Phailian Kashmir veng ah misi luang nih muhkhiak in om Phailian Village Authority leh Inn sung dongta kihou: Rs 3 Lacs in kilem
Lamka Nov 28: Lamka Police apan thukizadan in tuni zingdak 7:20 vel in meltheihlouh pawlkhat in a vuak ziak un Mr.Mangchungnung (26) S/o. Lienkholal of Phailian Meitei Leikai tuni zinglam dak 0:55 vel in Lamka Damdawi Inn ah si chih report mu uhi. Lamka Police in leng hiai toh kisai in Case khat chiamteh Mr. Mangchungnung vuak a aomna mun Phailian a Kashmir Veng lak spot inquiry nei uhi. Huai hunah pasal siluang khat va mukhia uhi. Hiai siluang pen hoihtak a velchet ahihnung in amah taksatung pan in All Manipur Rickshaw Puller Association Identity Card/Licence No.5513 musuah ua huai apan in Mr. D.Paukhanmung (25) S/o. D. Thangbiak of Bungmual ahihdan theihchet in om hi.
Thukizadan in Mr. Mangchungnung bel zan nitak annekzoh apawtkhia hi a nitak dak 8:00 vel in a sungkuante’n inn paihak sa in a venglak uh vazong mahle uh mulou uhi.zan sawtnung in Kashmir veng a Thongkhoginte inn kiang lakah Mr. Mangchungnung naktak a vuakliamsa in pawlkhat in vakoih uhi. Thongkhogin zi Hatneilam in leng Mr. Mangchungnung ahihlam atheihphet in Mangchungnung pu’ Mr. Lamneithang vahilh a Lamneithang in Mangchungnung suangkuante va hilh a huchiin Mangchungnung a omna mun apan vapi in inntun uhi. Himahleh a vuaknasatluat ahih ziak in Mangchungnung in thuakzoulou in kipekpek a huchiin asungkluante’n Lamka Damdawi Inn naihpih uhi.Casualty ah zan dak 11:00 in puaktun hi a Doctor in leng Surgical Ward ah admit pah hi. Bangtan hiam etkol man himahleh a liamna thuakzoulou in zinglam dak 0:55 vel in si hi.
Hiai Mangchungnung sihna toh kisai in zing dak 7:20 in Lamka Police Station ah report piak in om a, Police in leng thil omdan suizui in Mangchungnung vuak a omna mun Phailain a Kashmir Veng a spot inquiry apaina lam uah Mangchungnung vuak ahihna mun apan furlong khat vel a gamla ah pasal siluang khat mukhia ua, hoihtak a velchet ahihnung in a sakhau a pan in All Manipur Rickshaw Puller Association Identity Card/Licence No.5513 musuah ua huai apan in Mr. D.Paukhanmung (25) S/o. D. Thangbiak of Bungmual ahihdan theichian uhi.Mr. D. Paukhanmung bel Imphal a Lamphel a anu-le-pate toh om hi ua, Rickshaw hek a hi. Zan nitaklam dak 2:00 in Imphal apan Lamka hongpaitou hi a, Bungmual a inn uh tungmanlou in tuzing in Phailian Kashmir Veng a sisa a photkhiat a om hidan in apa’n gen hi. Hiai siluangte geel tuni zing dak 10:00 vel im Lamka Damdawi Inn ah Post Mortem bawl in om ua huaizoh in a sungkuante uh kiangtuak a piakkhiat in om hi.
Siluangte nungzang, tobou leh pheite jep/khetna ma ziak in dup gai a, ataksatung uh muntamtak ah soisakna ma muhtheih a aom banah a luzang/siip tuak uh keh/liam hi.Hiai tualthahna toh kisai in Kuki National Front (Samuel) pawl leh misi sungkuante tuak tuni sunnung apan in kihouna nei uhi. KNF(S) pawl in ngaihdam ngetna in misite inn ah gan khattuak agoh banuah siluang tuamna’ng in Puandum khattuak pia in Rs. 1,50,000/- tawi in lutmahle-uh misi sungkuante’n misi khat tung ah Rs.3,00,000/- tuak pedi’n phut ua, bangtanhiam akihou nung un mi khat tung ah Rs. 1,50,000/- tuak piak di’n kihoulem uhi. Tuni’n D. Paukhanmung sungkuante kiangah Rs. 1, 50,000/- pekhia ua, Mr. Mangchungnung sungkuante kiangah Rs, 1,50,000/- hongtung ding November 30, 2007 chiang a piak ding in kihoulem uhi.
