesu khutah aapzo leh, bangkua pen lungmuan om bek ding hi. Topa Jesu hong paikikna leh misiangthote kaihkhopna pen mopipawi tawh genteh hi. Ei pen Mo hihding ahi sepdingaa kilawm nasep khempeuh seem-a, nasiatakin panlak kul hi.

Mo ihihman paikhiat ding leh kipuahphatna.

Ei Zomite ngeina sungah numei in behkip neilo hi. A lutna bangkua ii behmin bangbang amabeh amanam hipah lel hi. Tua ahih ciangin " Numei khua leh sakhi khua" kici hi. Piangthak mikhat in paikhiat ding ngeinalui aneihmah bangin bangkua-thak sungah kipumpiak kul hi.

Tua ahih ciangin pasal behmin pua-in, "i beh, ei beh" cih kul hi. A pasal Nu leh Pa pen nu, pa mah cihlul pah hi. Alutna bangkua ngeina khempeuh kisinin theihkimloh phamawh hi. Tua bangkua san thupha leh nopsakna khempeuh zong neihpih pah lel hi. A nu leh a pa in manh la-in ahizongin, Jesu mintawh thukimin piakhia ahizongin, ngeina tawh kipawl thukimna hang ahizongin, pasal aadingin innkuan panin lakhia khinzo hi. Tua ahih ciangin a nualam sai theilo ding hi. Anualam hauhna leh nopsakna masuanin kisaktheihpih lo ding hi. Amanawhlam leh a nualam tawikhai-in pau lo ding hi. Amanawhte bangkua nopci a, a picinna dingin a nuntakna kibuppiak ding hi.

Teek leh ama kikalah ahal-adal om theilo ding hi. Palaai dingin a pasal zanglo ding hi. A teekte leh a pasal thuhilh dingin a pasal tawsawn lo ding hi. Huh ding leh panpih dingin kiging tawntung ding hi. Amau nupa, Teekte leh sanggam kikalah " no leh ko " cih kammal gingsak theilo ding hi. A pasal kiangah, na Nu, na Pa, nasanggamte cih kammal ahi, a kikalah kidalna-kawm khung lo ding hi. Ama lutna bangkua thanemna leh zawngkhalnate a nualam tunlo ding a, a pualamah thehkhia lo ding hi. Innkuan sungah amahpen meivak bangin taangkiukiau tawntung ding hi. Innkuanpihte suihkhak-puktheihna ahi khuamial bangin omlo ding hi.

Tuhun pen lokhawh bektawh nuntak hunlai bang hilo hi. Nupate in a nihtuakin sum zong thei ahihmanin, numei ten zong a nu a pa huhnuam uh hi. Nupa thukimna a omleh poilo napi-in, thukimna a omkeileh, ei Zongeina tawh kipi kileite aadingin, piang taktak lo zel hi. Nu leh Pa vaakding pen Zongeina in amamun ciatah nakoih dimdiam ahihmanin Zongeina taisan vet ihih keileh, numei in amathu tawh hihluat zong hoihlo gentham lo-in amau innkuan ki-itna leh lungnopna pen Pasian sehna bangin ngahzo lo ding uh hi.

Zongeina sungah ih Pu ih Pate in Sunghlam or numeilam zong nakoihkhong tuanlo hi. Nopna dahna hunin tanu mokhakte thatang,zubeel, ankuang nakpi-in kizang hi. Pute tukzukholh ci-in taangzukhumpen kikhol hi. Lokhote kipahtawina hih tungkan omlo hi. Ei sumzongte in Birth-day present, mothers-day, fathersday, cihkhawng tawh numei nu leh pa kihuh thei hi. Nu leh Pa vaaknuam aa numei hong kitom takciangin, Zongeina paizia tawh kilehbulh lua ahih ciangin thunamtui hilo hi. Ngeina sukha selo aa septheihna lampi zong leeng, hoih zaw hi. Napasal dem kei in. Kipumkhatna ding hanciam in. Nupa kilungtuak in khuata zo kici hi.


http://www.sctuang.sampasite.com/

No comments:

Post a Comment