Thursday, February 05, 2009

Barack Hussein Obama in President a kichiem ni’a athu gen

Tuni in tami mun ah mi masate nasep zal in tawmtah in kahing dinga, nang gingtatna tung uah ka lung adam in ipu ipate kipiana ka lungtang ah atham zing hi. President Bush in igam adinga anasepna tung ah kipa thu ka gen a, dinmun kaki hengding ua ang ki thuapina leh katung a aphatna akilah sah na ah ka lung adam hi.

American President sawmli leh li in tami thuchiam ana lata a. Tami thuchiam hi lemna leh muanna a umlai leh gam hausatna asang laitah ta in ana gen ua, tami thuchiam hi khonim leh huipi lang nuai ah zong ana sam uhi. Tuhun tan in America hi tuangtahin apei nalai a, lamkai penpente pilzia hilou in, mipiten ipu leh ipa te ngaidante gin umtah a izui vua, gam mukhie ten zuiding a anabawlte uh izui nalai zia uh ahihi.

Humsawtpi ana zuita ua, tulai khangtha ten zong izui teitei ding uh ahihi.

Tuin hasatna meeipi kal ah I um uh chi itheichiat ua, igam uhi gamdangte toh galvan zangin ikidou ua, igam uhi thagum zahna ah akigawl laitah ahihi. Igam ne leh ta dinmun asiat laitah ahia, azia ahileh duh am zia leh maw puana ngaipoimaw zoulou zia zong ahi a, azia poimaw mama khat ahileh ibawn ua ibawlkhiel zia uh ahi. Tami huntha ah igam uh a dianglut ding a, hinanleh ikiging masa sih uhi. Inn tampi kitaan in, nasemten ana uh ataan ua, sumdawnna a keniam hi. I damlou chianga ki etkawlna man asang ta mama a, I sanginn te a lawsam a, nichin in siatna in ang bawm a, I tenna planet uh hun lauhuai isuah ta uhi.

Tamteng hi puasietna kilahsahna ahia, data leh statistic bang a dih vot ahi. Igam un a kigintatna amangsah deudeu a, tami hi teh theichiah ahisih hi. America kiatniam na hi sil hingtung ding ahidan akilang chiang ta a, khangsawn ten angthua ngei ding uhi.

Tuni in nakung uah tami kagen ut hi, imaitua ding uh hasatna hi amaimai hilou in hasatna tahtah ahi a, alau huai in atam hi. Awlsamtah a suhfel maithei ahisia, hunsawt lousung a suhfel thei zong ahisih ding hi. Hinanleh, America gamin tami ana thei hen, igam hasatna tua hi I sufel ngei ding uhi.

Tunia bangzia a tami mun a pungkhawm ihi uai ichileh launa sangin lam etna/beiseina itelzaw zia uh ahi. Tami hasatna leh buaina peikan ding in iki lungtua zel uhi.

Tuin , thuchiam tangtun lou zia a mipi kunga hasatna tung hi ibeisah ta uh chi kapuang a, tambang ginna kingahna tham chinglou ten igam politic hun sawtpi sung ana luazing hi.

I gam uhi naupangnou khat ahi a, nanleh Bible thua imu bangin, naupang kimawlna silte koikhia a pichingbanga um uh ahunta hi. Tu in I beidawn ngailouna lungsimte uh toh ikithuam ua, igam history a hoizawlam ikiheisah uh angai hi. Khangtampi apata gou manphatah ina nei uh, ngaihdan siangthou leh pilna meisel hi imii sah ding uh ahisihi. Pasian in thuchiam angpia a, tuakhu michinteng akibang chiat chi ahi, michinteng aki zalen a, michinteng in milimpen/nopsapen ihi thei nadinga ma ila uh asiang a, tuakhu mipiten abawl thei uh apoimaw maw hi.

I gam thupina kagenkia ut a, thupina hi apia a kipia thei ahisihi. Asep a sepkhiat angai hi. I khualzinna lampi uhi suhtawm maimai thei zong ahi sihi. I lampi zui uhi milungsim chaute zuithei ahisihi. Nasepsang a um maimai utzawte, hausatna leh minthangna chauh telte ading in mun aum sihi. Tuasanga hangsan taha metding leh metlouding zong ngaitua masa loua malate, asema semte, silsiam tute, anaseppen uh zong theichiang loua taimataha sema, lampi hasatah zuia mualsuah ten hausatna leh zalenna anei zaw uhi.

Eite adingin, khawvela asilnei uh themnoukhat tawh tuisuahgiat galkai in hindantha neidingin ana kuankhia uhi. Eite adingin dawr lahah gimtah in anasem ua, Khawhang lamah anateng ua, chiang leh phawhbu kikal ah lou ana hou uhi.

