India President in Lok Sabha election om dinga lemsakna suai a piak dungzui in Lok Sabha term 15na ading member 543 telna ding in April 16 akipan May 13, 2009 tan phase tuamtuam 5 a kikhen in election om ding hi. Tulela pailai Lok Sabha term 14na pen ahun June 1,2009 in beiding a, huaiziakin 15th Lok Sabha hun ding azekaipen in leng June 2,2009 in a kipat teitei ngai hi.
1st phase ading in state tuamtuam 15 leh Union Territories 2 ah Lok Sabha member 124 telna ding in April 16, 2009 in election om ding a, huaite lakah seat 1 omna Outer Manipur Lok Sabha leng telkha hi. Huai dingin candidate dingte adin March 30(Monday) tan candidate ding hihna lehkha piak(nomination file) theih ding hi. March 31(Tuesday) in nomination paper-te etchetna(scrutiny) in zui ding a, candidate hihna apan kizukkik nuamte adingin April 2(Thurday) in kizukkik theih ding hi.Huai apan campaign bawlna hun kihong ding a, April 16(Thursday) in vote khiak hiding hi. Election om khit May 16(Saturday) in vote sim kipan ding hi.
Inner Manipur Lok Sabha seat ading in April 22,2009 in election om ding a, hileleng huai dingin political party tuamtuam nasatakin kisakhol mahle uh March 28,2009 in election Notification suak pan phet ding ahihman in hun omlai suak hi. Outer Manipur Lok Sabha seat a candidate nuamte adingin zan akipan in nomination file theih a, March 30,2009 tan lel hun om hi. Tutung Lok Sabha election om ding ah India phualpi a vaihawm Congress makaihna UPA pawlin vaihawmna letnawn teitei sawm in kisakhol uh a, BJP makaihna NDA pawlin lah govt thak bawl teitei sawm in kisa uhi. Alehlam ah Congress leh BJP apan kituamkoih Third Front kichi party tuamtuam kigawm in govt bawlkhiak tum in nasatakin kisa uhi.
Tutan a kitheidan in Outer Manipur bial ading in Congress in Thangso Baite,ex-Minister, People’s Democratic Alliance(PDA) pawlin tulela MP dinglai Mani Charenamei, BJP pawlin Loli Adanee, NCP in LB Sona (CPI & MPP pawlin leng Sona support ding chihthu om), JD(S) pawlin Sunny Santhil amau candidate ding hi’n puang khe chiat uhi. Hiaite lou leng tunitan a candidate ding puang nailou party om zekzek lai uh a, March 30,2009 tan Outer Manipur Lok Sabha seat adia candidate ut-te adia hun omlai ahihman in party bangzah in candidate ding a guan beh uhiam chih leh Independent candidate leng bangzah tak hong om khelai hiam chih kichian nailou hi.
Manipur ah tu dinmun ah Outer Manipur leh Inner Manipur Lok Sabha seat ah voter mihing 17,27,240 vel om a, huai lakah pasal 8,29,717 leh numei voter 8,97,523 vel om hi. Outer Manipur Lok Sabha Constituency ah voter 9,02,221 vel om a, Polling Station leng 1223 vel om hi. Tuma zek leh hun paisa a Assembly by-poll(MLA hilai khenkhat a sih ziaka kitelna om thakna bial) ah Manipur a govt len Congress pawl adin haksa lawlou in vuahzawh theih hisek a, huaipen govt len laite a hamphatna uh govt machinery hiam “money & musle power” zanga mahni candidate-te chingsak sek uh kichi ahi hi. Hiai pen dik gige kei mahleh party dangte sangin govt lenlai party-te adia lemtang(advantage) om kichi sek huai mah ahi hi.
Maban April 16 in Outer Manipur Lok Sabha seat adia election om ding ah tu dinmun etin Congress, NCP, BJP chihte Manipur ading in party lian leh mipi leng neitam ngen ahihman un hat mahmah chiat ding un kilang a, hileleng kum 2004 a Independent candidate a telching a om Mani Charenamei tutung in party lian leh minthang leng hinailou PDA candidate dan in ding mahleh party lian leh piching omsate candidate-te mah bangin hat mahmah veve ding in kilang hi. Aziakbel term paisa a Outer Lok Sabha bial apan MP chingsate banglou takin issue tuamtuam ah taise hetlou in panla deuh chiat mawk hi. Huailouin haksatna, buaina, bawlsiatna, kial-le-tak thiltungte ah leng panla in gen-le-sak neisek hi. Huaiziakin party candidate hihna ziaka chin ding himawklou in candidate-pa hihna(quality & efficiency) in leng saupi gen neipha ding bang hi.
Manipur singtanggam dinmun etin Naga leh Non-Naga group in khentheih a, sisan kibang, pau leh tawndan kinai in saupi kawkpha hi. Non-Naga group ah Chin/Kuki/Mizo/Zomi group kigawm Outer Lok Sabha biala voter kimkhat phazoulou deuh hi’n kilang hi. Etsakna dingin unau Naga community apan candidate 3 hattak hong omkhia uhenla, Non-Naga group apan kithutuak in candidate 1 tawsawn hilebel lampi om dingin gintak baihlam hi. Huchih lai in Non-Naga group akipan in vote tamkuamchiat muthei ding candidate 3/4 a om zenzen lebel candidate tengin bel ching dingin kikoih chiat mahle uh candidate hih sung kia leh vote sim masiah MP hih khak ding thil lauhuaipi suak hi. Hileleng telching a om penpen Manipur singtanggam pumpi bialtu MP a pom theih ngai a, telchinga om pen in leng amah vote leh vote loute khentuamlou in singtanggam pumpi khaikhawmtu MP hidia a kingaihsut a poimawh hi.