Appt. Order kintak a lak ngai
Lamka Nov 28: Electoral Photo Identity Card (EPIC) ading lemlakna neihlel toh kisai a Booth Level Officer (BLO) ding a DC/CCpur Mr. Sumant Singh, IAS apaisa September 7, 2007 a Order a suahte lak a tamtak in tunitan in Appointment order lanailou uhi.Hiai toh kisai in ZEO/CCpur nuai Teacher sem BLO dia seh a om tunitan a appointment order lanailoute’n akintheilam a lading in ZEO/CCpur in theisak a alaloute khaloh hentaang sak hiding uhi.
PDS Anntang hongtung
Lamka Nov 28: CCpur District Quota PDS Anntang zan nitak lam in Truck 6 Lamka a FCS Godown puaktun in om hi.Hiai anntangte bel November Quota hi a Henglep leh Komkeirap ading ahi.District sung a mautaam ziak a nek-le-taak taksapna lianpi omziak in pawl tuamtuam in District Quota kimtak a ngah theihnading in panla in tangkoupih sek mahle uh Phaijang helpawl khenkhat in quota apan in 20% cut thouthou uh hidan in muanhuaitak apan in thutut kingah hi.
Cabinet Secretary in Manipur phading
Lamka Nov 28: Manipur State sung a Phualpi solkal huhna tungtawn a kibawl thil tuamtuamte ahiding bangtak a bawl hina hiam chih enkhe ding in Government of India a Cabinet Secretary makaih in High Level Team in tukal sung in Manipur hongpha ding uhi. Hiai Teamte Rural Development Department in ana makaih ding ua, CCpur District leng hongpha in scheme tuamtuam sephsuah ahihdan etkhiatna hongnei ding uhi.
Bike in phukha in liam
Lamka Nov 28: Mrs. Niangzahoih (30) W/o. Mangzachin of Elim Veng, New Lamka tuni zing dak 8:00 vel in New Bazar ah Bike in phukha in akhuklak aliam banah a Ha nasa in Lamka Damdawi Inn ah etkol in omlel hi.
Jiri ah pawl nih in office picketting pan
IMPHAL NOV 28: Imphal East district sunga tuam om Jiribam Sub-division, Revenue district dinmun a dopsangna dia phutna a, Jiribam District Demand Committee in hun sawttak apat helna tuamtuam aneih nungun, tuni’n leng demand khauhsem a pai sawmna in, Jiribam mun a govt. office tuamtuam Additional Deputy Commissioner tel in, demand committee in picketting bawl in, chahbi kalh uh chihthu kiza hi. Hiai picketting ah Water supply leh health toh kisaite bel huap sak hilou dan in leng thutut kingah hi.
Thudang khat ah, Jiribam Higher Secondary Students Union in, hun sawttak apat a school a heutu kisam hukdimna dia govt. a ngetna abawl uh limsak ahihlouh ziakin, tuni'n Jiri Hr. Sec. School apat ADC office tan student 200 vel dingte’n protest rally nei ua, ADC office kalh in, suang in leng deng uhi. Hiai hun ah, students te hawlzakna dingin, Police ten blank fire bangzah hiam kapkhia ua, huainung in student 17 vel leng man uh hidan in thutut kingah hi.Students Union thusuak dan in, a demand uh December 2, 2007 tan a pichin ahihkeileh, Dec 3, 2007 apat hunchiam omlou a NH 53 Imphal-Jiribam lampi a Economic Blockade nei ding uhi.
Governor in B.T. Fly Over hong ding
IMPHAL NOV 28: Govt. of Manipur nuai a, Municipal Administration Housing and Urban Development (MAHUD) etkawlna nuai a, National Building Construction Company (NBCC) Limited in abawl, Imphal a Bir Tikendrajit flyover (B.T.Flyover) lei honkhiakna, Nov 30, 2007 zinglam dak 9.30 in Manipur Governor Dr. SS. Sidhu in nei dinga, President in Chief Minister O. Ibobi Singh pang ding hi. Hiai hun ah, 1st M.R.Band ten National Anthem bawl ding ua, Welcome address gen ding a, PDA Chairman leh MLA Dr. Kh. Loken in nei ding a, Flyover toh kisai hilhchetna NBCC limited ten nei ding uhi. Hiai Flyover honkhiakna ding toh kisai in akim leh kiang cheimawina nasep naktak in neih hilel a, zan a CM thupiak dungzui in tuni’n leng Nipa Keithel, Nambul luipang a dawr buk bangzah hiam phelkhiak in om hi. Himahleh, hiai mun a dawr buk thum bel phelkhiak louh in tuni nitaklam dak 4 tan in leng omlai chih ahi. Hiai dawr buk thum phelkhiak louh neitute Minister leh MLA khenkhat hiding un leng kigen hi.