Eite adingin ana sual un, anasi ua, Concord leh Gettysburg, Normandy leh khe sahn mun ah igam adingin anasi uhi. Numei leh pasalten theitawp suah in, akhutte uh agep/aduabei masang na anasem ua, dachianga khang hing umdingten nunnuamzaw anei thei nangding un anachi in. America gam hi mimal hausatna sangin ana ngaipoimaw zaw ua; mihing pian, hausatna emaw, sildangte sangin angai thupi zaw uhi. Tami khualzinna tunitan in I sunzawm zel uhi. Khawvel gam hausa pen ihi nalai ua, itenna lei a thuneipen ihi nalai uhi. I nasemte uhi tu masang sanga aneuzaw na leh achitlana uh a um tuansia, I lungsim uh zong tumasang sanga ipillou zawna uh a umnai sia, I vante leh inasepte chu kal masa emaw, ha masa emaw, kum peita lai emaw sanga ipoimaw louzawna a um sihi. I bawlthei uh a pangai nalai hi. Hinanleh mimal tawmnoukhat te hamphatna chauh atunding lau a ikiven zing hunlai ipeikan ta ua, tuniapat ikitat hiam uh angai a, init nate uh I silsiang uh angai a, America gam siamtha dingin nasepa ibulpat uh angai ta hi.

Munchin I etchiangin nasep ding atam mama a, I gam economy in hangsan leh feltaha ma lading apoimaw mama a, ma ila ding ua, natha siam chauh hilou in I khantou nading in matha ila ding uhi. Lampi leh leite ibawl ding ua, electric grids leh digital lampangte isiamtha ding ua, sumdawnna uh ahing khangtoukia thei nading leh iki zawpkhawm thei nading in. Science siamna te a um nading mun dihtaha a umthei nadingin ma ila ding ua, khawl sil a siamna te zangin hisel nalam ingai poimaw ding ua, ki etkawlna manzong isuh niam ding uhi. Ni, hui leh lei toh i gari te uh itaisah ding vua, I factory te uh zong I enkawl ding uhi. Zilna in poimaw mama te– college leh university te tulai khovelin apoimaw dan dungzui in I siam danglam ding uhi. Tamte hi ibawl theih uh ahi a, ibawl ngal ding uhi.

Tu in, I gamin a tupna gam atungzaw ding gingta lou aki um a, ama un tam ivaiguanna tampi te tangtun nading tana itua paiding uh agingta sih uh. A theizingna te uh atawm zouta ama. Tamigam in anatun nasate amanghil uh hi in akilanghi; pasal zalen leh numei zalenin atun theina tan te a theizing zoulou uh ahiding hi. A ngaituana te uh mi tengtengte lawna ahithei nading in a gawmkhawm ua, ahangsanna uh tawh.

Gingta theilouten tuin theikhalou anei ua, tuin politic tawh kidouna maimai ten mun atang zounon sih hi. Tu a igam in adawh pen chu I sawlkal hi alian tham nai, aneudeu talua ei chilam ahinonsia, I sawlkal in na apethei ei chite, law pangaitah neithei ding in innkuan chin ten na ahawl theiding vuai, aki enkawlzou thei na vuai chi hi I sawlkal in angaitua a, na apat pension te aza um tham na vuai chi sawlkal in a etchian angai hi. Tuakhu idei ua ‘ing’ chi a isan/dawng ding uh leh ma ila ding uh ahi. Hinanleh isan na ‘ii’ ichi uhleh I pogram vaiguansa te uh isuhtawp pai ding uhi. Mipi vantang sum enkawlte ihi ua, sum enkawl ten sum siam tah izah uh angai ding a, ibawldan hoiloute itawpsan ua iki siamtha uh angai a, inasep dingte uh khawmial nuai ah hilou in khawva nuai ah mite musua theia isep uh leh mipite leh sawlkal kikala kigintat tuahna I umsah theiding uhi.

Ahileh idawhna uhi I sum dawnna uh ahoilam a peiding in inawh ding uai asie lam in, chi dawhna hi imaitua laitah uh ahi. Hausatna atun leh zalenna a siam hi akitua thei sie, tami hasatna in ang theikhiatsah khat ahileh mit ihah zing louleh I sumdawnna te uh igingtatpha sangin a keniamthei hi chi ahi- tuahun chiangin gamin hausa leh neizou te chauh angai tua hun atung dinga, tuakhu gampumpi in athualaw zel hi. I ne leh ta lawchinna hi gross domestic product ah akingat sia, igam ua michin tung a hausatna atun dan ah akingah zaw a, I sum leh paite uh mimal chin lungsim kihawngte kung atun angai a, ki panpina ringawt hilou in, tuami khu ilampi zui ding uh, itupgam itun theina ding uh ahizaw hi.