Source: Manipur Express/Zogam.com
.::. All my articles can be view here: MELTED HEARTS .::.
1st phase ading in state tuamtuam 15 leh Union Territories 2 ah Lok Sabha member 124 telna ding in April 16, 2009 in election om ding a, huaite lakah seat 1 omna Outer Manipur Lok Sabha leng telkha hi. Huai dingin candidate dingte adin March 30(Monday) tan candidate ding hihna lehkha piak(nomination file) theih ding hi. March 31(Tuesday) in nomination paper-te etchetna(scrutiny) in zui ding a, candidate hihna apan kizukkik nuamte adingin April 2(Thurday) in kizukkik theih ding hi.Huai apan campaign bawlna hun kihong ding a, April 16(Thursday) in vote khiak hiding hi. Election om khit May 16(Saturday) in vote sim kipan ding hi.
Inner Manipur Lok Sabha seat ading in April 22,2009 in election om ding a, hileleng huai dingin political party tuamtuam nasatakin kisakhol mahle uh March 28,2009 in election Notification suak pan phet ding ahihman in hun omlai suak hi. Outer Manipur Lok Sabha seat a candidate nuamte adingin zan akipan in nomination file theih a, March 30,2009 tan lel hun om hi. Tutung Lok Sabha election om ding ah India phualpi a vaihawm Congress makaihna UPA pawlin vaihawmna letnawn teitei sawm in kisakhol uh a, BJP makaihna NDA pawlin lah govt thak bawl teitei sawm in kisa uhi. Alehlam ah Congress leh BJP apan kituamkoih Third Front kichi party tuamtuam kigawm in govt bawlkhiak tum in nasatakin kisa uhi.
Tutan a kitheidan in Outer Manipur bial ading in Congress in Thangso Baite,ex-Minister, People’s Democratic Alliance(PDA) pawlin tulela MP dinglai Mani Charenamei, BJP pawlin Loli Adanee, NCP in LB Sona (CPI & MPP pawlin leng Sona support ding chihthu om), JD(S) pawlin Sunny Santhil amau candidate ding hi’n puang khe chiat uhi. Hiaite lou leng tunitan a candidate ding puang nailou party om zekzek lai uh a, March 30,2009 tan Outer Manipur Lok Sabha seat adia candidate ut-te adia hun omlai ahihman in party bangzah in candidate ding a guan beh uhiam chih leh Independent candidate leng bangzah tak hong om khelai hiam chih kichian nailou hi.
Manipur ah tu dinmun ah Outer Manipur leh Inner Manipur Lok Sabha seat ah voter mihing 17,27,240 vel om a, huai lakah pasal 8,29,717 leh numei voter 8,97,523 vel om hi. Outer Manipur Lok Sabha Constituency ah voter 9,02,221 vel om a, Polling Station leng 1223 vel om hi. Tuma zek leh hun paisa a Assembly by-poll(MLA hilai khenkhat a sih ziaka kitelna om thakna bial) ah Manipur a govt len Congress pawl adin haksa lawlou in vuahzawh theih hisek a, huaipen govt len laite a hamphatna uh govt machinery hiam “money & musle power” zanga mahni candidate-te chingsak sek uh kichi ahi hi. Hiai pen dik gige kei mahleh party dangte sangin govt lenlai party-te adia lemtang(advantage) om kichi sek huai mah ahi hi.
Maban April 16 in Outer Manipur Lok Sabha seat adia election om ding ah tu dinmun etin Congress, NCP, BJP chihte Manipur ading in party lian leh mipi leng neitam ngen ahihman un hat mahmah chiat ding un kilang a, hileleng kum 2004 a Independent candidate a telching a om Mani Charenamei tutung in party lian leh minthang leng hinailou PDA candidate dan in ding mahleh party lian leh piching omsate candidate-te mah bangin hat mahmah veve ding in kilang hi. Aziakbel term paisa a Outer Lok Sabha bial apan MP chingsate banglou takin issue tuamtuam ah taise hetlou in panla deuh chiat mawk hi. Huailouin haksatna, buaina, bawlsiatna, kial-le-tak thiltungte ah leng panla in gen-le-sak neisek hi. Huaiziakin party candidate hihna ziaka chin ding himawklou in candidate-pa hihna(quality & efficiency) in leng saupi gen neipha ding bang hi.
Manipur singtanggam dinmun etin Naga leh Non-Naga group in khentheih a, sisan kibang, pau leh tawndan kinai in saupi kawkpha hi. Non-Naga group ah Chin/Kuki/Mizo/Zomi group kigawm Outer Lok Sabha biala voter kimkhat phazoulou deuh hi’n kilang hi. Etsakna dingin unau Naga community apan candidate 3 hattak hong omkhia uhenla, Non-Naga group apan kithutuak in candidate 1 tawsawn hilebel lampi om dingin gintak baihlam hi. Huchih lai in Non-Naga group akipan in vote tamkuamchiat muthei ding candidate 3/4 a om zenzen lebel candidate tengin bel ching dingin kikoih chiat mahle uh candidate hih sung kia leh vote sim masiah MP hih khak ding thil lauhuaipi suak hi. Hileleng telching a om penpen Manipur singtanggam pumpi bialtu MP a pom theih ngai a, telchinga om pen in leng amah vote leh vote loute khentuamlou in singtanggam pumpi khaikhawmtu MP hidia a kingaihsut a poimawh hi.
Source: Manipur Express/Zogam.com
.::. All my articles can be view here: MELTED HEARTS .::.
No comments:
Post a Comment