National Weightlifting hun khakna om ding
IMPHAL NOV 28: Manipur Weightlifting Association saina nuai a, 44th Men leh 20th Women National Junior Weightlifting Championship, Khuman Lampak Sports Complex, SAG hall a Nov 22, 2007 a Chief Minister O. Ibobi Singh in ahonkhiak, hun khakna Nov 29, 2007 sunnung dak 3.50 omta ding hi. Hiai hunkhakna ah, khuallian in Works Minister K. Ranjit leh President in Th.Lokeshwor Singh MLA te pang ding uhi. Hichibang National Weightlifting Championship ah India a state tuamtuam 23 apat kimawlmi leh official 200 val paikhom uhi.
Lam tuamtuam lahna om
IMPHAL NOV 28: Department of Art and Culture, Govt. of Manipur, Eastern Cultural Centre, Kolkata leh NE Zone cultural centre, Dimapur saina nuai a, VIII Bhagyachandra National Festival of Classical Dance, Shri Shri Govindaji Temple, Kangla, Imphal a om ah, tuni nitaklam dak 4.30 in lam tuamtuam, Manipuri Classical Solo N. Meenakumari Devi leh O. Jelen Singh ten minute 30 tuak lahna nei ua, tuazoh in, Aruna Mohanty in Odissi recital Dakkal 1 leh Jayant Kastuar in leng Kathak recital dakkal 1 lahna nei hi.
Hiai hun khuallian hihna toh, Eastern Zonal Culltural Centre, Kolkata a Director Anuradha Mukherjee in uap ding hi.
Dakkal 24 sung bandh ding
IMPHAL NOV 28: All Manipur Hill Districts Contract Basis Teacher's Association in, govt. a demand abawlte uh limsak louh ziaka, lungkim louh latsakna dia general strike neih dia thupuan a bawlsa bang un, tuni’n bandh hun ding puankhia uhi.
Association thusuak dan in, Nov 29, 2007 nitak dak 6.30 apat Nov 30, nitak dak 6.30 tan dakkal 24 sung, General strike om ding hidan in taklang a, a kisaipihte leh students organisation tuamtuamte bandh lohchinna dia kigingkhawl dingin theisak a, tuaban ah, transports associations/shops/govt. offices leh business activities te hiai ni a neih hilou dingin taklang a, nasemlou dingin leng theisak hi. Hiai general strike in, education toh kisai, schools, sahkhua leh water supply, medical leh electricity tebel huapkha lou ding hi. Hiai contract basis teachers te helna neih ding All Tribal Students Union Manipur in leng gum ding ahihdan uh thusuah bawlta uhi.
Debendra in Santosh kimuhpih
IMPHAL NOV 28: O. Ibobi Singh khenkhiak sawm a Delhi a panla pawl, Dissident te lak vatung Manipur a Law /Revenue/Forest Cabinet minister Th. Debendra Singh in tuni sunnung dak 1 vel in Union Heavy Fuel Minister Santosh Mohon Dev kimuhpih hi. Dissident ten amau pawl makaih dia heutu dia agen uh, Th. Debendra Singh in, AICC President Sonia Gandhi kimuhpih sawm in appointment leng lakhinta hi’n leng thutut kingah hi. Thudang khat ah, AICC high command in Debendra makai dia chinzou asak kei leleng amau lak a ahithei ding kitelkhiak tanpha Dissident ten lemsa uhi. Tulel a Delhi a omte lak ah, Th. Debendra Singh chihlouh, MPCC President Gaikhangam, FCS minister Y. Erabot, TD Minister DD. Thaisii tel uhi.
Sualluih naupang in hangsanman award ngah ding
Aizawl, Nov 28(NNN): Kumching lou naupang Lalrempuii in kumnawn Republic Day chiang in hangsanman award New Delhi ah sang ding chih thusuak om hi. Thusuak in ataklatna ah, September 14 2006 kum in Lalrempuii D/o Robuanga of Kawrtethawveng pasal khat in sual a, amah leng a kipeek khiaksawm na lam ah sihloh a, hiai toh kisai in ngetna om dungzui in Geeta Chopra Award 2007 (naupang kum 6-18 mihangsante) sangding hi’n kigen hi. Amah ahihleh, September 14, 2006 nitak dak 8 in naktak in sual in om a, a kitutkhiak sawmna lam ah sihloh hi. Amah pen sikhin ahihtak ziak in, asungkuante’n kumnawn New Delhi a Republic Day zatna hun ah hiai award a tanu uh sik le tang in va sang ding uhi.