Igam ki humhim nalam ah, I tahsa himna leh ingaidan deitel nalam ah bawl khiel inei ua, igam mukhie te… igam mukhie ten igingtatna sang in hasatna atua ua, charter ana suam ua, tuanah mimal zalenna leh dan tungnungna ana vaiguan ua, tuami charter khu khang tampi ah mipiten sisan luangkawm in ana toisang deudeu uhi. Tuami ngaidan in tunitan in khawvel ah meisal a de a, tuazia in eiten amii louna ding a isem/mut khuang ding ua, I phatsan sih ding uhi. Midangte leh sawlkal teng in tuin ahing en vua, khopi thupi penpen apat leh singtang ningtong penpen , kapa pianna khua nasan in zong ang en uhi. America gam hi khawvel gam chinte leh michinte lawmhoi ahi chi athei ua, mi koipou vaihawmna siangthou, lemna leh muanna dei tapou te hi America lawmhoi ahi. Tuazia in khawvel mapui dingin ikiman ta uh chi kagen ut hi. Ngaitua kit taleih khang masaten communism leh fascism ana maitua ua, missile leh tank chauh amaitua sih uh, hinanleh tuamiten ki gawmkhawmna leh ki pumpia na lungsim thuutah ana neizing uhi. Miten igam uh silbawl theina chauhin khawvel ahumbit zousih chi athei vua, tualeh idei bangbang a gamta zengzung ding zong ihisih uhi. Tuasanga ihatna te uh dachiang a khawvel hoina dinga zanga, I sahimnate khu azia ahoina thei siam a, khawvel mihingte kanatna dinga ma lathei hileh chi adei huai hi.

Ipu ipaten khawvela vaihawmna dih a um thei nadinga thu ana kimop sawn zel uh vengbit ding eite ihi uhi. Principle hoi leh dihtah in ang tuam a, gam leh gam ki unauna leh sepkhawmna hoizaw a umthei nadinga ma ila zing ding uh ahi. Amasa penin Irag hi amipite khuta umkia thei nading a akhut ua lana potkhiatsan isawm uh angai a, Afghanistan ah lemna leh muanna aum thei nadinga isepgim uh angai hi. I lawmlui te leh imelma luite tengtawh nuclear van lauhuaina tawmsah nalama ipankhawm uh angai a, I tenna khawvel sa/lum deudeu iven uh angaih hi. I gam ua khawtualmi mawna neiloute thasawm a helpawl hing gamtat sawmte na um uhleh tami kang hil ngal ut hi. Kaki pumkhatna uhi a nasa zaw ta a, kesah theigual aninawn sihi. Nang zouthei sih ding ua, kang zouzaw ding uhi.

I thei ua, I zalenna uh humbit dingin ihat nalai ua, ichau sih uhi. I gam uhi Kristian, Muslim, Juda leh Hindu sakhaw zuite umkhawmna leh gin neilou te gam ahi. I gam dinkhiat nalam ah khawvel ham tuamtuam leh culture tuamtuamten maw apua a, khawvel munchinte bawldan a America siam ahi. Civel war hasatah ina thua ta ua, tua hun hasatah ipeikan zia un ihat deu ua, iki unau deudeu uhi, kagenthei sia, masang a ikihuatna un amualliam san ta a, tuabang hunte ipeikan ta ua, tu in khawvel zong aneu in iki zawpkhawmna zong amasang sangin ahoizawta a, mihingin mani mihingpi te izaana uh ikilangsah deudeu ua, America in khawvel hi lemna leh muanna hun a puilut ding in ma ala zing hi.

Muslim khawvelin tami anathei uh hen, ngaituana tha tawh malam zuan in kang pei ua, tuinalam kibang leh kizatuah in. Khawvel gam tuamtuam, mahni gam siatna khawhanglam gamte ngaw zingten zong tami ana thei uhen, na mipite un na silsiam dan un ang te ding uhi. Na suhsiat nate uh hilou in. Neguna leh dihlou tah a thuneina tangten zong ana thei un, tuin khawvel tanchin gelna laipe hoilou lama gelin na um ua, tuin na khuttum humte uh phel na ut uhleh kapanpina uh khut kang ha ut uhi.

Gam genthei zawte adingin vaiguanna akinei a, noute tawh sepkhawm ka ut ua, na nasepna firm te uh ang lawchin a, nagam ua tui siangthou ahing luanglut thei nading in; natasa uh ahing hat a, na lungsim gilkialna uh dawn zangkhai ding in. Igam bang gamdangte zong, na musiamlouna uhi kamu thei in ka thua theisih uh; tualeh, Khawvel hausatna lakhiat nalam ah gahoilou tun thei nading khawpa kitaidemna zong ka deisih uhi. Khawvel a kiheng danglam ta a, tuami gualin eite zong ikihei danglam ding uhi.

