SILVER JUBILEE CELEBRATION, 1983-2008
Report
Hun leh kum kihei jel in theilou kaal in migam milei a um hinanlei, Sianhuoina toh dam in kum 25 bang ina tung pha man ta ua, October ni 4, kum 2008 jing mawng ninou kilawm tah in Shillong khopi a um Zou Sangnaupang Pawlpi te a ding in Jubilee ni loupi hing tung hi. Zintha Vaidotna leh Silver Jubilee lopna Anton Hall, Laitumkhrah, Shillong ah loupi tah in kimang a mipi 500 val kipei khawm hi. Zinglam nai 10 apat program kipan a, hunpat na ding in ZSP Lapi “Thou un, thou un,” chi khu senior student te mapuina toh mipiin ding kawm in ki awi va dum hi. Tuachiin hun teng Pasian khut ah ap-khietna Rev. Kamminthang in nei a tuamai hilou in, kum 25 ana peita sunga ZSP S/B mi eina muolliemsante geelthana leh zatatna zong kipie hi. Tuachiin, Tv. Khupmuanlal leh Tv. Peter Lianlunthang puitu hina nuoi ah hun peipi ahi ta hi.
Ajatat huoi Pu Ginsuanhau, Special Contractor tami niloupi ah Chief Guest hi a, Pu Jampau Lhungdim, Manager, Mizoram Gas Bottling Plant Guest of Honour hi a, tualeh Pu T. Khamchinmang President ZSP/GHQ Functional President dinga chiel himaleh, lemtan louna tuom tuom jieh in hing kalsuon thei non lou in, Pu Manglianthang, Social Worker in tam Funcional President hina mun luo hi.
Samuel K. Tungnung, President ZSP/SB apat in vaidawnna thu hum tah mai ngai khiet hi a, tuazou in Jubilee Nu leh Jubilee Pa phuonna um hi. Pastornu Niangkhannuom w/o Rev. Lianchinkhup, Silver Jubilee Nu hina khuh sah in um a, tualeh, Pa Kapkhanthang @ Kapmeng khu Silver Jubilee Pa hina pieh in um hi. Shillong khopi a ZSP na kiphu khiet apat amaute ana kipieh zawna leh kiphalna te uh manghil guollou ahi dan atha in geeldohna kinei kia hi.
Functional President dia kihan, hing peitheilou, Pu Khamchinmang in ZSP Shillong te di’a message ang thotte Rev. Kamminthang in kim tah in puon khietna nei a, aman atahsa in hing peithei sih nanleh, Jubilee lopna ding in dangka Rs. 1000/- tah hing thon a, tuachiin lungdamna khut kibeng va dum hi. Tuajou in Pu Manglianthang, Functional President a guot khun, thu genna nei a, mipite phonghal mama a, thumai hing genlou in aman zong ZSP Silver Jubilee lopna leh panpina ding in dangka Rs. 5000/ hing pie a, tuamai hilou in, lasate leh cultural dance bawlte zong Rs. 500 chiet pie hi. KALAISAI!!
Sangnaupang melthate pulahna um a, tukum meltha 27 vel pha a, tamini a hingtel theilou phabep khat zong um nalai hi. Amaute maban a laisimna a vangphatna leh siemna anei theina ding un Pasian kung a thunget sahna P/ Pastor Mangsuanthang in nei hi. Guest of Honor pu Jampau Lhungdim in thu ngainop huoitah mai genna hing nei a, sangnaupangte hing taw-hang mama a, maban ah zong akiphattuompi zing ding chi kinepna lienpi kinei hi. Pu Guest of Honor in ZSP S/B Silver Jubilee lopna leh panpina in dangka Rs. 10,000/ tah hing guon a, lungdam ahuoi taseng a, mipin, tawplou phiel in lungdamna kamteng kisam a, KALAISAI!! kichi va dum hi.