MIGAHTA te’n Govt vau
Aizawl, Nov 28(NNN): Mizoram Government Aided High School Teachers Association (MIGAHTA) te’n zan November 27 in Cooperative Hall ah meeting poimohtak nei uh a, huai ah Promotion Examination 2007 Result suahkhiak louh ding in thupukna nei uhi. MIGAHTA te nuai ah Class A apan Class-VIII tan om hi a, amaute’n State Government kiang ah 1997 kum apan Grant-in-Aid High School tengteng Adhoc Aided Status ding in ana phuta ua, tuni tan in lohsam der lai uhi. MIGAHTA thusuak in ataklatna ah, 0Chief Minister Zoramthanga kiang ah ngetna tamveitak a piak nung in CM in Grant-in-Aid High Schools te Adhoc Aided Status 1997 dungzui a dopsang hiding in thuchiam nei mah leh tuni tan pha bangmah sepsuah nei lou uh hi’n gen uhi.
Godrej Company in Jatropha leipanta
Aizawl, Nov 28(NNN): Godrej Agrovet Company leh Mizoram Government in kilemna Memorandum of Understanding suai a kaih uh sep pichingna ding in lou nasemte apan tuni in Gldrej Company in Jatropha tamtak leikhia uhi. Thusuak in ataklatna ah, Godrej Company in Jatropha 371 kilo lounasemte apan tuni in leikhia ua, New Vervek mun ah Kg 1 ah Rs. 5 in lei ziahziah uh hi’n kigen hi. Mizoram leh Godrej in kilemna bawl mah le uh aman ding bikhiah gina khalou uh a, hun nawn chiang in a man ding bikhiahna nei uhi. Mizoram ah 2005 kum in mi tamtak in Jatropha sing tuh sauhsauh ua, tukum in tamtak laak theih hi ta a, kum nawn chiang in Mizoram state sung chauh ah Kg Lakh tamtak piang ding a tuat in om hi. New Vervek village ah Innkuan tamtak in Jethropa ana chiin khak ziak un, Mautaam ah buaikha ban lawlou ding ua ngaihtuah in om a, Innkuan khat in kung 46,000 hial neibang leng om hi’n kigen hij. Godrej Company in ahihleh, Jatropha thaute gari thautui ding in zang uh a, PHE Department in leng Jethropa thautui zatsawm in naktak in kisalel uhi.
3rd College Principals' Conference kipan
Aizawl, Nov 28(NNN): Mizoram College Principals' Conference thumveina tuni in pat in om a, Mizoram University Conference Hall, Tanhril ah Governor Lt Gen (Rtd) M M Lakhera, PVSM, AVSM, VSM in khuallian hihna toh honkhiakna nei in, Rs. 65 lakh bei a kibawlthak University Computer Center honkhiakna nei hi. Governor in agenna ah, MU nasepkhiak te thupi mahmah a, MU tungtawn in State leh Central Solkar ah mi tamtak in sepna ngahta uh ahihdan gen kawm in, Vice Chancellor tel a, teaching leh non staff te kipiakzoh dan thupi salua ahihdan gen hi. Mizoram University Vice-Chancellor Prof AN Rai in agenna ah, MU in haksatna thupitak tak tuak lel a, Government ah zaksak a om pahpah ahihdan gen a, tulel in Staff lam ah taksapna liantak om ahi chi hi. Mizoram University nuai ah tulel in affiliate College 36 om lel hi.
BOARD OF SECONDARY EDUCATION MANIPUR
HIGH SCHOOL LEAVING CERTIFICATE EXAMINATION, 2008
PROGRAMME
Time : 3 hours for 100 marks (subjects with *) 2 hours for 45/50 marks (remaining subjects)
Date/Day Morning Evening
From 9 a.m. From 1 p.m.
3/3/2008 English * X
4/3/2008 FIRST LANGUAGE
Elementary Manipuri
(Manipuri/Bengali/Mizo/Paite/
Hmar/Tangkhul/Nepali/ThadouKuki/
Zou/Vaiphei/Kom/Mao)
Subjects in lieu of First language
Additional English
5/3/2008 X Social Sciences I (History)
6/3/2008 X Allternative English
7/3/2008 X Social Sciences - II(Geography)
8/3/2008 X Elementary Hindi
10/3/2008 Mathematics* X
11/3/2008 X Social Sciences - III (Civics &Economics)
12/3/2008 X Sciences - I(Physics)
13/3/2008 X Sciences - II(Chemistry)
14/3/2008 X Sciences - III (Biology)
15/3/2008 Hindi (MIL)*/Additional Hindi* X
18/3/2008 Additional Subjects* X
(Home Science/Higher Mathematics/
Commerce/Computer Science)
www.zogam.com
No comments:
Post a Comment