I lamsau zuiding vuah America mihangsan masate itheiziong ding ua, tu dakal ngei ah piaunel gamgaw gamla pipi apei ua, mun gamla tah a tang sang ah akal uhi. Thu hingvaihah nuam anei ua, Arlington mun a pasalpha um in kumtampi ang guhil bang in. I liberty/zalenna humbit tu ahizia ua izaa uh chauh hilou in I gam adinga sepna ‘spirit’ angtuh zia ahi hi. Ama un amate sang a thupizaw adinga sem ahi uh akithei uh. Tu a, tu khang ah tuami ‘spirit’ thou in tunitan in ahing mapui hi.

Sawrkalin abawl theitan leh abawl ngeingei dinghi tami gam kingahna lianpen hi American mipite ginna leh kukalna ahihi. Tuakhu America mipi lungsim pichinna te, zin leh lengte adinga mun asiam zel dante, innkangkap mihangsan ten insawng sangtah meikhute daisah a, nu leh pa kipiana in tate piching dinga a etkawla, tuateng in idinmun uh ana siam hi.

Tu a, imaitua uhi siltha ahi a. Tuami maitua dingin I khutlai uh zong siltha ahi angai hi. Ina lawchin nate uh kingahna chu- sepgimna leh gin umna, hangsanna leh dihtaha nasepna, thuatheina leh pilvangna, thuman theina leh gam itna, tamte hi sil lui ahi. Tamte hi thudih ahi. Tamten igam uh hunsawtpi ana khangtou sah zing hi. Tu a ipoimaw uh ahileh tamteng nuahat a ahi. Tu a ipoimaw uh chu maw-puana tangtun dinga michinte kipiana, midangte nasep theipi a patawi te, America mipiten eima chiat ah pichinsua ding inei uh chi ikithei ua, I gam leh khawvel adingin , tuin bawlding inei ua, imawpuana te uh peilou kawma pawm lou in, kipa tah in ipawm ua, I ‘spirit’ te lawchin nading daltu a um sihi.

Tami hi khua leh tuite adinga igam in achiam leh alawman pia khu ahihi.

Tami hi ikigintat nalam a ithula napen uh ahi a, tami hi Pasian in pilna angpia, I tupnagam itun thei nadinga imalana uh ahi.

Tami hi I zalenna uh leh isakhua in phattuamna anei na khu ahi; tuakhu ahi pasal,numei leh naupang, nam chinteng ginna nei a tami Mall – ah I pungkhawm zia uh. Tuakhu ahi, pasal khat, apa kum sawmgup peita a tualsung restaurant-a kilaw maimai in namai ua president thuchiam ala thei na zia khu.

Tuazia in tuni hi nichiamte ta ahichi thei chiat vai, hun peisa I sutkia leh. America apiankum a, hadang sanga avawt laitah gam it tu mi tawmnou khat te vua tuiluang gei ah ana si ua, Khawpi te lalhsan/taisan ahi a. Galte la hing nai deudeu ngal. Tua vua vawtte sisan tawh akihal a. Tua hunlai in igam awpte tunga lung awilouna kilahsah anai mama hi. Igam lamkaigun te in tami thu hi mipi theidingin asimkhe sah a; “Tamihi dachiang a khawvel hing um zeldingte kunga thei sah ding ahi…Phalbi khawvawt lai tah in ginna leh lam etna chilou damkhie a um zoulou lai in…Khawpi leh gamte khu laukhat nei a aum lai un, tua lauhuaikhu ana maitua/dou ta uhi.

America, tu a lauhuai kibang imaitua na vuah, tu a hasat mama na leh phalbi khawvawt ah, tua, thu sitheilou khu theizing vai. Lam-etna leh ginna tawh tu a vua vawttah mai hi maitua kia vai in, meipi vannim hingtung ding te itua ding ua. I tate tasawn te kung ah bang igen ta ding vuai, tami hasatna meipi vannim tuananlei I khual zinna lamsau zui uh atawp ding iphal sih uhi. Etkhiat ihi vua, ipeikan thei vua, I nungtawn sih uh. I hatna uh zong itaan sih uh; I mit in mun ningkawm teng a en a, Pasianin angna enzinga, I Zalenna silthawn pia thupi tah iliang vuah khangin, tuakhu khangsawn te kung ah him leh bit in ilansawn ta hi.

KA LUNGDAM E. PASIANIN HING GUALZAWL TA UH HENLA. PASIANIN UNITED STATE OF AMERICA HI GUALZAWL HEN.

-------------------------------------------
- Translated by Pu TK Lama, Aizawl, Mizoram


.::. All my articles can be view here: MELTED HEARTS .::.

Reblog this post [with Zemanta]

No comments:

Post a Comment