ZRA in thagum a sum ngen mi 2 man, Innluahte vaulau in thagum in sum laksak

Lamka, Oct 23: Zomi Revolutionary Army thusuak kingah dan in, tuni nitaklam dak 3 in Zouveng, Lamka ah thagum a sum ngen mi 2 mankhia uh hi’n gen uhi. ZRA thusuak dan in, mat a om mi 2 te ahihleh, Jamminlien (14) s/o Hemkhokhai of Tuibuong leh Jangminlal (21) s/o Jangthang of Changpikot hidan in gen uhi.

Lamka, Oct 23: Zan (Oct. 22, 2008) nitak dak 8 vel in migilou pawl khat in Zouveng lutna bul a innsawng khat va luh ua, nitak zankim dak 12 leh zinglam dak 1 kikal in khat vei va luh nawn in, sum leh van tuamtuam tamtak pawkhia uhi.

Muanhuaitak apan thusuak kingah dan in, Mr Sangboi s/o Zamniang of Zoveng, Meitei leikai makaih in meltheihlouh pawlkhat zan nitak dak 8 vel in Teddim Road, Zouveng lutna bul a building om khat ah va lut uh a, inn kuan bangzah hiam inn luah a omte va vau in ZRA min zang uh hi’n kigen hi.

Tuate mah zankim dak 12-1 am kikal in va tua building mah ah va lut nawn in inn kuan bangzah hiam om te kiang ah Mobile 7 leh Rs.5,565 thagum in laksak uh hi’n thusuak kingah hi. Thiltung tawh kisai Zomi Revolutionary Army Lamka Town Commander in suizui ngal a, huchi kawmkal ah ring leader Sangboi leng ki hemmang ngal in, a van suhsak teng uh a sungkuante kiang ah pekhia in amau leng ZRA te khut ah pekhe sawn uh hi’n kigen hi. Sangboi makaih a gang pawl khat in thagum a mi tuamtuam apan a suhsakte uh ahihleh, NGO (Progressive People's Organisation) CSW project a sem numei kipawl khawm mi 7 apan Mobile handset Nokia 1100 leh 2600 khat tuak, Samsung Mobile khat leh Rs.3,000, Niangboi apan Samsung Mobile handset khat, Narayan Bihari apan Mobile Nokia 1100 khat leh Sony Mobile khat ban ah Rs.1835; Nienghoinieng apan Rs.470; Kausha Bihari apan Rs.120 leh Ajay Bihari apan Rs.140 leh Mobile handset Nokia 1100 khat hi’n kigen hi.

Hiai thiltung tawh kisai ZRA in ngai khawk mahmah ua, amau sulnung hilou ahihdan ZRA Town Commander Romeo apan kiza a, ZRA te min zanga kuate hiam gamtang hi’n gen hi. Tunung sawtlou a thagum a sum leh Mobile laksat tu gang pawl khat te matkhiak hiding chi’n ZRA Town Commander in gen hi.


Source: http://zogam.com/index.php?option=com_content&task=view&id=4729&ac=0&Itemid=2