ZSP S/B ana phut khetute leh mimasate khu zatatna leh theizingna ding in Jubilee Memento khat chiet pieh in um uhi. Chiemte thei tham in, ZSP Shillong record na ah, mi 18 val ten tuniin Govt. nasepna hoipipi mu ta ua, amaute zieh in Pasian ipatoi ua, zong ikiletsahpi mama uhi. Abawn pi un tamini hing siim thei sih nan ulehzong, mi bangzat ahei khat ahing pei thei man un zong ilung dam uhi. Silver Jubilee Souvenir – ZOHEISA haakhietna editorial boardte apat in um a, gintat khel in Souvenir pen etlawm in hoi mama hi. Tam Souvenir ahile Unaupa Thangzaboi Manlun, USA a um leh Unaupa S.L Minlian in hing chawm sah ua, tuanah, unaupa Thangzaboi in dangka Rs. 8000/ in hing panpi a, unaupa S.L Minlian in Rs. 10,000 in hing phungvuo hi. Lungdamna thu itun sawn uhi. Tua thamlou in, unaunu Chiinngaihvung in zong Jubilee lopnang in dangka Rs. 7000 tah bawng pum leina ding in tuoh khie hi. Kipah mama u’i.
Mihing iitna jieh a sisan iitlou a phaltah a pe ngam ZSP in kumchin in mibangzat e khat kinei zing zieh in lungdam thu amaute tung ah itut uhi. Tam ZSP Salphate ahile: 1. Edmund Kamminlun, 2. Samuel Songate, 3. Letminlun Chongloi leh 4. Hangminlun te ahi uhi. “We are proud of you”. Siemsinna ah kimasawn jel in tukum Meritorious Award muthei tam aney a te ahi uhi:
01. Aaron. T. Muanthang MSW 1st Class MLCU
02. Vunghauniang MSW 1st Class MLCU
03. Ngaihoikim MSW 1st Class MLCU
04. L. Thangsing MSW 1st Class MLCU
05. P. Hangmuanlal B. Sc 1st Class NEHU
06. Khaineilun XII 1st Div MBOSE
07. Chinbizo Zou XII 1st Div MBOSE
08. Melody Manlun XII 1st Div CBSE
09. Ginlianthang XII 1st Div MBOSE
10. Samuel Taithul XII 1st Div MBOSE
11. Luanmuanching X 1st Div MBOSE
12. Chingzalam X 1st Div MBOSE
13. Monika Niangzahoi X 1st Div MBOSE
14. Hatngaikim X 1st Div MBOSE
15. Stephen Tunlianlal X 1st Div MBOSE.
Chief Guest Pu Ginsuanhau, Special Contractor apat in thugen ngainop umtah ngaikhiet hi a, aman Shillong Zou sangnaupangte laisim lam a hanthonna lienpi apieh banah, I Zou kipawlkhawmna ZSP um ahina ah adangdagte – ZYO, UZO chite zong a um ding angdeisah thu puong hi. Pu Ginsuanhau in deisahna leh iitna lienpi toh Jubilee lopna in ZSPte dangka Rs. 20,000/ tah hing guon a, tuathamlou in, tami nia lasa leh laam teng Rs. 500/ chiet pie hi. Pu Ginsuanhau Damsawt hen Kalaisai!!!
Tami ni in zaidei awisiem Pu T.T. Lal leh Ng. Lydia ten hing uop ua, mipite ngainop ding leh suhaltu ding laa hoitahtah hing oih pi uhi. Lamsiem tamtah ZO Lai Leng, Zou Vikings, Little Britney leh HIP HOP ten a talent uh hing ensah ua, skits show leh Zou cultural display, Zou lia leh tang duong jen tah maite Nampuon a kijem, khut kitu kawm in mipi mai a kal suon jet jet ua et nuom um mama uhi.
Atawpna ah, tam Silver Jubilee lopna a tha leh zung, sum leh pai leh hun mantam tahte hing na seng sah teng teng tung ah ZSP Shillong Branch in kipah thu tawplou itun uhi. Bangteng tung ah, kum 1983 apat 2008 tan hing na puitung tu Pasian kung ah loupina leh kipahna lienpen itun uhi. Amen. ZSP DAMSAWT HEN……
S. Joel Lianmang
Gen. Secretary
ZSP S/B
No comments:
Post a Comment